Рут 4
4
БогӀазица Рут лъадилъун ячин
1 # 4:1 Шагьаралъул кавабахъ букӀунаан доб заманалда ГӀизраилазул годекӀан.БогӀаз шагьаралъул кавабахъе щвана ва гьенив гӀодов чӀана. БогӀазица жиндир хӀакъалъулъ бицунеб букӀарав дов гӀагарав чи цевесан унев вихьидал, БогӀазица ахӀана: «Гьаниве вачӀа, дир вац, гӀодов чӀая цо!» АскӀове вачӀун гӀодов чӀана дов.
2БогӀазица ахӀана шагьаралъул анцӀго кӀудияв чи ва гьезда абуна: «ГӀодор чӀа гьанир». Гьел гӀодор чӀана.
3Хадув гьав кӀалъана дов гӀагарав чиясда: «МогӀавиялдаса тӀадюссарай НогӀомица ракь бичулеб буго. Гьеб ккола нилъер гӀагарав чи Эли-Маликил балъ. 4Дица хӀисаб гьабуна гьеб иш дуда лъазабизе ккелин; бичун босе гьеб, гьал киналго гьанир гӀодор чӀун ругезда ва жамагӀаталъул кӀудиял чагӀазда цебе. Босулеб батани босе, босулареб батани, босулареблъи лъазабе дида. ТӀоцебесеб ихтияр дур бугелъул, дун дуда хадусев ккола», – ян.
«Дица бичун босила гьеб», – ин абуна дос.
5Цинги БогӀазица абуна: «Дуца гьеб ракь бичун босараб къоялъ, дуца ячине ккола хварасул йикӀарай лъади, къоролай могӀавияй Рутги. Гьелъие гьавурав васги гӀезавизе ккола гьеб ракь хварасул наслуялъе хутӀизе». 6Гьелда данде дов гӀагарлъиялъул чияс жаваб кьун абуна: «Гьедин батани, дида кӀоларо гьеб ракь бичун босизе, щайгурелъул дирго бугебги магӀишат биххула дир гьебмехалда. Дур букӀа абе ихтияр, дида кӀоларо гьеб босизе».
7Цебе заманаялда ГӀизраилалда букӀана гьадинаб гӀадат: цояс цоясухъе цо жо бецӀун босизе, ялъуни мулкалъул бетӀергьанлъи гьабизе жиндирго бугеб ихтияр кьолеб бугони, гьабураб къотӀи щула гьабизелъун, гьев чияс тӀаса бахъулаан жиндирго хьит ва гьеб кьолаан дов жиндица ихтияр тӀаде босулев чиясухъе. ГӀизраилалъул халкъалъул гӀадаталда рекъон гьедин тасдикъ гьабулаан къотӀи.
8ГӀагарлъиялъул чияс абуна БогӀазида: «Дуцаго босе», – ян. Ва гьес жиндирго хьит бахъун кьуна гьесухъе. 9Гьебмехалда БогӀазица кӀудиял чагӀазда ва кинабго жамагӀаталда рагӀизабун абуна: «Гьале нуж руго жакъа нугӀзаллъун: дица НогӀомихъа босулеб буго кинабго Эли-Маликил, Килеонил ва МахӀлонил букӀараб милк. 10Гьединго, МахӀлонида йикӀарай могӀавияй Рутги ячуней йиго дица лъадилъун, МахӀлонил букӀараб магӀишат гьелъул лъималазе ирсалъе щвезе ва гьесул агьлу тӀагӀинчӀого букӀине нилъер шагьаралда. Нуж киналго руго гьелъие нугӀзаллъун».
11Цинги, киналго шагьаралъул кавабахъ рукӀараз ва кӀудиял чагӀаз абуна: «У, ниж руго нугӀзаллъун! БетӀергьанас, жиндидасан ГӀизраилил халкъ бижарал Ракелги Леаги гӀадин гьаеги дур минаялъуе жание лъугьуней йигей дур лъади ва гӀемерал лъимал гьареги гьелъ дуе! Эфраталда къудрат цӀикӀкӀаги дур, Бетлегьемалда машгьурлъаги мун! 12Биччанте гьелдалъун БетӀергьанас кьураб наслуялъ дур тухум, Тамарица Ягьудае гьавурав Парецил гӀадинаб букӀине».
Давудил умумузул рахас
13БогӀазица Рут лъадилъун ячана. Гьев гьелда аскӀов вегана, ва БетӀергьанас гьелъул ургьибе лъимер кьуна ва гьелъие вас гьавуна. 14Руччабаз НогӀомида абулеб букӀана: «Рецц БетӀергьанасе! Гьес мун ирсилав камун течӀо. ГӀизраилалдаго цӀар рагӀарав вахъаги гьев вас! 15Гьес цӀигьабила дур гӀумру, ва херлъараб мехалъ дур тӀалабги гьабила. Мун йокьулей ва анкьго васасдасаги дуе лъикӀай дур нусалълъидал гьев гьавурав».
16НогӀомица кодове вачун хьихьана гьев вас. 17Мадугьалихъа руччабаз абулеб букӀана: «НогӀомие вас гьавуна», – ян. Гьез гьесда Овид абун цӀар лъуна. Гьев вахъана Давудил эмен Йишавил эменлъун.
18Гьале Парецил наслуялъул рахас:
Парецие гьавуна ХӀецрон;
19ХӀецроние гьавуна Рам;
Рамие гьавуна ГӀаминадав;
20ГӀаминадавие гьавуна НахӀшон;
НахӀшоние гьавуна Шалмон;
21Шалмоние гьавуна БогӀаз;
БогӀазие гьавуна Овид;
22Овидие гьавуна Йишав;
Йишавие гьавуна Давуд.
Atualmente Selecionado:
Рут 4: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023