VATUMWA 5
5
1Yaali ho mundu mulala uwalangwa Anania, harara nu mukali weve Safira. Vaguliza mulimi gwaavo kandi. 2Navuzwa Anania harara nu mukali weve vavugiliza na kuvaasa ku mabese ga vanyoola. Yaleetera avatumwa kidieli kilala cha mabese yago.
3Petero yamuteeva, “Anania, kigira ki oleki Setani akwamihi mu mwoyo gugwo uduuki kovoolera Roho Mutakatifu ovovehi, mu livaasa kedonye cha mabese gonyooye ku mulimi? 4Nukikiri kuguguliza gwaali gugwo; kandi inyima wu kuguguliza, kandi mabese gagwo gaali googo utumikiri kuli mwene uyanzaa mba. Kigira ki otovooye mu mwoyo gugwo kokora kindu kuli yiki? Siovoleeye avandu ovovehi mba, navuzwa ovoleeye Nyasaye!”
5Lwa Anania yahulira makuva yago, yagwa hasi nakuza. Avandu vosi avahulira makuva yaga vaali nuvuti vonene ligali. 6Avasoleri vaza ni vavoha muviri gwigwe ni zinguvu ni vamuhira ichova, ni vamuyavira.
7Inyima wi zisa zivaga, mukali weve yaza natamanyi agaali nigekoleki. 8Petero ya muvooleraa, “Mbolera! Mabese yaga nigo goosi ga mwanyoola ku liguliza mulimi?” Naye ya mutivulira, “Yee, nigo goosi ga kwagulizira.”
9Navuzwa Petero ya muvooleraa, “Kigira ki ivi numusaza woovo mutovooye kogeriza Roho wu Mwami? Henza! Avandu vaziyi kuyavira musaza woovo vaveeye ha kiliango, navo valakuginga nu kukuhira ichova.”
10Nonoho, Safira yagwa hasi imbiri wi virenge via Petero, nakuza. Lwa avasoleri vingira, vamunyoola namali kukuza; ni va mugingaa ni va muhiraa ichova, ni va muyavira ahimbi nu musaza weve. 11Likanisa liosi, na vosi avahulira makuva yaga, vaatia ligali.
Vatumwa vaakora vilolekizu viokogenyia vinyingi
12Avatumwa vaakora vilolekizu viokogenyia vinyingi ku vandu. Avasuuviri vosi vavugana harara mu muganda mu lusimbu lwa Solomoni. 13Siyaali ho numulala ichova wu muganda gwa vandu vasuuvira uwaluvilira kuhambana navo mba, kali ndio avandu vandi vavizominya. 14Navuzwa livaliza lia avandu vasuuvira Mwami, avasaza na avakali, yamedeka ligali. 15Kolondekana na mativuli gi miyinzi javatumwa vakora, avandu vahiraa avalwaye vaavo kuzinzira, ni vavaaliza ku vidali kandi ku majambi, ndi niiva Petero avita, mbula chiriri chiche kigwiri valala kuvo. 16Avandu vanyingi vaza avaari nivatuli mu madaala gaali ahimbi na Jerusalemi, ni valeta avalwaye vaavo, kandi yavo avagumirwa na mademoni; navo vosi vahonywa.
Vatumwa vadambizwa
17Maku, Musaalisi Munene na avache veve, avasangi vumuganda gwa Vasadukayo vahene yaho, vakendekera avatumwa ligali. 18Kunangwa vagumira avatumwa, ni vavavohera mu vuhambe vonene vwa vahambe vosi. 19Navuzwa vudiku yivwo engelosi wu Mwami yigula virivwa viu muvuhambe, naavimilira kutura ichova, na avavoolera, 20“Muzie musingiri mu Litembeli muvoolere avandu amakuva goosi gi livamwoyo lihia yili.”
21Lwa avatumwa vahulira yaga, vingira mu Litembeli mugambazuri mu mavwevwe, ni vatanga kwigiza.
Musaalisi Munene na avache veve valanga harara livugana lie kiyaalo kenene cha vakulundu vosi va Vayuda; maku vaatuma amalago muvuhambe ndi valetwe imbiri wavo. 22Navuzwa lwa avasikari yavo vaduuka yo, sivanyoola avatumwa zana muvuhambe mba! Ma virana ni valeta makuva ku kiyaalo. 23Vavoola, “Lwa kuduuki muvuhambe, konyooye nihani zimbega ziosi vudinyu na avasikari nivalindi virivwa vulahi navuzwa lwa kwiguyi virivwa, si konyooye mundu mugati mba.” 24Lwa vasaalisi vanene kandi munene wa valindi vi Litembeli vahulira makuva yaga, vaali ni ligenya linene, ni vavura kumanya ichekoleki ku avatumwa. 25Maku mundu mulala yaza aha vakulundu vavunga na avavoolera, “Huliri! Avandu va muvohi muvuhambe vaveeye mu Litembeli lwene yilu, vigiza avandu!” 26Kunangwa munene wa valindi vi Litembeli harara na avasikari veve vazia mu Litembeli, navaleeta. Sivavagumira ni zinguru mba, kigira vaatia gase avandu valavalasa na magina.
27Valeta avatumwa yavo, ni vavasingiriza imbiri wi kiyaalo. Musaalisi Munene yavateveleriza, 28“Kwamwiganihiza vudinyu ligali mutigiza ku lieta liu mundu uyu mba; na kalunu, heenzi aga mukoli! Mulandizi amigizu ginyu mu Jerusalemi mwosi, na mwenya koleta kisaalia chilikuza liu mundu uyu ku kunyi!”
29Navuzwa, Petero na avatumwa vandi, vativura nivavoora, “Kuduuka kutie Nyasaye, kuvita kutia avandu. 30Nyasaye wa avaguuga viitu yasimugukiza Yeso wa munyi mwamwita, lwa mwamusunga ku musalaba. 31Nyasaye yamunenehiza kuduuka ha mukono gwigwe mulungi kuli Mwimiliri kandi Muhonyi, aduuki kuhaana ku avandu va Isiraeli vwiyangu vwu kwiganira, ma vanyoore lisamiifwa liu vwoni vwavo. 32Kunyi harara na Roho Mutakatifu, koveeye avaloli ku vindu yivi oveeye kihanwa cha Nyasaye ku avandu vamuhuliraa.”
33Lwa avandu vosi avaari mu kiyaalo vahulira yaga, vavihilirwa ligali kali nivenya viiti vatumwa. 34Navuzwa Mufarisayo mulala walangwa Gamalieli, uwaali mwigizi wi Lilaga, kandi wa avandu vosi vaaha luyali ligali, yasingira imbiri wi kiyaalo, ni yenya avatumwa vatulizwi ichova ku ing'inga engekeeke. 35Maku navolera avandu vi kiyaalo, “Munyi vandu va Isiraeli vache vange, muganaganyie vulahi icha mwenya kokora ku avandu yava! 36Mwizurizi kumanya ndi, mundu mulala walangwa Teuda yasingira mihiga mikekeeke ijiviti, navoora, ‘Mbeeye mundu munene.’ Na avandu vaduuka ahimbi zimia zine vaamulonda. Navuzwa yitwa, na avalondi veve vosi vasalanywa, nu muganda gwigwe ni gogota. 37Inyima wa yaga Yuda wa Galilaya ya singira. Mwene uyu kandi yang'usa muganda munene ni vaamulonda, navuzwa naye kandi yitwa, na avalondi veve vosi vasalanywa. 38Kalunu inzi mu volera, mutakola kindu choosi ku avandu yava mba. Leki vave! Kigira, niiva amakuva yaga anoho miyinzi jaavo yiji jalohizwa anoho jatangizwa na avandu jiladiva. 39Navuzwa nijiva ni jatula ku Nyasaye, munyi si munyala kuvaguuta mba. Kali mulanyola aveene ni mulwaanaa Nyasaye!”
Kunangwa avakulundu vi kiyaalo vosi valonda ligerihiza lia Gamalieli. 40Valanga avatumwa viirane mu kiyaalo ni vahaana amalago vakuywi, ni vaviganihiza vatigiza kandi ku lieta lia Yeso mba. Maku vavaleka vazie.
41Kunangwa avatumwa vaatura mu kiyaalo ni vayaanza ligali kigira Nyasaye yalora sivadukanaa kuvikwa mu zisoni kigira lieta lia Yeso mba. 42Vazizagilira madiku goosi kwigiza nukwilwaza mu Litembeli kandi mu zinyumba zia avandu Tvangeli ya Yeso kuli aveeye Mesia.
Ovotovoli vwa vasaza saba kokoonya avatumwa
Atualmente Selecionado:
VATUMWA 5: LOGOOLI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
©Bible Society of Kenya, 2019