เพรโด่แนพู๊ เต๊เห่ เตเฮ๊เบ่ เหร่อ เด๊อ เง
เตเฮ๊เบ่ เหร่อ เด๊อ เง
เพรโด่แนพู๊ เต๊เห่ เด๊อ ลีเพรโด่แนพู๊ เต๊เห่ อากู เออเต๊เห่ เนอหม่า, อาหรี่อาแก จิจือ เป่แฮ เร๊อ ลีลูกา แพ๊. ลีเออ อา รา แด๊โฉโลเป่อู เร๊อ เหย่ซู่ อา โคเจ่ กู ลู่เล๊อ เต๊เห่เนอ, แหย่โยบูโพ๊ แบ่เจ่ยูเป่เหย่ซี แกล๊ ฮู๊เต, อาโด่แน เปซีจว๊าโล เป่อูเร๊อ เหย่ซู่ อา เตซิครือมีลา อาหรี่อาแก, เร๊อ อาเป๊อแถ่ โด่แน เด๊อ “วีเยรูซาเล็ม, ยูดาห์เก่, สะมาเรียเก่ เร๊อ อาโด่แนปีชี จว๊าโต่เด๊อเห่ขุตื๊อดื่อ,” (๑:๘) ฮู๊เต เนอหม่า, ลีเออต๊าบ่า อาเตเรเฮ๊โลเป่อู เตหรี่เตแก อาโหมะกล่อหม่า เออเต๊เห่เฮ๊อ, เออหม่า ครี๊พู๊ เป๊อแถ่ เม เตเอ่เตแร เด๊อแกแยยิวพู๊ เต๊เห่ อาเกล โทเร๊อ ครี๊พู๊ อาเตหยื่อเตแหน่ เออเต๊เห่เนอ, อาเป๊อแถ่ จว๊าโน ลอเฮ๊อ เด๊อ ยูดาห์พู๊ เต๊เห่ อาเกลเฮ๊อ, เร๊อ อา โอ่เอ๊แถ่ เร๊อ โอ่เอ๊แถ่ ลอเฮ๊อเห่ขุต๊าบ่าเฮ๊อ. เพรราลี ซิหยื่อ เด๊อะโลตาเต เป่โป่ เพร แด๊ลี เต๊เห่ เร๊อ ครี๊พู๊เออเต๊เห่เนอ, อา เตเรเมปย๊าแก โรมันอาเทออาเก่หม่าโต่, โทโต่ ครี๊พู๊ อาเตหยื่อเตแหน่, เออเนอ อาเมเล๊อบาแถ่เบ่ ลอแพ๊แกแยยิวพู๊ เต๊เห่ อาเตจ๊อบู่จ๊อเบแพ๊.
อู โด่แน เหย่ซู่ อา เตซิดรือมีลา เร๊อ อา โลจว๊าปีชี แหล่แถ่ เร๊อ แหล่แถ่, โท๊โต่ เพรโด่แนพู๊ เต๊เห่ จว๊าเมโอ่ทวาแถ่ เป่อู เพรหยื่อตู๊หมู่ตอกล๊อ เต๊เห่ เออเนอ, ลี เออต๊าบ่า ราโล เป่ เตหรี่เตแก อา แก่ช๊าแกแร อา กู๊เหล่กู๊แบ่ โซโผ่. เออโซเจ่อ หม่า แคร๋ หม่าอิเตเฮ๊เนอ, (๑) เหย่ซู่ กา แก๊แถ่ โท เด๊อ ม๊อขุ เร๊อ ครี๊พู๊ อา เตจ๊อบู่จ๊อเบ เป๊อแถ่ดุแถ่แหล่แถ่ เด๊อวีเยรูซาเล็ม อากู. (๒) เหย่ซี จว๊าเล เม แหล่แถ่ โต่ เด๊อ ปาลาซาเก่ เร๊อ (๓) เหย่ซี จว๊าเล เมเป่แฮ ตีวี๊ตาวา โต่แลแค เด๊อเมดิเตอเรเนียน เทออ่อดุอาแก่ช๊า เร๊อ เมจว๊าโต่แลแค เด๊อ โรมันเก่.
ลีเพรโด่แนพู๊ เต๊เห่ อา เตเอ่เตแร เด๊อ อา โลปีชีดุเล๊อ หม่า หม่าเฮ๊อ แหย่โยบูโพ๊ เมเต เออเนอ เฮ๊อ. เป๊อ ป่วย เด๊อ อู เอ๊เร๊อ เพ็นเทคอสต์ แด่เร๊อ ป่วย เด๊อ วี เยรูซาเล็ม อากู เนอเตอเนอ เบ๊อะเนอ, แหย่โยบูโพ๊แบ่เจ่ โอ่ เร๊อ อา เตอเรอฉว่าชอ เร๊อ อา แฮ แล เด๊อ เพรหยื่อเอ่เตฮู๊เนอเต๊เห อาลู. เร๊อ ลีเออต๊าบ่า แด๊โฉ่ลอปลีเร๊อ แหย่โยบูโพ๊แบ่เจ่ ยูแกล๊ยูโกล, เด๊อะอ๊าเด๊อะเหร่ เพรหยื่อเอ่เต ตู๊หมู่ตอกล๊อพู๊ เต๊เห่ เน๊อ เพรหยื่อเอ่เตตู๊หมู่ตอกล๊อ อา กู่กล๊อดุกู๊ฉู่ทู เต๊เห่. ครี๊พู๊เต๊เห่ อา เตแด๊โฉ่โด่แน เต๊เห่ เนอหม่าหม่า อาโพรเตอเรอฉว่าชอ แหน่เจ๊อ. เตเมทวาแถ่ อา เหน่ เต๊อเจ่อ โทเต๊อเจ่อ เด๊อ เต ลี เพรโด่แนพู๊ เต๊เห่ อากู เออเต๊เห่ เนอหม่า เป แม๊เถอะ เน๊อ เตโพรเตอเรอ ฉว่าชอ เออเต๊เห่ เนอ, อา โอ่เด๊อ เพรหยื่อเอ่แหน่เอ่เต เต๊เห่ อา เตโอ่เซอเพร เต๊เห่ อากู, เร๊อ เตหยื่อเอ่เต ตู๊หมู่ตอกล๊อพู๊ เต๊เห่ อา เตแบ๊ซว๊าแบ๊โค หนิลู อากู เออเนอแพ๊.
เตเฮ๊เบ่ โต๊โต่ เร๊อ โต๊โต่
แบ่เจ่ เหย่ซู่ อาโหง่เฮ๊แก เด๊อ คยาเล๊อ เร๊อ อา เตอ๊อแล. ๑:๑-๑๔
แกแย เด๊อ อา แถ่ คูยูดาห์ กู๊เหล่ ๑:๑๕-๒๖
เตจว๊าโด่แนโล เป่อู เด๊อ วีเยรูซาเล็ม อากู ๒:๑-๘:๓
เตจว๊า โด่แนโล เป่ อู เด๊อ ยูดาห์เก่ เร๊อ สะมาเรียเก่ ๘:๔-๑๒:๒๕
คูเปาโล อา เตเอ่เตแร ๑๓:๑-๒๘:๓๑
ก. เถ่เล จว๊าเม จอแปแหร่ อา เตเอ่เตแร อา เหร่อเล๊อโต๊โผ่ ๑๓:๑-๑๔:๒๘
ข. โอ่กู๊โอ่แก๊ แม๊เถอะ ตาฉื่อ เด๊อ วีเยรูซาเล็ม อากู ๑๕:๑-๓๕
ค. จว๊า เม จอแปแหร่ อา เตเอ่เตแร เนอโพ๊โต๊โพ๊ ๑๕:๓๖-๑๘:๒๒
ง. จว๊าเม จอแปแหร่ อา เตเอ่เตแร โซโพ๊โตโพ๊ ๑๘:๒๓-๒๑:๑๖
จ. อู ด๊อโอ่ คูเปาโล ทอกู เด๊อวีเยรูซาเล็ม เร๊อ วีซีซารียา เร๊อ วีโรม เต๊เห่ อาวีกู ๒๑:๑๗-๒๘:๓๑
Atualmente Selecionado:
เพรโด่แนพู๊ เต๊เห่ เตเฮ๊เบ่ เหร่อ เด๊อ เง: EKTNTGEN
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login