संत.मरकुस 13
13
बड़े बिनती ओड़ाअ उयुगोः के उउदूः
(संत.मत्ती 24:1–14; संत.लुकास 21:5–19)
1तेकर ईसु बड़े बिनती ओड़ाअ रेनअः राच तरअः ऊड़ुङोः केनाय हिमीन रे मियांड चेला ताय “ए गुरू! नेलेमे तो नोःआँ बड़े टुकू के हेतरअ आल्लाय बेस बंगला के एतान लकान बनाव तदाकु,” बेता लियाय।
2ईसु हुनी के बेता लियाय “नोःआँ बड़े-बड़े बंगला के नेल दाम एतान, नोड़े टुकू तेङ रे टुकू एरे लादी ताही नोःआँ, जामा अपन से उयुअ कोआ।”
दुख हेतरअ बिपाईत
3हेतरअ जैतुन बुरु रेनअः बड़े बिनती ओड़ाअ दुबाःड़े दुड़ूः ताहिनाय, हिमीन रे पतरस, याकुब, जोहन हेतरअ अंध्रियस, एकले ताहिनाय हिमीन रे ईसु के कुली लियाकु। 4“ओका हिला नोःआँ जामा हुयाव कोआ, होना पुरायोः बेरा एतान चिनहा नेल कोआ, आले के उदूः लेमे बेता लियाकु।”
5ईसु “हुंकू के बेता लिकुआय चौंचित ताहिन पे कोवान दो आपे के आःड ची केपेआकु।” 6“तेकर ढेर होड़ ईङ आला नुमू रे हीःग कोआकु हेतरअ हुनी ‘ईङ गी ख्रीस्त हेके!,’ मेन केते ढेर होड़कु के आःड ची केपेआकु। 7तेकर आपे लड़ाई हेतरअ हुमाअ उपड़ीनोः रेनअः खभाईर आयुमेआपे दो आपे आलपे आकबकाव कोओ, नोःआँ दो हुयाअः गी एदनाअ, बकिर हिमीन रे दुनिया एरे चाबायोआ। 8तेकर मियांड जाईत एटाअ जाईत आला, हेतरअ मियांड राईज एटाअ राईज रअः बिरोध रे बिरिःड कोआकु, ठाँव-ठाँव रे भुईंडोल हुयाव कोआ, तेकर आकाल केआय, नोःआँ दो दुख बिपाईत रेनअः सुरू गी ताही कोआ।
9 #
सं.मत्ती 10:17–20; सं.लुका 12:11,12 “आपे चौंचित ताहिनपे, हुंकू आपे के कछारी ओड़ाअ रे रकाःब केपेआकु, हेतरअ पंचाईत ओड़ाअ रे हुमाअ केपेआकु, तेकर हाकिम हेतरअ राजाकु दुबाःड़े आपे के तिंगुन हुयाव कोआ ची ईङ आला बेस खभाईर के उदूः किकुआपे। हेतरअ हुंकू लःअय गोवाह पाड़ी कोआपे। 10दुनिया अन्तोः तरअः पहिल रे जामा देस रिनकु जाईत के नोःआँ बेस खभाईर के प-परचार एदनाअ।
11“तेकर आपे के सःब केते कछारी रे रकाःब पेआकु दो, हिमीन रे आपे एतान कंहड़ीईङ, मेन के आलपे सोंचाव के बकिर हिमीन रेगी नामे आपे हिना पे कंहड़ी, कंहड़ी वाला आपे कोवान पबितर आतमा कंहड़ीआय। 12तेकर बोको के बोकोते, आपा के होपोन ते गोगोएःग ची लःअय सःब ची किकुआकु, हेतरअ होपोन ते एंगा-आपा आला बिरोध रे बिरिःड केते गोएःग ची कि कुआकु। 13#सं.मत्ती 10:22तेकर जामाकु ईङ आला नुमू चलते खीस ऊकेपेआकु, बकिर जे आखरी जगुत खातिर दोहोयाय हिनी आला उधार हुयाव कोआ।
मुरुक बड़े बिपाईत दिन
(संत.मत्ती 24:15–28; संत.लुकास 21:20–24)
14 #
दानि 9:27; 11:31; 12:11 “तेकर आपे ‘भय-भयान ना नासोः खाता घींड़ जिनीस’ के, जे एड़े होना का ताहीनोः चाही, होनाःड़े आपे तिंगु ओना नेलेआपे दो पढ़ाअःकु समझाव जुनोःपे ची नोःआँ रेनअः माने एतान हेके।” “जे जाहुदिया रे एदान कुआ हुंकू के बुरु तेङ रे नीर जुनोः चाही। 15#सं.लुका 17:31तेकर जे साड़ुम तेङ रे रकाःब ऊनकु, ओड़ाअ भीतरी तरअः जहान जिनीस ईदी लःअय आलकु अड़गु कोओ। 16हेतरअ जे ओत ते एदान कुआ हुंकू, पछली ऊलटाव केते अपन गेन्दरअ संहित के आलकु ईदी के। 17हिमीन बेरा जे भारी गतार रे एदानिया चाहे जेकर नुनू चेंगा एदान कुआ, हुंकू लःअय होना दिन मुरुक भय-भयान एदनाअ। 18नोःआँ राबांग बेरा आलु हुयाअः लःअय आपे बिनती पे। 19#दानि 12:1; दि.वचन 7:14परमेसर जे हिला दुनिया के सिरजाव लःअय, हेन हिला तरअः का हीःग ताना, ना ओका हिला होअः एरे हिजोआ लकान बिपाईत, हिमीन रे हीःग कोआ। 20होना हिला के परभु एरे छोटे केआ होले ओके मनवा होअः एरकु बंचाव कोआ, बकिर हुंकू निबाड़ लिनकु होड़ खातिर जेके आएंग चुनाव ताद कुआय, होना बेरा के छोटे लःअय।
21“हिमीन बेरा, जाहें आपे के ‘नोआँड़े, ख्रीस्त एदानिया!’ चाहे ‘होनाःड़े, ख्रीस्त एदानिया!,’ बेता पेआकु दो हुंकू के आलपे बिसवास के। 22हिमीन बेरा झुठा ख्रीस्त हेतरअ झुठा आगमजानीकु दिसतार कोआकु हेतरअ मोकअ खाता चिनहा उदूः केआकु तेकर मुरुक बड़े-बड़े छकरित कामी केआकु, हुयाव दाड़ीयोः होले निबाड़ लिनकु केहोः आःड ची किकुआकु। 23हिना लःअय आपे चौंचित ताहिनोः पे, होना हिला हिजोअः तरअः पहिल रे गी ईङ आपे के जामा जिनीस के उदूः तद पेईङ, बेता लिकुआय।
होड़ आली होपोन रूवाड़ केते हीःग कोआय
(संत.मत्ती 24:29–31; संत.लुकास 21:25–28)
24 #
जसा 13:10; जोए 2:10,31; 3:15; दि.वचन 6:12;
जसा 13:10; जहेज 32:7 “हिमीन बेरा, होना बिपाईत तरअः तयोम सितोम बोंगा कड़िया कोआय, हेतरअ चानु होअः एरे मरसालेआ। 25#जसा 34:4; दि.वचन 6:13; जोए 2:10तेकर सिरमा तरअः इपील नुर कोआकु, हेतरअ सिरमा रेनअः सवांग हिलाव कोआ। 26#दानि 7:13; दि.वचन 1:7तेकर होड़कु, होड़ आली होपोन के मुरुक सवांग हेतरअ महिमा रे रिम्बिल रे हिजोअः नेल कियाकु। 27तेकर आएंग आलकु सिरमादूतकु के भेजाव केते ओत रअः नोःआँ छोर तरअः सिरमा रेनअः होना छोर जगुत गोटे तरअः निबाड़ लिनकु के नाम जवार किकुआकु।
अंजीर सिङ तरअः सिख
(संत.मत्ती 24:32–35; संत.लुकास 21:29–33)
28“अंजीर सिङ तरअः नोःआँ गाम सिखाःपे, होना रेनअः डाईड़ नरम जुनोआ हेतरअ पलहुवा योआ होले आपे जेठ रेनअः दिन सोदोर ना के पाड़ी आपे। 29हिना लकान नोःआँ जामा घटना हुयाअः नेलेआपे दो, होना दिन सोदोर ना के पड़ीपे, बकिर होना दुवार रेगी एदनाअ। 30नुकू होड़ जिवीःड ताहिनोआकु हिमीन रेगी नोःआँ जामा कंहड़ी हुयाव कोआ ईङ आपे के सचे बेताः दिपीईंग। 31सिरमा हेतरअ ओत ओचोः जुनोआ बकिर ईङ आला कंहड़ी एरे टागाआ।
तेयार ताहिन पे
(संत.मत्ती 24:36–44)
32 #
सं.मत्ती 24:36
“होना हिला के ओके होअः काकु पड़ीआ, ना सिरमा रिनकु सिरमादूत पड़ीआकु, ना ची परमेसर आली होपोन गी, बाबा परमेसर भाईर पड़ीआय। 33चौंचित ताहिन पे हेतरअ तेयार ताहिन पे, होना दिन ओका हिला हिजोआ के कापे पाड़ी ताना। 34#सं.लुका 12:36–38नोःआँ एटाअ राईज सेनोई होड़ लकान एदनाअ, हुनी ओड़ाअ ताय के नेनेल लःअय बंधाउवा के हक एमाअ तु लिकुआय, हेतरअ जामाकु के अपन-अपन लःअय काम हाटिङोः तु लिकुआय, तेकर ओड़ाअ होरहोई के आलुम निन्द कोओ, बेताः तु लियाय। 35हिना लःअय आपे चौंचित ताहिन पे, ओड़ाअ मुंवार ऊकिन बेरा हिजोआय के कापे पाड़ी ताना, आयुःब बेरा चाहे बराबईर निदा, चाहे भिनसारा, चाहे निदवारे हीःग कोआय। 36नोकान आलु हुयाव कोओ ची हुनी अचाका हीःग केते आपे के निन्दोः नाम पेआय। 37तेकर आपे के कंहड़ी तानिङ हिना गी जामाकु के कंहड़ी तानिङ, चौंचित ताहिनोः पे।”
Selectat acum:
संत.मरकुस 13: ASR
Evidențiere
Împărtășește
Compară
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2023 NLCI CC BY-NC-ND 4.0