Luka 24
24
Wo N Wye-wyeyi Lo Njesun
1Shi ofye ɓei gyi n Ladiwyi, anyikwoza yi ɓa kun n labmi-lbmi yi ɓa lo vingwo n omi asindnyai shi. 2Ɓa gye ala kuta pmiya n ko ɓei gu n vingwo gbe nyi. 3Ntucenu ɓa lofi. Amma shi ɓa ɓei lofi to ɓa gye Yesu nayi shi m.
4Shi ɓa ɓei gye lonu ɓaku je-je. Amma n sayi-sayi azaho ngun aba ɓa kunzhi n najei kpe n bu-bui pashau. 5Edna kwa wo anyikozayi ɓa ce akwo-wko zhi, esanu azayi ɓei daɓo n ɓai ge, “Kni nu zhin fyei zan oza wye-wyei shin n azafi aba? 6Ai wo to gnil lo ya m, wola lakala. Fye pa enya n wo ɓei gnafye woi ye nyi n Galili ge:
7“Aɓa ga Oza Nugun n alaifida akun a zun wo du, amma woɓa laka dna n anyipyeyi tayi.”
8Nsayi anyikozayi ɓa pa ɓedaye ɓo. 9Ɓa jezelo api ɓa gna owo abara ngun awo-cei gmanyi ɓedo n azajei n mwa. 10Ayi anyikwozayi Maryamu Magadaliya, Yuwannan ɓedo n Maryamu n wo zhin Yakubu ya nyi. Oɓa ɓedo n anyikoza ajeyi ɓa gna Yesu abara aɓoye vinya. 11Amma to Yesu abara ɓa ga ɓedayi gaiciya m, ɓai gye ge anyikozayi gbe akata fi ɓa nu ka wai.
12Amma Bitrus wa lakala wa busi lo vingwo n wohin, shi wo ɓei yawye shi wa gye aje nu kawai n ɓaɓei puwo nyi. Nsayi wa jezelo api woi zhin nubo si koɓa ze nwo lonu.
13Nwyiyi kwa Yesu aviyi ngun aba ɓai fi n zokwo bai daɓo lonu Imwasu, Ezhi yi nyi ngye mil ngun tnaba nu n Urushelima yi.
14Alo ɓai daɓo tu anya ɓo nɓa zhin vinya n Yesu tukwo. 15Shi ɓa ɓei lo ɓai daɓo lonu Yesu wa yeɓe vi-viyi n ɓai ɓa lo ɓai gni zan-zan. 16Shi ɓa ɓei gyewo to ɓa kpe wo ye m.
17Yesu wa nyaɓa ge, “fye lo fyei da kniɓei nu laiʼa?” Ɓa ku pizhi n na wyebai wun fi. 18Zaknayi n ɓa, ai yiwo ge Kiliyobas wa nyawo ge, “Oho nu bwace dnalo n Urushelima ye n ho ta kpe oɓoyelo n kwa zhin n anyipyei avun nya ye m?”
19Yesu wa nya ɓa ge, “A kni ɓoya? A ciwo ge, anya n ɓa zhin n yesu yi n wo gmi n Nazarat nyi. Wo ɓei zhin anabi nu har ma Shekwoyi ɓedo n azai vinya ɓei ciwo ntu aɓo wo-woyi ɓo n wo ɓei zhin nyi.
20“Amma eyi aprist dnagmai ɓedo n ya begyi yi ɓa wan wo ɓa gawo ntuge azun wo du. 21Yi ɓei n wyetu yi ge owo nu ɓa gni Israila. To nyipyei tayi nu shi aɓoye ɓei zhin.
22“Anikozaho n yi ɓaku ɓeyi n nabari hoi to yi kpe ce yem, ɓa lo vingwo n labmi-labmi yi. 23Ɓa to gyewo nayi shi m, ɓa jezeɓe ɓai cige, ɓaku gye amalaika ho ɓai gna ɓa wo la lakala n vingwo. 24Azaho n i kuwa ɓai lo vingwoyi ɓai gye gaiciya nu, amma ɓato gyewo wye m.”
25Nsayi Yesu wa ciɓa ge, “Ai fye zhin a ma-ma nu kni nu zhin to fyei ga anabi ɓeda gaiciya n pye-pye n maʼa? 26Ai kwo ɓei zhin tile nu ntuge Masifu wa sin wahala ye n sayi walo owo daraja.”
27Nsayi Yesu wa wu ɓa enya nkwo kafi lo n wo tukwo n Littafi enya n kwo ya n Attaurat har kwoi lo annabi.
28Shi ɓa ɓei wo vi-vi n ezhi hoi n ɓa ɓei lo nyi, Yesu wa zhin ngye woye wa duya. 29Amma ɓa ɓawo ge wola wangye ngnisun n ɓai ntuge wyeshe ɓei la she. Ntucenu wa ye n ɓa nya, wa bmadna n gnisun n ɓai. 30Shi aɓei ɓe n nyagyi wa sase ngnisun ɓai, wa shin bredi wa zhin Shekwoyi godiya, wa gnakwo ajeya wa gaba. 31Nsayi oɓa wye ɓa guya bmagyi ɓa gane ge Yesu nu gni, amma wa bwi ɓa wye n sayi-sayi.
32Ɓaci aje ge, ai yi ɓei wo agmada pya ho esanu n wo ɓei daɓo n yi ɓe n zokwo nyi. Woi wu yi enya kwo kafi lo a Littafi nyi. 33Ɓa kukala ɓajeze lo Urushelima ɓagye owo abara n yezhi ngun awocei-gmanyi ɓedo n azajei. 34Ɓa cige, “Lalle Dagayi la lakala n vingwo gama wo ku wohin tukwo wu Siman.”
35Oɓa ngun aba ɓaku oɓanya da nya kwa zhin vinya n zokwo, n jesun shi ɓa gane n woi esanu wa gna brediya gaba nyi. 36Esnu n ɓa ɓo yezi ɓai da aɓoye sa fyewyi, ba je-je ɓa gye Uesu gni n ɓa tan-tansin kawai, wa ciɓa ge, “Bugbafu nfya ba.” 37Ɓazhi ednai wo ɓa ɓai gye ge zafun nukwoyi ho nu gni.
38Amma Yesu wa ciɓa ge, “Kni nu zhin fyei la damuʼa? Kni nu zhin to fyei ga gaiciya ma? 39Fye shi mi abwa awye n mi apitai fya kpe ge emi nu gni sosai. Fye to mi bwa fya gye gama zafun to n nayi m, bale a cige kwo bw asunkun, shi fye gye mi n cei nyi m.” 40Shi wo ɓei d lonu wa-wuɓa owo abwa n apita yi.
41Amma to ɓa du-du ɓa ga gaiciya m, gama ɓa ɓei nuzhi n agmadai nu cei wo ɓa. Ntucenu wa nyaɓa ge, “Fye n nyagyi lo ya?”
42Ɓa gawo wye sala ɓi ho. 43Wa gwo wa gyikwo gni nɓa bye vinya.
44Nsayi wa ciɓa ge, “Aɓoye nyi n mi ɓei gnafye esanu n mi ɓei kun-sun n fyei nyi. Nyaho-nyaho n kwo kafi lo n Musa Littafi n mi tukwo ɓeda n annabi ɓei ka har ɓedo n Zabura yi ɓa ku nu.” 45Nsayi wa guɓa tunaniya ntuge ɓa gane n nyai n kwo kafi lo n Littafi. 46Wa ciɓa ge, “Nya nyi nkwo kafi lo nge kwo zhin tile nu Masifu wa sin wahala har wa laka n vingwo n nyipyei tayi. 47Njesun ge dna wo eye nu aɓa zhin waʼazi ntuge aza ɓa bwa gafara n ɓa laifi. A zhin aza vinya, kwoi ya n Urushelima. 48Fye zhin asaida-da nu aɓoye vinya.
49“Emice, mi ɓa tnu fye n nyai n mi dada ku alkawali zhin. Amma fye ku pmi fi n zhimi ye saidai ikwo n kwo gmi nshe kola ɓe da fye.”
50Nsayi wa kunɓaya zhi nbmi wa vi zokwoyi n kwolo Baitanya nyi. Wa ku abwa wu nshe wa tuba anabarka. 51Shi wo ɓei gni woi tuɓa anabarka yi Walakala tu she har wa bwi ɓa wye woi gun n sheyi. 52Ɓa zhin wo sujada zhi ɓo, Nsayi ɓa jezelo Urushelima n nu-nuyi n agmadayi. 53Ɓaku fi adduwa nyakun n saho-sahoi vinya ɓai zhin Skekwoyi gwodiya.
Selectat acum:
Luka 24: GAW
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.