Maroko 15
15
O Piliclic ni Pilato
(Matay 27.1-2, 11-14; Luka 23.1-5; Yohani 18.28-38)
1To dafak sato i, kalah sa a masa'opo ko kakridan no citodongay to ta'ong ato kalas no niyaro' ato pasifana'ay to Rikec ato polong no lomaocay a masasowasowal. Ta palit hanto nangra ci Yis a mikidkid a patorod i ci Pilatoan. 2Liclicen ni Pilato ci Yis, <<O hongti no Yutaya a tamdaw Kiso haw?>> han ningra.
Paca'of sa ci Yis, <<O sowal iso konini,>> han Ningra.
3Adihay ko pipakokot no kakridan no citodongay to ta'ong to pakayniay i ci Yisan a dmak. 4Saka, liyawen haca ni Pilato a miliclic ci Yis a somowal, <<Tngilen, hatini ko nika adihay no nipipakokot nangra to pakayniay i Tisowanan i, caay paca'of Kiso to maan aca saw?>> han ningra.
5Nikawrira, caayto paca'of ci Yis to maan aca. Safahka' sato ci Pilato.
O Pipastek i Patay
(Matay 27.15-26; Luka 23.13-25; Yohani 18.39--19.16)
6Maraod ko Pita'lifan a Lisin to mihcahcaan i, ira ko pinangan ni Pilato a mitdal to nilongocan no finawlan to ccay a marofoay a tamdaw. 7Itiya i, tatodong sa a ira ko ccay a tamdaw ci Parapas hananay, o mapakapotay a marofo i namiparawraway a mipatay to tamdaw. 8Raod sato ko finawlan ci Pilatoan, samatiyaen o pinangan to ha:tiniay ko dmak to saki tamiyanan, han nangra a mingitangit cingra. 9Licay sa ci Pilato i cangraan, <<Papitdal kamo i takowanan to hongti no Yutaya a tamdaw haw?>> han ningra. 10O sakasaan ningra a somowal i, mafana' ci Pilato to nika o nano 'inap no kakridan no citodongay to ta'ong ci Yisan ko sapatorod nangra i cingraan.
11Nikawrira, Paororen no kakridan no citodongay to ta'ong ko finawlan a somowal, ka o ci Parapas ko tatdalen han ci Pilato han nangra. 12Milicay haca ci Pilato i finawlan, <<Ano hatira i, maanen ako ko dmak toya hongti no Yutaya hananay namo a tamdaw?>> han ningra.
13Alaclicli' sa ko finawlan, <<Paceken Cingra i ciwcika!>> saan.
14Licayen ni Pilato, <<Nao maan ko tatiihay a dmak Ningra saw?>> han ningra.
Nikawrira, mangalef a mangalef ko picli' nangra, <<Paceken cingra i ciwcika!>> saan.
15O sapalipahakaw ni Pilato to finawlan saka, tdal hanto ningra ci Parapas. Ta mipalimo'ot haca a mipalo ci Yisan, patorod hanto ni Pilato cangra a papipacek i ciwcika ci Yisan.
O Pisamsam no Sofitay ci Yisan
(Matay 27.27-31; Yohani 19.2-3)
16Saka, krid hanto no sofitay ci Yis a patayra i potal no loma' no mikomoday. Ta pasa'opo hanto nangra ko sofitay a ma^min. 17Pariko' han nangra ci Yis to tarangitangay#15.17 tarangitangay -- o roma i, ko^timay (katimol), maloloay. a kafafang. Sa'nged han nangra ko fadal a mipakafong i Cingraan. 18<<Hongti no Yutaya a tamdaw, nanay mida'oc a malahongti Kiso,>> han nangra Cingra a mita'ong. 19Sti'en nangra to pnen no 'ardo ko fongoh Ningra, sopa'en nangra, mipitosor cangra a misata'ota'ong Cingraan. 20Mahrek cangra a misamsam i Cingraan i, hlongen nangra koya tarangitangay a kafafang Ningra. Ta pariko'en haca nangra Cingra to nano riko' Ningra, ta krid hanto nangra ci Yis a pasadak a mipacek i ciwcika.
Mapacek ci Yis i Ciwcika
(Matay 27.32-44; Luka 23.26-43; Yohani 19.17-27)
21Itiyasato, malitmoh nangra i fatad no lalan ko minokayay nai omah a tamdaw (ci Simon no Kirini, o mama ni Aliksantor aci Rufus.) Patangic han nangra cingra a papi'orong to ciwcika ni Yis. 22Kriden nangra ci Yis a patayra i Kolkota hananay, o tatodong nonini i, o <<'Okak no Fongoh>> sanay. 23Itiya i, pananomen nangra ci Yis to nipacamolan to mir a fadisoso' a ^pah. Nikawrira, caay pinanom ci Yis. 24Ta pacekento nangra ci Yis i ciwcika, ta mararitos haca cangra a misakilac to riko' Ningra. 25Siwa ko toki to dafak a paceken nangra ci Yis i ciwcika. 26O nitilidan a raraw Ningra a paya i, <<O Hongti no Yutaya a tamdaw,>> saan. 27Pakapoten nangra i ci Yisan ko tatosa a kokong a mipacek i ciwcika, i kawanan Ningra ko ccay, i kawili Ningra ko ccay.#15.27 Ira ko katlangay a cudad matongal i 28 a tosir Onini i, o nika lahci no sowal i Fangcalay Cudad toya, Mapakapot Cingra to ciraraway a masa'osi, malahciayto konini a sowal (tiri'en i Luka 22.37).
29'Inga'ing sa to fongoh ko mitafsiway a tamdaw a milikaf i ci Yisan a somowal, <<Is! Kiso oya plengen Ako ko Fangcalay Pita'ongan, ta patirengen Ako i tolo a romi'ad yasanay a tamdaw. 30Dada, ka^pod nai ciwcika a pa'orip to tireng Iso!>> han nangra.
31Mahaen ko kakridan no citodongay to ta'ong ato pasifana'ay to Rikec a mitongangan Cingraan a somowal, <<Pakapa'orip Cingra to tao i, caay pakapa'orip to tireng,>> saan cangra a masasowasowal. 32<<Hongti no Israil, Kristoaw, dada, ka^pod i matini nai ciwcika. Pa'arawen kami, ta paso'lin kami i Tisowanan!>> han nangra.
Haloya nipakapotan i ci Yisan a mapacekay i ciwcika a milokes ci Yisan.
O Patay ni Yis
(Matay 27.45-56; Luka 23.44-49; Yohani 19.28-30)
33Yo kalahokanto i, sato'man sa ko polong noya hkal, ma^deng tolo a tatokian ko halafin. 34Ta tolo ko toki to hrek no lahok i, satata'ang sa ci Yis to ngiha' a micli', <<Iloi, Iloi, lema sapaktani?>> saan. O tatodong nonini i, <<Kawasaw ako, Kawasaw ako, nawiro falahen Iso Kako a miliyas saw?>> o sanay.
35Matngil noya tomirengay itira a papinapina a tamdaw konini a sowal i, sowal sa, <<Tngilen, mitahidang Cingra i ci Iliyaan,>> saan. 36Saka, cikay sa ko ccay a tamdaw a papihcep i 'acicimay a ^pah ato parok ta pakafiten ningra i pnen no 'ardo a papingata i ngoyos ni Yis a papihcep, ta sowal sa, <<Akaho, nengnengaw ita, latek tayni ci Iliya a mi^pod i Cingraan!>> saan cingra.
37Satata'ang sa to ngiha' ci Yis a micli', ta lafot sato ko sla' Ningra.
38Itiya i, latosa sa a macinas nai fafaed tahira i kala^no ko maca'itay a sapala'ed a kiradom i laloma' no Fangcalay Pita'ongan. 39Ma'araw no ccay a tomirengay i ka'ayaw no ciwcika a kakridan no sofitay ko nika matira no nipicli' ato#15.39 O roma a katlangay a cudad awaay no nipicli' ato. nika patay ni Yis i, sowal sa, <<So'linay, o Wawa no Kawas konini a tamdaw,>> saan.
40Ira i ra:ay a minengneng ko papinapina a fafahiyan. Ira itira ci Mariya no Maktala, ira haca ci Mariya o ina no ka^mangay a Yakopan aci Yosif ato ci Salomi. 41Yo i Kaliliho ci Yis i, mararid cangra a mihaklong i Cingraan a mipadang. Ira a mikapot cangraan ko romaroma a fafahiyan. O nano mihaklongay cangra ci Yisan a tayra i Yirusalim.
O Pitadem ci Yisan
(Matay 27.57-61; Luka 23.50-56; Yohani 19.38-42)
42Nanoya, pisakalafianto ko romi'ad i 'ayaw no Pasla'an a Romi'ad to pipatalaan a romi'ad. 43Itiya i, saki^mel sa to faloco' ci Yosif no Arimatiya a tayra i ci Pilatoan a mingitangit to sapialaaw to tireng ni Yis. Onini a tamdaw i, o tadamaanay a lomaocay, o hinatalaay cingra to pikowan no Kawas. 44Ckok sa ci Pilato a mitngil to nika patayto ni Yis. Orasaka, tahidang hanto ningra koya kakridan no sofitay, <<Halafinayto a mapatay ci Yis haw?>> han ningra a milicay. 45Yo mapalitato ni Pilato ko nano sowal noya kakridan no sofitay to nika patayto ni Yis i, papiala hanto ni Pilato ci Yosif to tireng ni Yis. 46Saka, 'aca sato ci Yosif to nisanga'an to kliw a kiradom, ^pod hanto ningra ko tireng ni Yis a miala a mitafo toya kiradom, ta tli han ningra i nito^to'an a 'ongcoy a tadem, walinen haca ningra ko fokloh a mitli i fawahan no tadem. 47Ira itiya ci Mariya no Maktala ato ina ni Yosif ci Mariya a misimaw ato minengneng to pitlian i ci Yisan.
Atualmente Selecionado:
Maroko 15: AMIS2019
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© The Bible Society in Taiwan, 2019