MATHIE 2
2
Bhweyɛ́nmán khónkhó bha ewú Jezwi
1Wo ho Jezwi Bɛtelɛ́mɛn khúbhɛ́ abha Jude gotho. Lóka lókɔn ɔn, Erɔde nɔn ali bhringbi. Lóka wo ho Jezwi, bhweyɛ́nmán khónkhó áwɛsɛ́ pɛmwe chan ácɛ́nmɛ si ádi phɛ́nta bha. Wo di Jeruzalɛ́mɛn, 2ló wo ébhi sa:
– Ka yípɔ ebhá lí Jwifunɛ́n bhringbi oho pɔ́pɔ́ si abha e? Lo wu mɛ́n pɛmwe ácɛ́nmɛ si ádi, ló lo bha lo élɛ.
3Lóka bhringbi Erɔde ye bhwe lókɔn, ńthɛ́n eli, mɛ́n le Jeruzalɛ́mɛn khúbhɛ́nɛ́n khúnbrɛn ɔ́nmɔn. 4Lótɛ ńmúrɛ nphahamán-óthemánhɔn khúnbrɛn le bidíyɛ́nmán abha mɛ́n khúbhɛ́ hrómɛn ɔ́nmɔn hɛ́n, ló ńmi nkɔn lósi wo bhá hó Mesi, 5ló wo krɛnmɛn lée:
– Bɛtelɛ́mɛn khúbhɛ́ abha Jude gotho. Ló nɛn ábhwe bhwetɔ́tréwo lrɛ tre o:
6“Ló hɛ Bɛtelɛ́mɛn khúbhɛ́ abha Jude gotho,
ɛle li ákhúbhɛ́ wrɛ́ bɛn bha
Jude khúbhɛ́hɔn hromɛn a,
hɛ hromɛn nɔn athe bɛn bha chán thándi
ló ánman yalí mɛn féchwe ali Izraɛ khúbhɛ́nɛ́n.”
7Erɔde che bhweyɛ́nmán khónkhó bha kpɔ́thé, ló ńmi nkɔn sa wo lie lóka cɛ́ɛ́ tɛ pɛmwe di. 8Lómánji ńchɛ wo lée wo ló Bɛtelɛ́mɛn, ló ńkránman nkɔn sa:
– Tɛmɛ ɔ́n no, ɔ́n nɛn yípɔ lókɔn mwámwá, ló lóka ɔ́n gɛ ɔn, ɔ́n sé mɛn njɛ, ló mɛn lɔ mɛn no nɛ.
9Lóka bhringbi ha wo phu, lótɛ wo lɔ wo lo. Ló pɛmwe khɛ́n wo phrɛ wu ácɛ́nmɛ si ádi, énɛnsi wo hɛ́nmɛn. Lóka ádi yípɔ si abha, lópán ádɔnya. 10Lóka wo wu pɛmwe, áphɔhá khóo gɛ wo. 11Wo lɛ bháthó, wo wu yípɔ le nkɛ man Mari ɔ́nmɔn, ló wo bhɔ ntráhɛ́nlé wo éla yípɔ. Lómánji wo phwan wo nɔnkwá, ló wo pɔ nkɛ yí ali: ńcí, ńmwe le kprɛ́nkhuma ɔ́nmɔn. 12Lómánji, Yankan khɔ nájú mɛn kranman wo salé wo lé cu khɔ́ Erɔde yé npɔhɔ́n. Lóhɛ́nthé wo sakhɔ sitó nánkhɛ lo wo khúbhɛ́.
Lóka wo wa lo Ejiphithi khúbhɛ́
13Bhweyɛ́nmán khónkhó ka asaji lo, lótɛ Hwánthe-mranchɛ́wo bɛn bha tɔ bhwe se Jozɛfu nájú mɛn sa:
– Tɛmɛ ɛchánfe, ló ɛdo yípɔ le mɛ́n man ɔ́nmɔn wá ló Ejiphithi. Ɛchré lóne kábrɛ kábrɛ odi lóka mɛɛ́n nbrɛn mɛn mán kranmán hɛ lée ɛsáji bhá. Átɛsalé Erɔde énɛn awɛ́n yípɔ lókɔn.
14Lótɛ Jozɛfu fe, ló ńmréci mɛn, ńdo yípɔ le nkɛ man ɔ́nmɔn no Ejiphithi. 15Ńchre lóne kábrɛ kábrɛ ádi lóka Erɔde khu. Lóyí si akhɔ tɛ é, ochɛ́sé ábhwe Hwánthe khɔ bhwetɔ́tréwo phɔ tɔtre ɔn, lóyí otɛ́ símɛ́n: “Mɛn chɛ mɛn bhi chan Ejiphithi khúbhɛ́ thándi.”
Ńmiɔ́ chɛ́-nchɛ́ wo wɛn npasá mɛn
16Lóka Erɔde yɛn salé bhweyɛ́nmán khónkhó biɛ, ńthɛ́nyan khrákhrá kɛ hromɛn. Lónian mɛn khɛ́n bhweyɛ́nmán khónkhó tɔ ácí pɛmwe chan di bhwe se ńye ɔn, lóhɛ́nthé ńse mɔ́nsi salé wo wɛ́n nsɛbhiɔ́ khúnbrɛn khɛ́n agɛ npá mɔn, le wo khɛ́n wo ka gɛ npá mɔn, wo khúnbrɛn khɛ́n wo bha Bɛtelɛ́mɛn khúbhɛ́, le lókhúbhɛ́ jɛ́ njɛ ɔ́nmɔn hrómɛn. 17Áchɛ́se bhwetɔ́tréwo Jeremi bhwe atɔ, lóyí tɛ simɛ́n sa:
18“Oye ákhwɛ́ bɛn dɛn Rama khúbhɛ́,
hɛ́nduthɔ́n le áphɔjɔ́ ɔ́nmɔn tɔ́,
Rachɛ nɔn ethɔ́n mɛ́n miɔn phɔ hɛ́ndu,
nkɔn khú nkɔn khu hɛ́nthé,
ánnɛn dɛn khɛ́n okhwɛ thɛ́n lé.”
Lóka wo chan Ejiphithi saji bha
19Lóka Erɔde khu, Ejiphithi gotho lóne, Hwánthe-mranchɛ́wo bha gɛ Jozɛfu nájú mɛn, 20ló ńtɔ sa:
– Tɛmɛ ɛchánfe, ló ɛdo yípɔ le mɛ́n man ɔ́nmɔn sáji ló Izraɛ gotho, átɛsalé néphan khɛ́n énɛn yípɔ awɛ́n, wo khu phu.
21Lótɛ Jozɛfu fe, ló ńdo yípɔ le nkɛ man ɔ́nmɔn sáji no Izraɛ gotho. 22Lókhɛ́n ńye salé Jude gotho lóne, Akelaúsi nɔn ali bhringbi chre Erɔde phɛ́nmɛ́n. Ákhúsó kɛ hromɛn, ló ńnɛn pɔ salé anchré lóne gotho. Khɛ́n wo khɔ nájú mɛn tɔ bhwe se, ló ńno Galile gotho phɛ́nta. 23Ló ńno chre Nazarɛ́thi khúbhɛ́. Lóyí si akhɔ tɛ é, ochɛ́sé bhwetɔ́trémán bhwe lókɔn atɔtre, lóyí otɛ́ símɛ́n: “Wo bhá che nkɛ hɛ́n Nazarɛ́thi sɛ.”
Atualmente Selecionado:
MATHIE 2: ENT96
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Ebrié New Testament © Bible Society of Côte D'Ivoire, 1996.