Qneepah 2
2
Meyah ka Bgihur Utux
1Dehuk smseman 50 ali de msseli 1 nniqan ka kana dsnheyi. 2Kiya de asi lux peeyah baro ka hrenang mntena so sbgihur paru, sbgihur ma stenge kana sapah tluungan daha hiya. 3Niqan ka so mntena hema ka rana puniq mncriyu, mswaye ma mosa mtuting knkingal tunux daha. 4Kiya de kana dheya we stngayan Bgihur Utux duma, so pnrengo Bgihur Utux dheya rmengo kari seediq icil.
5Ciida we, meniq Yerusalem hiya ka seediq Yudaya kmtama Utux Baro pneeyah knkingal qnlhangan bobo dxeral. 6Mhrenang ka hrenang nii de meyah msseli ka hbaro seediq. Qbhangan daha nii mskari knkingal kari daha nanak ka dsnheyi de msqhenga ka dheya. 7Msklui kana dheya ma rmengo: “Tai, nii rmengo nii we uxe dseediq Galil peni? 8Knkingal ta we, hmuwa ta nii mbahang gisu rmengo kari alang ta nanak ka dheya ho? 9Ita nii we seediq Barutiya, Maday, Eylam, dungal we ga meniq Mesopotamia, Yudaya, Kappadokia, Pontos, Asia, 10Huyrugia, Pampulia, Micrayim ma ga smdaling Kurenaios ka icil Ribue. Dungal we seediq mtnooda pneyah Roma. Kiya de seediq Yudaya ma seediq ga mremux kntmaan Yudaya. 11Ckceka daha we niqan seediq Yudaya, wada snhii snhiyan Yudaya, seediq Krete ma seediq Arab. Qbhangan ta ka dheya we gisu mskari kari ta ma rmengo paru qneepah Utux Baro!” 12Mskluwi ma mgedang lnglungan ka kana dheya ma mpprengo: “Maanu bale ka so nii da ho?” 13Kiya de tgreno rmengo ka duma: “Ga bsukan sino bgurah ka dheya!”
Kari Rnengo Petros
14Msuupu mheyu 11 snkgulan ka Petros ma pmbaro ba kari na rmengo: “Seediq Yudaya ma kana ga meniq Yerusalem! Klai ka ooda nii, psquri kari mu ka birac namu uri. 15Lmngelung namu gisu bsukan ka dseediq nii, uxe so kiya. Ado saya we hani prading mgrebu ka saya. 16Nii we kika rnengo Yoel mpgeela kari:
17‘Rmengo ka Utux Baro:
Meniq ali thiti ciida,
hrigun mu Bgihur mu ka kana muudus niqan heyi ma dara,
mprengo kari mpgeela ka lqlaqi namu,
lqlaqi namu rseno we mqita so tuutux,
rdrudan namu we mpsepi utux.
18Ali ciida, hrigun mu Bgihur mu ka tnqliyan mu rseno ma tnqliyan mu mqedil,
dheya we mprengo kari mpgeela.
19Pqtaun mu sklwiun ba qneepah ka karac baro,
pqtaun mu pnskraya qneepah,
niqan dara, puniq, qrengul so plabu ka bobo dxeral.
20Mpnkuung ka ledax hido,
mpkeso dara ka idas.
Berah na mtuura ba ma paru ba ali Bukung ciida mooda ka nii.
21Ali ciida, ani ima ka mlawa ngayan Bukung we pkdusun kana.’”
22“Seediq Israel, qbhangi kari mu nii. Utux Baro we pnoda na seediq Najare Yesu qmeepah paru ba beyax, sklwiun bale ma, pnskraya na qneepah ckceka namu. Nii pgkela yamu quri Kiristo ka Utux Baro we klaun namu bale. 23Sbege ka Yesu we mnoda psgao lnglungan Utux Baro ma pnugeela na mkela. Kiya de yamu we spooda namu baga seediq uka gaya pndakar, wada namu spteetu jyujika ma wada namu phqilun ka heya. 24Kiya de Utux Baro we, wada na lhlahun ka hnlidan na mhuqil. Kiya de wada na pkdusun peeyah hnqilan. Ado uka hteran hhuqil ka Yesu. 25Tmiyu heya rmengo ka Dawid:
‘Taan mu berah mu klaali ka Bukung.
Meniq narac mu ka heya uka ku llgelu.
26Maanu so kiya de mqaras ka lnglungan mu, mqaras ka hema mu.
Kiya uri we heyi mu we mptbleyaq meniq ckceka gnrihan.
27Ado uxe su qada tuxan mnkuung ka utux bgihur mu,
uxe su srwaun psburo ka mrtaso tnqliyan su.
28Wada saku sptgesa ka elu knuudus.
Pstngayan saku qnaras ka meniq ku berah su.’”
29“Mtswai, quri ndaan Dawid rudan cbeyo we ani ku nak truura mneeru yamu: Wada mhuqil ka heya da ma wada reesun da. Betaq ali saya ida nii ita hini ka bqerus na. 30Mpgeela kari Utux Baro ka heya, klaun na mppeeyah lqlaqi ltlutuc na ka phyegun mptleung tluungan na, nii we sndhegan Utux Baro heya uri. 31Dawid we pglaun na mkela ka so nii ma rmengo quri kkuudus peeyah hnqilan Kiristo:
Ini laxi tuxan mnkuung ka heya,
ini ksburo ka heyi na uri.
32Yesu nii we wada pkdusun Utux Baro peeyah hnqilan da. Kiya de kana yami ka pgkela na. 33Yesu we wada psaun baro narac Utux Baro ma, wada na ngalun peeyah Tama ka Bgihur Utux sntangan. Maanu so kiya de sheruy na ka nii namu taan ma nii namu qbhangan. 34Ani ini osa tlangan baro ka Dawid, kiya we rmengo heya nanak:
‘Rmengo tnpusu sapah mu ka Bukung:
Tleung narac mu ka isu,
35betaq mu pcpilan papak su ka pais su.’
36So kiya de kana seediq Israel, klai bale ka nii. Pnttuwan namu jyujika ka Yesu nii, Utux Baro we wada na ngalun Bukung ma Kiristo ka heya di!”
37Mbahang so nii ka hbaro seediq de asi lihu lhebun daha ma, rngagan daha ka Petros ma kana snkgulan: “Mtswai, mhuwa nami mesa meepah ho?” 38Rmengo ka Petros: “Knkingal namu ge priyux ka lnglungan namu, ooda ngayan Yesu Kiristo ptgaya psino. So maha sruwaun ka qnquwan namu we pooda ngayan Yesu Kiristo ptgaya psino. Kiya de maangal namu bnege Bgihur Utux. 39Ado sntangan nii we sbege na yamu ma laqi namu ma, kana seediq ga meniq theya, kiya ka seediq pnlawa Bukung, Utux ta baro.” 40Kiya de duma na hiya dungal we, spooda na egu ba kari pgkela ma dmurun dheya rmengo: “Kdusi ma qdriqi mbiki bobo dxeral saya ka yamu!” 41Maanu so kiya de mnangal kari Petros we mooda ptgaya psino. Kiya de ali ciida we, suumal quri tnugsaan Yesu ka seediq we ya ba 30'00. 42Kiya de dheya we ini psetuq muyu tnugesa snkgulan ma mggaluk, gmebing pang ma dmurun.
Kndusan Kana Rahul Dsnheyi
43Miicu bale ka kana seediq. Qmeepah egu sklwiun ba pnskraya qneepah ka snkgulan. 44Kana dsnheyi we msuupu theyaq kana ma, ani maanu we pntnaun daha dmoi kana. 45Brigun daha ka qyqeya ma dnoi daha, spuyu so ddooyun knkingal daha ma saasu daha seediq. 46Klaali mskingal ba lnglungan daha msuupu Sapah Thmkuwan ma, moda knkingal sapah gmebing pang. Mqaras ma psaasu uqun mekan. 47Tmdahu Utux Baro ma qrasun kana seediq. Kiya de klaali suumal Bukung dheya ka seediq pnkuudus.
Atualmente Selecionado:
Qneepah 2: Stgdaya
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
The Bible Society in Taiwan, 2020
© 台灣聖經公會版權所有，2020