Mithumo 1
1
Magana nya guhegule
1 # Wona gambe: Luk 1:1-4. Amanawe Teyofilo, umo nya Libhuku nya guhegule, nyi sasamedzede satshavbo iso Jesu a nga girago ni gu hevbudza, gukhugela guhegulani nya thumo waye, 2kala litshigu a nga gwelago khilo Ndzadzini; hwane nya gu na ningide Milayo khu tshivba nya Liphuvbo nya Guage, ga Vapostoli a nga bani a va hathide. 3Hwane nya gu na fude, Jesu a dzi wonegiside ga Vapostoli na gu vbanya, khu mawonegiselo nya guhambanelane, a dzi wonegiside gwawe gipimo nya magumana matshigu, a gu ganela navo khu Mahungu nya Mufumo wa Nungungulu. 4Na gu hodza navo, a di va laya va si khugi khu Jerusalema, aholu, va lindrela gutadzisega nya gitumbiso gya Babe, “Gitumbiso mu nga nyipwa na nyi gu ganela khu likana langu: 5#Wona gambe: Mat 3:11; Mark 1:8; Luk 3:16; Joh 1:33. Kholu, Johane bhapatiside khu mati, aholu enu, ndrani nya matshigu madugwana, mu na bhapatiswa khu Liphuvbo nya Guage.”
Gugwela ga Jesu Ndzadzini
6Vapostoli na va tshanganide, va di mu wudzisa, khavo: “Pfhumu, ina khavbo olu uno wusedzago mufumo tigoni ga Israyeli, gani?” 7Uye a di va hakha, khuye: “Kha si lumbi enu guti gikhati ni dzinango Babe a dzi vegisidego khu gudzina gwaye. 8Gasi enu, mu na hakha tshivba gikhati Liphuvbo nya Guage li na gu tshigago gwanu. Mu na khala dzifakazi dzangu gukhugela Jerusalema ni Judheya gwatshavbo, ni Samariya, kala mahegiso nya mafu.” 9Na ganede esi, a di gwela Ndzadzini na va gu mu wona, lipfhi li dita va tshira mahoni gwawe. 10Na va gu khedza Ndzadzini, gikhati Jesu a nga bani a gu gwela, va di hidzimela vbafuvbi gwawe vama vavili, na va ambade dzingandzu nya guage, va ta va wudzisa, khavo: 11“Vama va Galileya, khu ginani mu pfhalago khu gu khedza Ndzadzini? Uye Jesu wa moyo mu mu wonego na gu gwela Ndzadzini, a na wuya gambe kharati nga edzi mu mu wonego na gu gwela khidzo Ndzadzini.”
Matiya a ngu hathwa gutshikedza wulanga wa Judha
12Khavbo avbo, Vapostoli va di bwelela va gu hongola Jerusalema khu gigomoni nya miolivha, gi khalago vbafuvbi ni Jerusalema, gipimo nya guningane pfhuka wu dzumedziswago gu gimbila khu litshigu nya Sabhadho. 13Na va bede dhoropani, va di lita nyumbani ga vbatshani, omu va nga bani va gu olovela gu khala: Pedro, Johane, Andreya, Filipi, Tomasi, Bharitolomewu, Matewu, Jakobe mwamana wa Alifewu ni Simoni Zelote, ni Judha mwamana wa Jakobe. 14Vatshavbo khu gu pwanana va di pharisa gu gira milombelo, gumogo ni vanyamayi nya gukari ni Mariya mayi wa Jesu ni vandriyaye.
15Khu matshigu yale, Pedro a di khuga a ema vbakari nya vandruye (tengo nya vathu vatshavbo va nga bani va tshanganide a diri gipimo nya lizana ni magumavili 120 vathu), a ganela, khuye: 16“Vandruye, gu di vbwetega gutadzisega umo nya Milowo, satshavbo iso si nga ganedwa khu Liphuvbo nya Guage, khu likana la Dhavhidhe, khu mahungu ya Judha a nga thangelago ava va nga hunga Jesu. 17Judha a di valedwe vbakari gwathu a gu hakha gipimo gyaye umo nya thumo wathu. 18Aholu rengide gipeto khu tengo va nga mu livbago khu wusongi waye, oyu muthu a di thega vbavbatshi khu hungo, a pferuga khu vbakari, mahembe yaye ma vbalaga vbavbatshi. 19Silo sesi si di tidwa khu vathu vatshavbo va Jerusalema, khu kharato, gipeto gile va di gi rana khu limi lawe khavo Akelidhama, gu tshamusago gupwani lithembwe nya novba.
20Kholu gu lovidwe libhukuni nya Dzindzimo gupwani:
‘Yi na khale giwula ndranga yaye
ni muthu moyo a nga vbanyi avbo.’
Gu engedzwa gambe pwani:
‘Wulanga waye wu na tshikedzwa khu mumbe!’
21“Khu kharato, vbakari nya ava vama hi gimbilago navo gukhugela gikhati gyatshavbo Jesu a nga vbanyago vbakari gwathu; 22gukhugela Gubhapatisa ga Johane kala litshigu a nga gwelago Jesu Ndzadzini; moyo wawe gu vbwetega a khale gumogo ni ethu fakazi nya Guwuge gwa Jesu khu ga vafudego.” 23Khavbo avbo, va di hatha vama vavili: Josefe a nga bani a gu ranwa pwani Bharisabha, na gu tidwa khu lina la mululami, ni Matiya. 24Khavbo avbo, va di gira nombelo, khavo: “Pfhumu, Uwe utigo monyo nya muthu ni muthu, wonegisa ga ava vavili khu wevbini uye u mu hathidego, 25gasi gu tshikedza, thumoni nya wupostoli, wulanga wu nga tshidwago khu Judha khu gufela gubwelela wulanga waye.” 26Khavbo avbo, va di gira tumbatumbane; gi gu thegela Matiya. Gukhugela avbovbo a di vegwa tengoni nya vale nya likhumi na vavili vapostoli.
Selectat acum:
Mithumo 1: BGE2014
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
A Bíblia em Gitonga © Bible Society in Mozambique, 2014.