Matta 5
5
Nkee mara Kaa ra a Yolo
1Pa Yeso yǝ wǝrsǝ ɓeta dem wa, yǝ taa ɓoti a yolo yǝ kaɗa. Emfǝɗkaa ɓisa ɓǝ wo a sani, 2pa yǝɓǝ ntii fǝɗkǝra yǝn nkee me,
3“Saltǝra yǝ kaɗan a ɓaa ɓǝ maasǝ hanoo ɓoso a Wiso ɓa,
me kuɓsutu a liura wa ndǝ ɓoso.
4Saltǝra yǝ kaɗan a ɓan kuɗa teb ra ɓa,
me kǝ ɓǝ taa na'nkwiiti wa.
5Saltǝra yǝ kaɗan a ɓaa ɓǝn yausǝ ee ɓa ni,
me put ntaandi wa ndǝ ɓoso.
6Saltǝra yǝ kaɗan a ɓaa ɓǝn kurasǝ ɗoora ma mbraa sima a tom mbu yǝsǝ yaɓ a wiiyo a Kaa ni ɓa,
me ɓǝkǝ nkwee.
7Saltǝra yǝ kaɗan a ɓaa ɓǝ sǝ ma manyamanyato ɓa,
me ɓaa kǝ ɓǝ weɗa manyamanyato kǝn.
8Saltǝra yǝ kaɗan a ɓaa ɓǝsǝ ma kuti ɗekɗek ɓa,
me kǝɓǝ wǝr Kaa.
9Saltǝra yǝ kaɗan a ɓaa ɓǝn tisǝ ɓaa a kaɗ hurhur ɓa,
me ɓaa kǝɓǝ yar me em Kaa ɓa.
10Saltǝra yǝ kaɗan a ɓaa ɓǝ weesǝ kongsa a tom mbu yǝsǝ yaɓ a wiiyo a Kaa ni ɓa,
me kǝɓǝ taa kuɓsutu a liura wa.
11“Saltǝra yǝ kaɗan a sani me ɓeta ɓǝn sirsǝ, ɓǝn nasǝ kongsa, ɗǝm ɓǝn nkeen nsaad mbu kwalakwala ɓa a ɗuura sa, u para wa men niina. 12Sǝ hurkuɗa sǝ kwala, me sǝkǝ kon nsaa kwalari wa ɓoti a liura, me a ɗǝɗa finda ɓǝ nasǝ kongsa ɓannawanto tang ɓa.
Tuma ǝn mbu yaɓ ɓa
13“Saase sǝ tuma put ntaandi wa ɓa. Pa me tuma ɓaa ma songsongto usun, kiyǝ tomtomni kiya tom songsong ɗǝmǝu? Sem yaɓ ɗǝm a mbuka ra, ndub ɓaa kǝ tuk ndiira a noo ma natsa.
14“Saase sǝ nga tuma put taandi wa ɓa. Ur ɓaa marsǝ a kola wa yǝ nkaa yǝ tomma a nhuukǝra ra. 15Ɗǝm ɓaa nekaa arkumta a liki ma talo ra. Me maaso ɓaakǝ ɗangrǝ ɓoti a mbu ti ɓisa me yǝ na han ɗekɗek ɓa ɗuur siso nsaad. 16Maso ɗǝm, sǝ lee ɗekɗek to waaso yǝ too handa a wii ɓeta wa, me ɓǝ wǝr tinimse yaɓ yaɓ waaso, me ɓǝ nyoo Paase yǝ sǝ a liura wa.
Kung masaka Musa wa
17“Sǝ sen me nǝ wo me nǝ haarǝ mbu Masaka Musa ɓa, ma fǝɗkǝra Ɓannawanto ɓa ra, nǝ wo sem me nǝ ɓǝ haarǝ ra, pa nǝ wo me nǝ ɓǝ kunggu. 18Nǝn nkeesǝ ɓongtǝra, ndub me liura ma putu ɓǝ nɗiitǝ, nyorma kǝma sem fin hana ngeekelek u Masaka Musa wa ka nfaa wa ra, ndub me ɓaa kunggun nsaad. 19Me maaso yaa yǝ kausǝ hana fin a mbu Kaa yǝ nkeesǝ me aa tom ɓa ya, ɗǝm yǝ fǝɗkǝ ɓaata me ɓǝ tom maaso ya, ɓaa ka yar me yaa ngeekelek ya a kuɓsutu liura wa. Pa yaa yǝ ɓǝɗsǝ Masaka Musa ya ɗǝm yǝ fǝɗkǝ ɓaata me tom maaso ya, ɓaa ka yar me yaa kwangya a kusutu a liura wa. 20Pa me nǝn nkee sǝ ɓongtǝra, ndub me sǝ tom mbu yǝsǝ yaɓ a wiiyo a Kaa ni ɓa, a faɗ u ɓaa Farisiyawa ɓa ma malǝmaa Masaka Musa sa wa ra, sǝ kan a kuɓsutu a liura wa ra.
Fǝɗkǝra Yeso ra a nfiima
21“Sǝ kuran, ɓaa nkee sirta ɓǝnda me, ngǝ toɗ ete ra, ɗǝm yaa yǝ toɗsǝ ete ya, ɓaa kaa kankiita” 22Pa nǝn nkeesǝ me yaa yǝ nfiisǝ ate isi ya ɓaa kaa kankiita. Maso ɗǝm yaayǝ nkeesǝ ate isi me haura ya ɓaa kasa ko a han kwauwo u ǝn yarsǝ me Sanhendrin ɓa. Ɗǝm yaa yǝ nkeesǝ ate isi me, “Ngǝ yaa salya ya” yǝ pam me yǝ kana ara.
23Maso ɗǝm, me ngǝn na himara a bagadi, pa ngǝ ɗim me ate nyaange yǝ ma rǝkata ma ngase, 24a lee na himara sǝra a wii bagadi wa. Ngo ntiiri kongǝ kon nfaata a ate nyaange ni nhe, pa ngǝ wo ngǝ na himara nga.
25A kon nfaata naakǝn ma atekere yaange yaa yǝn taasǝ me kiyǝ ngǝn ko a han kankiita ɓa ya. A sǝk ma sase a fer sǝsa ɗǝɗa wa, pa me sem maaso ra, atekere yaange kiyǝ ngǝ na a nem an kan kiita ya, ɗǝm an kan kiita ya kiyǝ ngǝ na a nem ya kwang neu ɓeta ya, sase ɗǝm kiyǝ ngǝ mudkǝ a ham neu ɓeta ɓa. 26Nǝn nkee ngǝ ɓongtǝra, ngǝ kong fiɗaa ham sǝsa ra, ndub me ngǝ kwan nsaad mbu ɓan ɓǝɗ ngǝsǝ ɓan.
Fǝɗkǝra Yeso ra a ɗuura Pepeto ra
27“Sǝ kuran, ɓaa nkee me, ‘Ngǝ tom pepeto ra.’ ” 28Pa nǝn nkeesǝ me yaayǝ sengǝsǝ toone ma ɗeura ya, yǝ wee tom pepeto ma sasen a kuɗa ira. 29Me nuu nwaango a seya ya, yǝn kwaa ngǝ ngǝ tom tentenato, aa hik ngǝ mudkǝ ndiira. Para ngǝ nyam fin a ɗaaso kakta mabiri nyaange wa, a u nsaad maabiri nyaange kaa mudkǝ a ara wa. 30Ɗǝm me nem nyaange a seya ya, yǝn kwaa ngǝ ngǝ tom tentenato, a nɗǝm ngǝ muɗkǝ ndiira. Para ngǝ nyam fin a ɗaaso kakta maabiri nyaange wa, a u nsaad maabiri nyaange kaa mudkǝ a ara wa.
Fǝɗkǝra Yeso ra a ɓaa ma toone wa
31“Ɓaa wee nkeen me, ‘Hana yamni yaa yǝ pǝǝsǝ toonesi ya, tomon ɗaɗ yǝ nyor likarkar ɓaaɓaa wa, yaa na.’ ” 32Pa nǝn nkeesǝ me, hana yamni yaa yǝ pǝǝsǝ toonesi ya, me sem a pepeto ra, yǝn tisǝ yǝ tom pepeto, ɗǝm yaa yǝ konsǝ toone ɓaa pǝǝsǝsǝ ya wa, yǝn tom pepeto ma sase.
Fǝɗkǝra Yeso ra a ɗuura Kwǝma ra
33“Ɗǝm, sǝ kuran me ɓaa nkee ɓet tang ɓa me, ‘Ngǝ kuu a mbu para ɓa ra, pa ngǝ kung mbu ngǝ kwǝsǝ Ankundi ɓa wa.’ ” 34Pa nǝn nkeesǝ me, sǝ kong kuuwo ra, hana ma liura, me ǝn ham kuɓsutu Kaa ɓa, 35hana ma put ntaandi wa ɓa, me ǝn ham nhii natsa ɓisa, hana ma Urshalima me ǝn Ur Kuɓ kwang wa. 36Ɗǝm ngǝ kwǝ ma nkweerange ra, me ngǝ nkaa ngǝ kang ma nhiinyo fin, pengpeng hana tebteb ra. 37Pa a lee ‘Ee’ yǝ tom ‘Ee’ ɗǝm ‘Awo’ a tom ‘Awo’ pa mbu faɗsǝ u nwa ɓa, fiɗ a ya kwalakwala ya ni.
Fǝɗkǝra a ɗuura holo ra
38“Sǝ kuran ɓaa nkee me, ‘Holo nuu nwa a nuu, ɗǝm holo ɗǝmta wa a ɗǝmta.’ 39Pa nǝn nkeesǝ, sǝ ɓisi yaa yǝsǝ kwalakwala ya ra. Me yaake ɗaktǝngǝ a laura seya ra, aa kǝrtǝ kwasa ɗǝm. 40Ɗǝm me yaake taa me yǝ ngǝ ti kaura me yǝ kon luktu nwaago, aa na laulauwara nga ɗǝm. 41Me yaake ti ngǝ me ngǝ siki ma sase noonata wa pusapu pu, so ma sase noonata wa pusapu pu raɓ. 42A na hana yamni me yǝ kǝna ngǝ mbuka, nga na, ɗǝm yaa yǝn taasǝ me yǝ kon kwano a ngani ya, ngǝn sa ra.
Sǝ Yau Ɓaatakera
43“Sǝ kuran ɓaa nkee me, ‘Ngǝ yau anndǝnsaatǝre nyaange ɗǝm ngǝ ɓisi ateker nyaange. 44Pa nǝn nkeesǝ me, sǝ yau ɓaataker ɓǝsa, ɗǝm sǝ tom kǝnara ɓaa ɓǝn nasǝsǝ kongsa ɓa, 45me sǝ kaɗ em Paase yǝsǝ a liura ya. Yǝn ti osa yǝ nwee a ɓaa kwalakwala ɓa ni, ma ɗǝm ɓaa ɓǝ sǝ kwalari ɓa, ɗǝm yǝ tung tiwo a roo a ɓaa ɓǝn tomsǝ mbu yǝ sǝ yaɓ a wiiyo a Kaa ni ɓa, ma ɗǝm ɓaa ɓǝn tomsǝ mbu sem yaɓ ra ɓa a wiiyo a Kaa ni. 46Me sǝn yau ɓaa ɓǝn yausǝsǝ ɓa maɗ, ndǝ nsaa mbi kǝsaa taau? Hanan ɓan kon samra ɓa ɓǝ toma maaso rau? 47Ɗǝm me sǝn too ɓaata ɓisa seɗɗe, sǝn tom mbi u faɗsǝ ɓaatau? Hanan ɓaa ɓǝ maa Kaa ra ɓa, ɓǝ toma maaso rau? 48Me maaso, saase sǝ tom kungsǝta nga Paase a liura yǝsǝ kungsǝra ya.
Atualmente Selecionado:
Matta 5: LLA
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
©2023 Seed Company in collaboration with Language Developers and Bible Translators Association