Luka 5
5
O Pitahidang ni Yis to Nisawawaan
(Matay 4.18-22; Maroko 1.16-20)
1Yo ccay a romi'ad tomireng ci Yis i lawac no Kinisarit hananay a fanaw. Macaco^co^co ko finawlan a miraod ci Yisan to sapitngilaw to sowal no Kawas. 2Ma'araw ni Yis ko tosa a tamina i lawac. Ma^podto itiya koya mifotingay a misawsaw to salil nangra. 3Saka, dakaw sa ci Yis to ccay noya tamina, o tamina ni Simon koya. <<Ckrohen to mamang konini a tamina a paliyas to lawac,>> han ni Yis ci Simon. Ta aro' sato Cingra i tamina a pasayra i finawlan a pasifana'.
4Mahrek ci Yis a pakimad i, <<'Iwasen ko tamina a patayra i talolongay. Tfaden ko salil namo a mifoting,>> han Ningra ci Simon a somowal.
5Paca'of sa ci Simon a somowal, <<Singsiaw, salafii sa kami a matayal i, awaay ko maalaay niyam to maan aca. Nikawrira, do^do han ako ko sowal Iso a mitfad to salil,>> han ningra. 6Haen han nangra ko dmak i, masalil nangra ko adihayay a masaflaway a foting. Sakaftasan saan koya salil nangra. 7Saka, kawih han nangra koya cafay nangra a tamina a papipadang cangraan. Tayra sato cangra a mipadang i, tomes hanto nangra koya tosaay a tamina to foting. Sakalnengan sato koya tamina. 8Yo minengneng ci Simon Pitiro tonini a dmak i, hinokop sa i ka'ayaw ni Yis. Sowal sa cingra, <<Tapangaw, liyasen kako, nawhani o ciraraway a tamdaw kako,>> han ningra.
9O sakasaan ningra i, o nika fahka' nangra to nika adihay no maalaay nangra a foting. 10Mahaen ito a fahka' ko kapot ni Simon ci Yakop aci Yohani o wawa ni Cipitay. Pasowal sa ci Yis ci Simonan, <<Aka ka talaw, i ikor nonini i, papisa'opoen Ako kiso to tamdaw a matiya o pifoting namo,>> han Ningra.
11Pacakat hanto nangra i hkal ko tamina nangra. Sawad hanto nangra ko maamaan nangra a mitoor i ci Yisan.
O Piadah ni Yis to Malono'ay a Adadaay
(Matay 8.1-4; Maroko 1.40-45)
12Nanoya, yo itira ci Yis i ccay a niyaro' i, ira ko ccay a malono'ay. Ma'araw ningra ci Yis i, hinokop sa a mingitangit, <<Tapangaw, ano o faloco' Iso i, pakakorac#5.12 pakakorac -- Nengnengen i Matay 8.2. Kiso i takowanan,>> saan.
13Laya' sa ci Yis to kamay a mikapa i cingraan. <<O faloco' Ako tisowanan, kakoracto,>> han Ningra. Tangsol sa a maadah koya malono'ay a tamdaw. 14Palimo'ot han ni Yis cingra, <<Aka ka somowal i cimacimaan. Katayra kiso i citodongay to ta'ong a patiri' to tireng iso. Ta do^doen ko limo'ot ni Mosi a pacakat to maan i Kawas a pawacay i tamdamdaw to nika korac iso,>> han Ningra.
15Nikawrira, mangalef a mangalef a matnak ko lihaf to pakayniay i ci Yisan. Sa'opo sa ko 'alomanay a finawlan to sapitngilaw to sowal ni Yis ato sapiadahaw Ningra to adada nangra. 16Nikawrira, miliyas ci Yis a tayra i kato'olan a mitolon.
O Piadah ni Yis to Ma'piay a Adadaay
(Matay 9.1-8; Maroko 2.1-12)
17Yo ccay a romi'ad yo pasifana' ci Yis i, ira a maro' itira ko nai niyaroaro'ay no Kalili ato Yutaya ato nai Yirusalimay a papinapinaay a Farisay a tamdaw ato pasifana'ay to Rikec. Ira ko 'icel no Tapang i ci Yisan to sapiadah to adadaay. 18Ira ko papinapina a tamdaw to mililiday to ccay a ma'piay i kafoti'an. Misafaloco' a pacomod i laloma' no loma' i cingraan a patli i ka'ayaw ni Yis. 19Nikawrira, 'aloman ko tamdaw saka, awaay ko pakayraan nangra a pacomod cingraan. Saka, cakat sato cangra a tayra i fadahong a mitoplak to kawala, ta halokafoti'an han nangra a mi^pod koya adadaay i ka'ayaw ni Yis i sifo' no tamdamdaw. 20Mahapinang ni Yis ko paso'lin no faloco' nangra saka, sowal sa Cingra toya ma'piay, <<Idangaw, mahpolayto ko raraw iso,>> han Ningra.
21Oya sato a pasifana'ay to Rikec ato Farisay a tamdaw i, <<O maan a tamdawan konini iro milokes to Kawas a somowal saw? Cima ko pakahpolay to raraw? Caay hakiya ko Kawas a ccay ko pakahpolay?>> saan cangra a ngaliwngiw.
22Mahapinang ni Yis ko harateng nangra saka, sowal sa i cangraan, <<Nawiro mahaen ko harateng no faloco' namo saw? 23I cowaay ko rahodayay a sowal to nika <Mahpolto ko raraw iso,> sanay atoya <Kalomowad a romakat,> sanay a pasowal toya adadaay a tamdaw saw? 24O papahapinangen Ako kamo to nika o cisakowanay ko Wawa no Tamdaw i tini i hkal a mihpol to raraw,>> han ni Yis. Ta pasowal sa ci Yis toya ma'piay a tamdaw, <<Pasowalen Ako kiso, kalomowad. Alaento ko kafoti'an iso a minokay i loma' iso,>> han Ningra.
25Saka, tangsol sa a lomowad koya ma'piay i ka'ayaw no tamdamdaw a miala to kafoti'an ningra. Halo nika hmek han ningra to Kawas a minokay i loma' ningra. 26Safahka' sa cangra a ma^min. Hmek sato cangra a mingodo to Kawas. Sowal sa, <<Ma'araw niyam anini ko kafahka'an a dmak,>> saan.
O Pitahidang ni Yis ci Lifian
(Matay 9.9-13; Maroko 2.13-17)
27Ikor nonini a dmak, masadak ci Yis i, ma'araw Ningra ko nika maro' ni Lifi hananay a milisataay a tamdaw i pilisataan. <<Katayni a mitoor i Takowanan,>> han ni Yis cingra a somowal. 28Lowad sato ci Lifi, sawad han ningra ko maamaan a mitoor i ci Yisan.
29Mipatala ci Lifi i loma' ningra to tadamaanay a sapatahka ci Yisan. Ira a mikapot ko 'alomanay a milisataay ato romaroma a tamdaw tonini a tahka. 30Ira ko papinapina a Farisay a tamdaw ato kasakapot nangra a pasifana'ay to Rikec a langiwngiw a somowal i nisawawaan ni Yis, <<Nawiro mikapot kamo to milisataay ato tatiihay a tamdaw a komaen ato mita'owak saw?>> han nangra.
31Sowal sa ci Yis i cangraan, <<O tanoktokay a tamdaw i, caay ko papaisingen. Deng o adadaay ko papaisingen. 32O patosokan Ako a tayni i, caay ko mitahidangay to mo^celay a tamdaw, o mitahidangay Kako to ciraraway a tamdaw a papipasasiyor to faloco' a pasayra i Kawas,>> han Ningra.
O Pakayniay i Pisaliway a Licay
(Matay 9.14-17; Maroko 2.18-22)
33Ira ko somowalay ci Yisan, <<Mararid a misaliway, mitolon ko nisawawaan no paino'ay a Yohani. Hatiraayto ko nisawawaan no Farisay a tamdaw. Dengan o nisawawaan Iso ko komaenay mita'owakay,>> han nangra.
34Pasowal sa ci Yis, <<Yo iraho i pitahkaan ko papararamoden a fa'inay i, ma^deng kiso a papisaliway to widang ningra saw? Caay. 35Nikawrira, ano maraodto ko romi'ad to pialaan toya papararamoden a fa'inayan i, itiyato cangra a misaliway,>> han Ningra.
36Pasowal haca ci Yis i cangraan to ccay a tinako, <<Awaay ko micicihay to fa^lohay a riko' a miala to malosatapid to matlangay a riko'. Nawhani ano haenen i, macicih nira koya fa^lohay a riko'. Caay ka tatodong i matlangay a riko' koya nialaan i fa^lohay a riko' a satapid. 37O romasato, awaay ko miparoay i matlangay a falako a lofoc to fa^lohay a ^pah. Nawhani ano haenen i, maftas noya fa^lohay a ^pah koya matlangay a falako a lofoc, ta mataktak koya ^pah. Halofalako a lofoc a maftas. 38Orasaka, o fa^lohay a ^pah i, caay ka^ca o fa^lohay a falako a lofoc ko piparoan. 39O romasato, nakomaen ko tamdaw to matlangay a ^pah i, awaay ko mangalayay a komaen to fa^lohay a ^pah. Nawhani o matlangay ko nga'ay saan ko harateng ningra,>> han ni Yis.
Atualmente Selecionado:
Luka 5: AMIS2019
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© The Bible Society in Taiwan, 2019