Matayɔ 5
5
Yeso unzo ʉpanʉ ekoo ʉ ɨkpangba
(Luk 6:20-23)
1Iya Yeso a꞉na ungbutu wʉ ɓombi akʉ limbi, kija a꞉ɗito ekoo ʉ ɨkpangba. Ambuwulo ɨsɨ, ɓakpataka ngiɓangɔ ɓambʉka anambamba angɔ. 2Kija a꞉faniso naɓɔ kunzo ʉpanʉ kusigo ɓɔ:
3« Ɨgyagya nʉ ɓombi ngiɓa ɓanʉ ɓanangyɨa akʉ 'ʉtʉma,
jʉ Ɓʉngama ngiɓa ɓa ekoo ʉ ɓisi ɓa akʉ ekoo ʉndaɓʉ.
4Ɨgyagya nʉ ɓiga ngiɓa ɓakʉdya ikoko,
jʉ Asʉɓɨɨ a꞊ɓusingo 'ʉtʉma singoni.
5Ɨgyagya nʉ ɓiga ngiɓa ɓanʉ 'ʉtʉma wʉ majɨɔ,
jʉ ɛɓɔ ɓa꞊dya maɓɨɨ akʉ ɨtaka ngia.
6Ɨgyagya nʉ ɓiga ngiɓa ɓanʉ taa,
nʉ taa yɛɛ kyɨɛ moni akʉ ɓungbingbii apɛɛ ʉ Asʉɓɨɨ,
jʉ ɛɓɔ ɓa꞊mʉta mʉtanɨ.
7Ɨgyagya nʉ ɓombi ngiɓa ɓaanɨa ɓangɛ ikoko,
jʉ Asʉɓɨɨ a꞊ɓʉnɨa ɛɓɔ ikoko kʉ nɨaa.
8Ɨgyagya nʉ ɓiga ngiɓa ɓanʉ 'ʉtʉma wɔɔ uɗo,
jʉ ɛɓɔ ɓa꞊na Asʉɓɨɨ akʉ mesu.
9Ɨgyagya nʉ ɓiga ngiɓa ɓaanziso majɨɔ,
jʉ Asʉɓɨɨ a꞊ɓusoko ɓɔ ɓana ɓangɔ.
10Ɨgyagya nʉ ɓiga ngiɓa ɓanaɓɔ kʉkyananaka
jʉ ɓakʉkyɨa moni kɔɔ ngbingbii apɛɛ ʉ Asʉɓɨɨ,
jʉ Ɓʉngama ngiɓa ɓa ekoo ʉ ɓisi ɓa akʉ ekoo ʉndaɓʉ.
11Ɨgyagya ninu ati ngia ɓombi ɓa‑ɔɔ ninu kʉzɨaka, nʉ kʉkyananaka, nʉ chwio nʉ yakanaka akʉ lɨngbaa lʉ moni kʉ di di di aka ekoo asɛmɛ. 12Kweni ɨgyagya, nʉ jananakɨeni nadɨndɨ, jʉ na꞊nyɨa nʉ apɛpɛ ɔɔ ʉja ekoo ʉ ɓisi. Jʉ ɓombi ɓa꞉kyananaka jɛnɛ lɨgbɛ lʉ Asʉɓɨɨ ngila lʉ pɛɛ kʉ ɓwanɨ. »
Yeso unzo isisinio ekoo ʉ 'ukwe nʉ wanga
(Mak 9:50; Luk 14:34-35)
13« Inu na ndʉ 'ukwe akʉ ɨtaka ngia. Ɨkyɛmɨngana, 'ukwe kʉndapakeni tiga ndapakanɨ, kasalɨa ɓata akʉ ɨkyɛmɛ tɨmanɨ? Mɛɛ‑zʉ ɓakukinyiso tii tʉkʉ aɓei ɓʉ kinyaa, ɓombi ɓambʉkichoo nʉ mɨtɨndɨ.
14Inu na ndʉ wanga amati ɨtaka ngia. Gʉlʉ ngia ɓaamʉtɨa ekoo ʉ ɨkpangba, ambakaɓatanɨa gʉkʉ ɗɛkɛkɛ. 15Nʉ ɓambakaya wanga nawɔ kʉkuto nʉ ɨkɔchɔ. Ɨkyɛmɨngana, ɓaʉnapɨa ekoo ʉ 'ʉbɨnga wɔngɔ, ɓɔ jʉ wʉpʉya ɓombi kʉ ɓuɓomu ngiɓa ɓaɓio ambɛnɨ ngiinanɨ. 16Kʉ ɓwanɨ, jɨeni apɛɛ ʉ ɓombi ngbanga ndʉ wanga, ambʉ ɓombi ɓʉna ɨkyananakɨa yɛɛ iɗo ngiindɛnʉ, ɓambubibiso Atɔ ʉndɛnʉ ngia ekoo ʉ ɓisi. »
Yeso unzo ʉpanʉ ekoo ʉ Mʉsa
17« Nɔɔyokɔmʉ ɓɔ ɛmɛ ma꞉ka kuɓundo mapanʉ kʉ Mʉsa, gʉ ɓɔ mapanʉ ngika kʉ lɨgbɛ. Ɛmɛ makakɔmʉ nakɔ kuɓundo, ɨkyɛmɨngana ma꞉ka nakɔ kʉkwananakiso. 18Tʉkʉ kingono, ɛmɛ maninu kusigio ɓɔ wati ngua wʉ 'upipio wʉ ɨtaka nʉ ekoo ʉ ɓisi wambʉkakɔmʉ‑ɔɔ, ɓambʉkʉkwanana kuungwiso amati ʉ mapanʉ ngikʉnanɨ gʉkʉ 'ʉtɨndɨ wʉ ʉbalʉa mungono, gʉkʉ ɨdyakʉ yɛngɔ, kʉɓʉya tʉkʉ aka moni kʉ muɓomu kakyananakɨa sina‑ɔɔ.
19Amati ʉ mapanʉ ngikʉnanɨ kʉ muɓomu, mombi ngia aɓundo, abana tʉkʉ ʉwa wɔɔ ɗɛkɛkɛ wɔngɔ, ambukwisiso kʉ nʉ ɓombi nga ɓɔmɔ, ɛyɔ aɓio mombi ɔɔ ɗɛkɛkɛ nadɨndɨ amati Ɓʉngama ngiɓa ɓa ekoo ʉ ɓisi. Ɨkyɛmɨngana, mombi ngia akyananakɨa mapanʉ ngikʉnanɨ kʉ muɓomu, ambʉpanɨa ɓangɛ nakɔ kʉkyananakɨa kʉ ɓwanɨ, ɛyɔ aɓio mombi ɔɔ ʉja amati ʉ Ɓʉngama ngiɓa ɓa ekoo ʉ ɓisi. 20Ɛmɛ maninu kusigio ɓɔ ndʉ ɨkyananakɨa yɛɛ ngbingbii ngiindɛnʉ, yambʉkʉɓaa iya yɨ Ɓafalisayɔ nʉ ɓapananakɨa ɓʉ mapanʉ, inu nambukukumunio sina amati ʉ Ɓʉngama ngiɓa ɓa ekoo ʉ ɓisi gʉkʉ ɗɛkɛkɛ. »
Yeso unzo ʉpanʉ ekoo ʉ kwa ʉnganga
(Luk 12:57-59)
21« Inu nakʉmbɨa ʉpanʉ ngua ɓa꞉nzo jɛnɛ ɓombi ngiɓa ɓʉ pɛɛ ɓɔ: ‹ Wɔɔwakɔmʉ mombi.#Popoko Kʉɓ 20:13 Nʉ mombi ʉweni mangɛ, ɓabi nayɔ apɛɛ ʉ 'ʉkɔmbɔ. › 22Ɨkyɛmɨngana, ɛmɛ maninu kusigio ɓɔ, mombi ʉkwɨeni mangɛ ʉnganga, ɓabi nayɔ apɛɛ 'ʉkɔmbɔ. Nʉ kʉndʉ mombi ʉsigieni manye ɔɔ gue ɓɔ: ‹ Wa ijangi! › Yɨkwanana ɓɔ Ubua wɔɔ Ʉja wʉ ɓakumu‑kumu wʉtɨna 'ʉkɔmbɔ nguangɔ tɨnanɨ. Nʉ mombi ʉzɨakeni mangɛ ɓɔ: ‹ Wanʉ ɓaumu! › Yɨkwanana ɓɔ ɓumugiso tʉkʉ amati dyaa ngia yɨ mɨtʉ yɨ ɨpá nʉ mɨtʉ yɨ ɨpá!
23Kʉndʉ winyeni kʉsa kunzo Asʉɓɨɨ apɛpɛ ngiasɔɔ, wambutunguo ɓɔ ayoo asɔɔ anɔwɛ nʉ ɨngbaa yɨ moni, 24sɨa‑zʉ apɛpɛ ngiinanɨ asɔɔ tʉkʉ ananɨ, wambʉsa kʉhata ɓɔ kɔneni inu nayɔ. Mbise ɔngɔ, wambʉka tiga kunzo apɛpɛ ngiinanɨ asɔɔ.
25Kʉndʉ mombi inyeni kʉsa nɔwɛ apɛɛ ʉ 'ʉkɔmbɔ, hata nayɔ kʉkʉnganakɨa ati ngia na‑ɔɔ kʉsa nɨngbaa, pɛɛ ngia mombi ngiinanɨ ʉ꞉nachʉngɨa ambʉɓʉyakɔmʉ‑ɔɔ nɔwɛ akʉ 'ʉkɔmbɔ. Jʉ chʉkɔmʉ ɓwanɨ, ɓabi nɔwɛ apɛɛ ʉ ɓajuji, kija ɛɓɔ ɓa꞊nanzo akʉ lɨkɔndɔ lʉ ɓapolisi, ɓambʉnanga tiga akʉ boloko. 26Manɔwɛ kusigio tʉkʉ kingono, wambʉkʉɓʉa akʉ boloko ɨsʉkʉɓwanɨ wambulipenikɔmʉ mabɨngɨa nguʉsɔɔ kʉɓʉya tʉkʉ akʉ usengi ngua wʉ 'upipio! »
Yeso unzo ʉpanʉ ekoo ʉ ɨndambʉ
27« Inu nakʉmbɨa ʉpanʉ ngua ɓa꞉nzo jɛnɛ ɓɔ: ‹ Wɔɔkyɨakɔmʉ ɨndambʉ. ›#Popoko Kʉɓ 20:14 28Ɨkyɛmɨngana, ɛmɛ maninu kusigio ɓɔ, ndʉ mombi akanga moi, ambʉmʉtananɨa akʉ 'ʉtʉma nguangɔ, ambʉ ʉkɨnda nayɔ tʉkʉ kɨndanɨ amati ʉ 'ʉtʉma nguangɔ. 29Kʉndʉ iso ngiisɔɔ yɨ guɔngɔ yɨnasingeni akʉ ɨngbaa yɨ ɓʉɓɨɓɨ, wʉkwanana nayɔ kiso, wambiigiso. Ya piɛ gʉ iɗo ɓɔ wagba wʉ ndʉtʉ mungono nguʉsɔɔ wʉyangaa, chʉkɔmʉ pɛpɛ tiga ɓagiso ndʉtʉ ngiisɔɔ kʉ iɓomu amati ʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá.
30Kʉndʉ ɨkɔndɔ ngiisɔɔ yɨ guɔngɔ yɨnasingeni akʉ ɓʉɓɨɓɨ, ɨtɨna tɨnaa wambiigiso danga. Jʉ ya piɛ iɗo nadɨndɨ ɓɔ wagba mungono wʉ ndʉtʉ nguʉsɔɔ wʉyangaa, chʉkɔmʉ pɛpɛ ɓɔ ɓagiso tiga ndʉtʉ ngiisɔɔ kʉ iɓomu amati ʉ dyaa ngia yɨ mɨtʉ yɨ ɨpá nʉ mɨtʉ yɨ ɨpá. »
Yeso unzo ʉpanʉ ekoo ʉ tuiso moi
(Mat 19:9; Mak 10:11-12; Luk 16:18)
31« Ʉpanʉ wa꞉sigo jɛnɛ ɓata kʉ ɓɔ: ‹ Mombi ʉtʉiseni moi angɔ, umunzo ʉbalʉa ngua umutuiso nawɔ. ›#Popoko Tung 24:1 32Ɨkyɛmɨngana, ɛmɛ maninu kusigio ɓɔ gue kʉ 'uɓomu ngia atuiso moi angɔ, yambikinye tʉkʉ ɓɔ ʉkyɨa ɨndambʉ, ambʉ tʉkʉ gue umusingo amati ʉ ɨndambʉ. Nʉ kʉndʉ gue ʉchɨkeni moi ngia swaɨ umutuiso, gue ɔngɔ ʉkyɨa kʉ ɨndambʉ. »
Yeso unzo ʉpanʉ ekoo ʉ tɨna silika
33« Na ɓata kʉmbɨa ʉpanʉ ngua ɓa꞉nzo jɛnɛ ɓombi ngiɓa ɓʉ pɛɛ kʉtaa ɓɔ: ‹ Wɔɔtɨnakɔmʉ silika wʉ yakanaka. Ɨkyɛmɨngana, moni ngika watɨna‑ɔɔ silika apɛɛ Asʉɓɨɨ Makʉʉɓɨɨ, kʉkyananakɨa tʉkʉ kyananakɨanɨ. ›
34Ɨkyɛmɨngana, ɛmɛ maninu kusigio ɓɔ, nɔɔtɨnakɔmʉ silika gʉkʉ ɗɛkɛkɛ. Abana gʉ akʉ ino yɨ ekoo ʉ ɓisi, jʉ ekoo ʉ ɓisi ya izi yɨ ɓuwei ngia yɨ Asʉɓɨɨ. 35Abana akʉ ino yɨ ɨtaka, jʉ ɨtaka ya izi yɛɛ napɨɛ mɨtɨndɨ ngia yɨ Asʉɓɨɨ. Abana akʉ ino yɨ Yelusalɛma, jʉ ya ɨkʉmbʉ yɨ Asʉɓɨɨ Ngama ngia ɔɔ 'ʉja. 36Nʉ nɔɔtɨnakɔmʉ silika akʉ mɨtʉ ngiindɛnʉ gʉkʉ ɗɛkɛkɛ. Jʉ inu nambʉkʉkwanana kunitanakiso undii abana gʉkʉ mungono kʉka imvi, gʉ gʉkʉ nawɔ kuuwiso ɓʉ nzisi.
37Akʉ lɨngbaa lʉ moni tʉkʉ kʉ liɓomu, nʉbayeni moni ɓɔ ‹ Oo ›, bayeni tʉkʉ nʉ ingono. Nʉ ndʉ natata moni ɓɔ ‹ Chʉkɔɔ ›, tateni tʉkʉ nʉ ingono. Jʉ moni ngika kɔɔ mʉmatakɨɛ ekoo ɔngɔ, kaaʉngwa ɔɔ Abɨa. »
Yeso unzo ʉpanʉ ekoo ʉ tisio ikosi
(Luk 6:29-30)
38« Nakʉmbɨa ʉpanʉ ngua ɓa꞉nzo jɛnɛ pɛɛ kusigo ɓɔ: ‹ Iso akʉ iso, nʉ iwenu akʉ iwenu. ›#5:38 Inyi yɛngɔ ɓɔ tisio ikosi. Popoko Kʉɓ 21:24; Ɓal 24:20; Tung 19:21. 39Ɨkyɛmɨngana, ɛmɛ maninu kusigio ɓɔ, nɔɔtisiokɔmʉ ikosi yɨ ɓʉɓɨɓɨ ngiɓa mombi aɓio ʉnɨkyɨeni. Ndʉ mombi anaɓɛnda ɨkɔndɔ yɨ mesu akʉ ingyengye ngia yɨ ɨkɔndɔ yɨ guɔngɔ, mʉnɨtanisio tiga iya yɨ ɨkɔndɔ yɨ moiɔngɔ kʉnɨtanisioo. 40Ndʉ mombi abi nɔwɛ apɛɛ ʉ 'ʉkɔmbɔ, ambʉchɨka ɨpʉkʉ yɨ ɨkʉʉ ngiisɔɔ, mʉsɨa ʉchɨka kɔtɨ ngiasɔɔ kʉ chɨkaa. 41Nʉ ndʉ mombi anandandiso ɨkyɛmɛ akʉ angu, ɓɔ muɓuisio ɛyɔ akʉ kilɔmɛtɛlɛ mʉngana, muɓuisio ɛyɔ tii tʉkʉ akʉ kilɔmɛtɛlɛ ɓepini. 42Nʉ mombi ʉnateni ɨkyɛmɛ, munzo ɛyɔ tʉkʉ nzoo. Mombi ʉnateni mabɨngɨa munzo ɛwɔ tʉkʉ nzoo, wɔɔmʉtatɨakɔmʉ. »
Yeso unzo ʉpanʉ ekoo ʉ kʉnda makwa
(Luk 6:27-28,32-36)
43« Nakʉmbɨa kʉtaa ɓɔ ɓa꞉sigo jɛnɛ ɓɔ: ‹ Kʉnda mangɛ, wambʉyaa makwa nguʉsɔɔ. ›#Popoko Ɓal 19:18 44Ɨkyɛmɨngana, ɛmɛ maninu kusigio ɓɔ, kʉndeni ɓakwa ɓʉndɛnʉ. Tɨeni ɓombi ngiɓa ɓaninu kʉkyananaka. 45Kʉ ɓwanɨ, ɓa꞊nisoko tiga ɓɔ ɓana ɓʉ Asʉɓɨɨ, atɔ ʉndɛnʉ ngia a ekoo ʉ ɓisi. Jʉ ɛyɔ aajiiso ɨpá ekoo ʉ ɓombi kʉ ɓuɓomu, iɓa ɓɔɔ iɗo kʉndʉ iɓa ɓɔɔ ɓɨɓɨ. Nʉ ɓata, aanyiiso ʉgbaa ekoo ɓombi kʉ ɓuɓomu, iɓa ɓɔɔ ngbingbii, kʉndʉ iɓa ɓambʉkɔmʉ ngbingbii. 46Jʉ ndʉ naɓio kʉkʉnda tʉkʉ ɓombi ngiɓa ɓaanɨkʉnda inu, nanyɨa nʉ ɨjangɨa tɨmanɨ? Ɓandɔmbɛ ɓɔɔ ɓulipise manzanza#5:46 Ɛɓɔ ɓi꞉nye ɓombi ɓɔɔ ɓɨɓɨ. ɛɓɔ ɓaakyɨa kʉ ɓwanɨ. 47Nʉ ɓata ndʉ naɓio kuɓukuo tʉkʉ ɓana ɓʉ anʉ ɓʉndɛnʉ, ambʉ nʉkyɨa moni kɔɔ maja tɨmanɨ? Jʉ abana tʉkʉ ɓombi ngiɓa ɓambakambɨa Asʉɓɨɨ, ɛɓɔ ɓaakyɨa kʉ ɓwanɨ! 48Kʉ ɓwanɨ, ɓieni ɓombi ɓɔɔ ngbingbii, ngbanga kʉndʉ Atɔ ʉndɛnʉ ngia a ekoo ʉ ɓisi akʉ ngbingbii. »
Selectat acum:
Matayɔ 5: BudKoya
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2021, Wycliffe Bible Translators, Inc.