संत.मरकुस 7
7
पुरखावती रआ बारे फरीसीकु आला सवाल
(संत.मत्ती 15:1–9)
1मुसिङ फरीसीकु हेतरअ धरम पुथी सि-सिखावकु, जिरोसलेम तरअः हीःग ऊनकु, ईसु दुबाःड़े जवार नेनाकु। 2तेकर हुंकू ईसु आलकु आधा चेला तायके पुरखाकु आला नेग के बाई केते, छुँत तीः रे चाहे बेगार आबुन ते लाःड जोम नेल लिकुआकु।
3(फरीसीकु हेतरअ जामा जाहुदीकु पुरखाकु आला नेग-दसतुर के मनाअ कु, तेकर अनौरी बेस केन तीः आबुनोः जगुत काकु जोमेआ। 4तेकर बजार तरअः हीःग केते अनौरी ऊमोअ जगुत काकु जोमेआ, हेतरअ निआँ लकान आउरो बात एदनाअ, हुंकू जामा नेग के मनाआकु, तेकर हुंकू दो डुभनी, लोटा हेतरअ दाराप बसान के मांजायाकु आउर खटिया के सुधेआकु।)
5हिना लःअय फरीसीकु हेतरअ धरम पुथी सि-सिखावकु, “आम आलकु चेला एतान लःअय पुरखाकु आला नेग-दसतुर रे काकु चलाआ तेकर बे आबुन ते छुँत तीः तरअः जोमेआकु,” मेन केते कुली लियाकु।
6 #
जसा 29:13
ईसु हुंकू के कंहड़ीओ किद कुआय, “इसायस आगमजानी आपे ढोंगी लःअय बेस गी कंहड़ी तदाय, नोःआँ दो लिखा लअः एदनाअ,
“‘हुंकू होड़ कंहड़ी रेदो मनाअ कु,
बकिर मन ताकु, ईङ तरअः एटाअ ते ताहिनोआँ।
7नुकू बेगारी रअः ईङ आला आराधनायाकु,
हुंकू दो परमेसर आला कंहड़ी मेन केते,
होड़कु आला कंहड़ी के उदूः कुआकु!’
8“आपे परमेसर आला हुकूम के टलाव केते, होड़कु आला नेग-दसतुर के मनाआपे।”
9तेकर “आपे पुरखा रअः नेग-दसतुर के मनाअ लःअय, परमेसर आला हुकूम के मुरुक बेस केन ओचोः गुल तअपे!,” बेता लिकुआय। 10#उइठ 20:12; कन 5:16; उइठ 21:17; लेवी 20:9“एता लःअय ची, ‘एंगा-आपा के मनाअ पे, तेकर जे एंगा-आपा आला निन्दा कंहड़ीआय, हुनी के गोएःग गुल ताई,’ मेन केते मुसा कंहड़ी तदाय। 11बकिर आपे मनअपे, जदि जाहें अपन एंगा-आपा के कंहड़ीआय ‘ईङ तरअः आबेन के जेतना नानाम ताहीना होना परमेसर के भेंट एमा किदयीङ’ 12दो आपे हुनी के अपन एंगा-आपा लःअय एतान होअः कापे कामीअ चीकुआ। 13निआँ लकान आपे पहिल रअः नेग-दसतुर तरअः जेके आपे ठहराव तदापे, परमेसर आला कंहड़ी के टोटागेआपे, तेकर नेकान नेकान ढेर पे कामीआ।”
होड़ के छुँछुँत खाता बात।
(संत.मत्ती 15:10–20)
14तेकर ईसु, होड़कु के आएंग दुबाःड़े राअः केते, “आपे जामाकु ईङ आला कंहड़ी के आयुमेपे हेतरअ समझाअ पे,” बेता लिकुआय। 15“होड़ रे बाहरी तरअः एतान जाईत होअः बोलो केते काय छुँ छुँता, जे भीतरी तरअः ऊड़ुङोआ हिना गी छुँ छुँताय। 16[आ-आयुम लःअय जेकर लुतूर एदनाअ हुंकू आयुम केपे।”]
17तेकर हुनी, तुन्दरा होड़ दुबाःड़े तरअः ओड़ाअ सेन नेनाय, हिमीन रे चेला ताय होना गाम रेनअः बारे कुली लियाकु। 18“आपे होअः बोका एदनाअ पेआ एतान? आपे कापे समझाआ, जे जिनीस बाहरी तरअः होंड़े बोला होना काय छुँ छुँता, 19होना हुनी आला मन रे का सेना, बकिर लाहीःग रे सेना तेकर लाहीःग तरअः हुई केते बाहरी उडुंग जुनोआ,” मेन केते ईसु जामा जोजमाःके सुध ठहराव लःअय।
20तेकर “जे होड़ तरअः ऊड़ुङोआ, हिना होड़ के छुँत कुआय, कंहड़ी लःअय। 21जे भीतरी तरअः, चाहे होड़ आला मन तरअः, जेतराम जेतराम सोंच, बेलाज काम, चोचोर, होड़ गोएःग, 22एटाअ लाईं के ओ-ओतोङ, लोभी, खपतान, चतुर, लुचा, कान्खी लुलुड़ीःग, नि-निन्दा, बड़वारी, तेकर हुरमुठ, मन तरअः ऊड़ुङोआ। 23नोःआँ जामा गादुस बात भीतरी तरअः गी ऊड़ुङोआ तेकर होड़कु के छुँ छुँताय।”
ईसु मियांड आउराईत आली माई के छोड़ाव लियाय।
(संत.मत्ती 15:21–28)
24तेकर ईसु गलील राईज के बाई केते सूर रेनअः हेनाःड तअः राईज रे हीःग नेनाय, तेकर ओके होअः आलकु पाड़ी के मेन केते, मियांड ओड़ाअ रे सेन बोलो नेनाय, बकिर काय ऊकु दाड़ी नेना। 25तेकर हिमीन रे गी मियांड आउराईत ईसु आला बारे आयुम केते हीःग नेनाय, जेकर छोटे माई ते रे असुध आतमा लटकाव तहिनाय, तेकर हुनी आला जांगा रे नुर केते गोहराव नेनाय। 26हुनी गुरू युनानी आउर सिरिया राईज फिनीसिया परदेस रिनी ताहिनाय, तेकर माई तिंग के मुवाँ आतमा तरअः छोड़ाई मे, मेन केते गोहराव नेनाय। 27“पहिल रे चेंगाकु के बीअ चाकुमे, एता लःअय ची चेंगाकु आला लाःड के रेःग केते सेता के गिड़ी एमोअ बेस कनोआँ,” बेता लियाय।
28तेकर हुनी, “साथे एदनाअ परभु,” “सेरे होः सेता होअः दो टिबुल लतार रेनअः चेंगाकु आला सखड़ी के हलांग जोमेआकु,” मेन केते कंहड़ी रूवाड़ोः लियाय।
29“नोःआँ कंहड़ी चलते आम सेनोः जुनोः मे, मुवाँ आतमा आम आली माई के बाई किदयाय,” ईसु बेता लियाय। 30तेकर हुनी आएंग ओड़ाअ सोदोर केते, मुवाँ आतमा ते बाई ताही लियाय, तेकर माई ताय के खटिया रे बेस ऊनी नेल लियाय।
बाइहरा हेतरअ कोन्दा होड़ के बेस लियाय
31तेकर ईसु सूर राईज तरअः उडुंग केते, सैदा तेकर दिकापुलिस ताला-ताला सेनोःयाःते गलील रेनअः डाहा दुबाःड़े सोदोर नेनाय। 32तेकर होड़कु, हुनी दुबाःड़े मियांड बाइहरा हेतरअ कोन्दा होड़ के आगु लियाकु, तेकर आम नुई तेङ रे तीः ताम के दोहोय मे, मेन केते गोहराव नेनाकु। 33तेकर हुनी के तुन्दरा होड़ दुबाःड़े तरअः एटाअ ते ईदी लियाय, तेकर लुतूर ताय के सुटीःग लःअय हेतरअ बेःग केते आलांग ताय के टुंड़ाअ लःअय। 34तेकर सिरमा के साँगील केते जोड़ से साँस ईदी केते, “इफ्फात्तह” चाहे “उघड़ाव जुनोःमे!,” कंहड़ी लःअय।
35तेकर हुनी आला लुतूर ताय उघड़ाव ना हेतरअ आलांग ताय होअः तोल ताहीना होना टोटअ ना, तेकर कंहड़ी फुटकार केदाय। 36तेकर हुंकू के, नोःआँ जामा बात के ओके केहोः आलपे उदूः केकु, मेन केते बधराव ताही लिकुआय, बकिर जेतना बधराव ताही लिकुआय हिमने गी हुंकू होना बात के परचार लआकु। 37हुंकू मुरुक मोकाव केते कंहड़ी लअकु, “हुनी जे काम, कामी लःअय हुनी बढ़ियाँ लःअय, हुनी बाइहरा के आ-आयुम लःअय, कोन्दा के कंहड़ी लःअय सवांग एमा कुआय,” मेन लअकु।
Selectat acum:
संत.मरकुस 7: ASR
Evidențiere
Împărtășește
Compară
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2023 NLCI CC BY-NC-ND 4.0