Qneepah 3
3
Pklmeun ka Mrikic Meeniq Rhengun Sapah Thmkuwan
13 patis bobo mnekan drunan ciida, mosa Sapah Thmkuwan ka Petros ma Yohane. 2Niqan 1 seediq, heya we mrikic peeyah pnttingan na. Klaali saapa seediq mosa Sapah Thmkuwan Malu Rhengun kesun tmngayan hiya ka heya. Kiya de pniqun daha rhengun mremux Sapah Thmkuwan mesa bnege seediq. 3Taan na ka Petros ma Yohane mpteme Sapah Thmkuwan de mesa bnege. 4Tlleus mita heya ka Petros ma Yohane, rmengo ka Petros: “Qtai miyan.” 5Kiya de tqlahang mita dheya ka heya ma mkmaangal bbege daha heya. 6Rmengo ka Petros: “Uka ku kana king ma ging. Wano kana dnoi mu ka sbege mu sunan. Spooda mu ngayan Yesu Kiristo seediq Najare, rmengo sunan, tutuy ma kkesa!” 7Kiya de dooyan na narac baga ma pstoyun na, asi knssaya mbeyax ka papak na ma pungo papak na da. 8Kiya de msbolung mtaril, mheyu ma prading mkkesa uri. Kiya uri we msuupu dheya mremux Sapah Thmkuwan, mkkesa ma msbolung mtaril, ma tmdahu Utux Baro. 9Kana knhbaro seediq we mita heya mkkesa de tmdahu Utux Baro, 10klaun daha ka heya kiya ka tnleung malu rhengun Sapah Thmkuwan mnesa bbege. Kiya de quri so ndaan na heya we mnkluwi bale ma mrrudu tunux daha.
Gmarang Kari Meeniq Sbesuk Selomoh ka Petros
11Gaga meeniq sbesuk Selomoh kesun tmngayan ciida ka seediq kiya ma blebil Petros ma Yohane ka heya. Msuupu tmalang mosa dheya ma mskluwi bale ka kana knhbaro seediq. 12Taan Petros de rngagan na ka hbaro seediq: “Seediq Israel! Hmuwa, ma namu sklwiun ka so ooda nii ho? Hmuwa ma namu tgleus mita menan ho? Pneyah beyax nami nanak ma pneyah snhiyan nami nanak ka wada pkeesa seediq nii mesa namu ho? 13Utux Baro nuAbraham, nuYijxaq ma nuYakobu, kiya ka Utux Baro nrudan ta cbeyo ge, tena pkledax Yesu tnqliyan na. Yamu de wada namu sbege Pilatos ka Yesu. Kmpraguh ka Pilatos we ini namu sruwa berah na. 14Wada namu shetur ka mrtaso ma msderux ooda. Pgsaun namu ka pnhuqil seediq rraguh na yamu, 15wada namu phqilun ka pusu knuudus. Heya we wada pkdusun Utux Baro peeyah hnqilan. Kiya de yami ka mpgkela noda nii. 16Ado snhii namu ngayan na, ngayan na ka wada pkmalu qntaan namu ma gnklaan namu seediq nii. Kiya heya ka bnege snhiyan wada pkmalu kana seediq meniq berah namu.
17Mtswai, klaun mu. Qmneepah namu so nii we mnoda uxe namu gnkela. So nii ka qbsuran namu uri. 18Kiya de Utux Baro ge, pdaun na quwaq mpgeela kari ka pnugeela kari quri mooda mqraqil ka Kiristo. Kiya de wada mpbale da. 19Kiya ka priyux lnglungan namu, so maha sresun ka qnquwan namu. 20So kiya de meeyah ka ali psnberih pkbeyax lnglungan peeyah berah Bukung. Pyahun na uri ka Kiristo Yesu pnsramal na yamu. 21Asi ka hridun baro ka heya betaq ali pdngusun na ptutuy kana ani maanu ciida. Kiya ka Utux Baro spooda na quwaq mrtaso dmpgeela kari peeyah smmalu kana bobo dxeral cbeyo rmnengo. 22Rmnengo ka Moseh: ‘Bukung, Utux Baro su we mptutuy 1 mpgeela kari peeyah mtswai namu mntena yaku. Ani maanu ka rrengo na yamu we qbhangi kana. 23Ani ima ini qbahang mpgeela kari nii we maha qada peeyah kana seediq.’ 24Peeyah Samuel ma kana smnegul mpgeela kari, rmnengo kari pnugeela na we asi ka smneeru ali nii uri. 25Laqi dmpgeela kari ka yamu ma mplutuc namu pnsdhegan rudan namu cbeyo daha Utux Baro. Kiya ka rnengo Abraham: ‘Mooda ltlutuc lqlaqi su sblequn ka kana klegan seediq bobo dxeral.’ 26Kiya de Utux Baro ge, pnheyu na ka tnqliyan na we pllayun na smkagul yamu hini. Ssbleyaq na yamu ma so txtaxa namu kmpriyux ma mlatac qnnaqah qneepah.”
Atualmente Selecionado:
Qneepah 3: Stgdaya
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
The Bible Society in Taiwan, 2020
© 台灣聖經公會版權所有，2020