Osey 7
7
1Ne Islael amowamalowamena,
Ipala:imipe sosawe gite kekema saoda:madili,
a:pite Samaliyape sosawe a:na:da:mina gi kekeda:madili.
Obai sewata gi gobala edeli,
ilinate gegenama gogobama ilile sa:eda:tedili,
ilina gagasida:te nabidi tetepala luma ilida:minini,
2ameta obai a:ma gi pa:pa itawa edili,
a:na:pi na: obaimunu sosawe a:na:da:mina gi waelabeyagai iwaleda:lowa.
Obaimunu sosawe gite obai a kawapida:yana,
waelabega tepala obaimunu sosawe a:na:da:mina gi na: tida:lowa.
3Obaite a:na:da:mininina sosawena gile obaimunu kanaba dalagi sa:kelaminili.
A:pite kanaba dalagipe pulagi iya:ta: sa:kelaminili obaimunu sewata gile.
4Obai waelabeyagai enobai dala bilibilina edeli,
ba:kele seyata ilate ololapela elelo,
ase ilate tepa waelabegale babalelalo, palawa gwalilanapate ila pa:pa gwama tuminamalelo,
palawa gwalila tepala asemite palawate potamalelona tepama saolamalelo.
5Sa:dowali kanaba dalagipe poko kadepala,
kanaba dalagipe pulagite waen sikale sosawe bapi eyana,
a:pite obate luma ilapala da:mida:na lumada mai atimada:yana.
6Obaimunu alipo ba:kele seyata a:na:pi,
obaite oba dima ilada saodiyana.
Obaimunu ga:o gite isa lewabegale dololo,
a:pite kadepa puwela ila babalela a:na:pi etelelo.
7Seyata ilanapa a:na:pi obai waelabega a a:na:pi ediyana,
Obaite obaimunu gaganabina munitidili.
Obaimunu kakanaba waelabeyagai nisisilili,
a:pite etate na: pa:pa awana:miyana.
8Ipala:imite eta:mi a:ibaigada menagi elelo.
Ipala:im enoba sedeseda: eyana baya a:na:pi elelo, ya:de pa: esa:minananapa.
9Atakabinate obape kamali a binimiyana,
ameta oba a:ma gi pa:pa itawa eyana.
Obape tita a kalate kawapiyana,
ameta oba a:ma gi pa:pa tilelo.
10Islaelpe na: awagana: gite lalelo Islael sosawenapa,
ameta oba LOD Gododima pa:pa gwama isola:yana
gwama oba pa:pa uwaloloyana.
11Ipala:im enoba keleba puwida: a:na:pi,
oba gasumina gima gi pa: kalekalebega gwama oba iwalela pa: kalekale,
obate eta tepala Isipt wadima mamamida:lo
eta tepala obate Asiliyadima esa:lo.
12Obai na:diwila na: na:dowali tiya obai sidima miditilamalowa.
Na: obai sidina puwida: a:na:pi a:ima silida:minamalowa.
Obai menagimite edelamadilina gilala enamamalowamena tepala,
na: obai alolamalowa.
13Obai kakabeya,
gi ase obai na:le a wama na:diyana,
Obai sosawe eda:madili,
gi ase obai na: asakana:miniyana,
Na: obai wisale alolamalale iwiminanowa
ameta obai na: gima sewatana gilala ladili.
14Obai pa:pa obaimunu alipolena: dima adimadili
ameta obai obaimunu tene sabala adimadili.
Obaite kona taota: adami wi kanika:ta:ma menagimite gaogoda:minadele
ameta na:le wama esa:dili.
15Ne obai gi ituda:mite a:pite kamalida:miyamana,
ameta obaina: dima sosawe a:na:mina gi sa:leminini.
16Obai Kamalinapa Sidinapadima pa:pa esa:dili,
obai enoba saitasaitanapa gagi a:na:pi.
Obaimunu gaganabinate gili wasole nisisilamadili
obaimunu pa: sogoda:na asakada:mina gilala gile.
A:ma gima lumate obai iyada:minamadili
Isipt wa gobala.
Atualmente Selecionado:
Osey 7: GBOTP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Gogodala Bible Translation Project © Bible Society of Papua New Guinea, 2016.