Esta 3
3
Amanate Yu luma dapola gima bata gi miyana gi
1Tepa lewasege a pa:weleyala kanaba dalagite Amedatape mata Aman A:iga:gape wapiki palanapa dalagi sidinapa oko sabama galamiyana. #3:1 A:iga:g Amalekanapa kanaba dalagi obape luma mata enobai Islaelana lumumunu amatana giwa:lana edeliyana. 2Kanaba dalagite obape okona waelabega gobala Aman sidinapa saba atayana. Amale kanabate gi miyana obape kabigida:na gabamani dala waelabegaite asimisile Amanadima baodelamada:le. A:pite waelabega okonate a:ma gi a:na:miniyana ameta Modekai menagite a:ma gi a:na:mina gima ilapala eyana.
3Amale eta:mi okona dalate pa:da:te obate powa gile kanabate layana gilalama pa:pa gima kamiyana gima oba anate tiliyana. 4Kadepa waelabegala obaite Modekai anate anate edeliyana obate Amanadima baotolamalale, ameta oba obaimunu gilalalama pa:pa gima kamitoloyana. Oba a:negelayana, na: Yu lumagi, enobala pa: awapa na: Amanadima baotolamalale. Obai amale a:ma gilala enamada:te na:da:te Aman itumiyana.
5Amanate Modekaipe a:na:mina gi tilite kabigibegale ga:oyana. Gwama Modekaite Yu lumagi eloyana gi Amanate enamayana tepala obate gi sa:lemiyana Modekai lapola gima. 6Ameta oba pa: Modekai menagi lapola gima sa:leyana, oba ameta Pesiya wa kabigibega gobala edeliyana Yu luma dapola gima bata gi sa:lemiyana.
7A:pite kanaba Sekeses obate naba 12 gogo kanaba eloyana tepala, enoba Nisan lopanapa samosola Amanate Yu luma dapola gima bata gi sa:leda:munoyana, obaite ba:kele saki#3:7 Pul gititiwa gi a:na:miyana. ba:ba:minadele gititiwa gi a:na:miyana. Amale obaite a:yatanapa samoso enoba Adape naba 13 napa kadepa tilite awapage laiyana.
8Aman amale kanaba dalagidima wete oba anayana, ma:ma Pesiya wa kabigibega gobala eta:mi luma gagasila a:meta edeli, obaite ma:ma wape babalama pa:pa baodili. Obaimunu babala opa:yasege enobala a: obaida gi pa:pa menagi elamalelo, a:pite a: ege obai a: na:sa:da:minamalelo. 9Kanaba, a:dila ma:ma gi awapa elamalona a: lumadima kamalinapa gilala milamalelo a:pite lumate ya:mai luma waelabega dapolamadili. A: ya:ma gi a:na:miwila na: a:dowali oko amowa gima a:dowali kipale gosa alidi gobama 10,000 siliba talen milamalowa. Na: gibalama gi a: ananowa.
10Kanaba dalagi amale didiya dapoladele gi kakaleda:munotoloyana obape mai inikikinapa lini saowamite Yu lumadima giwa:lanapa dalagi Amanadima atayana, ma:ma Aman enoba Amedatape mata, A:iga:gape wapiki palanapa lumagi. 11Kanaba amale a:negelayana, a: kipale gosa a:ya a: dima gwalite ameta e iwiminanona gi a: obai dima a:na:minamalelo.
12Amale obaite lopanapa samosope naba 13 napa kadepala kanaba dalagipe gilala aliletediliyana dala awada:mite obai daniyana obaite Yu luma dapola leta gilala a:na:da:minamada:le. Amale obaite a:mai leta gilala opa:pa:yale a:na:da:minete a:mai gilalape dowatiliyana nabidile a:mai leta gilala aliliyana. Obaite a:mai leta kanaba dalagipe gagile a:na:da:minete obape mai linile didiya dapoliyana. 13Gisaolana lumate a:mai leta alete Pesiya wa kabigibegata: gwama eta:mi wata:ma alete na:diyana. A:mai leta gobala enoba lopanapa samoso naba 13 napa kadepa menagila waelabega Yu lumate awe nagala binile kaokolamadilina gilalate dololoyana. Apeda: kanika:da:na lumata:, kakabeyana lumata: atota: segeta: waelabegate binida:madili, amale obaimunu lopala aledamenamadili. 14A:pite opa:pa:yana wa papala waelabegala edeliyana sidina gabamani dalate a:mai leta gilala lumadima kekeda:miniyana obaite sa:leda:te edilila a:ma kadepa saolamalale.
15Obai ya:ma leta gilala iya:ta: Susa kabiginapa baigama kekemiyana. A:ma tepala Susa kabiginapa baigala edeliyana lumate a:ma gi itawa eda:te daledalesege edeliyana. Ameta kanaba dalagita: Amanata: a:ma tepala menagimite mitite sika nidiliyana.
Atualmente Selecionado:
Esta 3: GBOTP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Gogodala Bible Translation Project © Bible Society of Papua New Guinea, 2016.