Seemthawhnak 22
22
Isaak in Rai hri dingih Thupiak
1Hipawl hnukah Pathian ni Abraham a hniksak. A hemah, “Abraham,” tiah a ti. Abraham ni, “Hinangah ka omkau,” tiah a ti. 2Pathian ni, “Na dawtmi na tiapa ngeihsun Isaak, kota la, Moriah ram ah tat, cun ka tan hmuhsak leimi tlangpawl lakih pakhat a’khin amah cu meitih rai ah hri lei ci,” tiah a ti. 3Curuangah Abraham cu mawpan ah a tho, a laak kung a taang ih a hemom pahnih leh a tiapa Isaak a hruaita hngai; cun meitih raihriiknak caah thing a la, culeh Pathian ih hmuhsakmi hmun ahcun a tat. 4A ni thumnak ahcun Abraham ni khua a zoh ih cui hmun cu lam hlapi in a hmu. 5Cutikah Abraham ni a hemomle cu, “Hina’hhin laak rum taang uh; tepangpa leh kei cu khina’h khi kan tat thok; Pathian kan bia ta thok, cun nan hemah kan kirṭhan thok,” tiah a ti hngai. 6Abraham ni meitih raihriiknak thok thing cu lain a tiapa Isaak parah a taang, cun amah ni cu mei leh reente a keng. Cuticun an pahnih cu an tat khat. 7Isaak ni a pa Abraham cu, “Ka pa!” tiah a ti. Culeh a pa ni, “Awi law, ka tiapa,” tiah a ti. A tiapa ni, “Mei leh thing cu hinangah an omkau, a i na’n meitih raihriik thokmi tusuan teh khawnangah a om?” tiah a ti. 8Abraham ni, “Pathian amah rori ni meitih raihriik ding tusuan cu ruatkhang leh lei ka tiapa,” tiah a ti. Curuangah an pahnih cu an tat khat.
9Pathian ih hmuhsakmi hmun an phat tikah Abraham ni acunang ahcun pakawh a don ih thing cu ningcangtein a sia. A tiapa Isaak cu a ṭawn ih pakawh parih thing parah a hlum. 10Cuhnukah Abraham ni a kut suah in a reente a la ih a tiapa cu thah a khaaitia. 11Ihmansela Bawipa ih vanmi ni vancung in a ko ih a hemah, “Abraham, Abraham!” tiah a ti. Abraham ni, “Hinangah ka omkau,” tiah a ti. 12Vanmi ni, “Tepangpa parah na kut thlah hlah law, cun a parah ituhman ti hlah; icatile na tiapa, na tiapa ngeihsun hman sup lo’n ka hemih na piak ruangah Pathian na ṭihzah ti cu atu hi ka tiah,” tiah a ti. 13Culeh Abraham ni khua a zoh ih tuu kikawng pakhat ṭulhri hnok lakah a ki awk ih a taangmi a hmu. Abraham cu a tat ih tuu kikawng cu lain a tiapa canah meitih raihriiknak in a pia. 14Curuangah Abraham ni acui hmun cu Yahweh Jireh #22:14 Yahweh Jireh ti cu Bawipa ni ruatkhang leh lei tican. tiah a ko; nihinni tiangah “Bawipa ih tlang parah ruahkhang i leh lei,” tiah zon ti a ii.
15 Bawipa ih vanmi ni Abraham cu vancung in a voi hnihnak a ko ih, 16“Bawipa ni, ‘Hi thil hi na tiih, na tiapa, na tiapa ngeihsun na sup lo rom ruangah, 17ka tan thluasuah taktak thok ih na ciitlang cu van ih arsi zet leh rilikap ih siatnel zet tam in ka vua hngai thok. Cun na ciitlangle ni an ralle ih khuapipawl an neh thok ih 18na ciitlang thawngin vulei cung miphunpawl cu thluasuah an i thok, icatile ka thu na cangngai rom,” tiah a ti. 19Curuangah Abraham cu a hemomle hemah a kirṭhan, thoin Beersheba laah an tat khat; culeh Abraham cu Beersheba ahcun khua a sa.
Nahor ih Tianaule
20Hipawl hnukahhin Abraham cu, “Na naupa Nahor caah Milkah ni khaw tianaule a hrin: 21upatleng ah Uz, a nau ah Buz, Aram ih pa Kemuel, 22Khesed, Hazo, Pildash, Jidlaf leh Bethuel,” tiah sim a ii. 23Bethuel cu Rebekah ih pa ah a cang. Hile pariat hi Abraham ih naupa Nahor caah Milkah ni a hrin hngai. 24Cuhleiah, a nusun, a min ah Reumah a imi ni Tebah, Gaham, Tahash leh Maakah a hring hngai.
Atualmente Selecionado:
Seemthawhnak 22: KHBF
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Khualsim Holy Bible © Bible Society of Myanmar, 2021.