Maroko 12
12
O Tinako to Tatiihay a Mifoloday
(Matay 21.33-46; Luka 20.9-19)
1Saka, patinako haca ci Yis i cangraan a pasifana', sowal sa Cingra, <<Ira ko ccay a palomaay to fadisoso' a tamdaw. 'Adipelen ningra ko taliyok. Karkaren ningra ko pihtecan to salang no fadisoso'. Patirengen ningra ko pikacawan. Ta pacaliw han ningra ko mifoloday tonini a pisafadisoso'an. Ta lomowad cingra a palafang i roma a kitakit. 2Maraodto ko pilitodan saka, ocoren ningra ko koli ningra a patayra i mifoloday a papiala to 'isal no kinaira no fadisoso'. 3'Arawhani, rpet han noya mifoloday konini a koli a mipalo. Pawakawak han nangra cingra a papinokay. 4Saka, ocoren haca no tawki no pisafadisoso'an ko roma a koli ningra i, padoka'en nangra ko fongoh ningra a misamsam i cingraan. 5Ocoren haca no tawki no pisafadisoso'an ko roma a koli ningra i, mapatay nangra cingra. Ocoren haca ningra ko roma a 'alomanay a koli i, haenen nangra a mipalo ko romaroma. Patayen nangra ko romaroma. 6Saikorayto i, ocoren noya tawki no pisafadisoso'an ko dengan a kakaolahan ningra a wawa a patayra i mifoloday, <Ano o wawa ako i, kangodoen nangra kiya,> nasa ko harateng ningra. 7'Arawhani, masasowasowal koya mifoloday, <O mamirocok to omah no tawki no pisafadisoso'an konini a tamdaw. Tatata. Patayaw ita cingra. Ta o no mitato konini a omah ningra,> saan. 8Saka, rpet hanto nangra koya wawa a mipatay, ta mafahkol a mifalah i papotal no pisafadisoso'an ko horac a tireng,>> saan.
9Ta licay sa ci Yis, <<Ano hatira i, maanen no tawki noya pisafadisoso'an ko dmak hakiya? Caay ka^ca o tatayra cingra a mipatay tonini a mifoloday. Ta o papatoroden ningra i roma a mifoloday koya pisafadisoso'an.
10<O kinafalah a fokloh no misaloma'ay a tamdaw i,
malata'enengan no loma'.
11O nitayalan no Tapang konini.
O kafahka'an a nengnengen ita!>
Yasanay a matilid i Fangcalay Cudad i, caho ka asip namo saw?>> han ni Yis.
12Nawhani, mafana' ko kakridan no Yutaya a tamdaw tona tinako, o cangra ko ni kakteran ni Yis, saka, sapirpetan Cingraan. Nikawrira, matalaw cangra to finawlan saka, liyas sato i Cingraan a itoan.
O Pakayniay i Pipasata to Hongti no Loma a Licay
(Matay 22.15-22; Luka 20.19-26)
13Nanoya, maocor ko papinapina a Farisay a tamdaw ato masakapotay ni Hiroti a mapatayra i ci Yisan. Onini i, Maanen ita ko nipipamoraraw to sowal ni Yis a misa'fit o sanay nangra. 14Saka, tayra cangra i Cingraan a somowal, <<Singsiaw, mafana' kami to nika o so'linay a tamdaw Kiso. Ano masamaamaan ko piharateng no tamdaw i, o so'linay ko pipasifana' Iso to tamdaw to sowal no Kawas, nawhani caay paska Kiso to cimacima a tamdaw. Pasowalen kami, masamaan ko harateng Iso, o pipasata i hongti no Loma i, o maliyangay to Rikec ita haw? O papasata kita, ano ^ca i, caay ko papasata kita?>> han nangra.
15Mahapinang ni Yis ko nika o pisafana' nangra konini. Sowal sa, <<Nawiro sapisa'fitan kamo i Takowanan? Pataynien ko ccay a tinali a patiri' i Takowanan!>> han Ningra.
16Patayra han nangra ko ccay a tinali i Cingraan. Itiya i, milicay ci Yis, <<O nima a faco konini saw? O nima a tilid konini saw?>> han Ningra.
<<O no hongti no Loma,>> han nangra a paca'of.
17Pasowal sato ci Yis, <<Ano hatira i, o no hongti no Loma a maamaan i, patikoen i hongti no Loma. O no Kawas a maamaan i, patikoen i Kawas,>> han Ningra.
Safahka' sato cangra a mitngil tonini a sowal Ningra.
O Pakayniay i Nika Lomowad a Ma'orip nai Patay a Licay
(Matay 22.23-33; Luka 20.27-40)
18O romasato, tayra ci Yisan a milicay ko caay paso'lin to nika lomowad a ma'orip nai patay sanay a Satukay a tamdaw. 19Sowal sa cangra, <<Singsiaw, matilid ni Mosi ko sowal to saki titaanan toya <Ano ira ko mapatayay ko kaka, ano caho ka ciwawa ko nisidayan ningra a fafahi i, o kakalafafahien no safa ko nano fafahi no kaka ningra a pawawa to malotloc no kaka ningra,> saan. 20Ira i 'ayaw ko papitoay a malikaka to matiniay ko dmak. Cifafahi ko sakakaay. Caho ka ciwawa i, mapatayto. 21Kalafafahi han no safa ningra koya maponengay a o nano fafahi no kaka ningra. Caho ka ciwawa i, mapatayto. Mahaen ko sakatatolo a safa. 22Mahaen cangra a papito a cifafahi toya fafahiyan a caay ka citloc. Ta saikoray sato haloya a fafahiyan a mapatay. 23Ano hatira i, i kalomowadanto a ma'orip nai patay i, cima nangra ko cacifafahi toya fafahiyan saw? Nawhani, papito cangra a ciramod toya fafahiyan,>> han nangra.
24Pasowal sa ci Yis i cangraan, <<Nawiro moraraw ko harateng namo saw? Nawhani, mafokil kamo to Fangcalay Cudad, caay haca kafana' to 'icel no Kawas. 25Ano lomowadto a ma'orip nai patay ko tamdamdaw i, caayto ko caciramod. Matiyato o i kakarayanay a coyocoyoh ko 'orip nangra. 26Itira i nitilidan ni Mosi a kimad to pakayniay i matodohay a cifadalay i, caho ka asip namo saw ko nano sowal no Kawas to pakayniay i nika lomowad a ma'orip ko mapatayay? O sowal no Kawas i ci Mosian i, <O Kawas ni Apraham, o Kawas ni Isak, o Kawas ni Yakop Kako,> saan. 27O tatodong nonini a sowal i, o Kawas i, caay ko Kawas no mapatayay. O Kawas no ma'oripay o sanay. Wata: ko nika moraraw no harateng namo,>> han ni Yis.
O Kakalimlaan a Limo'ot
(Matay 22.34-40; Luka 10.25-28)
28Itiya i, ira a miraod ko ccay a pasifana'ay to Rikec. Matngil ningra ko nika laliyaliyang nangra. Mahapinang ningra ko nika nga'ay no nipipaca'of ni Yis to Satukay a tamdaw saka, licay han ningra ci Yis, <<I tini i polong no limo'ot i, i cowaay ko kakalimlaan a limo'ot saw?>> han ningra.
29Paca'of sa ci Yis, << <Pitngil kita o Israil! Deng ccay aca ko Tapang ita a Kawas. 30Saka, sarocoden ko faloco' iso, sarocoden ko 'orip iso, sarocoden ko harateng iso, sarocoden ko 'icel iso a maolah to Tapang a Kawas iso,> saan. Onini ko kakalimlaan a limo'ot. 31O sakatosa a kakalimlaan a limo'ot i, <Samatiyaen o nika olah iso to tireng ko nika olah iso to tao,> saan. Awato ko mikikakaay tonini a tosa a limo'ot,>> han Ningra.
32Pasowal sa koya pasifana'ay to Rikec i ci Yisan, <<Singsiaw, mato sowal Iso, deng ccay aca ko Kawas. Awaay ko roma yasanay a sowal Iso i, so'linay kora. 33O romasato, sarocoden ko faloco', sarocoden ko harateng, sarocoden ko 'icel a maolah to Kawas atoya samatiyaen o nika olah to tireng ko nika olah iso to tao, yasanay a sowal Iso i, ikaka no nipipacakat to masamaamaanay a nitodohan a sapato'aya#12.33 sapato'aya -- o roma i, sapatafang (katimol). ato romaroma a cilisinay a sapato'aya ko nika nga'ay,>> han ningra.
34Mahapinang ni Yis ko nika fana' ningra a paca'of saka, sowal sa i cingraan, <<Caayto piraay kiso to Kitakit no Kawas,>> han Ningra.
Nanitiya a paskato ko tamdaw a milicay i ci Yisan to maan aca.
O Pakayniay i ci Kristoan a Licay
(Matay 22.41-46; Luka 20.41-44)
35Yo pasifana' ci Yis i Fangcalay Pita'ongan i, sowal sa, <<Nawiro o tloc ni Tafiti ci Kristo saan ko sowal no pasifana'ay to Rikec saw? 36O nano mangiyangiay no Fangcalay 'Adingo ko faloco' ni Tafiti saka pasowal sa,
<Pasowal ko Tapang to Tapang ako,
Kamaro' i kawanan Ako tangasa i papihinokopan Ako to 'ada Iso i pasaripa'an Iso,> sanay.
37<O Tapang> han ni Tafiti Cingra a mitahidang. Ano hatira i, maanen ni Kristo a malatloc ni Tafiti saw?>> han ni Yis a milicay.
O Pina'on to Pasifana'ay to Rikec
(Matay 23.1-36; Luka 20.45-47)
Maolah a mitngil ko 'alomanay a finawlan to sowal ni Yis. 38Yo pasifana' i cangraan haw i, sowal sa Cingra, <<Pina'on kamo to pasifana'ay to Rikec. Maolah cangra a ciriko' to kakaya'ay a misarakarakat i kalali'acaan a ta'ongen no tamdaw, 39o romasato, mangalay cangra a maro' i micidekay a kamaro'an i kasa'opoan a loma' ato tadamaanay a kamaro'an i pitahkaan. 40'Afasen nangra ko loma' no maponengay. O sapa'araw aca ko nipitolon nangra to kakaya'ay a pitolon. Saka, caay ko sasamadahen no Kawas ko nipitfoc i cangraan,>> han Ningra.
O Pipacakat no Maponengay
(Luka 21.1-4)
41Maro' ci Yis i ngata no pipakingkingan a hako no Fangcalay Pita'ongan, nengneng sa to samaanay ko nipiparo no 'alomanay a tamdaw to payso i hako. Adihay ko niparoan no 'alomanay a cidafongay a tamdaw to payso. 42Ikor i, ira a tayra ko ccay a pakoyocay a maponengay a miparo to tosa a laliping, onini i, o todongay no ccay a payso#12.42 ccay a payso -- todongay no tosa a laliping.. 43Tahidang han ni Yis ko nisawawaan Ningra a somowal, <<So'linen Ako a somowal kamo, ikaka no niparoan no nimanima a tamdaw ko niparoan nonini a pakoyocay a maponengay a payso. 44Nawhani o nano rafas no dafong nangra ko niparoan no roma a tamdaw. Nikawrira, masapakoyocayto cingra i, ^min han ningra a pacakat ko polong no saka'orip no tireng,>> han Ningra.
Atualmente Selecionado:
Maroko 12: AMIS2019
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© The Bible Society in Taiwan, 2019