1. Mose 4
4
O Kayn oun o Abel
1O Adam vas khetne peskri romyah Eva. Oun yoy vas an vavar koova oun anas i čaves ap i phoub oun das les o lab Kayn. Oun yoy penas: “Me lom i morsh čavo. O baro Devel das les mande.” 2Oun pal kova anas yoy i douyto čaves ap i phoub. Koles das li o lab Abel. O Abel vas i bakrengro. O Kayn vas i harho oun boudras ap i harhetikri phoub.
3Pal i tsiro las o Kayn kolestar, hoy ap leskri phoub baro vas oun rhačras les o baro Debleske. 4Oun o Abel las tikne bakren, kay i phoureder čave pengre dayendar hi, maras len oun rhačras lengre feteder kotya o Debleske. Oun o baro Devel dikas lačes ap o Abel oun ap kova, hoy yob rhačras leske. 5Ap o Kayn dikas yob gar lačes, vitar gar ap kova, hoy yob rhačras o Debleske. Koy las o Kayn i bari rholi oun dikas rhoyedo tele ap i phoub. 6Koy penas o baro Devel ap o Kayn: “Hoske hal tou rhoyedo? Hoske dikeh tele? 7Kova hi yaake: Te kreh, hoy mishto hi, nay dikeh tou i menshen an i yaka. Te kreh, hoy gar mishto hi, hi o čilačepen gar dour toutar, oun kamell ray pral toute te vell. Tou hounte vess ray pral o čilačepen.”
8O Kayn penas ap peskro phraleste Abel: “Am! Djas vin ap o them!”
Oun har yon vin ap o them his, hadas pes o Kayn ap peskro phraleste Abel oun das les moulo.
9Koy penas o baro Devel ap o Kayn: “Kay hi tiro phraal Abel?”
Penas yob: “Djinau gar. Dap me hounte yak ap miro phraleste?”
10Oun o Devel penas: “Hoy kral tou? Shoun! Tiro phraleskro rat dell gole pal mande dran i phoub. 11I phoub kras peskro mouy pre oun piyas tiro phraleskro rat, koles tou moulo dal. Kanna nay boudress bouder gar ap i phoub. Tou vess praasedo ap i phoub. 12Te kreh tiri boudi ap i harhetikri phoub, vell kote či touke baro. Tou hounte djas trouyel ap i phoub. Tout vella kek them, kay khere hal.”
13Koy penas o Kayn ap o baro Debleste: “Miri phagi hi yaake baro, kay rikrau lat nay gar vin. 14Tou tradeh man kava dives vin dran o them! Me hounte khatrap man glan toute. Man vella kek them, kay khere hom. Me hounte dap man trouyel. Hakeno, koon hatsell man, nay dell man moulo.”
15Koy penas o baro Devel: “Na-a! Hakeno, koon o Kaynes moulo della, koleskre menshendar venn efta menshe moulo dino.”
Oun o baro Devel kras i sikepen glan ap leskro shero, te djinell hakeno, koon hatsell les, te nay marell lo les gar. 16Oun o Kayn djas peske o baro Deblestar. Oun djas an ko them Nod vergel i baar Eden, ap koy rig, kay o kham pre djala.
O Kayn oun leskre čave, kay pal leste van
17Oun o Kayn vas khetne peskri romyah. Kaya vas an vavar koova oun anas o Henok ap i phoub. Oun o Kayn kras i foro, oun das ko fores ko lab peskro čavestar Henok. 18O Henok las i čavo. Leskro lab his Irad. Koleskro čavo his o Mehouyael Koleskro čavo his o Metoushael Oun koleskro čavo his o Lamek. 19O Lamek las peske douy romyen. O lab kol yekatar his Ada. Koy vavar kharas Silla.
20I Ada anas i čaves ap i phoub. Leskro lab his Yabal. Yob vas o dad kolendar, kay an plarhtene khera djivenn oun ap i firhende yak denn. 21Oun o lab leskro phralestar his Yubal. Kova vas o dad halauterendar, kay hayvenn ap doryengre bashepangre oun tikne phourdepangre te bashrell.
22I Silla anas ninna i čaves ap i phoub. Leskro lab his Toubal-Kayn. Yob vas o dad halauterendar, kay hayvenn sasterno koova te krell. Leskri pheen his i Naama. 23Oun o Lamek penas ap peskre romyende:
Ada oun Silla, shounenn, hoy me penau!
T'mer, mire romya, denn garda ap mire laba!
Te doukrell man i morsh, koles dau moulo.
Te dell man i terno morsh dava, dau les me moulo.
24Koon o Kaynes moulo della, koleskre menshendar venna efta moulo dino.
Koon man, o Lamekes, moulo della, koleskre menshendar venna 77 (efta-deesh-te-efta) menshe moulo dino.
O Set oun o Enosh
25Oun o Adam vas pale khetne peskri romyah. Oun yoy anas i čaves ap i phoub, oun das les ko lab Set, oun penas: “O Devel das man i vavar čaves miro čaveske Abel, koles o Kayn moulo das.” 26Oun o Set las ninna i čavo. Koles das yob ko lab Enosh. An ko tsiro mangan i menshe o ersto kopo o baro Debles an.
Atualmente Selecionado:
1. Mose 4: Sint-Man2024
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.