Ts'etta 4
4
Gaabiliy Haabil
1Aadam xhunaşşe Həvayka g'alirxhu, mana vuxhne ayxu Gaabil (alyaart'una) uxu. Həvee eyhen: «Rəbbike zı insan pay xhinne alyart'u». 2Qiyğa məng'ee Gaabilna çoc Haabil uxooxa. Haabil vəq'əbı uxhiyxhanna eyxhe, Gaabilir ç'iye ezana.
3Sabara vaxt ılğevç'uyle qiyğa, Gaabilee Rəbbis ç'iyeyl alyadıynçike pay abayle. 4Haabileyid ts'etta syurunee ıxhayne nekke yugne vəq'əbışike adayle. Rəbbee Haabilir, Haabile adıynbıd alyaat'anbı. 5Gaabilir, Gaabilee adıynbıd Rəbbee alyaat'a deş. Mançil-alla Gaabilis it'umba qəl vuxha, aq'va gyavaxana'a.
6Rəbbee Gaabilik'le uvhuyn:
– Nya'a qəl haa'a? Nya'a aq'va gyavaxanı'ı? 7Nya'a, yugna iş haa'axhee, Zı ilydyabat'aye? Yugna iş hidyaa'axhee, bınahın akkayne ögee gugu hav'u, ğu gozet ha'a. Mançin xuruş valqa vod, ğu mançis xəbvalla haa'as vukkan.
8Qiyğa Gaabilee Haabilik'le eyhen:
– Qora çoleeqa vüqqəs.
Maa'ad Gaabilee çoculqa xıl g'ot'ul, mana gek'ana.
9Qiyğa Rəbbee Gaabilike qidghın hı'iyn:
– Çoc Haabil nyaane?
Mang'vee eyhen:
– Ats'a deş. Nya'a, zı çocuna g'aravulyne vor?
10Rəbbee eyhen:
– Ğu hı'iyn hucoon?! Çocune eban ç'iyeençe Zalqa ona'a. 11Mane nyuq'vnen yiğne xıleke k'yapk'ınna çocuna eb hööğəs ghal aaqı. Mançil-allab ğu ine nyuq'vnel bed-düə alyabat'a. 12G'iyniyke şaqa ğu nimee yugda ç'iye ezveeyid, mançin vas ıkkanəxüdın kar heles deş. Ğu ciga deşda g'e'eşşuna xhinne ixhes.
13Gaabilee Rəbbik'le eyhen:
– Yizda cazaa ts'ıts'aa'asınçileb hexxaba vob. 14Haane, Ğu zı g'iyna ç'iyeyne aq'valer g'e'eşşena. Valer dyugulyxha, zı ciga deşda ixhes. Şavneyiy ögiylqa qığeç'u, mang'veeyir zı gik'asda.
15Rəbbee mang'uk'le eyhen:
– De'eş, şavaayiy Gaabil gik'u, mang'uke yighne yəqqees qəl qığaahas.
Rəbbee Gaabililqa işaara giyxhe, mana qızaxxıng'vee gimek'acenva. 16Gaabil Rəbbike ark'ın Eden bağne şargıl – Nod#4:16 Nod: cühüt'yaaşine mizel «ciga deşda» eyhen vodun. eyhene cigee axva.
Gaabilyna nasıl
17Gaabil xhunaşşeyka g'alirxhu. Mana vuxhne ayxu, Xanok uxu. Mane gahıl mang'vee şaharniy alyaa'a. Şaharılqa, Xanokun, dixen do giyxhe. 18Xanokike İrad g'arayle. İradıker Mehuyael g'arayle. Mehuyaeliker Metuşael g'arayle. Metuşaeliker Lemek g'arayle.
19Lemekee q'öyre xhunaşşe hee'e. Sang'ı'n do Ada, mansəng'ı'nıd Tsillaniy vod. 20Adee Yaval uxu. Yaval çadıree aaxvanbışda, syuru havacenbışda ts'erriyna insan ıxha. 21Mang'une çocun do Yuvalniy. Mana lirayiy dyuttyak' əlivxüna ts'erriyna insan ıxha. 22Tsillee Tuval-Gaabil uxu. Tuval-Gaabilee tuncıkeyiy yivayke curayn-curayn əhtacbıniy ha'a. Mang'uqa Naama eyhena yuçuniy vor. 23Lemekee xhunaşşeeşik'le in uvhu:
«Adayiy Tsilla, zı eyhen g'ayxhe!
Lemekın xhunaşşer, yizde cuvabıl k'ırı alixhxhe:
Zak ciga hı'iynçil-alla zı sa adamiy gik'u,
zas ı'xiynçil-alla zı gade gik'u.
24Gaabilil-alla yighne yəqqees qəl qığaahasxhee,
Lemekıl-allab yights'ale yighne (77) yəqqees qəl qığaahas».
Şetiy Enoş
25Aadam meer xhunaşşe Həvayka g'alirxhu. Mana vuxhne ayxu, sa dix uxu. Mang'us Şet doyud gixhxhı, eyhen: «Gaabilee gik'uyne Haabilyne cigeeqana Allahee zas meerna dix huvu». 26Şetiqar sa dix eyxhe, doyud Enoş giyxhe.
Mane gahıl insanaaşe Rəbbis ı'bəədat ha'a giviyğal.
Atualmente Selecionado:
Ts'etta 4: YIQSUM
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login