Luke 6
6
1ဥပုသ်မာန်းရာတ်ရအာမှါခ့်ခါ ကိုယ်တော်ယေရှုယောက် တပယ့်တာတ်ကား အန်ကလာန်တေဒေ ဖြတ်သောလာန်ပဲမှါခ့်ခါ တပယ့်တော်တာတ်ကား အန်သတူတေဒေကွန်ဘန်း လာပ်ခေါက်တေဒေ သဟူးတေယောက် ဆဘွတ်ပန်း သတူတေဒေ ယုတ်ကြီးမှာ။ 2အန်၌မှါခ့်ခါ ဖာရိရှဲစယ်ယာတာတ်ကား ကိုယ်တော်ယေရှုတေ "ဟနိမ်ကား ဥပုသ်မာန်းရာတ်တုံန်းဘေ အအွန်သင့်သဘင်းအရာတေ ဟမာန်ငှါးအွန်ကြီးတေ" ညယ်ငှေါကြီးမှာ။ 3ကိုယ်တော်ကား "ရှာန်းပလာန်ဒါဝိဒ်ယောက် ဟိန်တပယ့်တာတ် ယုတ်ခေါ့နင်းကြီးမှါခ့်ခါ ဟိန်ဟာနိမ်အွန်နီမှာ ငှေါဘင်းနာတေ ဟနိမ် အကျယ်ပတ်ကြီးရားရဲ။ 4ဟိန်ကား ဘုရားရှာန်ဘင်း ကျောင်းနောင်းပါ ဆာန်ဘန်း ပုရောဟိတ်တာတ်နင်း သီးသန့်ကပ်သပဲဘင်း မုန့်တေဒေ ဟိန်ကိုယ်တိုင် ယုတ်လားဆာအချီ ဟိန်နောက်လိုက်တေဒေရီဒါး အီယုတ်အာန်မှာ" ညယ်ငှေါစီးဘန်း ဆာတ်သဘန်းကိုယ်တော်ကား 5"သမီဆာဆားတော်ထှာဘင်းငါကား ဥပုသ်မာန်းရာတ်ပင်း အရှာန်ထှာမှာ" ညယ် မိန့်တာန်မှာ။ ညာပါဘင်းသဟူးရှီးပန်းနင်းဘင်းဆိတ်ဟော်ဝါ 6တခြားဘင်း ဥပုသ်မာန်းရာတ်ရအာဘေ ကိုယ်တော်ယေရှုကား ဓမ္မာရုံဘေ ဟောသကာ ဆွောန်သကာနင်းမှါခ့်ခါ ညာပါဘင်းပိုက် သဟူးရှီးနင်းဘင်းဆိတ် ဟော်ဝါငှါမှာ။ 7ဖာရိရှဲယောက် ကျမ်းကျိန်းပေါ့ပင်း အိုးဆကြီးစယ်ယာကား ဥပုသ်မာန်းရာတ်ပေ ဟော်ဝါဟော်ဝါတေ ကုသအီမှာငှေါဘန်းကား စွပ်စွဲသရန်ကွန်း ကိုယ်တော်တေ စောင့်သဘန်းယူနင်းကြီးမှာ။ 8အန်နိမ်စါန်းငှေါဒီ အန်တာတ် ဟာနိမ်တွေးသဘန်းနင်းဘင်းနာတေ မိန်းရှာတ်ခါဘင်းအတွာတ် ကိုယ်တော်ယေရှုကား အန်ဘင်းညာပါဘင်း သဟူးရှီးနင်းဘင်းဆိတ်တေ "သမီဆတာတ်မန်းဘေ ရဲဘန်းစပ်နာန်" ညယ်မိန့်တော်မူသမှါခ့်ခါ အန်ဘင်းဆိတ်ကား ရဲဘန်း စပ်နာန်မှာ။ 9စီးမှါခ့်ခါ ကိုယ်တော်ယေရှုကား "ဟနိမ်တေ ငါစားနူစိန်ယူကူ။ အနိမ် ဥပုသ်မာန်းရာတ်ပေ မဲဘင်းနာတေအွန်သင့်သောလဲ၊ အမဲဘင်းတေ အွန်သင့်သောလဲး အာနိမ်အချီ ဟော်ဝါ ဟော်ဝါဘင်း အဆာတ်တေ ကယ်တာန်သကလဲ၊ သာန်းရှီးထှာကလဲ" ညယ်စိန်ယူစီးမှါခ့်ခါ 10ဟိန်ပိုက်ပင်း သမီဆတာတ်တေ ယူဘန်း ညာပါဘင်းသဟူးရှီးနင်းဘင်းဆိတ်တေ "နာန်ဘင်းသဟူးဒေ ဖြန့်တာန်စမ်း" ညယ်မိန့်သမှါခ့်ခါ အန်ဘင်းဆိတ်ရီးဒါး သဟူးတေဆန့်တာန်မှါခ့်ခါ ဟိန်သဟူးကား မလဲအတိုင်းထှာဟာန်းရာန်မှာ။ 11အန်၌မှါခ့်ခါ ဖာရိရှဲတာတ်ယောက် ကျမ်းပေါ့ပင်းအိုးဆကြီးတာတ်ကား ဒေါသပူဘန်း ကိုယ်တော်ယေရှုတေ ဟာနိမ်အွန်ထှာကူငှေါဘင်းနာတေ အချန်းချန်း တိုင်ပါန်သနင်းကြီးမှာ။ 12ရအာမှါခ့်ခါ ကိုယ်တော်ယေရှုကား ကယာစောက်ပါလာန်ဘန်း နာတ်ကျယ် ကျယ်ရာလုံး ဘုရားရှာန်ဘေ ဝိုင်သဘန်းဆုစိန်မှာ။ 13ဟလာန်းယားမှါခ့်ခါ တပယ့်တော်တာတ်တေ ဟိန်ပါကော်စိန်းယုတ်ပန်း အန်တာတ်နောင်းဟက် ရှစ်နူဘန်းကလိန်းဟူးတေ တပယ့်တော်ညယ် မယ်ရာန်မှာ။ 14အန်ဘင်းဆိတ်တာတ်ကား ပေတရုညယ် ကိုယ်တော်နာမယ်အီရီဘင်း ရှိမုန်ယောက် ဟိန်နရှီထှာဘင်း အန္ဒြေ၊ ယာကုပ်၊ ယောဟန်၊ ဖိလိပ္ပု၊ ဗာသောလမဲ၊ 15မဿဲ၊ သောမ၊ အာလဖဲဘင်းဆာ ယာကုပ်၊ ကိုယ်အမျိုးတေမစ်ပင်း ရှိမုန်၊ 16ယာကုပ်ဆာ ယုဒယောက် အနားမန်းပါကိုယ်တော်တေ သစ္စာဖောက်သကူဘင်း ယုဒရှာကာရုတ်တာတ် ထှာကြီးမှာ၊၊ 17စီးမှါခ့်ခါ ကိုယ်တော်ကား တပယ့်တော်တာတ်ယောက်အတူ ကယာစေါက်ဟက် ကြွဒီဘန်း ဆပ်နီမှာ။ အန်ဘင်းနေရာဘေ တပယ့်တော်တေကလောင်းတုံန်းယောက် ယုဒပြေ၊ ဂျေရုဆလင်၊ ဇိဒုန်ယောက် တုရုဒေသကမ်းပါး တစ်ရိုးလုံးဘေ ငှါဘင်းမြို့ တေဟက် သမီဆာ ကလောင်းတုံန်းတာတ်ရီးဒါး ထုတ်ကြီးရီမှာ။ 18အန်တာတ်ကား ကိုယ်တော်ယေရှု ဟောသကာဘင်းတေဒေ သက်ပန်း ကိုယ်ဘင်းကမာရောဂါတေဒေ ကယာစိန်းဒင်အတွာတ် ဒီကြီးမှာ။ အမဲနနူ ကပ်ခံသထှာဘင်း ဆိတ်တာတ်ရီးဒါး မလဲကလဲ ထှာဟာန်းကြီးရီမှာ။ 19ကိုယ်တော်ဟက် တန်ခိုးတော်တေပူဘန်း ကမာရောဂါတေဒေ ကယာစိန်းဘင်းအတွာတ် သမီဆတာတ်ရီးဒါး ကိုယ်တော်ယေရှုတေ ထိသလူကွန်း ကြိုးစားသနင်းကြီးမှာ။ ကောင်းကျိုးချမ်းသာအဖြာဖြာ 20စီးမှါခ့်ခါ ကိုယ်တော်ကား ဟိန်တပယ့်တော်တာတ်ပါ မန်းဘန်း အန်တာတ်တေ "ဘုရားရှာန်ကား ဆာန်းရဲသဘင်းဆိတ်တာတ်တေ ကောင်းကျိုးချမ်းသာ အဖြာဖြာတေ လူစိန်းကူ။ ဘုရားရှာန်ဘင်း သာသနာတော်ကား အန်တာတ်အတွာတ် ထှာမှာ။ 21ဘုရားရှာန်ကား ယုတ်ခေါ့ပ်နင်းဘင်းဆိတ်တာတ်တေ ကောင်းကျိုးမာန်းဂလာ အဖြာဖြာယောက် ပြေ့စုံသစိန်းဘန်း ယုတ်တင်အူဒင်တေ ဖိန်းစိန်းကူ။ ဘုရားရှာန်ကား ဟပ်ပန်းနင်းကြီးဘင်းဆိတ်တာတ်တေ နီးစိန်းကူ။ 22သမီဆာဆားတော်ငှေါဘင်းတေ သက်ကြီးဘင်းအတွာတ် သမီဆတာတ်ယူနီဘင်းတေ ခံသထှာဘင်းဆိတ်တာတ်၊ အပယ်ခံသထှာဘင်းဆိတ်တာတ်၊ နှိပ်စါတ်သလား ခံသထှာဘင်း ဆိတ်တာတ်ယောက် ရိုင်းရိုင်းကားကား ငှေါခံသထှာဘင်းဆိတ်တာတ်တေ ဘုရားရှာန်ကား ကောင်းကျိုးချမ်းသာအဖြာဖြာယောက် ပြေ့စုံသစိန်းကူ။ 23အန်နိမ်ထှာဘန်းကား မွန်းဘန်း ကသကြီးရာန်။ ဟမာန်တွာတ်ငှေါဘန်းသာငှေါ ရွှေမြို့တော်ဘေ ဟနိမ်လူကူဘင်းဆုတုံန်းကား အကြီးကျယ်မြင့်မြတ်သမှာ။ ဟလိန်းပါမှါခ့်ခါဟက် အန်တာတ် အုတ်တာတ် အတော်တာတ်ရီးဒါး ပရောဖက်တာတ်တေ အန်နိမ်အတိုင်း အွန်ကြီးရီဘင်းအတွာတ် ထှာမှာ။" 24"အာနိမ်စါန်းငှေါဒီ ဆွာမ်းဘင်းဆိတ်တာတ်၊ ဟနိမ်ကား ပြေ့စုံသဘင်းဘဝဘေ နင်းလူကြီးရီဘင်းအတွာတ် ဟနိမ်အတွာတ်ကား အကြီးကျယ်ဆိုးသမှာ။ 25အရာတ် မလဲယုတ်ပန်း နင်းလူကြီးဘင်းဆိတ်တာတ်ကား အကြီးကျယ်ယုတ်ခေါပ့်ပင်းဒုက္ခတေ ကြုံဒီထှာကူ။ အရာတ် နီးဘန်းနင်ဘင်းဆိတ်တာတ်ကား အဆင်တေကားကြီးထှာဘန်း ဟပ်ကြီးထှာကူ။ 26သမီဆာတာတ်ကား ဟနိမ်ဘင်းအကြောင်းတေမလဲငှေါးဘန်းကား ဟနိမ်ဒုက္ခယောက် ကြုံသကြီးထှာကူ။ ဟမာန်တွာတ်ငှေါဘန်းသာငှေါ အန်ဘင်းဆိတ်တာတ်ပင်း အုတ်တာတ် အတော်တာတ်ရီးဒါး အယောင်ဆောင်သပဲဘင်း ပရောဖက်တာတ်တေ အန်နိမ်အတိုင်း မလဲငှေါကြီးရီဘင်းအတွာတ် ထှာမှာ။" ရန်သူတာတ်တေမေတ္တာပဲကြီး 27"အန်နိမ်စါန်းငှေါဒီ အရာတ်သက်ပန်းနင်းကြီးဘင်း ဟနိမ်တေ ငါငှေါကူ။ ရန်သူတာတ်တေ မေတ္တာပဲကြီး။ ကိုယ်တေယူနီဘင်း သမီဆတာတ်စေါက်ပေ အန်တာတ်အတွာတ် မဲဘင်းနာတေဒေ အွန်အီရာန်။ 28နာန်တေကျိန်သဘင်း ဆိတ်တာတ်တေဒေရီးဒါး ဘုရားရှာန်ဟက် ကောင်းကျိုးမာန်းဂလာတေ အီကွန်းအတွာတ် ဆုစိန်အီကြီး။ နာန်စောက်ပေ အမဲဘင်းဆိတ်တာတ် အတွာတ်ရီးဒါး ဆုတေစိန်အီကြီး။ 29ဟော်ဝါဟော်ဝါကား နာန်လပါမ်ပယ်အာတေ သန်းဘန်းကား နောက်ပယ်အာဒေပါ သန်းစိန်းယုတ်ခါန်းငါန်။ ဟော်ဝါဟော်ဝါကား နာန်တော်ပဲဘင်း ပြာန်ဘင်းဆာန်ဆုန်တေ စိန်ဘန်းကား နောင်းဘင်း ဆာန်ဆုန်တေပါအီရာန်။ 30နာန်ဟက် စားနူစားနာ စိန်ရီဘင်းဆိတ်တာတ်နင်းရီးဒါး အီကြီး။ ဟော်ဝါဟော်ဝါဟက် နာန်ပစ္စည်းတေဒေ လာပဲဘန်းကား အန်ဘင်းဆိတ်ဟက် ပြန်သဘန်း အစိန်ဟာန်းဆာ။ 31ကိုယ်တေ အွန်စိန်းယုတ်ကာတ်ပင်းအတိုင်း သမီစောက်ပေရီးဒါး မလဲကလဲအွန်အီကြီး။ 32ကိုယ်စောက်ပေ မေတ္တာပဲဘင်းဆိတ်တေဆာ မစ်ပန်းနင်းဘန်းကား ဘုရားရှာန်ကား နာန်တေ ဟာနိမ်ချီးမွမ်းသကူတေ။ အမဲဘင်းသမီဆတာတ်ကား အန်တာတ်တေ မေတ္တာပဲဘင်း ဆိတ်တာတ်တေဒေ၌ဆာ ပြန်သဘန်းမစ်ကြီးဟာလား။ 33နာန်စောက်ပေ မဲဘင်းဆိတ်တေ၌ဆာ နာန်ကား ပြန်သဘန်း မဲရန်လားငှေါဘန်းကား ဘုရားရှာန်ဟက် ဟာဘင်းဆုတေစဲ အမျှော်လင့်သကြီးဆာ။ အမဲဘင်းသမီဆတာတ်စဲ အန်နိမ်အွန်ရန်မှာ။ 34ပြန်သဘန်းလူဟာန်းကူညယ် အထာန်ယောက် သမီတေ ဟနိမ်ဟယ်အီဘန်းကား ဘုရားရှာန်ကား ဟနိမ်တေ ချီးမွမ်းသကူညယ် ထာန်သနင်းကြီးလည်း။ အမဲဘင်းသမီဆတာတ်စဲဒါး အီရာန်ဘင်းအတိုင်း လူဟာန်းကွန်း အချန်းချန်းဟယ်အီကြီးဟာမှာ။ 35ဟနိမ်ကား ရန်သူတေဒေ မေတ္တာပဲဘန်း အန်တာတ်အတွာတ် မဲဘင်းနာတေဒေအွန်အီကြီး။ ပြန်သဘန်းလူဟာန်းကူညယ် အမျှော်လင့်သဘန်း ဟယ်အီကြီး။ ဘုရားရှာန်ကား ကျေးဇူးအမိန်းရှာတ်ခါဘင်း ဆိတ်တာတ်ယောက် အမဲဘင်းသမီဆတ်တေ မေတ္တာပဲဘင်းအတွာတ် ဟနိမ်အန်နိမ်အွန်ဘန်းကား အကြီးကျယ်တုံန်းဘင်း ဆုကျေးဇူးတေလူဘန်း အမြင့်မြတ်ဆုံးထှာဘင်း ဘုရားရှာန် ဆာဆအိတ်တေထှာကြီးကူ။ 36ဟနိမ်ဘင်း အဝါဘုရားရှာန်ကား မေတ္တာကရုဏာတော်ယောက် ပြေ့စုံသဘင်းအတွာတ် ဟနိမ်ရီးဒါး မေတ္တာကရုဏာယောက်ပြေ့စုံသကွန်းနင်းကြီး။"<br> 37"အန်ကားအပြာန် သမီတေ အစီရာန်သကြီးဆာ။ အာနိမ်မားဆာ ဘုရားရှာန်စီစာန်သလားတေ ဟနိမ်အခံသကြီးထှာကလား။ သမီတေအပြစ်တာန် အဝေဖန်သကြီးဆာ၊ အာနိမ်မားဆာ ဘုရားရှာန်အပြစ်တာန်သလားတေ အခံသထှာကလား။ သမီတေခွာမ်းလွှတ်သကြီး၊ အန်နိမ်အွန်ဘန်းကား ဘုရားရှာန်ကား ဟနိမ်တေ ခွာမ်းလွှတ်သအီကူ။ 38သမီတေ အီကြီး။ ဟနိမ်ရီးဒါး ဟနိမ်အီဘင်းထာတ် ကလောင်းတုံန်းတေ အီလားခံသထှာကူ။ ဟနိမ် သမီတေအီဘင်းအတိုင်း ဘုရားရှာန်ကား ဟနိမ်တေ ပြန်သဘန်းအီဟာန်းကူ" ညယ်မိန့်တော်မူသမှာ။ 39စီးမှါခ့်ခါ ကိုယ်တော်ကား အန်တာတ်တေ ဥပမာပုတ်အာယောက် မိန့်တော်မူသဘင်းနာကား "မိတ်အကတုံန်ဘင်း ဆိတ်ဟော်ဝါကား တခြားမိတ်အကတုံန်ဘင်း ဆိတ်ဟော်ဝါတေ လမ်းကာရန်ကလဲ။ အန်တာတ်ကလိမ်ဟူးစလုံး ချောက်နောင်းဘေ အက်နာန်ကလားအချည်နော်။ 40အိုးဆကြီးထား ပိုသောပေါ့ပင်း တပယ့်ညယ်အဘိုဝါး။ အာနိမ်စါန်းငှေါဒီ တပယ့်တေ ပေါ့ကွန်း ဆွောန်သအီရာန်ဘန်းကား ဟိန်ကား ဟိန်အိုးဆကြီးနိမ် ထှာကြီးရီကူ။ 41နာန်ကား နာန်မိတ်တူရှီနောင်းဘေငှါဘင်း အမှိုက်တေ ဆတီးအပဲညယ်၊ နာန်အဆွေမိတ်တူရှီနောင်းဘင်း အမှုန်အမွှားဆာတေ ဟမာန်ငြားကတုံန်နင်းတေ။ 42နာန်မိတ်တူရှီနောင်းဘင်း ဖွုန်းတလွောမ်တုံန်းနိမ်ငှါဘင်း အမှိုက်တေ အကတုံန်ညယ် "အဆွေ၊ နာန်မိတ်တူရှီနောင်းဘေငှါဘင်း အမှုန်အမွှားတေငါလာအီကူ" ညယ် ဟာနိမ်ငှေါရန်ကူတေ။ သမီဆာမလဲနိမ် ဟန်ဆောင်သပဲဘင်းဆိတ်တာတ်၊ ဟနိမ်မိတ်တူရှီနောင်းဘင်း ဖွုန်းတလွောမ်တုံန်းနိမ်ငှါဘင်း အမှိုက်တေအရာန် လာရာန်။ အန်နိမ်မားဆာ နာန်အဆွေ မိတ်တူရှီနောင်းဘေငှါဘင်း အမှိုက်တေ လာအီဒင် ဟနိမ် ရှာန်းရှာန်းလာန်းလာန်း ကတုံန်လူကလား။"<br> 43"မဲဘင်းကလွုန်ကား အမဲဘင်းရှရှီတေ အရှီရန်နိမ် အမဲဘင်းကလွုန်ရီးဒါး မဲဘင်းရှရီတေ ရှီရန်ကလားအချီရား။ 44ရှရှီတေယူဘန်း ကလွုန်အကြောင်းတေ ငှေါရန်မှာ။ စောဟားချုံပုတ်နောင်းဟက် ဆာန်းညက်ရှီတေ ကွန်လားအလူနိမ် ချုံပုတ်နောင်းဟက် စပျစ်ရှရှီဒေရီးဒါး ကွန်လားအလူရန်နား။ 45မဲဘင်းသမီဆာကား ဟိန်အဆေင်နောင်းဘေငှါဘင်း မဲဘင်းနာတေဒေ၌ ကာရန်လား။ အမဲဘင်းသမီဆာကား ဟိန်အဆေင်နောင်းဟက် အမဲဘင်းနာဒေ၌ဆာ ကာရန်လား။ ဟနိမ်ဆတွန်းဟက်ပူဘင်း တူးတေကား ဟနိမ်အဆေင့်တေ ကာနင်းမှာ။"
ကျေမ်းစာဘင်းဆိတ်ကလိန်းဟူး 46"ဟနိမ်ကား ငါငှေါဘင်းတူးဒေ အသက်ညယ် ဟမာန်တွာတ် ငါတေ 'ကိုယ်တော်၊ ကိုယ်တော်' ညယ်ကော်နင်းကြီးဒေ။ 47ငါပါဒီဘန်း ငါတရားတော်တေဒေ သက်ပန်း လိုက်နာသဘင်းဆိတ်တာတ်ကား ဟာဘင်းသမီဆာယောက် တူသမှာငှေါဘင်းနာတေ ဟနိမ်တေ ငါငှေါကာကူ။ 48အန်ဘင်းဆိတ်ကား ကာတေ ထိန်ကွန်းထူဘန်း လုံးကရှီတေယောက် အုတ်မြစ်ချသပဲဘင်း ကျေမ်းစာဘင်းဆိတ်ယောက် တူသမာ။ ဝဲလွောမ်နီဘန်း ဝဲယုတ်လားတေ ထှာရီမှါခ့်ခါ အန်ဘင်းကျေမ်းကား မလဲကလဲစာပဲဘင်းအတွာတ် အပေါ်ရန်နား။ 49အာနိမ်စါန်းငှေါဒီ ငါဘင်းတရားတေဒေ သက်ပန်း အလိုက်နာဒဘင်းဆိတ်တာတ်ကား အုတ်မြစ်အချသောညယ် ကာစေါက်ပေ ကျေမ်းစာဘင်းပဲဘင်းဆိတ်ယောက် တူသမာ။ ဟလာန်းဝဲဘန်း ဝဲတေလွောမ် ဝဲတေယုတ်နီမှါခ့်ခါ အန်ဘင်းကျေမ်းကား ချတ်ချန်းပြိုတာန်ဘန်း ပြတ်စီးတာန်ကူ" ညယ်မိန့်တော်မူသမှာ။
Atualmente Selecionado:
Luke 6: ktpv-rv
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.