GENESIS 8
8
1Ma tha God ka onotoona tha Noa, ma do maruki eki sui boo, ma aini katele ki, do eki sui bana na keka to bi nia i la aka: ma tha God ka falea mai thauthau na ka tatha fafia fanua ne i iano, ma kafo eki ka totoo; 2Ruka‐mauri eki lau boo na i matakwa ma maana olofolo ki na i thalo lo, kera bokosia, ma kera suusia dani si aru faisia thalo lo; 3Ma kafo eki ka totoo ta si maṉa si e’i faisia ifafona fanua ne i iano: ma tee taleṉee fa boṉi eki ma lima tafulu fa boṉi e sui, kafo eki ka faekwa naa. 4Ma aka eri ka katu naa ana fiuna fa madami ana taṉafula ma fiuna fa boṉi ana madami eri, i la gwa tolo lo ki i Ararata. 5Ma kafo eki ka faekwa alaa, ka fulatoona taṉafula madami: ana taṉafula madami, afa boṉi totonao ana madami eri, kera rikia naa gwauna gwa tolo lo ki. 6Ma lalae mai, fai tafulu fa boṉi e sui, tha Noa ka bii ifinia sufua ana aka eri ne thauwai nia: 7Ma nia ka arasia kau tee thaaro boboraa, na ka lofo olili ka fula asi maṉa na kafo eki ka a’i naa faisia ifafona fanua ne i iano. 8Nia ka arasia lau bokau tee fa bola rafu, fasi kai rikia sa mado e a’i kafo eki e gwa’u naa faisia maana theegano; 9Ma sui bola rafu eri e a’i si fulatoona ta si kula ni mamaloa ifana lofona ’aena, ka oli lau mai isana uri la aka, sulia na kafo eki ni fafia maana fanua ne i iano sui bana: sui nia ka tekwasia kau abana, ka rauria, ka ṉalia mai uri la aka. 10Ma nia ka to bana sulia fiu fa boṉi lau; sui ruana ka arasia kau bola rafu eri faisia ṉa aka; 11Ma bola eri ka kotho mai isana i thaulafia; ma, rikia fasi, tee ree olifi na i fokona, do ne fisua mai neri: asi ade la eri tha Noa e thaitoomana kafo eki kei e’i naa faisia ifafona fanua ne i iano. 12Ma nia ka to bana sulia fiu fa boṉi lau; sui ka arasia kau bola rafu eri; ma bola eri ka a’i si oli na mai, ka lae bonaa faisi nia. 13Ma lalae mai ana ona taleṉee fa ṉali ma etana fa ṉali, ana madami totonao, afa boṉi totonao ana madami eri, kafo eki ka a’i naa faisia ifafona fanua ne i iano: ma tha Noa ka idua kau si do ne thu fafia aka eri, ka lio kau, ma, rikia fasi, maana theegano e raraṉea. 14Ma ana ruana madami ana ruana taṉafula ma fiuna fa boṉi ana madami eri, fanua ne i iano ka raraṉea bonaa.
15Ma tha God ka ṉata mai satha Noa, ka una eri, 16Muki kotho faisia aka eri, ni oe bia kwaimu, ma kaluwane oe ki, ma kini‐fuṉao oe ki bi oe. 17Talaia mai bi oe do maruki eki sui bana na ni isamu, na do eeta kwailiu, thaaro ki, ma aini katele ki, ma do aṉoaṉo na keki aṉo fafia fanua ne i iano; fasi keki oro alaa i fanua na i iano, kwalafada keki oro faamau ka lae alaa, ma keki funu i fanua na i iano. 18Ma tha Noa ka kotho mai, ma kaluwane nia ki, ma kwaina, ma kini‐fuṉao nia ki bi nia: 19Do maruki eki sui boo na i masuu, ma do ni sui bana na keki aṉo, ma thaaro eki sui bana, ma atona bana ta do na ka isu ifafona fanua ne i iano, kera sui, ana seeda ne eeta kwailiu, keka kotho mai faisia aka eri. 20Ma tha Noa ka thauwai nia fulii era ni foa la ifatha Jihova; ka ṉalia tei do ana do maruki eki sui bana na kera faalu, ma tei thaaro ana thaaro eki sui bana na kera faalu, ka falea do ni afufu ki fafia fulii era ni foa la eri. 21Ma do eki ka makwafia tha Jihova ka lea; ma tha Jihova ka soree i ruruuna, Nau e a’i kwasi alua lau taa la fafia theegano inunufana imole; boro so si manata la ni sui bana na imole keka manatatoona i ruruuda e taa asia naa ita u boo i faekwa lada; ma nau e a’i kwasi thauṉia lau do maruki eki sui bana, sulia abula laku na nau ku ilia na ba. 22Afa boṉi eki na fanua na i iano kai to bana sulia, si maṉa ni afusi lana foee do ki ma si maṉa na unii do eki kai rafo naa, ma si maṉa ana gwagwaria ma si maṉa thato ka thatofifi, ma unii thato ma unii gwagwaria, ma si maṉa fanua kai dani ma si maṉa fanua kai rodo, do eki sa kai sui e a’i ka dodoloa.
Selectat acum:
GENESIS 8: MLU1949
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
British and Foreign Bible Society 1949, 1951