లూకా 15
15
చుక్కాయ్‍ గయూతె మ్హేంఢను ఉపమాన్‍
(మత్త 18:12-24)
1ఏక్‍ వోహోఃత్‍ యేసు వాతే ఖంజనాటేకె కరి సుంకరుల్‍బి పాపుల్‍ కేత్రేకీ జణు ఇనాకనా ఆయూ. 2పరిసయ్యుల్‍బి, షాస్త్రుల్‍ యో ఖారు దేఖీన్‍, ఆ పాపేలవ్‍నా కందే కర్లీన్‍ యూవ్నేతి మలీన్‍ ఖాణు ఖౌంగ్రస్‍ కరి యూవ్నే గోణీగిలిధూ. 3ఇనటేకె యో యూవ్నా ఆమ్‍నూ ఉపమానం బోల్యొ.
4తూమారమా కినాబి హోః మ్హెంఢర్హైన్, ఇన్మతూ ఏక్‍ మ్హేండా గమైగుతో, ఆ ఏక్కమ్‍ హోః మ్హేంఢా మ్హేంధిన్‍ యో ఏక్‍ మళతోడీ ఢూండ్‍స్యుకున్నా? 5యో మ్హేంఢా మళ్యు తేదె ఇనా ఖాందఫర్‍ నక్లీన్‍ ఖుషీతి ఘర్‍కనా ఆయిన్‍, 6గమైగయుతే మారు మ్హేంఢా ఫాచు మళ్యు; ఇనటేకె మార భరోబర్‍ తూమేబి ఖూషీ హూవో కరి బోల్‍స్యే. 7ఇమ్మస్‍ కేధేస్కి దిల్‍ భద్‍లాయిలీధూ హూయు నీతిగా ర్హవళు ఎక్కమ్ ఖొః అద్మీయేతిబి, దిల్‍ భద్‍లాయిలేవానునూ ఛాతే ఆ ఏక్‍ పాపితి స్వరగ్‍మా ఘను ఖుషీ హూవస్‍.
గమాయ్‍ గయూతె బిల్లు
8ఏక్‍ బాయికోనా ధహ్‍ః రూపనూ బిళ్ళమతూ ఏక్‍ గమైగయుతో, “యో ఏక్‍ బిళ్లుమళతోడీ ఘర్‍మా ఊజాళునా బుడ్డీ బాళిన్‍ ఏన్‍ కరీన్‍ ఢూండ్‍స్యేకోయిన్నా?” 9యో బిళ్ళ మళ్యుతో ఇనాకనా కామ్‍ కరవళీయేనా, ఇనూ కందేనూ, బగళ్లునా బులైన్‍ మారు గమైగయుతే రూపనూ బిళ్ళు మళ్యు ఇనటేకె తూమేబీ మారబరొభ్బర్‍ ఖూషీ హూవోకరీ బోల్‍స్యేకొన్నా? 10ఇమ్మస్‍ దిల్‍భద్లాయిలేవళు ఏక్‍ పాపినటేకె దేవ్నూ దూతల్నా క్హామే ఖూషీ హూస్యే కరి తూమారేతి బోలుకరుస్‍.
గమాయ్‍ గయోతె ఛియ్యో
11బుజు యో ఆమ్‍ బోల్యొ; ఏక్‍ అద్మినా బే ఛీయ్యా థా. 12పన్కి యో బేజణమా నానో ఛీయ్యో ఆయిన్‍ భా మన ఆవ్నూతే ఆస్తీమా మారు బాగ్‍ మన దాకరీ మాంగమా, యో ఇమ్మస్‍ నానో ఛీయ్యానూ బాగ్‍ ఇనస్‍ పాడీన్‍ దీనాఖ్యో.
13థ్హోడ ధన్మస్‍ యో నానో ఛీయ్యో ఇని ఆస్తినా లీన్‍ దేహ్‍ఃమా ఛల్‍జైన్‍, మలీన్‍ యో దౌలత్నా ఇనా క్హరాబ్‍కామ్‍నా ఖర్చు కర్యో.
14ఇమ్‍ రఫ్యా క్హారు ఖతంహూయిజవదీన్‍ ఘణు మోటు కాళ్‍ ఆయూ, తేదె యో గ్హణు ముసిబత్మా పడ్యోబుజు ఇనకనా కాయిబి కొయిని. 15తేదె యో క్హయార్‍మా ఏక్‍ అద్మికనా గయో, యో అద్మిఇనా ఢూకర్‍ ఛరావనా కరి ఖేతర్‍మా బోలిమోక్‍ల్యొ. 16ఇనా కోన్బి అత్రు ఖాను‍బి దేవాళు కొమళ్యుని. ఇనటేకె యో ఢూకర్‍ ఖావనూ పోట్టు ఖానూ కరి రైగో.
17ఇనా తేదె బుద్ది ఆయిన్‍, మారు భా నూ ఘర్‍కనా కామ్‍ కరవళానా థక్‍తోడీన్‍ ఖవయేత్రు ధాన్‍ ఛా. పన్కి మన అజ్గ ఖాణు కోయిన్తే భుక్‍నా మర్‍జౌంగ్రుస్‍. 18మే వుట్టీన్‍ మారో భా కనా జైస్‍, భా మే, దేవ్నా, తారేఖుబి ఘాణు విరుద్‍గా పాప్‍ కర్యో; 19బుజు కేధేబి తారో ఛీయ్యో కరి బోలావనా మన యెత్రె లాయక్‍ కోయిని; ఇనటేకె మన తూమారు కామ్‍ కరవళమా ఏక్‍జణంతరతోబి గల్లా కరి బోల్‍నూ కరి సోచీన్‍, 20వూట్టీన్‍ ఇనా భా కనా ఆయో. యో ఇనూ భా నూ ఘర్‍ ధర్రాస్యు దూర్మా ఛాకతో ఇనా భా ఇనా దూర్తిస్‍ దేఖీన్‍ నాహ్‍ఃతో హూయిన్‍ ఆయిన్‍ ఇనా గలేంఢాఫర్‍ పడీన్‍ బుఛ్చా దిదో. 21తేదె యో ఇనా భా తి, మే దేవ్‍తిబి తారేతిబి మోటూ పాప్‍ కర్యొ. బుజు కేదేబి మే తారో ఛీయ్యో కరి బోలావనా మే లాయాక్‍ కోయిని కరి బోలామా. 22రైతోబి ఇనా భా ఇనా కామ్‍ కరవళాతి, మార ఛీయ్యానా పేరానూ అసేల్‍నూ లుంగ్ఢా, హాత్‍నా అంగోటీయే, గోఢానా చెప్లే లాయిన్‍ పేరావో కరి బోల్యొ. 23అష్యల్‍నూ బీష్యావళు ఏక్‍ పసువుణా లాయిన్‍ వాఢీన్‍ మోటు పండగంతర కరీయే. 24మరీగయోతే మారో ఛీయ్యో పాచు జీఉట్యో, గమైజైన్‍ పాచు మళ్యో కరి బోలామా, యూవ్నే ఖారు పంఢగ కరనిక్‍ల్యా.
25తేదె ఇనో మోటో ఛీయ్యో ఖేతర్‍మతూ ఆంక్రతో ఇనా ఘర్‍మతు గీతేవ్‍నూ ఖేల్‍నూ ఆవాజ్‍ ఖంమ్జయూ.
26యో దాసుల్‍మా ఏక్‍ జణానా బులైన్‍ ఘర్‍మా ష్యాత్‍ హూంక్రస్‍ కరి పుఛవమా. 27యో ఇనేతి తారో భై ఆయో, తారో భా నానో ఛీయ్యో అచ్చితర ఆయో కరి ఇనటేకె బిష్యావళు ఏక్‍ పషువు వాఢుకరస్‍ కరి బోలామా,
28యో వాతేనా ఖంమ్జీన్‍ ఖ్హీజ్‍ ఖైన్‍ యో ఘర్‍మా జవాన దిల్‍ నాహూవామా, తేదె ఇనా భా ఆయిన్‍ బతిమాల్యొ. 29తేదె యో ఇనా భా తి అత్ర వరహ్‍ఃతూ తార కనా రైన్‍ తారీస్‍ వాతే ఖంమ్జు కరుస్‍నీ, కేధేబి మే మార దోస్తేవ్‍తి మళిన్‍ ఖూషీతి ఖావనా ఏక్‍ బోక్డుతోబి మన దిదోనా? 30కానీ ఆ తారో నానో ఛీయ్యో రైతో ఇని ఆస్తీలిన్‍ జైన్‍ క్హరాబ్‍వాళీయేతి ఖైయిన్‍ ఆయోతే ఇనా మాత్రం బిష్యావళు పషువు వాడీ పంఢగ కరుకరస్‍. కరి 31తేదె యో, మారొ ఛీయ్యో! తూ కేధేబి మారస్‍ కనా ఛా. ఇనటేకె “మారు హాఃరూబి తారుస్‍తో.” 32అప్నే ఖూషీ హూవనూ, ఆనందించనూ అసేలస్‍; ష్యానకతో భై మరీజైన్‍ ఫాచు జీవిన్‍ ఉట్యో, గమైజైన్‍ ఫాచు మళ్యో కరి ఇనేతి బోల్యొ.
Atualmente Selecionado:
లూకా 15: NTVII24
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
The New Testament in Vagiri Language © The Word for the World International and Vagiri Nawa Jivan Kristi Madadi Telangana, India. 2024