Genesis 40
40
Si Jose Nagsaysay sang Kahulogan sang mga Damgo sang mga Binilanggo
1Sang ulihi ang manugtagay sang bino sang hari sang Ehipto kag ang iya pangulo nga manugluto sang tinapay nakasala sa ila agalon nga hari. 2Ang hari naakig gid sa sining duha niya ka mga opisyales, 3gani, ginbilanggo niya sila sa balay sang kapitan sang gwardya, sa diin si Jose ginbilanggo. 4Nagdugay sila sa bilangguan kag ang kapitan sang gwardya nagsugo kay Jose sa pag-alagad sa ila.
5Isa ka gab-i, didto sa bilangguan, ang manugtagay sang bino sang hari sang Ehipto kag ang iya pangulo nga manugluto sang tinapay nagdamgo, kag ang tagsa nila ka damgo may nagkalainlain nga kahulogan. 6Pagkadto ni Jose sa ila sang pagkaaga, nakita niya nga natublag sila. 7Ginpamangkot niya sila, “Ngaa daw kasubo gid sang inyo mga guya karon nga adlaw?”
8Nagsabat sila, “Kada isa sa amon may damgo, kag wala sing isa diri nga makasaysay sang kahulogan sini.”
Si Jose nagsiling, “Ang Dios amo ang nagahatag sang ikasarang sa pagsaysay sang kahulogan sang mga damgo. Kon mahimo sugiri ninyo ako sang inyo mga damgo.”
9Gani, ang manugtagay sang bino nagsiling, “Sa akon damgo may balagon sang ubas sa atubang ko 10nga may tatlo ka mga sanga. Sang pagpanalingsing sini, nagpamulak dayon, kag ang bunga sang ubas naluto. 11Nagauyat ako sang kupa sang hari, gani, ginkuha ko ang mga ubas kag ginpuga ini sa kupa, kag ginhatag ko ini sa iya.”
12Si Jose nagsiling, “Amo ini ang kahulogan: ang tatlo ka mga sanga amo ang tatlo ka adlaw. 13Sa tapos ang tatlo ka adlaw pagwaon ka sang hari, patawaron ka niya, kag pabalikon sa imo palangakuan. Magatagay ka sing bino sa hari subong sang imo ginahimo sang una sang nagaalagad pa ikaw sa iya. 14Pero dumdoma man ako kon yara ka na sa kaayuhan, kag kon mahimo buligi man ako paagi sa paghinambit sa akon sa hari agod makagwa man ako sa sini nga bilangguan. 15Kay sa pagkamatuod, paagi sa pakusog gindala ako diri halin sa duta sang mga Hebreo, kag bisan diri sa Ehipto wala ako sing may nahimo nga malain nga manginkabangdanan sang ila pagpabilanggo sa akon.”
16Sang pagkakita sang pangulo nga manugluto sing tinapay nga ang kahulogan nga ginhatag sa damgo maayo, nagsiling sia kay Jose, “Ako nagdamgo man. May tatlo ka alat nga sulodlan sang tinapay nga ginatus-on ko. 17Sa naibabaw gid nga alat, yara ang tanan nga sari sang tinapay para sa hari, pero ginkaon ini sang mga pispis.”
18Si Jose nagsabat, “Amo ini ang kahulogan sang imo damgo: ang tatlo ka alat amo ang tatlo ka adlaw. 19Sa tapos ang tatlo ka adlaw pagwaon ka sang hari kag pugotan! Dayon bitayon niya ang imo bangkay sa kahoy, kag ang mga pispis magakaon sang imo unod.”
20Sa ikatlo nga adlaw, nga amo ang kaadlawan sang hari, naghatag sia sing punsyon para sa iya mga opisyales. Ginpagwa niya ang iya manugtagay sang bino kag ang pangulo sang manugluto sang tinapay kag ginpaatubang niya sa iya mga opisyales. 21Ginpabalik niya ang manugtagay sang bino sa iya una nga palangakuan, 22pero ginpabitay niya ang pangulo sang manugluto sang tinapay. Ang tanan nga natabo suno gid sa ginsiling ni Jose. 23Pero ang manugtagay sang bino wala gid makadumdom kay Jose, kundi nalipatan gid niya sia.
Selectat acum:
Genesis 40: MBBHIL12
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Maayong Balita nga Biblia © Philippine Bible Society, 2012