ወንጌል ዘማቴዎስ 4

ምዕራፍ 4

በእንተ ጾሙ ወተመክሮቱ ለእግዚእ ኢየሱስ

1 # ማር. 1፥12-13፤ ሉቃ. 4፥1-13፤ ዕብ. 4፥15። ወእምዝ ወሰዶ መንፈስ ለእግዚእ ኢየሱስ ገዳመ ከመ ይትመከር እምኀበ ዲያብሎስ። 2#ዘፀ. 34፥28። ወጾመ አርብዓ መዓልተ ወአርብዓ ሌሊተ ወእምድኅረ ዝ ርኅበ። 3ወቀርበ ዘያሜክሮ ወይቤሎ እመሰ ወልደ እግዚአብሔር አንተ በል ከመ እላ አእባን ኅብስተ ይኩና። 4#ዘዳ. 8፥3። ወአውሥአ እግዚእ ኢየሱስ ወይቤሎ ጽሑፍ «ከመ አኮ በኅብስት ክመ ዘየሐዩ ሰብእ አላ በኵሉ ቃል ዘይወፅእ እምአፉሁ ለእግዚአብሔር።» 5ወእምዝ ነሥኦ ዲያብሎስ ወወሰዶ ውስተ ቅድስት ሀገር ወአቀሞ ውስተ ተድባበ ቤተ መቅደስ። 6#መዝ. 90፥11-16። ወይቤሎ እመሰ አማን ወልደ እግዚአብሔር አንተ ቅንጽ እምዝየ#ቦ ዘኢይጽሕፍ «ቅንጽ እምዝየ» ወተወረው ታሕተ እስመ ጽሑፍ «ከመ ለመላእክቲሁ ይኤዝዞሙ በእንቲኣከ ከመ ይዕቀቡከ በኵሉ ፍናዊከ ወበእደዊሆሙ ያነሥኡከ ከመ ኢትትዐቀፍ በእብን እግርከ።» 7#ዘዳ. 6፥16። ወአውሥአ እግዚእ ኢየሱስ ወይቤሎ ካዕበ ጽሑፍ «ኢታመክሮ ለእግዚአብሔር አምላክከ።» 8ወእምዝ ነሥኦ ዲያብሎስ#ቦ ዘይቤ «ወአዕረጎ» ውስተ ደብር ነዋኅ ጥቀ ወአርአዮ ኵሎ መንግሥታተ ዓለም ወኵሎ ክብሮሙ። 9ወይቤሎ ዘንተ ኵሎ እሁበከ እምከመ ሰገድከ ሊተ ወአማኅከኒ። 10ወእምዝ ይቤሎ እግዚእ ኢየሱስ ሑር እምድኅሬየ ሰይጣን ጽሑፍ ለእግዚአብሔር አምላክከ ትስግድ ወኪያሁ ባሕቲቶ ታምልክ። 11#ዮሐ. 1፥52፤ ዕብ. 1፥6-14። ወእምዝ ኀደጎ ዲያብሎስ ወናሁ መላእክት መጽኡ ይትለአክዎ።

ዘከመ ነበረ በቅፍርናሆም

12 # 14፥3። ወሰሚዖ እግዚእ ኢየሱስ ከመ አኀዝዎ ለዮሐንስ ተግኅሠ ውስተ ደወለ ገሊላ። 13ወኀደጋ ለናዝሬት ወመጺኦ ኀደረ ቅፍርናሆም እንተ መንገለ ባሕር ውስተ አድባረ ዛብሎን ወንፍታሌም። 14ከመ ይትፈጸም ዘተብህለ በኢሳይያስ ነቢይ እንዘ ይብል። 15#ሉቃ. 6፥17። «ምድረ ዛብሎን ወምድረ ንፍታሌም ፍኖተ ባሕር ማዕዶተ ዮርዳኖስ (ጰራልዩ ወጰራልያስ) ወገሊላ ዘአሕዛብ። 16#ኢሳ. 9፥1-3። ሕዝብ ዘይነብር ውስተ ጽልመት ርእየ ብርሃነ ዐቢየ ወለእለሂ ይነብሩ ውስተ ጽልመት ወጽላሎተ ሞት ብርሃን ሠረቀ ሎሙ።»

በእንተ ትምህርት ቀዳሚት ዘመሀረ እግዚእ ኢየሱስ

17ወእምይእቲ ዕለት አኀዘ እግዚእ ኢየሱስ ይስብክ፥ ወይበል ነስሑ እስመ ቀርበት መንግሥተ ሰማያት።

በእንተ ቀዳማውያን ሐዋርያት

18 # ማር. 1፥16-19፤ ሉቃ. 5፥1-11፤ ዮሐ. 1፥35-43። ወእንዘ ያንሶሱ መንገለ ባሕረ ገሊላ ርእየ ክልኤተ አኀወ ስምዖንሃ ዘተሰምየ ጴጥሮስ ወእንድርያስሃ እኅዋሁ እንዘ ይወድዩ መርበብቶሙ ውስተ ባሕር እስመ መሠግራን እሙንቱ። 19#ሕዝ. 47፥10። ወይቤሎሙ እግዚእ ኢየሱስ ንዑ ትልዉኒ ድኅሬየ ወእሬስየክሙ ትኩኑ መሠግራነ ሰብእ። 20ወበጊዜሃ ኀደጉ መሣግሪሆሙ ወተለውዎ። 21ወኀሊፎ ሕቀ እምህየ ርእየ ካልኣነ ክልኤተ አኀወ ያዕቆብሃ ወልደ ዘብዴዎስ ወዮሐንስሃ እኅዋሁ ውስተ ሐመር ምስለ ዘብዴዎስ አቡሆሙ እንዘ ይሠርዑ ወያስተሣንዩ#ቦ ዘኢይጽሕፍ «ወያስተሣንዩ» መሣግሪሆሙ ወጸውዖሙ። 22ወበጊዜሃ ኀደጉ ሐመሮሙ ወዘብዴዎስሃ አባሆሙ ወተለውዎ።

በእንተ ቀዳማውያት መንክራቲሁ ለእግዚእ ኢየሱስ

23 # ሉቃ. 4፥15-31፤ ግብረ ሐዋ. 10፥38። ወአንሶሰወ እግዚእ ኢየሱስ ውስተ ኵሉ ገሊላ እንዘ ይሜህር በምኵራባቲሆሙ ወይሰብክ ወንጌለ መንግሥት ወይፌውስ ኵሎ ደዌ ወኵሎ ሕማመ ዘውስተ ሕዝብ። 24#ማር. 6፥56። ወወፅአ ስሙዓተ ነገሩ ውስተ ኵላ ሶርያ ወአምጽኡ ኀቤሁ ኵሎ ድውያነ#ቦ ዘኢይጽሕፍ «ኵሎ ድውያነ» ወኵሎ ሕሙማነ ዘለለ ዚኣሁ ሕማሞሙ ወጽዑራነ ወእለሂ ቦሙ አጋንንት ወወርኃውያነ ወእለሂ ነገርጋር ወመፃጕዓነ ወአሕየዎሙ ለኵሎሙ። 25ወተለውዎ ብዙኃን አሕዛብ እምገሊላ ወእምዐሥሩ አህጉር ወእምኢየሩሳሌም ወእምይሁዳ ወእማዕዶተ ዮርዳኖስ።

Atualmente Selecionado:

ወንጌል ዘማቴዎስ 4: ሐኪግ

Destaque

Copiar

Quer salvar seus destaques em todos os seus dispositivos? Cadastre-se ou faça o login

Saiba mais sobre a ሐዲስ ኪዳን በልሳነ ግእዝ

ወንጌል ዘማቴዎስ 4

Versículos Bíblicos Populares relacionados a
ወንጌል ዘማቴዎስ 4

Ouça ወንጌል ዘማቴዎስ 4

Bíblia:

ግዕዝ

Versão: ሐዲስ ኪዳን በልሳነ ግእዝ - ሐኪግ