Madius 2
2
1Eris apos Iesu Bedleem an pece Jutaia an naopan iyehki is atimarid a Herot, eris ahes an ridjai o un a ilpu atimi arapakau, um apan Jerusalem, 2um ika, Eris apos natimarid u nupu Jutaia eda? ecris ecetai inmoijeuv o un aijama an ridjai o un, ecra mun ham aijama mika ecri atpuse an nuhup o un. 3Is wat atahaijeg a Herot natimarid, is ehioehio inliinmopon aien, im lep nupu Jerusalem asega. 4Is asjapicnaig ilpu atimi ahlap esjilid asega aien im ilpu atimi esege an pece, um ahodai ra, um ika, Eri apos Kristo eda? 5Eris um ika ehelen ara, Bedleem an pece Jutaia: is um ucce intas ineig is upyi aged a naprofeta, um ika, 6“Ak Bedleem, an pece Jutaia, na eti upoupo aiek irai ilpu atimarid Jutaia; etpu aridjai iram a natimarid inyi ethi, etpu atimarid u nupu Isreel unyak aien.” 7Is asjapicnaig ilpu atimi arapakau a Herot, jam eti asaig, um ahodaig upene ra, um ika, Is ehcohos inmoijeuv an nahopan? 8Is abrai ra aien mika eri apan Bedleem ara, um ika, Apan aijaua, um ahilek emda inhalav; aku wit ecet yin aijaua, um lep adumoij pam, um asuptecnaig ehelek; ki apan ainyak um atpuse an nuhup o un. 9Eris wat atahaijeg intas o natimarid ara, eris atga ura ara; is atga um uhup ira ra inmoijeuv ineig eris ecetai ara an ridjai o un, is wat uhum pan inuarin ineig is amen iran inhalav, um anaiji ijinies. 10Eris wat ecetai inmoijeuv ara, is esjilid acen nimyiacitak ura.
11Eris apan ara anliin neom, um ecet inhalav ehele Mere risin, um atpuse an nuhup o un, um alaigaheni vai yin: eris ahiacse padiaig ura ara, um alupai yin niji itai tup ahtai; colt, im nidi libano, im nidi mura. 12Is acaiji ra a Atua an numjeg ahnag ura, mika eri jim adumoij pan ehele Herot ara, eris atga an nefalaig is eche ara, um apan an pece ura. 13Eris wat atga ura ara, is ehcohos pan ehele Josef a nagelo o Ihova, an numjeg ahnag o un, um ika, Atidai aiek, um leh inhalav im risin, um aha pan Ijipt, um amen eahki wat uhum pan naopan iyehki ekpu asuptecnaig ehelum ainyak: etpu ahilek inhalav a Herot mika yi atgei yin. 14Is um atidai aien, um leh inhalav im risin an nepeig, um aha pan Ijipt: 15is amen aien eahki um uhum pan naopan iyehki is mas a Herot: mika eri ehneijid intas ineigki o Ihova is upyi asaig a naprofeta um ika, “Kis ahlaig vai inhal unyak ainyak mika yi ude Ijipt aien.”
16Is wat ato a Herot, nikavaig, eris imyipalea yin a ilpu atimi arapakau, is atavaitap alupas aien, um abrai atimi mika eri atgei ilpu halav asega ara Bedleem, im lep irai uari pece asega ubutpotet, ahes ira ra is ero inmesese ira ra, um yetpan irai ilpu halav pam apos, is idivaig is ahodaig upene ilpu atimi arapakau aien. 17An naopan iyehki is ehneijid intas ineig is upyi asaig a Jeremaia naprofeta, um ika, 18“Eris atahaijeg nohran tah Rema, intaigvaig, im taig afakatotau, um ehteigtaig alupas, is imyitaig ilpu hal o un a Rejel, is ika aien inyi ti eropse inliinmopon, eris mun atih ara.”
19Is wat mas a Herot, is ehcohos pan ehele Josef a nagelo o Ihova an numjeg ahnag o un an pece Ijipt, 20um ika, Atidai aiek, um leh inhalav im risin, um apan an pece Isreel: era mun emesmas ara eris ahilek inhalav ara mika eri atgei yin. 21Is atidai aien, um leh inhalav im risin, um apan an pece Isreel. 22Ja is wat ato aien, nikavaig, is atimarid an pece Jutaia a Arkileus par isjipigmoig Herot etman, is imtitaig aien napanvaig eahki: ja, is wat acaiji yin a Atua an numjeg ahnag o un, is apan aien an pece Calili: 23is apan aien an nuarin-pece is ethi nidan Nasared, um amen; is idivaig intas ineig eris upyi asaig a ilpu profeta, um ika, Uhpu anvi nidan par ika nup an Nasared.
Atualmente Selecionado:
Madius 2: ATY1863
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
historic text maintained by the British and Foreign Bible Society