KORINTUS 1 7
7
Soaḷ pototonibuḷoi
1Tanaa in insilangankudon kon i monimu onu inta pinais monimu kon surat inta kinirim monimu kon inakó. Aka tobatú ḷoḷaki bo diá nobuḷoi, sabanarnea mopia intua.#7:1: Aka tobatú ḷoḷaki bo diá nobuḷoi, sabanarnea mopia intua: ande Moiko in moguman kon aka tobatú ḷoḷaki diá mobuḷoi, mopia intua. 2Táe bá diá moigonú in oaid inta diá patus aidan, dá maníka mobuḷoi andeka mokipobuḷoi. 3Buḷoi ḷoḷaki in mustibí mogaid kon onu inta ain sinantú aidannea. Natua doman in buḷoi bobay; tumpaḷabí mogaid kon onu inta ain sinantú aidannea. 4Buḷoi bobay in diábí motaau in mongawasa kon awaknea tontaní; sin awaknea tatua in kon bonubí in kawasa i buḷoinea ḷoḷaki. Natua doman in ki buḷoinea ḷoḷaki in diábí doman motaau mongawasa kon awaknea tontaní; sin ki buḷoineabí in mongawasa kon awaknea tatua. 5Doyowa motonibuḷoi in diábí motaau in mosiyayúan. Motaaubí asaḷbo muna moyosingog bo diá motaau moonggot. Aka natua yo doyowa motonibuḷoi in tumpaḷa motaau mosisambayangan. Tongá naonda intua moiko in mustibí bui motobatú saḷaku doyowa motonibuḷoi. Sin aka diá natua yo koonggotannea kogonúanbí in roho inta diá mopia, sin diá mokotahang kon ibog in awak.
6Onu in pinogumanku kon i monimu naa in deemanbí parenta, táe tongginabí. 7Sabanarnea in mopiabí in ginaku aka komintan intau bo mobaḻí ná akuoi. Táe komintan intau ain bidon inogoian i Allah in totabi inta noyo-noyoposimai. Tobatú nokouḻí kon totabi nanaa, tobatú doman nokouḻí kon totabi natua.
8Manangka intua nanaa in tongginaku kon intau inta diápa nobuḷoi bo kon bobay mita inta dongkadon boba-bobay: Maníka in moiko bo umurandon mobiag bata-batangan ná akuoi. 9Táe aka moiko bo diá mokotahang kon ibog mobuḷoi, yo maníka pobuḷoi. Sin maníka bo mobuḷoi dika in monahang kon ibogmu inta moiḻiu tua. 10#Mat. 5:32, 19:9; Mrk. 10:11-12; Luk. 16:18 Kon i monia inta ain nobuḷoi, naa in parentaku: (Sabanarnea in deemanbí akuoi in nobogoi in parenta tanaa, táe ki Tuhanbí.) Tobatú bobay inta ain pinobuḷoi in donaaibí monaḷámai kon i buḷoinea ḷoḷaki. 11Tongá aka sinaḷáanneadon in ki buḷoinea ḷoḷaki, dá bobay tatua in donaai bidon mokipobuḷoi bui, andeka maní bui mamangoi kon i buḷoinea. Natua doman in ḷoḷaki. Diábí doman motaau in ḷoḷaki mogaat kon i buḷoinea.
12Bo tanaa in tongginaku kon intau mita ibanea mako, naa in tongginakubí tontaní, deemanbí i Tuhan, aka intau Keresten bo kobuḷoi kon bobay inta diá mopirisaya kon i Kristus, bo ki buḷoinea bobay tatua in moibog mobiag moyotakinnea, yo diábí motaaunea gaaton in ki buḷoinea bobay tatua. 13Bo aka oyúon doman in bobay Keresten kobuḷoi kon intau inta diá mopirisaya kon i Kristus, bo ki buḷoinea ḷoḷaki tatua in moibog mobiag moyotakinnea, yo diábí motaau gaatonnea in ki buḷoinea tatua. 14Tantú ḷoḷaki tatua in motaaubí mobaḻí umat i Allah sin aindon notonibuḷoi takin intau inta ain nobaḻí umat i Allah. Natua doman in buḷoi bobay, tantú motaau bidon doman mobaḻí umat i Allah sin ain notonibuḷoi in intau inta ain nobaḻí umat i Allah. Sin aka diá natua, yo tantú ki adí mita monia in naonda bo ki adí mita in intau inta diá nonotaau kon i Allah, táe aka duduian monimu in tongginaku naa, yo ki adí mita monimu tua in mobaḻí bidon umat i Allah. 15Tongá aka intau inta diá mopirisaya kon i Yesus monaḷámaidon kon i buḷoinea bobay andeka kon i buḷoinea ḷoḷaki inta ain nopirisaya kon i Yesus, yo donaaibí mako bo dikabí ampagan sin diábí nongonu. Sin ibogon i Allah in mobiagbí motobatú in moiko komintan. 16Sin moiko utat saḷaku buḷoi bobay – inta ain nopirisaya kon i Kristus ki Tuhan naton – naondabí in kototaau monimu, kon diá mokosaḷamat#7:16: naondabí in kototaau monimu, kon diá mokosaḷamat: ande naonda in kototaau i Utat kon ki Utat in diá mokoposaḷamat. in iko kon i buḷoimu ḷoḷaki? Natua doman in iko buḷoi ḷoḷaki inta nopirisayadon kon i Yesus, naondabí in kototaau monimu kon iko in diá mokosaḷamat kon i buḷoimu bobay?
Kobiagbí podudui onu in kinoibog i Allah
17Naa in atorang inta pinobayáku kon bayongan jamaat: Pomuḷoi in intau musti mobiag tumompia podudui kon inta kinoibog i Allah, ná inta ain sinantú-Nea wakutu in nogoiní kon i monimu kon bá mopirisayadon kon i-Nia. 18Umpamanea, tobatú intau bo sinunatdon kon wakutu in inoiní i Allah, dá dikabí ramujion inggamáan in paḷot mita in sunat tatua. Natua doman, aka oyúon in diápa sinunat kon wakutu in inoiní i Allah, dá dika bidon poigumon konbá sunatonpa. 19Sin sinunat andeka diá, diábí moponting intua. Dumuduibí kon atorang mita i Allah in moponting. 20Tuamai, kobiagdon moiko ná kon dodai in inoiní i Allah. 21Aka wakutu inoiní bo moiko in nogaid saḷaku ata, yo diábí nongonu intua. Tongá aka komintanmai bo mokouḻídon kon kasampatan moiḷuatdon, yo popobaragunadon in kasampatan tatua.#7:21: Tongá aka komintanmai bo mokouḻídon kon kasampatan moiḷuatdon, yo popobaragunadon in kasampatan tatua: ande Táe umpaka iko mokouḻí kon kasampatan kon moiḷuatdon, yo mopia-piabí kon iko in mogaid kon inta totok in mopia saḷaku bobantung. 22Sin ata inta mopirisaya kon i Tuhan, nobaḻí bidon intau i Tuhan inta nobebas. Bo intau nobebas inta nopirisayadon kon i Tuhan, nobaḻí bidon mogogaid kon oaidan i Tuhan Yesus Kristus. 23Moiko ain bidon sinaḷui i Tuhan bo nodait-Nea bidon inuboḻian. Tuamai, dikabí moibog in mobaḻí ki ata in onukadon kon dunia naa. 24Táe naonda in kaadaanmu kon wakutu in inoiní i Allah, tantúbí kobiag natua takin i Allah.
Soaḷ intau inta diápa kobuḷoi bo inta dongkadon boba-bobay
25Sabanarnea akuoi in diábí notarima kon parenta i Tuhan kon soaḷ intau mita inta diápa nokipobuḷoi. Táe saḷaku intau inta mopirisaya inta ain inogoian-Nea in totabi inta motaau pirisayaanmai, dá mononggina in akuoi.
26Moindoimai kon kaadaan masai naa, yo maníka ki ine in diápa pinobuḷoi yo tantúpa natua. 27Táe aka iko bo noiḷautdon nobuḷoi, dá dikabí ramujionmu bo gaaton in ki buḷoimu tatua. Táe aka diápa in iko noiḷaut nobuḷoi dá maníka bo dikadon motayak kon buḷoi. 28Táe aka iko bo tantúbí moibog mobuḷoi, yo diábí doman nongonu. Natua doman in mongodeaga, diábí doman baradosaan aka mokipobuḷoi. Tongá intau inta nobuḷoi tua mokouma kon roriga inta ibogonku in moiyayúbí mita kon i monimu intua komintan.
29Nanaa in makusudku uḻe utat mita: Nopoḷokdon in wakutu naton. Tuamai nongkon masa in tanaa, intau inta kobuḷoi, kobiagdon naonda bo intau inta diápa kobuḷoi; 30intau inta nongombaḷ, musti in sia tumon intau inta ná diá in yagi-yaginea. Intau inta noḷunganga in gina; musti in sia tumon intau inta ná diá noḷunganga in gina. Bo intau inta ain notaḷui, musti in sia tumon intau inta diá koonu bo onu; 31bo intau inta umuran nobaḻí ki ata in onu inta kon dunia naa, yo donaaidon in sia moibog tonggataan in dunia naa. Sin dunia naa in motoyong bidon moyoyang takin kaadaannea masa in tanaa!
32Ibogonku moiko komintan moiyayúdon kon bayongan roriga. Tuamai, intau inta diá kobuḷoi in musti mokopotantú kon raiannea bo mogaid kon onu inta kinoibog i Tuhan, bo moposanang in ginanea. 33Táe intau inta kobuḷoidon, moantóbí totok in raiannea soaḷ in dunia naa, sin moibog in mosia moposanang in gina i buḷoinea; 34tuamai in diá motantú in raiannea. Bobay inta diá kobuḷoi, andeka inta mongodeagapa, moantó in raiannea kon soaḷ ki Tuhan. Sin ibogonnea in kobiagannea tua in komintandon posarakan kon i Tuhan. Táe bobay inta kobuḷoidon, umuranbí in sia morai kon soaḷ mita in dunia naa, sin moibog in sia moposanang in gina i buḷoinea.
35Naa komintan in pinaisku sin kopiaanbí monimu tontaní, deemanbí molarang kon bayongan ibog monimu. Táe ibogonku in bá umuran mogaid kon inta mopia bo inta mokosanang kon bayongan in intau bo umuran motantú in raian kon i Tuhan.
36Tongá aka tobatú intau bo nogaid kon inta diápa patus aidan kon i kantangnea sin diádon mokotahang kon ibognea, táe oyúonbí in niat monia motonibuḷoi yo aidaibí.#7:36: táe oyúonbí in niat monia motonibuḷoi yo aidaibí: ande Soaḷ ḷoḷaki tobatú bo ki adínea in mongodeaga: aka irasaneamai kon sia in nogaidon kon inta diá patus aidan kon i adínea tatua, bo adí tatua in nogurangdon motaaudon pobuḷoion, dá sia in mustibí mogaid kon onu in koibognea bo mopotonibuḷoi kon i adínea mongodeaga tatua. Sin diábí baradosaan aka motonibuḷoibí in moiko. 37Táe aka intau tatua bo mogamádon kon kaputusan kon bonu in ginanea, kon diábí tonibuḷoionnea#7:37: kon diábí tonibuḷoionnea in ki kantangnea tua: ande kon diábí mopotonibuḷoi kon adínea mongodeaga. in ki kantangnea tua sin mokotahangbí in sia in diá mobuḷoi, dá oaidnea tatua in mopiabí. 38Simpodon mako kon singog intau inta mobuḷoi#7:38: mobuḷoi: ande mopotonibuḷoi kon adínea mongodeaga. in mopiabí doman, bo intau inta diá mobuḷoi#7:38: diá mobuḷoi: ande diá mopotonibuḷoi kon adínea mongodeaga. in mopia-piadon doman.
39Bobay inta ain nokipobuḷoi notobatúdon i buḷoinea ḷoḷaki komangoi in nobiagpa in ki buḷoinea tua. Táe aka matoidon in ki buḷoinea tatua, dá bobay tatua in mobebasbí in mokipobuḷoi bui kon intau inta kinoibognea; asaḷ tonibuḷoi tatua in tonibuḷoi Keresten. 40Tongá mopia-piabí kon aka diádon bui mokipobuḷoi in sia. Tua in podudui in raianku, táe iraiku kon onu in pinogumanku naa komintanbí kon bonu in kawasa in Roho i Allah.
Atualmente Selecionado:
KORINTUS 1 7: INOMOG
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Alkitab Singog In Mongondow Masa In Tanaa © Indonesian Bible Society, 2016.