Yaɓooda 37
37
Jojep kɨ ngankõn
1Jakob ndɨ kam dɔning Kanat, lot'n bɔwa i mbah kamt kete. 2Hoita lo ngan Jakob laten. Lon ɓal Jojep i kɨlah gidaitanaimɨta, ɗa ul batg nat kɨ ngankõn. I ngon kɨbasa ɓaitɔ, na i nat kɨ ngan Bila kɨ ngan Jilpa, nẽ bɔwɨng. Jojep ɔrr hoi nyaɗad kɨmajal ro bɔwdt.
3Israel ndig Jojep tɔi nganɨn kɨmadg tube, kɨta i ngon dɔ bɨga, na ur kubji kɨ ngal ada. 4Ngankõ Jojep oon ad bɔwd ndiga tɔi ngankõa kɨmadg tube ye, ɔsɨna ta, na asɨn kela ta kɨ kam hɔ al.
5Jojep nii, na eltaa ngankõn ad ɔsɨna ta kɨ tɔi ɓaitɔ. 6Kɨtɔ eld an: Oon: Oon dɔ nii'n m'nii nõ. 7Jĩ kam ndɔɔt, ɗa kɨ dɔ sĩga nyako kam ndɔɔt, taa ne sɨnga lom ɓai ɗa dõ. Na sĩgag losɨ lan na gugɨn dɔa, ɔsɨn dɔd ber nõ sĩgat lom. 8Kamla ngankõa elɨna anan: I ndig kõɓe dɔjt e? Kɨ ndig ɗa ngar dɔjt a? Ad ɔsɨna ta kɨdɔidɔt ɓaitɔ kɨta niig loa kɨ tag loa.
9Jojep tel nii kɨɗang tɔ, na eltaa ngankõn. Eld an: Oon m'nii nii kɨɗang tɔ M'oo kàd kɨ nah kɨ kɨmẽg kɨlah gidaikɨɗa ɔsɨn dɔd ber nomt. 10El bɔwɨn tit elɨn ngankõn, na bɔwa ndanga, ela an: Nii ɗi kɨ titbe i nii ten a? Mĩ kɨ kõi kɨ ngankõ, j'a kɨ ɗe j'ɔsɨ dɔj ningt nõit rota a? 11Jang ɗa ngankõa dɔat, na bɔwa ngom ta 'nten kamɨnt.
Ngankõ Jojep ɗaw na
12Ngankõ Jojep awɨn Sikemt kad ulɨn ɓut nyakulg lo bɔwd. 13Israel el Jojep an: Ngankõi ɗa ulɨn ɓut nyakulg Sikemt ale? I ɗe ad m'lai rodt. Jojep tura an: Mĩ ne. 14Israel ela an: Aw oo ke ngankõi ton lapia kari, na ɓut nyakulg ton kari tɔ a ne, i tel ɔrrɨm hoid. Kokam hollot kɨ Hebrõt laa, na Jojep aw tee Sikemt.
15De mad ndɔda, a ndɔm kam mut. De'n non ndɨjea an: I ɗa i sah ɗi a? 16Tura an: M'ɗa m'sah ngankom. M'kɔi kɨ elɨm ɗa ulɨn ɓut nyakulg kɔtko kɨ ɗah a? 17De'n non ela an: Ɓain labe kɨta m'oo dɔ elɨn anan: Ad kɨ j'awɨn Dotan. Jojep aw go ngankõnt na ngahd Dotan.
18Lon ngankõa oona ko sãi, na tee nderbe rodt al ɓaitɔ ye, ndan tad nat kad n'tɔlɨna. 19Elɨn na ta kudt anan: Oon ngeni ka ndɨ ɗe nõ 20Ad j'awɨn tajigla, kɨ tɔlɨna, na kɨ lana kam holɓet mad kɨwo, na ka j'an: Dã mad kɨmut saa, na j'a kɨ j'oo nya'n niig loa a ɗan. 21Ruben oo dɔ ta lod, na ug ɔrra jidt, el an: Ad kɨ tɔlɨna al 22Ruben eld tɔ an: Ot kũn mosɨ kɔ, na i lana kam holɓet kɨwo'n ɗan kɨ kam mut, na kɨ de mad nda jin dɔat al. El titbe kad kɨ n'ɔrran jidt kad kɨ n'tel sia ro bɔwat.
23Lon Jojep tee ro ngankõnt ye, ngĩn kubji loa kɨ roat ad i kubji kɨ ngal. 24Hɔna, lana kam holɓet kɨwo. Kam holɓen non to kari, man gotot.
25Kamla ndɨn ber kɨ n'san nya, unɨn kumd kɨ dõ, oon Ismaelag ngétɔidõ ɓain dɔning Galaad a ɗen kɨdɔdt. Lukumg lod ton nõkag kɨbom kɨ myrr, ndɨ awɨn ne kɨ dɔning Ejipt't. 26Kamla Juda el ngankõn an: Ĩla kɨ tɔlɨn ngonkõj, kɨ yan ro mosa a ne, ɗi j'a kɨ ngahn loat a? 27Ad j'aw kɨ ɗawɨna ji Ismaelagt, na kɨ ndan jij dɔat al kɨta ngonkõj i dã roj. Ngankõa ndigɨn ta loa. 28Lon Madiãg ngéɗagat ndɨ tɔin ye, ɔrrɨn Jojep kam holɓet kɨwo kɨɓing, na ɗawɨna Ismaelag kɨ sikel larjã dɔjoo, ad awɨn sia Ejipt't.
29Ruben tel aw ta holɓet, na oo Jojep kam holɓet al, kamla til kubg lon. 30Tel kɨ ro ngankõnt, el an: Ngon goto, na mĩ ye ka, m'aw ɗah a? 31Unɨn kubji lo Jojep, tɔlɨn bal bĩã mad, na lan kubji'n non kam mosat. 32Kamla lan kɨ kubji kɨ ngalɨn non, ad ɗen ne ro bɔwdt, elɨna anan: Oo nya'n kɨ tee dɔt Oo ke i kubji lo ngoni, ke ĩ al a? 33Jakob gera, el an: I kubji lo ngonɨn. Dã kɨmut saa. Rota Jojep i kɨ tɔrr huthut. 34Jakob til kub lon, la kub hɔndo ront, na hɔndo ngonɨn ndɔ ngãibe. 35Ngana kɨdɨngã tube kɨ ngana kɨdẽ tube awɨn roat kɨ n'gɔrɨna, na mbet gor lod, el an: Kɨ nõ kumt la m'a m'awɨn go ngonɨmt kam lot kɨ koo ye. Bɔwa nõa titbe.
36Madiãg ɗawɨn Jojep dɔning Ejipt kɨ Potipar, kɨkɨɗa ku ngéɗakɨlat lo Paraõ, bɨradɔ ngéngom dɔ ngar.
Atualmente Selecionado:
Yaɓooda 37: MlL
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Mbai Bible Revision © Bible Society of Chad, 2015.