LUKA 22
22
Lilohiza mu vwivisu ukwita Yeso
(Mat. 26:1-5; Mar. 14:1-2; Yoh. 11:45-53)
1Ing'inga yi Lisavo liu Mugadi gutali mu na mamera, ililangwa Lipasaka, liali ahimbi kuduuka. 2Avasaalisi vanene kandi avigizi vi Lilaga vaali nivagerizaa konyoora inzira yu kwiita Yeso muvwivisu, kigira vaatia avandu.
Yuda yavugilira kuzaama Yeso
(Mat. 26:14-16; Mar. 14:10-11)
3Maku, Setani yingira mu Yuda, uwalangwa Esikarioti, mulala ku aviigi likomi na vaviri.
4Kunangwa Yuda yatura ho nazia kovolerana na Vasaalisi vanene kandi na valindi vi Litembeli kuli yaali anyala kuzaama Yeso kuvo. 5Vayaanza ligali kandi valagana kumutunga mabese. 6Yuda yavugilira kugo, ma natanga kwenya uvwiyangu vulahi vwu kuzaama Yeso kuvo, vugira avandu kumanya.
Yeso yalohiza kulia Lipasaka
(Mat. 26:17-25; Mar. 14:12-21; Yoh. 13:21-30)
7Lidiku lie lilia Mugadi gutali mu na mamera liaduuka lwa magondi gi Lipasaka gaduukanaa gitwi. 8Yeso yatuma Petero na Yohana, namalago yaga, “Muzie mukolombere lisavo lie Lipasaka nakunyi kuduuki kulia.”
9Vamuteeva, “Wenyaa kokolombere Lisavo yili haliha?”
10Yavativulira, “Lwa namuve niwingiraa mu lidaala linene, mulavugana numundu nagingi isiongo ya mazi. Mu mulonde kuduuka munyumba ya nayingiri mu, 11Muvoolere mwene inyumba, ‘Mwigizi akoteeva, inyumba ya vageni eveeye hayi, ya inzi ndiraa mu Lisavo lie Lipasaka harara na aviigi vange?’ 12Naye alamumanyia inyumba enene ye gorofa nayo yetegekiziywi vulahi. Mulombe lisavo live mwene yimwo.”
13Vaatura ni vazia kandi nivanyoora ivindu viosi niviveeye kuli Yeso yavavolera. Valombera mu Lipasaka.
Lipasaka liu Mwami
(Mat. 26:26-30; Mar. 14:22-26; 1 Vakor. 11:23-25)
14Lwi ing'inga yaduuka, Yeso harara na aviigi veve, viikara kulia chukulia. 15Yavavolera, “Ndayegomba ligali kulia ni munyi Lipasaka yili ningikiri kwitwa! 16Kigira inzi muvooleraa, Sindalia kandi Lipasaka yili kuduuka lwa liliheevwa kivuni chalio kuduukiru mu Vwami vwa Nyasaye.”
17Maku Yeso yahevwa kekombe nikizuyi iwaini, nahaana lisandiza ku Nyasaye, navoora, “Muvuguli kekombe yiki, na musange hagati hinyu. 18Muvooleraa, kutura kalunu inzi sindanwa kandi iwaini yiyi kuduuka lwu Vwami vwa Nyasaye vuzaa.”
19Maku yavugula kedonye chu mugadi nahaana lisandiza ku Nyasaye, nameganyia kandi navaha, navoora, “Yigu goveeye muviri gwange, [uguhaanwa kuli isadaka ku Nyasaye kigira munyi. Mukore ndio mu linzizuliza.” 20Munzira ndala nzere, nivakamara lilia mugadi, Yeso yavugula kekombe chi iwaini navoora, “Kekombe yiki keveeye Lilaga Lihia lia Nyasaye mu masahi gange, agasundulwa kigira munyi.]”
21“Navuzwa, Heenzi! Uyu unzamaa aveeye hano komesa harara ninzi! 22Mwana wa Adamu azizaa kwitwa kuli Nyasaye yasavira kuye. Navuzwa, O, vayaye, kilaamo keveeye ku uyu umuzamaa!”
23Ahene yaho, vatanga kotevana aveene naveene, ni uliha kuvo uzizaa kokora yaga.
Aviigi vahangalizana kigira ovonene
24Lihangalizana liatulira hagati ha aviigi ndi ni uliha kuvo unyala kuganaganwa aveeye munene ligali hagati haavo. 25Yeso yavavolera, “Avami vi zihiiri vamiiha avandu vaavo kuzinguru; kandi avamihi avaveeye nuvunyari yavo venya avandu vavalange, ‘Avalina vahaani na vovokonyi.’ 26Navuzwa yaga sigaveeye ndio ku munyi mba. Nitali munene ku munyi gamudukira ave kuli mwana mukekeeke, na uyu mwimiliri gamudukira ave kuli mutumiki. 27Nivwaha oveeye munene, uyu wikaye komesa kulia viukulia anoho ni uyu umutumikiraa? Ni uyu wikala komesa kulia viukulia! Navuzwa, kali nigaveeye ndio inzi mbeeye hagati hinyu kuli uyu utumikaa.
28“Navuzwa munyi nivo avazizagilira kusingira vudinyu ku lovega lwange mu ing'inga yi ligerizwa liange. 29Kuli Baba wange yamba zinguru ukwamiiha avandu yava, kandi inzi ndio, muheezaa zinguru zindala nzere mwamihi. 30Munyi mulalia nukunwa komesa yange mu Vwami vwange. Mulikala ku zindeve ziu Vwami ukwamiiha zihiiri likomi na ziviri zia Isiraeli.
Yeso yaporofeta ndi Petero alamwambakane
(Mat. 26:31-35; Mar. 14:27-31; Yoh. 13:36-38)
31“Simoni, Simoni! Hulira, Setani ateevi munwa ku Nyasaye agerizi munyi vosi kwavukanyia vandu valala kutura ku vandu vadamanu, mulimi asesaa ingano. 32Navuzwa inzi mali kukusaalira ku Nyasaye, Simoni, ndi lisuuvira liilio litageha mba. Lwa ivi wirana ku inzi, uladinyiriza mioyo ja avamwavo vovo.”
33Navuzwa Petero yamutivulira, “Mwami, inzi, nzetegeki kuzia niivi mu vuhambe, kandi mu likuza.”
34Yeso yamutivulira, “Ngovolera agiligali, Petero, uvudiku vwa lero, idaywa nitalagula, ulanyambakana haali kavaga ndi, si umanyi inzi mba.”
Yeso yiganihizaa aviigi veve
35Maku Yeso yateeva aviigi veve, “Lwa ndamutuma ing'inga yila kuzia vugira kebeti, musigo, nivilato, mwaadaka kindu?”
Navo vamuvolera, “Awa.”
36Yeso yavavolera, “Navuzwa kalunu, ku vosi oveeye ne kebeti cha mabese, akivuguli, kandi oveeye nu musigo akole ndio. Oyo utaveeye ni kivavi, agulize likoti lilie, na aguli kivavi. 37Kigira muvooleraa ndi Amang'oda Matakatifu agaavoola ndi, ‘Yavalizwa harara na avoni.’ Kuduuka gatwekizwe kuva agiligali ku inzi. Yee agang'odwa ku inzi gaaza kuva agiligali.”
38Aviigi veve vamuvolera, “Mwami, henza, koveeye ni vivavi viviri hano.”
Yeso yavativulira, “Yivio viduuki.”
Yeso yasaala mu Kiguru cha Mizeituni
(Mat. 26:36-46; Mar. 14:32-42)
39Yeso harara na aviigi veve, vaatura mu lidaala lia Jerusalemi, nivazia kuli mwima gwaavo mu Kiguru cha Mizeituni. 40Lwa yaduuka havenyaa, yavolera aviigi veve, “Musaale, Mutingira mu ligerizwa mba.”
41Yavaleka nazia kuli hanyala kulasa ligina, nasigama, nasaara. 42“Baba, nuyanza, tuliza kekombe chu vusaliri yiki ku inzi. Gatava kuvulaliri vwange, navuzwa gave kuvulaliri vuvwo.” [ 43Engelosi yaloleka kuye kutura mwigulu, naamuha zinguru. 44Mu vusaliri vonene, yasaala numwoyo gwosi ligali kandi ulogeri lwilwe lwali kuli zingerageriza zia masahi gatonyatonyaa hasi.]
45Lwa yamala lisaala lilie, yazia ku aviigi veve, nanyoora vagona, nivaluhi kigira ovovereri. 46Yavateva, “Kigira ki mugonaa? Vuki musaale, ndi, muvuli kwingira mu ligerizwa mba.”
Ligumirwa lia Yeso
(Mat. 26:47-56; Mar. 14:43-50; Yoh. 18:3-11)
47Lwa Yeso yaali nakevoola ndio, kiduma kenene chaduuka nichimiliywi na Yuda, uwaali mulala ku aviigi likomi na vaviri. Yuda yisunda ahimbi ku Yeso naamuvusa. 48Navuzwa Yeso yamuvolera, “Yuda, uzamaa Mwana wa Adamu ni livuusa?”
49Lwa aviigi va Yeso, avaari harara naye, valora agaali nigazizaa kwekoleka, vateva, “Mwami kutumikiri vivavi vietu?” 50Mulala kuvo yatema mutugwa wu Musaalisi Munene na amukala ugutu, gwu mukono mulungi.
51Navuzwa Yeso yativura navoora, “Agene yago: gaduuki. Leki!” Kandi yadira ugutu gwu mutugwa oyo, namuhonyia.
52Maku Yeso yavolera avasaalisi vanene, avanene va valindi vi Litembeli, navakulundu, avaari ni vazi kumugumira ndi, “Munyingiliraa ni vivavi kandi nizimbimbu kuli mwingiliraa umunuuri? 53Lwa ndaali harara ni munyi kazozo mu Litembeli si mwanyiira amakono ginyu kung'umira mba. Navuzwa yiyi ni isa yinyu, kokora agamwenyaa, lwa zinguru zie kisundi ziamiihaa.”
Petero Yambakana Yeso
(Mat. 26:57-58,69-75; Mar. 14:53-54,66-72; Yoh. 18:12-18,25-27)
54Kunangwa Vagumira Yeso, nivamuhila muinyumba yu Musaalisi Munene, Petero yavalonderera inyima. 55Lwa vaali nivakafwana muliru hagati hu mujizi, Petero yaza niyikara harara na yavo avaari nivakumbirizi muliru. 56Mukaana mutumikiri mulala yalora Petero niyikaye ahimbi ku muliru. Yamwumika navoora, “Mundu uyu kandi yaali harara na Yeso!”
57Navuzwa Petero yambakana navoora, “Mukali ivi, kali inzi simumanyi mba!”
58Lwinyima hakekeke, Mundu wundi yamulola navoora, “Ivi kandi oveeye mulala kuvo!”
Navuzwa Petero yativura, “Mundu ivi, ninzi mba!”
59Inyima wi isa ndala, mundu wundi yadinyiriza kovora nuvuluviliri, “ Ligali siunyala kuhayahayiza ndi mundu uyu yaali harara na Yeso; kigira aveeye Mugalilaya!”
60Navuzwa Petero yativura, “Mundu ivi, simanyi kali icha omoloma mba!”
Nonoho lwa Petero yaali nakemoloma, idaywa yalagula. 61Mwami yikivuka, niyumika Petero. Petero yizuliza likuva liu Mwami kuli wa yamuvolera, “Lero idaywa nikikiri kulagula, ulanyambakana haali kavaga.” 62Ahene yaho Petero yatura ichova nalira novovereri vunene.
Yeso yakolelwa kehenyahenye nukukuywa
(Mat. 26:67-68; Mar. 14:65)
63Avandu vaali nivagumiyi Yeso vamukolera kehenyahenye, kandi vamukuya. 64Vamufuma muzimoni nikitambaya, nivamuteeva, “Vuula! Nivwaha ukuduyi?” 65Vavoola kuye vindu vinyingi viu kumunyega.
Yeso yahilwa imbiri wi kiyaalo cha avakulundu
(Mat. 26:59-66; Mar. 14:55-64; Yoh. 18:19-24)
66Lwa vwacha, avakulundu, avasaalisi vanene kandi avigizi vi Lilaga vavugana harara Yeso yaleetwa imbiri wi kiyaalo chavo kuyaalwa. 67Vamuvolera, kovolere, “Ivi niyie Kristo?”
Yeso yavativulira, “Kali nimuvoolera, simunyala kusuuvira inzi mba. 68Kali niiva ndeva munyi liteeva, simunyala kundivulira mba. 69Navuzwa kutura kalunu Mwana wa Adamu alikalizwa ku mukono mulungi gwa Nyasaye Wuvunyali!”
70Ahene yaho, vosi vateva, “Ivi oveeye Mwana wa Nyasaye?”
Yeso yavativulira, “Munyi muvooraa, inzi Mbeeye.”
71Navo vavoola, “Kigira ki kwenyaa avaloli vandi? Kunyi aveene kumali kuhulira agavooye nu munwa gwigwe umwene.”
Atualmente Selecionado:
LUKA 22: LOGOOLI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
©Bible Society of Kenya, 2019