GÉNESIS 2
2
1Ajinata janaj pachata, kay pachatapis, chaypi kajkunatawan Dios ruwayta tukorqa. 2Qanchis kaj diapi, Diospa tukuy ima ruwanasnin tukusqaña kajtin, samarikorqa. 3Chaymanta qanchis kaj diata Dios bendicerqa, churanoqarqataj samarikuna diata, imaraykuchus Pay chay p'unchaypi samarikorqa tukuy imata ruwasqanmanta.
Runa qhallallaj Edén huertapi
4-5Chaymin janaj pachaj qallarikuynin, kay pachaj qallarikuynintaj. Maypachachus Dios ruwarqa janaj pachata kay pachatawan chaypacha, manaraj ni ima sach'apis karqachu, nitaj ima q'omer qhorapis jallp'api wiñarqarajchu, imaraykuchus Señor Dios manaraj parachimorqarajchu jallp'a pataman, nitaj pipis karqarajchu jallp'ata llank'anampaj. 6Chaywampis Diosqa wausita chhullata jina pampamanta llojsichimorqa, chaywantaj jallp'ata joq'ocharqa. 7Chaymanta Señor Dios runata ruwarqa ñut'u jallp'amanta, senqanmantaj kausay samayta samaykorqa. Ajinamanta runaqa kausayta qallarerqa.
8Señor Dios uj qhallallaj huertata Edempi ruwarqa inti llojsimuynejpi; chaymantaj churarqa chay runa ruwasqanta. 9Chay huertapi Señor Dios wiñacherqa tukuy laya sumaj poqoj sach'asta mikhunapaj. Huerta chaupitaj karqa kausay sach'a, wiñachillarqataj allin kajta mana allin kajta rejsina sach'atapis.
10Huertata qarpanampaj kikin Edenmanta uj mayu llojserqa, chaymantataj tawa mayusman t'aqakorqa. 11Ñaupaj kaj mayoj sutin karqa Pisón. Chayqa muyuykushan Havila jallp'aj muyuyninta, chaypitaj qori tiyan. 12Chay jallp'api kaj qoreqa sumaj karqa. Chaypi kallarqataj sumajta q'apashaj mach'a sach'a waqaywan, ónice rumiwan. 13Iskay kaj mayoj sutenqa Gihón; chaytaj muyuykushan tukuy Cus jallp'ata. 14Kinsa kaj mayoj sutenqa Tigris; chaytaj muyuykushan Asiriaj inti llojsimuyninnejta. Tawa kaj mayoj sutintaj Eufrates.
15Señor Diostaj runa ruwasqanta Edén huertaman churarqa llank'anampaj, qhawanampajtaj. 16Chaymanta Señor Diosqa kamacherqa runata: Huertapi tukuynin kaj sach'asmanta mikhullanki; 17Allin kajta mana allin kajta rejsina yachay sach'aj poqoynillanta amapuni mikhunkichu; chay sach'aj poqoynintachus mikhunki chayqa, wañunki. 18Señor Diosqa nerqa: Mana allinchu runaqa sapallan kanan. Paywan kanampaj, uj yanapajta ruwapusaj. 19Señor Dios ruwarqa jallp'amanta tukuy laya monte animalesta, tukuy laya p'isqostawan. Jinaspataj runaman qhaterqa, sapa ujta sutichanampaj. Chay runaj sutichasqasninwantaj sapa uj kashanku. 20Runataj sapa uj animalesta sutichararqa: Monte animalesta, p'isqosta, uywasta ima. Manataj tarikorqachu payta yanapajqa. 21Señor Diostaj runata misk'ejta puñurpayacherqa, chaykamataj ujnin wajtanninta orqhorqa, jinaspataj aychallanwantaj k'askaykuchiporqa. 22Señor Dios runaj wajtanninta orqhosqanmanta uj warmita ruwarqa, jinaspataj runaman pusamorqa. 23Runataj payta qhawarispa nerqa: Kayqa kikin tulluymanta, kikin aychaymanta; kaypa sutintaj kanqa warmi, imaraykuchus Diosqa payta qharimanta ruwasqa. 24Chayrayku qhareqa tatanta mamantawan saqenqa, warminwantaj ujchakonqa, iskayninkutaj uj runa jinalla kanqanku. 25Iskayninkutaj qhari warmi q'alaslla kasharqanku, manataj p'enqakorqankuchu ajina kasqankumanta.
Atualmente Selecionado:
GÉNESIS 2: QCHSB
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Qheshwa Biblia DC © Sociedades Bíblicas Unidas, 1986.