Lukas 8
8
Sik ngay Mangena Galo Isus
1Sanya ginan, ay Isus nalo yangay sa sangay furuan ayu daul ay sa sangay furuan ayu sirut, laman nanfamoyung at Masine fag Barita sabaliwas Dius nu gfagtainan. Ay at labi dua galo anya, 2ay anggan sik ngay mangena. Kafag ngay mangena ebi anke mauri fag ngay falad ay tiba anke fakasaitun, ay abandi anfia wan. At sadi tagalo anya, Maria, at ngayan yangay te, Magdalena. Ebi fituk mauri fag falad naubun anya. 3Ay anggan Uana, at mangama Kusa, Erudes at fagsuguan at sadi, ay Susana, ay tiba yak mangena. Kafag ngay mangena nagubuk Isus ay at ngay ufud, siginan nu gfon at ramraman.
Isus at Faydayuanan sabaliwa sik Tagtanum
Mt 13:1-9; Mk 4:1-9
4Sik ngay taw ngayu, siginan sangay furuan andasug sas Isus, ay Isus nafoyung sik faydayuanan te, 5“Sik tagtanum nakoko laman nananum at ngay bvtang. Ay gina gtanum, tiba at bvtang antong sasad dalan. Ay ngay taw nasiad, ay manuk tungud andasug ay nasinduk wan. 6Ay tiba at bvtang antong sa tagagangun, ay dewa bagu gtugbung, anlangke wan, aroro matat way sanya. 7Ay tibak bvtang antong sas wa makmak madugi, ay kafag makmak anbia ay nafaut at tanuman. 8Ay tibak bvtang antong sat masine fag daga ay anbia ay grawvg, ay at rawvg siginan galay sadik bvtang, sik sandan.”
Isus gina garingang, nauro te, “Fagayu am tagdungugan, amatangani tua fia.”
Isus at Algan at Fagfaydayuananun
Mt 13:10-17; Mk 4:10-12
9Ay at ngay tagadal ginto at faydayuanan at masuad. 10Ay Isus nalong te, “Dius kaylat nu sumaful am at ngay masuksuk sabaliwa at fagfagtainanan. Ay sa tibak taw faydayuanan way lang, laman,
‘dewa gdama, wa glag,
ay dewa gdungugan, wa gtogdungug.’#8:10 Isayas 6:9.
Isus at Faydayuanan sabaliwas Tagtanum at Masuad
Mt 13:18-23; Mk 4:13-20
11“Katatuy at faydayuanan at masuad. Kafag bvtang at masuad, Dius at Longan. 12At kintong fag bvtang sasad dalan at masuad, sik taw at nadungug Dius at Longan, ay arodi vtv Satanas andasug ay nabul kafag Longan siginan kafag taw at amatanganan, laman kanya wa gafanud ay wa ban kalangfe. 13Ay at kintong fag ngay bvtang sa tagagangun, kata ngay taw at nadungug Dius at Longan ay masakit nu gafanud ay guseganan. Ay kanya fag ngay taw nu gafanud wa glugo, kata way kafag bvtang nu yud nalalid, aroro nu ndasug famaskud, kanya fagayu gfangafoliun way. 14Ay at kintong fag ngay bvtang sas wa makmak at madugi, kata ngay taw at nadungug Dius at Longan, ay dewa katanya, kanya fagayu gafanawa way at leleg ste swa daga, ay kesug way at fagmaramramanun, ay at fakaylatun ste swa daga nafaut at amatanganan, ay at rawvg wa nlesan. 15Ay at bvtang at kintong sit masine fag daga at masuad, sik taw at nadungug ay takesug tua Dius at Longan, ay tagfabanwan tua sat masine ay sat matuyan fag amatanganan. Ay kanya mafanyan tua anggan narawvg.
Sik Salung at Masukluban si sik Fagsuadan
Mt 5:15; Mk 4:21-25
16“We taw namasalung sik salung, ay gtabun sik fagsuadan ay mannga namasas daga fagtiugan, nu bunway namasa tuas fagfatungkudan, laman ngay taw nu nasakbo lumag at damlag. 17Aroro fagayu at yud kalag umsure ban, ay fagayu at masuksukan umsaful ban. 18Amatangani fia kaduge am gdungugan, aroro nusnga sinu at ke kwa, e gfamut yay ban. Ay nusnga sinu nu alay way tagsi anya, e namul way ban siginan anya, anggan at amatanganan te, Tuy angku way.”
Isus at Mina ay at ngay Faduksay
Mt 12:46-50; Mk 3:31-35
19Arodi, Isus at mina ay at ngay faduksay andasug, ay wa manangakbang sas Isus aroro ngayuk taw gfasidsikfitan anya. 20Ay e nalong sas Isus te, “Am mina ay am ngay faduksay sis lod bale, gyalagun emu.”
21Ay Isus nalong te, “Tagdungugan ay tagfaning Dius at Longan, kanya tua ku mina ay ku ngay faduksay.”
Isus Nafasiwang sik Fulug
Mt 8:23-27; Mk 4:35-41
22Sik menit, Isus nasakay sa sik sakayan lino gasfuan at ngay tagadal, ay kanya nalong te, “Bastam, nandife watam lino.” Ay kanya fagayu nalo wan. 23Ay kaduge sis sakayan lino, Isus gtiug. Ay sik fulug andasug, ay at sakayan antalin mamam ay gakalubgubun wan.
24Ay at ngay tagadal ankakbang sas Isus ay gfulo anya te, “Em Fun, em Fun, gakalubgubun watam!”
Ay Isus anfulo ay gsalag tagmara ay lugwak. Ay anragang wan ay anke fagmanabayanun wan. 25Isus nalong sat ngay tagadal te, “Wain ay fagyudun e fagafanudun?”
Ay at ngay tagadal kalimu, ay gamatangan daul, ay glodlongan te, “Sinu tuy fag taw? Newa, dewa tagmara ay mamam gfaning tua anya.”
Isus Nafafia sik Mangama at ke Mauri fag Falad
Mt 8:28-34; Mk 5:1-20
26Isus ay at ngay tagadal andasug sa sangay taw Gerasa at talun. Gerasa fag talun ay talun Galilea gdiddifean Lino Galilea. 27Ay gina Isus gduksun siginans sakayan lino, sik mangama gfablang anya. Kafag mangama ebi gbanwan sit furuan, ay ngayuk mauri fag falad antayuk sa anya. Glugo wan kanya nu yud gsulun lanbung, ay nu yud namanwan ya sat bale. Ay at fagbanwanan si ways fagfolian ngay kinbul. 28Kafag mangama nu nalag Isus, nauro ay namalub sit daga salubangan, ay maksvn nu glong te, “Nataw am fagyafakamulunun ro sa angku, Isus, Tiba Tungud fag Dius at Baguama? Maksvn nu glong au emu te, lag gfauri angku.”
29At fagnalongun katanya aroro aro taw Isus nasugu kafag mauri fag falad laman gubun anya. Ngayu ginan kafag mauri fag falad nu nangatayuk sanya fag taw. Ay tibak taw naulit kanya fag taw ay nasiuk salambitan sit famauyungan ay sit tiusan bitis. Ay kanya fag taw nagatvng at fansiuk fag ngay salambitan ay at mauri fag falad natabug anya sas talun at yud e taw. 30Ay Isus nainto anya te, “Sinu am ngayan?”
Ay kafag taw nabalus te, “Tangayu.”
Kanya nalong takatanya aroro ngayuk mauri fag falad tagsi anya. 31Ay kafag ngay falad at mauri maksvn nu get sas Isus te, “Lag gtabug emi sas tangabasad fag lusung laman namaurianan emi.”
32Ay sanya sik ngay bumbu gfangudkudan sa sangaba tigyangan tubi, ay kafag ngay falad at mauri maksvn nu get sas Isus te, “Fasai emi sa sangay bumbu.” Ay Isus gfaning at fagetun. 33Ay kafag ngay falad naubun kafag taw ay nasakbo sa sangay bumbu, ay kafag ngay bumbu natarung siginans tubi ay nataglayun sasad lino ay napnut.
34Ay ngay tagalaga ngay bumbu gabanganan guli sat furuan ay sa tagligung fag ngay furuan, laman namansulit at nalag. 35Nu katanya, ngay taw nalo sanya, laman nanlag te, nataw at kinfasludan. Ay kanya fag ngay taw andasug sas Isus, ay nalag aro ke mauri fag ngay falad, malunggung sis Isus at daga salubangan ay galanbungan ay e amatanganan wan. Ay at nananlag maksvn nu kalimu. 36Ay kafag ngay taw at nalag at kinfasludan nafoyung sat ngay bagu kadasug, Isus at nafakamulun gina gfafia aro ke mauri fag falad. 37Ay fagayu taw siginans furuan Gerasa, ay siginan at ngay tagligung fag talun, get sas Isus te, “Anin ngatu, loi wan ste ginan,” aroro kanya fagayu garinun kalimu. Nu katanya, Isus nasakay sas sakayan lino ay noli wan.
38Ay kafag taw aro at ke mauri fag ngay falad get sas Isus te, “Nangalo au emu,” ay Isus wa naylat, ay glong te, 39“Ulii yakman sa am bale ay foyungi sanya fag ngay taw Dius at nafakamulun sa emu.”
Ay kanya nalo wan ay nafoyung sas fagdaul furuan sabaliwas Isus at nafakamulun sa anya.
Sik Baguina at Kinbul wan ay sik Mangena at ke Fakasaitun
Mt 9:18-26; Mk 5:22-43
40Isus nu nfoli wan sas talun Galilea, sanya fag ngay taw kaylat namablang anya, aroro kanya fagayu gfanya anya. 41Ay sik taw at ngayan Ayru andasug. Kanya sik tagfangguna sas taw Udyu at bale fakafulan. Ay kanya namalub sas Isus at daga salubangan ay gtaban anya sat bale. 42Ayru at sisian, sadi wayk baguina, ay at banwa labi dua, ay kanya gakabulun. Ay gina Isus glo sanya, kafag ngay taw gfasidsikfitan anya. 43Ay sanya e sik mangena labi dua wak banwa nu yud karagang nu gfangigusan, ay we taw mafafia anya. 44Ay kafag mangena ankakbang sas Isus at day guyuy, ay nated Isus at baringbingan lanbung, ay arodi vtv, anragang wan nu gfangigusan.
45Ay Isus nalong te, “Sinu at nated angku?”
Ay fagayu taw glong te, “Bunwa au.”
Pedru nalong te, “Em Fun, sik ngay taw gligung emu, ay gsikfit emu.”
46Ay Isus nalong te, “Sik taw nated angku, aroro namatang au ku fagmabalyananun nu gduksun siginan angku.”
47Ay kanya fag mangena nu nasaful te, we kasuksuan, gtadtaruyan nangakbang sas Isus ay namalub sit day darafa, ay nafoyung gina sis wa taw at salubangan at algan at fagnatedun, ay nu setain nu kafia vtv.
48Ay Isus nalong sa anya te, “Fagmangena, am fagafanudun nafafia emu. Loi wan, manabayan tua ro wo.”
49Ay gina Isus garingang, sik taw andasug siginan Ayru at bale, ay nalong te, “Anbul wan am baguina. Lag gfasalag ya tam takamoyung.”
50Ay Isus nu nadungug, nalong sas Ayru te, “Lag gafanawa, afanudi way, ay umfia yay ro am baguina.”
51Ay Isus nu ndasug sas Ayru at bale, gsalag tibak taw nu gsakbo. At fagfasakboun, Pedru way lang ay Uan ay Santiagu ay kafag baguina at mama ay at mina. 52Ngay taw at maful sanya, gwayway ay garusngusan, aroro kafag baguina anbul wan. Isus nalong te, “Lag am gwayway, aroro kanya wa nbul, gtiug way.”
53Ay ngay taw kase, gfalingun Isus, aroro nasaful te, kafag baguina anbul wan. 54Ay Isus nated kafag baguina at daluap ay nauro te, “Fagbaguina, alindugi.”
55Ay kafag baguina at falad anfoli, ay arodi kanya anlindug. Ay Isus nasugu te, “Foni fakonun.” 56Kafag baguina at fagtainan andulo ay Isus nalong te, “Lag gfoyung ay nalag nusdi sa sadik taw.”
Selectat acum:
Lukas 8: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines