VATUMWA 7
7
1Musaalisi Munene yateeva Sitefano, “Amakuva gavakuyalira yaga gaveeye agiligali?”
2Sitefano yativura, “Avaamitu na vababa! Mumbulirizi! Nyasaye wu vukumi yaloleka ku guuga wiitu Aburahamu, mu Mesopotamia, nakikiri kuzia komenya Harani. 3Nyasaye yamuvolera, ‘Tula mu kivala chicho, oleke avinyumba yooyo na uzie mu kivala cha ndikumanyia.’
4“Kunangwa, Aburahamu yatura mu kivala cha vandu Vakalidayo, nazia komenya Harani. Inyima wi likuza lia baba weve, Nyasaye yamutuliza Harani kandi, niyazaa komenya mu kivala cha munyi mumenyi mu yiki kalunu. 5Nyasaye siyaamuha ku ekedonye chi kivala yiki keve umwandu gwigwe; mba, navuzwa yamulaga alamuha kivala yiki keve chiche kandi chi ikisukulwi chiche. Ing'inga yene yeyo Aburahamu si yaali nu mwana mba. 6Nyasaye yamuvolera ndi: ‘Visukululwi vivio valahirwa mu kivala chamifwa na avandu vandi, navo valakolwa yo avatugwa, na valadambizwa mihiga zimia zine. 7Navuzwa ndakakalagiri ihiiri yeyo ilivakola avatugwa. Lwinyima ndakavatulizi mu kivala yicho vaze kusigamira hano.’ 8Maku Nyasaye yaaha Aburahamu muruka gwi likevwa gove Kimanyiru chi Lilagana. Kunangwa, Aburahamu yakeva mwana weve Isaka ku lidiku lia munane namali kwivulwa. Isaka naye yakeva Yakobo. Yakobo kandi yakola ndio ku avaguuga viitu likomi na vaviri.
9“Avaguuga viitu yavo vaali nembodoka ku Josefu, ni vamuguliza kuva mutugwa mu Egebeti. Navuzwa Nyasaye yaali harara naye, 10namuhonyia kutura mu vudinyu vwivwe. Lwa Josefu yaloleka imbiri wu mwami wa Egebeti, Nyasaye yamuha liiva liu kuyaanziza kandi ovogeri. Kunangwa Mwami wa Egebeti yamukola ave mwamihi mu kivala yicho kandi munyumba yeeye yu vwami yoosi.
11“Maku inzara yaali mu kivala cha Egebeti choosi kandi mu Kanaani. Inzara yiyi yaleeta uvusaliri vonene ligali. Avauuga viitu si vaali vanyara konyoora chukulia choosi mba. 12Lwa Yakobo yahulira ndi vuswage voveeye mu kivala cha Egebeti, yatuma avana veve, avaguuga viitu, vazie Egebeti ing'inga yu kutanga. 13Lwa virana Egebeti lwa kaviri, Josefu yivuula ku avamwavo veve; kandi mwami wa Egebeti yamanya avinyumba ya Josefu. 14Josefu yatuma amakuva ku Yakobo baba weve na avinyumba yeeve vosi, naavalanga vaze Egebeti vaali avandu sabwini na tano. 15Yakobo yazia Egebeti; uwa yakuzira harara na avaguuga viitu vandi. 16Miviri jaavo jagingwa ni jihilwa Shekemu, ni jiyavilwa mu kilindwa cha Aburahamu yaali naguli ku vwifeza ku ihiiri ya Hamori.
17“Lwi ing'inga yaduuka, Nyasaye aduukizi lilagana lia yalagana na Aburahamu, livaliza lia avandu vaali mu Egebeti liali ni limali komeedeka ligali. 18Lwinyima mwami wundi wavula kumanya Josefu yaatanga kwamiiha mu kivala cha Egebeti. 19Mwene uyu yakolera ihiiri yitu aguvugaadi, nadambiza avaguuga viitu navaniga vatulizi vana vaavo ichova vakuzi. 20Musa yiivulwa ing'inga zana yeyo. Yaali mwana wi ligondo lilahi ligali. Yalelerwa munyumba yaavo ku imieli jivaga, 21Lwa yateevwa ichova, mukaana wu mwami wa Egebeti yamuvugula, namulera namukora kuli mwana weve. 22Musa yigizwa amakuva goosi govogeri vwa vandu va Egebeti, kandi yaali wi zinguru mu litivula lilie kandi mu vikolwa vivie.
23“Lwa Musa yaali naduuki mihiga arubaini, yatovola mu mwoyo gwigwe azie kuluuta avamwavo veve, avana va vandu va Isiraeli. 24Yalora yo mulala kuvo nadambizwa nu mu Egebeti. Kunangwa yazia kumugayira na yatungiza kisaalia, niyiita Muegebeti. 25Yaganagana, vandu va Isiraeli veve vamanya Nyasaye umutumi avahonyie, navuzwa si vamanya ndio mba. 26Mugamba gwalonda ku, yanyoora vandu va Isiraeli vaviri ni vakubana; yaageriza kuvahambanyia, navoora, ‘Munyi muveeye avamwavo; kigira ki musolanaa aveene ku vene?’
27“Navuzwa uyu waali nakuya mutende weve, yalumba Musa halovega, navoora, ‘Nivwaha wakuviika ove mwimiliri nu mukalagi wiitu? 28Wenyaa kunzita kuli witi Muegebeti mugolova?’ 29Lwa yahulira yaga, Musa yiruka, nazia komenya mu kivala cha Midiani, ni yivulira yo avayaayi vaviri.
30“Lwa Musa yaali niyakamara mihiga arubaini, engelosi wu Mwami yaloleka kuye mu kisaka chaali ni chaadukaa muliru mu changalangwi, ahimbi ni Kiguru cha Sinai. 31Lwa Musa yalora yaga, yaagenya lilola yilio muno. Lwa yisunda ahimbi kohenza; yahulira mwoyo gwu Mwami ni govoora; 32‘Inzi mbeeye Nyasaye wa avaguuga vovo, Nyasaye wa Aburahamu, Isaka na Yakobo!’ Musa yadegera kigira uvuti, kandi si yaluvirira kohenza yo mba. 33Mwami yamuvolera: ‘Tuliza vilato, kigira aha usingiyi hano haveeye ahatakatifu. 34Mali kolola vusaliri vwa avandu vange vasalirizwa mu Egebeti ligali. Mali kuhulira lilira lielikenya liavo, ninzi mali kuuza nduuki kuvahonyia. Ku lwa yago hamba hano, ngutumi uzie Egebeti.’
35“Musa uyu niyie wa avandu va Isiraeli vasuura lwa vavoola: ‘Nivwaha wakuviika ove mwimiliri kandi mukalagi wiitu?’ Kuvitira mu engelosi waloleka kuye mu kisaka chaali ni chaadukaa muliru, Nyasaye yatuma Musa uyu ave mwimiliri nu muvohololi wavo. 36Niyie wimilira avandu yava kutura mu Egebeti niyakamara kokora vilolekizu kandi viokogenyia mu kivala cha Egebeti, mu Inyanza Inzakanyu kandi mu changalangwi ku mihiga arubaini. 37Musa oyo niyie wavolera avandu va Isiraeli, ‘Nyasaye alamutumira muporofeti kuli yanduma, kandi mulala ku avandu vinyu vene.’ 38Musa uyu niyie uwaali mu livugana lia avandu va Isiraeli mu changalangwe harara nengelosi uwavolerana naye mu Kiguru cha Sinai. Kandi yaali hala na avaguuga viitu. Niyie wahevwa amakuva ga Nyasaye gi livamwoyo ahe kunyi.
39“Navuzwa avaguuga viitu vasuura kumuhulira. Vamusura, nivegomba kwirana Egebeti. 40Vavoolera Haruni, ‘Okolombere avanyasaye avakwimilira mu logendo. Sikumanyi ichagwiira Musa mba, uwakwimilira kutura Egebeti.’ 41Gaali mu madiku yago aga velombera kifananyi che kemoli, nivahaana kucho, visiuviliru nivasangalira kifananyi chaali cha makono gaavo aveene. 42Kunangwa Nyasaye yagirung'ana kutura hagati haavo, na avaleka vasigamiri zing'ereng'ani ziu mwigulu, kuli gang'odwa mu kitabu cha vaporofeti:
‘Munyi avandu va Isiraeli!
Siaveeye inzi wa mwitira zinyama no kondetera
visiuviliru mihiga arubaini mwigendanyama!
43Munyi mwagingaa lihema liu munyasaye Moleki,
kandi kifananyi che eng'ereng'ani yu munyasaye winyu Rafani.
Vifananyi via mwalomba nivio via mwasigamira.
Ku lwa yago, inzi ndamuhaminya muzie mu kivala
ihale kuvita Babiloni kuva yo avatugwa!’
44“Avaguuga viitu vaali ni Lihema lio kololekiza kuva ho kwa Nyasaye mu changalangwi. Lialombwa kuli Nyasaye yalaga Musa alilombe, live kuli ichayamanywa. 45Ing'inga yeyo avaguuga viitu vaavugura lihema kutura ku vababa vaavo. Valiginga nivazia nalio nivaveeye harara na Joshua. Vaginga lihema yilio lwa vamala kuvugura kivala chi zihiiri zia Nyasaye yakunga imbiri wizimoni ziavo. Liali yo kuduuka ing'inga ya Daudi. 46Daudi yanyoora livugilirwa lia Nyasaye kandi yateeva Nyasaye amuvugiliri yumbakiri Nyasaye wa Yakobo havundu hokomenya. 47Navuzwa yaali Solomoni uwamwumbakira inyumba.
48“Kali ndio, Nyasaye Oveeye igulu Ligali kuvita viosi, siamenyaa mu zinyumba ziumbakwa na avandu mba; kuli muporofeti avoora;
49‘Mwami Nyasaye avoora,
Ligulu liveeye kuli endeve yange yu vwami,
ni lirova liveeye endeve yu kuviika ku ivirenge viange.
Kunangwa, ninyumba ya lugano ki ya munyala kunyumbakira?
Ni hayi ha inzi sosera?
50Siaveeye inzi uwalomba vindu yivi viosi?
Anoho si gaali ndio?’ ”
51Sitefano yaazizagilira kovora “Munyi ava amagoti gadinya! Mioyo jinyu na amatu ginyu gaveeye kuli aga yavo avatamanyi Nyasaye. Munyi muveeye kuli avaguuga vinyu: Munyi kandi muhingiraa Roho Mutakatifu amadiku goosi. 52Yaali ku ho nu muporofeti wa avaguuga vinyu vavura kudambiza? Vita avatumwa va Nyasaye, avalandiza ku maziambiri iliiza liu Mutumikiri mulungi. Na kalunu, munyi mumali kumuzaama nu kumwita. 53Munyi nivo avamwavugula lilaga lia Nyasaye, ilialeetwa nizingelosi, navuzwa si mulihuliyi mba!”
Sitefano yalaswa amagina
54Lwa avakulundu vi kiyaalo vahuliriza amakuva ga Sitefano, vavihilirwa ligali, nivalumanyia amiinu gaavo mu uvutima. 55Navuzwa Sitefano, ni yizuuyi Roho Mutakatifu mba, yumika mwigulu, nalora uvukumi vwa Nyasaye, kandi Yeso nasingiyi ha mukono mulungi gwa Nyasaye. 56Yavoola, “Heenzi! Ndolaa ligulu ni likunuliywi, nu Mwana wa Adamu usingiyi ha mukono mulungi gwa Nyasaye!”
57Hene yaho avandu vosi avaari mu chikalo chi kiyaalo vahanzuka ni mioyo minene nivafuuma amatu gaavo na amakono gaavo. Nonoho vatwuma kuye vosi harara, 58nivamuzoma ichova wi lidaala linene, nivamulasa na amagina. Avaloli vatuliza makoti gaavo nivagaviika mu vulindi vwu musoleri mulala, walangwa Saolo. 59Lwa vaali nivamulasa amagina, Sitefano yasaala navoora, “Mwami Yeso, vugula mwoyo gwange!” 60Yasigama, nahanzuka nu mwoyo munene na avoora, “Mwami! Utavaliza vwoni yivu kuvo mba.” Lwa yamala kovora yaga, yakuza.
Atualmente Selecionado:
VATUMWA 7: LOGOOLI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
©Bible Society of Kenya, 2019