ကမ္ဘာႏစ နိဒါန်း
နိဒါန်း
ကမ္ဘာႏစကျမ်ꩻ မဉ်ꩻအဓိပ္ပါယ်ႏနဝ်ꩻ ဖေါႏနယ်ဖေႏ “ကမ္ဘာႏအစ၊ အဇာႏတိ” အကျောင်ꩻခရာႏသွူ။ ကျမ်ꩻယိုနဝ်ꩻ ဖေါႏနယ် ကဖန်ဆင်ꩻ မာꩻထွာလွဉ် စကြာဝဠာႏ ခရာႏ လိုꩻကထွာလွဉ်စ ခရာႏ၊ အပဲစ်ဒုစရဲက် တွမ်ႏထာꩻဒုက္ခ ကထွာလွဉ်စခရာႏ၊ ဗွေႏထာဝရဘုရာꩻနဝ်ꩻ အဝ်ႏဆွုပ်ဆံႏလိုꩻ နုဲင်းမုဲင်ꩻခရာႏနဝ်ꩻသွူ။ ကမ္ဘာႏစကျမ်ꩻကိုနဝ်ꩻ သေနွောင်ꩻ အထျꩻအထောင်ꩻ အဝ်ႏနီစွိုးသွူ။
1) အခန်ꩻတန် (၁-၁၁) နဝ်ꩻထွာ ထာꩻဖန်ဆင်ꩻ မာꩻထွာလွဉ် ကမ္ဘာႏတွမ်ႏ လိုꩻအရီးသွတ်ꩻဖုံႏ သမဲင်ꩻခရာႏ ထီႏဗာႏနုဲင်းနဝ်ꩻသွူ။ အခန်ꩻယိုဖုံႏနဝ်ꩻ ဖေါႏနယ်ခါꩻ အာဒံတွမ်ႏ ဧဝသီးခရာႏ။ ကာဣနတွမ်ႏ အာဗေလသီးခရာႏ၊ နောဧတွမ်ႏ ထီလုမ်ႏခရာႏ၊ ဗာဗုလုန် လမ်းတွိုက်ထို ခရာႏဖုံႏ နုဲင်းနဝ်ꩻသွူ။
2) အခန်ꩻတန်(၁၂-၅၀) ကိုနဝ်ꩻ ဖေါႏနယ် ဣသရေး လိုꩻမျိုꩻဖုံႏ မွိုးဖြားဖါဖြားသီး သမဲင်ꩻသွူ။ အရီးသွတ်ꩻ ပုဂ္ဂိုလ်ႏကထွာ အဗြာဟံနဝ်ꩻ ထာꩻယွုမ်းအာႏကွိုꩻတွမ်ႏ လွောက်ꩻနာႏ ဗွေႏဘုရာꩻအမိန်းနဝ်ꩻ လွိုကယ်ꩻဝင်ꩻနဝ်ꩻသွူ။ နဝ်ꩻထွူ ဝွေꩻပိုဣသဲစ်ခရာႏ၊ အလီꩻယာကုပ် (ဣသရေးတဲ့ꩻ ဟဲ့ꩻသွူ) ခရာႏ၊ ဣသရေးခွိုꩻမျိုꩻ တဆီနီမျိုꩻနဝ်ꩻ အဖါယာကုပ်တွမ်ႏ အပိုခိုဖုံႏ တဆီနီဖြာꩻ ခရာႏဖုံႏသွူ။ ယာကုပ်ပိုခို တဆီနီဖြာꩻအကို ကထွာယောသပ် ခရာႏတဲ့ꩻနဝ်ꩻ ယာကုပ်ပိုခို အလင်ဖုံႏတွမ်ႏ အတမွိုးဖါပိုစွိုꩻဖုံႏ ကဖျော်လွေꩻ အီဂျစ်ခမ်း အုံသော့ꩻဗာႏထာꩻ နုဲင်းမုဲင်ꩻခရာႏဖုံႏနဝ်ꩻ ဖေါႏနယ်ခါꩻသွူ။
ကျမ်ꩻယိုနဝ်ꩻ ဖေါႏနယ်ဖေႏ လိုꩻဖုံႏခရာႏ နုဲင်းနဝ်ꩻတဲ့ အထျꩻနဝ်ꩻ ဖောႏနယ်ဖေႏဒျာႏ ထာဝရဘုရာꩻ ဗွေႏဘုရာꩻ ခွုမ်စမ်ႏမာꩻလွေꩻထာꩻ နုဲင်းမုဲင်ꩻ အကျောင်ꩻခရာႏနဝ်ꩻသွူ။ စရီးအီတွမ်ႏ ထာဝရဘုရာꩻ ဗွေႏဘုရာꩻ ကဖန်ဆင်ꩻ မာꩻထွာလွဉ် စကြာဝဠာႏစွဥ်ႏတဲ့ သွတ်ꩻအီဒျာႏတွမ်ႏ အီႏထွားထိန်ꩻသွုပ်လွေꩻဒျာႏ ဝွေꩻဗွေႏ အလိုꩻမျိုꩻဖုံႏတာႏ ဗွေႏဘုရာꩻအီႏထိန်ꩻထွားသွုပ်ဒျာႏ ဂတိတောႏနဝ်ꩻသွူ။ ကျမ်ꩻတစောင်ႏလွုမ်းနဝ်ꩻ အွဉ်ႏရေꩻဒျာႏ ထာဝရဘုရာꩻ ဗွေႏဘုရာꩻ ခွုမ်စမ်ႏ မာꩻလွေꩻထာꩻ နုဲင်းမုဲင်ꩻ၊ နဝ်ꩻထွူ ထာဝရဘုရာꩻ ဗွေႏဘုရာꩻ စီႏရင်ႏဖေႏတံႏ လိုꩻဖုံႏ ကမာꩻအပဲစ် ဒုစရဲက်သားဖုံႏ ခရာႏ၊ အွဉ်ႏတီႏ စွဲကိုဝွေꩻဗွေႏ လိုꩻမျိုꩻဖုံႏခရာႏ၊ နဝ်ꩻထွူ မွဉ်းဖျင်ဖေႏ ဝွေꩻသီးသမဲင်ꩻ ခရာႏ၊ ဖေါႏနယ်ဖေႏ နုဲင်းနဝ်ꩻသွူ။ တဲမ်းမတ်သေꩻ လိုꩻမျိုꩻတမျိုꩻ အထာꩻယွုမ်းချက်ဖုံႏတဲ့နဝ်ꩻ၊ အထာꩻယွုမ်းယို ဖေႏကမွန် အာႏအဝ်ႏလွဉ်တဲ့နဝ်ꩻ ဖေႏကထွာ အစွဲအကမ်းတာႏ တဲမ်းမတ်သေꩻဗာႏ ကျမ်ꩻယိုတစောင်ႏသွူ။
အကျောင်ꩻခရာႏအအဲဉ်ႏ
ဖန်ဆင်ꩻမာꩻထွာလွဉ်စကြာဝဠာႏတွမ်ႏလိုꩻခရာႏ (၁:၁—၂:၂၅)
ထွာအပဲစ်ဒုစရဲက်တွမ်ႏထာꩻဒုက္ခဆင်ꩻရယ်ꩻအစ (၃:၁–၂၄)
တယ်ႏအာဒံဗꩻလွေꩻနောဧစိုးခရာႏ (၄:၁—၅:၃၂)
နောဧတွမ်ႏထီလုမ်ႏထိုꩻခရာႏ (၆:၁—၁၀:၃၂)
ဗာဗုလုန်ရန်းခြေင်ႏတွိုက်ထိုခရာႏ (၁၁:၁–၉)
တယ်ႏသျေမဗꩻတွိုႏလွေꩻအာဗြံခရာႏ (၁၁:၁၀–၃၂)
ဣသရေး လိုꩻမျိုꩻအဖါဖဲ့ꩻဖါဖြားခွိုꩻရဲဉ်ႏကထွာအဗြာဟံ၊ ဣသဲစ်၊ ယာကုပ်ခရာႏ (၁၂:၁—၃၅:၂၉)
ဧသောခွိုꩻမျိုꩻဖုံႏ (၃၆:၁–၄၃)
ယောသပ်တွမ်ႏ ဝွေꩻဝေးခိုဖုံႏ (၃၇:၁—၄၅:၂၈)
ဣသရေး လိုꩻမျိုꩻဖုံႏ ကအဝ်ႏဒါႏအီဂျစ်ခမ်း (၄၆:၁—၅၀:၂၆)
Atualmente selecionado:
ကမ္ဘာႏစ နိဒါန်း: PBCL
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Pao Bible Common Language© Bible Society of Myanmar, 2019.