MARKA 15
15
Pilata hmaah Isua a ding
(Mt. 27:1-2,11-14; Lk. 23:1-5; Jn. 18:28-38)
1Zîng a lo nih veleh puithiam lalte chu upate, Dân zirtîrtute leh Sanhedrin pum pui chuan ro an rêl#15:1 Mss ṭhenkhatah ‘engtia tihhlum tûr nge tih an rêl a’ tih a ni. a; Isua chu an hlîng a, an kai a, Pilata kutah an hlân ta a. 2Pilata chuan ani chu a lo zâwt a, “Juda-te lal i ni maw?” a ti a. Ani chuan a chhâng a, “Chu, i sawi chu,” a ti a. 3Puithiam lalte chuan an hêk mawlh mawlh a. 4Tichuan, Pilatan a zâwt leh a, “An hêkna zozai che hi i hre na nge, a enga mah i chhân loh?” a ti a. 5Isua erawh chuan a enga mah chu a chhâng ta chuang lo va, Pilata chuan mak a ti hle a.
Tihhlum tûrin Isua chungah ro an rêl
(Mt. 27:15-26; Lk. 23:13-25; Jn. 18:29—19:16)
6Kût niin mi tâng pakhat an ngen apiang Pilatan a chhuahsak ṭhîn a. 7Helho tâng zînga pakhat, Baraba an tih chu, hel laia tual an thahnaa a tel ve avângin tân inah a tâng reng a. 8Mipuite chu an han chho#15:8 Mss ṭhenkhatah ‘an au va’ tih a ni. va, a tih ṭhin ang kha tihsak leh tûrin Pilata chu an ngên a. 9Ani chuan, “Juda-te lal hi chhuahsak che u ila in duh em?” a lo ti a. 10Puithiam lalte chuan îtsîkna avângin a kutah an rawn hlân a ni tih a hre si a. 11Puithiam lalte chuan mipui chu Baraba chhuahsak dîl tûrin an fuih a. 12Tichuan, Pilatan anniho chu, “Chuti chu Juda-te lal in tiha hi engtia ka tih nge in duh?” tiin a zâwt leh a. 13Anniho chu an au leh a, “Krawsah khêngbet rawh,” an ti a. 14Pilata chuan, “Engah maw? Eng nge a tihsual?” a ti a. Nimahsela, anniho chu ring lehzualin, “Krawsah khêngbet rawh,” tiin an au ta tuar tuar a. 15Tichuan, Pilatan mipui tihlungawi a duh a, Baraba chu a chhuahsak ta a; Isua erawh chu sipaite a vuaktîr a, krawsa khenbeh tûrin an hnênah a pe ta a.
Sipaiten Isua an sawisa
(Mt. 27:27-31; Jn. 19:2,3)
16Sipaite chuan in hual chhûngah, praitorian an tihah chuan an hruai lût a, an pâwla mi zawng zawng an au khâwm a. 17Ani chu kawrfual senduk an hâktîr a, chawimawina atân hlîng an kual a, an khumtîr a. 18“Chibai, Juda-te lal!” tiin chibai an bûk ṭan ta a. 19Tiangin a lu-ah an vua a, chil an chhâk a, ṭhingṭhiin chibai an bûk el huai huai a. 20Chutia nuihza siam nâna an hman zawh chuan kawrfual senduk chu an hlihsak a, ama kawr an hâktîr leh a, krawsa khenbeh tûrin an hruai chhuak ta a.
Isua Khenbeh
(Mt. 27:32-44; Lk. 23:26-43; Jn. 19:17-27)
21Thingtlâng lam aṭanga lo kal mi pakhat, Simona, Kurini khaw mi, Aleksandara leh Rufa pa, lo ding chu Isua kraws putsak tûrin an man a. #Tirh. 13:1; Rom. 16:13.
22Golgotha, ‘Luruh hmun’ an tih thleng chuan an hruai a, 23Mura pawlh uain an pe a; mahse, a duh lo va. 24Tichuan, krawsah an khêngbet ta a. An chan ṭheuh tûr hriat theih nân ṭhumvâwrin a silhfênte chu an insem a. #Sam. 22:18. 25An khenbeh hun chu zîng dâr kua#15:25 Mss ṭhenkhatah ‘dar 12 vêl’ tih a ni. vêl a ni. 26Amah an hêkna thu ziak an târ a, ‘Juda-te lal,’ tiin. 27Ama rual chuan suamhmang pahnih an khêngbet bawk a, a ding lamah pakhat, a vei lamah pakhat.#15:27 Mss ṭhenkhatah châng 28-na, ‘Mi sualte chan a chang ve ta tih lehkha thu kha chutiang chuan a lo thleng ta a ni’ tih a tel. #Isa. 53:12.
29Mi vei nuk nukte chuan an lu thingin, “Uai! Nang, Tempul ṭhiata ni thuma din leh theitu, #Sam. 22:7; 109:25; Mk. 13:2; 14:58; Jn. 2:19. 30intidam la, kraws ata kha lo chhuk ta che,” tiin an tiel a. 31Chutiang bawkin puithiam lalte leh Dân zirtîrtute chuan, “Mi dang mah tidam ṭhîn, mahni lah intidam thei si lo. #Sam. 22:7,8. 32Amah kan rin theih nân kan hmuhah, Krista, Israel lal chu, tûnah hian kraws ata lo chhuk ang hmiang!” tiin hmusit takin an tiel bawk a. Ama ruala khenbehte pawh chuan chutiang bawkin an ti a.
Isua a thi
(Mt. 27:45-56; Lk. 23:44-49; Jn. 19:28-30)
33Chhûn dâr sâwm leh pahnih a lo ni a, tlai dar thum thlengin khawvêl pum pui a thim ta vek a. 34Tlai dâr thumah chuan Isua chu ring takin a au va, “Eloi, Eloi, Lema Sabakthani,” tiin (chu chu, “Ka Pathian, Ka Pathian, engah nge mi kalsan?” tihna a ni). #Sam. 22:1. 35A kianga ding ṭhenkhatte chuan chu chu an hriatin, “Ngai teh u, Elija a ko va ni,” an ti a. 36Mi pakhat a tlân a, uain thûrah sponj a chiah a, tiangah a târ a, Isua chu intîr a tum a, “Ngawi rú, amah la thla tûrin Elija a lo kal emaw i en ang u,” a ti a. #Sam. 69:21. 37Isua chu aw ring takin a au va, a hnuk a chat ta a. 38Tin, Tempul chhûng puanzâr chu a chung lam aṭangin a hnuai lam thlengin a thlêr thla ta a. #Exod. 26:31-33; Heb. 10:9-20. 39A hma zâwna sipai za hotu ding pawh chuan chutia#15:39 Mss ṭhenkhatah ‘a au va’ tih a tel. a hnuk chat ta chu a hmuh chuan, “He mi hi Pathian Fapa a lo nih ngei hi le!” a ti a. #Mk. 1:11; 9:7.
40Hmeichheho pawhin hla tak aṭangin an thlîr ve reng a, chûng zîngah chuan Magdala khaw mi Mari te, Jakob naupang zâwka nu Mari te, Josea nu te, Salomi te an tel a. #Jn. 19:25. 41Hêng mite hi Galili rama a awm laia amah zuia a rawngbâwlsak ṭhîntute an ni; tin, a ruala Jerusalem-a chho ve hmeichhe dang pawh tam tak an awm. #Lk. 8:1-3.
Isua phûm
(Mt. 27:57-61; Lk. 23:50-56; Jn. 19:38-42)
42Juda-te Inrinni a ni a, (chu chu Sabat ni atâna an inbuatsaih ni a ni.) #Deut. 21:22,23. 43Josefa, Arimathai khuaa mi, rorêltu zînga tel, mi zahawm tak, Pathian ram beisei mi ve bawk kha, tlai lam a lo nih chuan a lo kal ve a, huai takin Pilata a va luh chilh a, Isua ruang chu a dîl a. 44Pilata chuan a thi ta mai tih a hriat chuan mak a ti hle a, sipai za hotu chu a ko va, a thihna chin a zâwt a.#15:44 Mss pakhatah chuan, ‘a thi dêr tawh maw?’ tih a ni. 45Sipai za hotu ka aṭanga a hriat hnu chuan a ruang chu Josefa a pe ta a. 46Tichuan, puan zai sîn a lei a, amah chu a la thla a, puan zai sîn chuan a tuam a, lung ker thlânah a zalh a, thlân kawngka chu lungin a khâr ta a.#Tirh. 13:29; 1 Kor. 15:4. 47Tin, Magdala mi Mari leh Josea nu Mari pawh chuan an zalhna chu an en reng a.
Selectat acum:
MARKA 15: MIZCLBSI
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.