ᒉᓂᓯᔅ 3
3
ᐃᓂᓂ ᐅᔕᔒᐱᑕᒧᐎᓐ ᐁᑕᔑᑌᓂᒃ
1 # Rev 12.9; 20.2. ᐃᓇᔥᑫ ᑕᔥ ᑭᓀᐱᒃ ᓇᐗᒡ ᑮᑲᑮᑖᐌᑕᒧᑯᐸᓐ ᐊᐲᒡ ᐸᑳᓐ ᐊᔭᐋᐎᔕᐞ ᑳᑮ ᐅᔑᐋᒡ ᑳᑎᐯᒋᑫᒡ ᑭᔐᒪᓂᑑ᙮ ᒦ ᐊᐌ ᑳᐃᓈᒡ ᐃᑴᐗᓐ, ᑌᐺ ᓇ ᑯ ᑮᐃᑭᑐ ᑭᔐᒪᓂᑑ, ᑳᐐᓐ ᑭᑲ ᐅᑕᒋᑫᓰᒻ ᐁᑕᔂᑯᓯᐙᒡ ᒥᑎᑰᒃ ᐅᐅᒫ ᑭᑎᑫᐗᑲᒥᑯᕽ ᐁᔮᐙᒡ?
2ᐊᐊ ᑕᔥ ᐃᑴ ᐅᑮᐃᓈᓐ ᐃᓂ ᑭᓀᐱᑰᓐ, ᐱᓵᓂᓴᑯ ᓂᒦᒋᒥᓐ ᒦᓇᓐ ᑳᐊᑰᑌᑭᓐ ᒥᑎᑯᕽ ᐃᐃᒫ ᑭᑎᑫᐗᑲᒥᑯᕽ᙮ 3ᐅᐅ ᑕᔥ ᑮᐃᑭᑐ ᑭᔐᒪᓂᑑ, ᑳᐐᓐ ᑭᑲ ᐅᒋ ᐊᒧᒥᓀᓰᒻ ᐊᐊ ᒥᑎᒃ ᒣᑴᔭᐄ ᑭᑎᑫᐗᑲᒥᑯᕽ ᑳᐸᑕᑭᓱᒡ, ᑳᐐᓐ ᑲᔦ ᑭᑲ ᑖᑭᓈᓯᐙᐙ, ᒦ ᓴ ᐃ ᒋᓂᐳᔦᒃ ᑮᔥᐱᓐ᙮
4ᐊᐊ ᑕᔥ ᑭᓀᐱᒃ ᐅᑮᐃᓈᓐ ᐃᑴᐗᓐ, ᑳᐐᓐ ᑌᐺ ᑭᑲ ᓂᐳᓰᒻ᙮ 5ᐃᓇᔥᑫ ᐋᓃᔥ ᑭᔐᒪᓂᑑ ᑭᑭᑫᓂᒥᑯᐙ ᐊᐲ ᐃᐃᒫ ᐅᒋ ᐊᒧᒥᓀᔦᒃ, ᑭᑲ ᐃᔑᐊᔮᒻ ᑖᐱᔥᑰ ᑭᔐᒪᓂᑑ ᒋᑭᑫᑕᒣᒃ ᒥᓄᐃᔑᐌᐱᓯᐎᓐ, ᒪᒋᐃᔑᐌᐱᓯᐎᓐ ᑲᔦ᙮
6ᐊᐲ ᑕᔥ ᐃᑴ ᐎᔮᐸᒫᒡ ᐃᓂ ᒥᑎᑰᓐ ᐁᐅᓂᔑᔑᓂᒡ ᒋᐅᑕᒋᑫᐎᓐᒡ, ᐋᐱᒋ ᑲᔦ ᐁᑮ ᒥᓉᑕᒧ ᓈᑯᓯᓂᒡ, ᐁᑮ ᒥᓴᐎᓈᑯᓯᓂᒡ ᑲᔦ ᐃᓂ ᒥᑎᑰᓐ, ᐅᑮ ᐅᑖᐱᓈᓐ ᐊᐊ ᐃᑴ ᐃᐃ ᒦᓐ ᐁᑮ ᒦᒋᒡ᙮ ᒦᑕᔥ ᑲᔦ ᑳᐃᔑ ᐊᔕᒫᒡ ᐅᓈᐯᒪᓐ᙮ 7ᒦᑕᔥ ᑳᑮ ᒦᓂᑣ ᑭᑫᑕᒧᐎᓐ ᒦ ᐃ ᔐᒫᒃ ᑳᑮ ᑭᑫᑕᒧᐙᒡ ᐁᑭᑭᑯᓇᔦᓯᒀ᙮ ᒦᑕᔥ ᑳᐃᔑ ᒫᒪᐎᒀᑕᒧᐙᒡ ᑭᒋ ᔔᒥᓈᑎᑯᐎ ᐊᓃᐲᔕᓐ ᐁᑮ ᐅᔑᑕᒫᓱᐙᒡ ᐋᓯᔮᓇᓐ᙮
8ᐅᑮ ᓅᑕᐙᐙᓐ ᑕᔥ ᑳᑎᐯᒋᑫᓂᒡ ᑭᔐᒪᓂᑑᓐ ᐁᐱᒬᐌᓇᒥᓂᒡ ᑭᑎᑫᐗᑲᒥᑯᕽ ᐁᑕᑭᓈᑯᔑᓂᓂᒃ᙮ ᒦᑕᔥ ᑳᐃᔑ ᑳᓱᑕᐙᐙᒡ ᑳᑎᐯᒋᑫᓂᒡ ᑭᔐᒪᓂᑑᓐ ᐊᐊ ᐃᓂᓂ, ᐊᐊ ᑲᔦ ᐃᑴ, ᒣᑴᔮᑎᒃ ᐁᑮ ᐃᔖᐙᒡ ᑭᑎᑫᐗᑲᒥᑯᕽ᙮ 9ᑳᑎᐯᒋᑫᒡ ᑭᔐᒪᓂᑑ ᑕᔥ ᐅᑮ ᐊᑐᒫᓐ ᐃᓂ ᐃᓂᓂᐗᓐ, ᐋᑎ ᐁᔮᔭᓐ? ᐁᑮᐃᓈᒡ᙮
10ᐃᓂᓂ ᑕᔥ ᑮᐃᑭᑐ, ᑭᑮ ᓅᑕᐎᓐ ᐃᐃᒫ ᑭᑎᑫᐗᑲᒥᑯᕽ᙮ ᓂᑮ ᐅᒋ ᓭᑭᔅ ᑫᑰᓐ ᐁᑭᑭᔥᑲᓯᐙᓐ ᑳᑮ ᐅᒋ ᑳᓱᔮᓐ᙮
11ᑮᐃᔑ ᓇᑴᑕᐙ ᑕᔥ, ᐊᐌᓀᓐ ᑳᐃᓂᒃ ᑫᑰᓐ ᐁᑭᑭᔥᑲᓯᐗᓐ? ᑭᑮ ᐅᒋ ᐐᓯᓐ ᐃᓇ ᐊᐊ ᒥᑎᒃ ᑳᑮ ᐅᒋᐃᓈᓐ ᒋᐅᒋ ᐐᓯᓂᓯᐗᓐ?
12ᐊᐊ ᑕᔥ ᐃᓂᓂ ᑮᐃᑭᑐ, ᐊᐊᐌ ᐃᑴ ᑳᑮ ᒦᔑᔭᓐ ᒋᐐᒌᐗᒃ, ᒦ ᐊᐌ ᑳᐅᒋ ᐊᔕᒥᒡ ᐃᐃᒫ ᒥᑎᑯᕽ ᒦᓐ᙮ ᒦᑕᔥ ᑳᐃᔑ ᒦᒋᔮᓐ᙮
13 # 2Co 11.3; 1Ti 2.14. ᑳᑎᐯᒋᑫᒡ ᑭᔐᒪᓂᑑ ᑕᔥ ᐅᑮᐃᓈᓐ ᐃᑴᐗᓐ, ᐌᑯᓀᓐ ᑕᔥ ᐃᐃ ᑳᐅᒋ ᐃᔑᒋᑫᔭᓐ? ᐅᐅ ᑕᔥ ᑮᐃᔑ ᓇᑴᑕᒻ ᐊᐊ ᐃᑴ, ᑭᓀᐱᒃ ᐅᔕ ᓂᑮ ᐗᔦᔑᒥᒃ ᑳᑮ ᐅᒋ ᐃᔑᒋᑫᔮᓐ᙮
ᑭᔐᒪᓂᑑ ᑮᐐᑕᕽ ᐋᓃᓐ ᑫᐃᔑᐌᐱᓯᓂᒡ
14ᑳᑎᐯᒋᑫᒡ ᑭᔐᒪᓂᑑ ᑕᔥ ᐅᑮᐃᓈᓐ ᐃᓂ ᑭᓀᐱᑰᓐ, ᐋᐱᒋ ᑭᑭᒋ ᐹᑖᒥᑰᐎᔅ ᐅᒋ ᐅᐅ ᑳᑮ ᐃᔑᒋᑫᔭᓐ, ᐊᐲᒡ ᐐᓐ ᐅᑯ ᑲᑭᓇ ᐊᐗᑳᓇᒃ, ᐅᑯ ᑲᔦ ᑲᑭᓇ ᐊᔭᐋᐎᔕᒃ᙮ ᑮᓐ ᑕᔥ ᐐᓐ ᑭᑲ ᒥᒋ ᒥᓴᑌᐅᑌ, ᑭᑲ ᒦᒋᓐ ᐃᐃ ᐹᒀᐗᕽ ᒥᓂᒃ ᑫᐱᒫᑎᓯᔭᓐ᙮ 15#Rev 12.17. ᑭᑲ ᐃᔑᐃᓂᓂᒻ ᒋᔒᑫᓂᑎᔦᒃ ᐊᐊ ᐃᑴ, ᑭᓃᒑᓂᓯᐙᒃ ᑲᔦ ᑕᔒᑫᓂᑎᐗᒃ᙮ ᐐᓐ ᑕᔥ ᐊᐊ ᐃᑴ ᑫᐅᓃᒑᓂᓯᒡ ᑭᑲ ᔑᑯᑎᒀᓀᔥᑳᑯᐙᓐ, ᑮᓐ ᑕᔥ ᑭᑲ ᐐᓴᑭᔥᑲᐎᒫᓐ ᐅᑑᑕᓂᓃᕽ᙮
16ᐃᑴᐗᓐ ᑕᔥ ᐅᑮᐃᓈᓐ, ᓇᐗᒡ ᑭᑲ ᐃᔑᐃᓐ ᐊᐗᔑᒣ ᒋᐐᓴᑫᑕᒪᓐ ᑭᑭᔥᑲᐙᐗᓱᔭᓐ, ᒋᐐᓴᑫᑕᒪᓐ ᑲᔦ ᐙᐸᒫᐗᓱᔭᓐ᙮ ᑭᑲ ᐊᑕᐌᓂᒫ ᑕᔥ ᑭᓈᐯᒻ᙮ ᐐᓐ ᑕᔥ ᑭᑲ ᑎᐯᓂᒥᒃ᙮
17 # Heb 6.8. ᑭᔐᒪᓂᑑ ᑕᔥ ᐅᑮᐃᓈᓐ ᐋᑕᒨᓐ Adam, ᐁᑮ ᐱᓯᑕᐗᒡ ᑕᔥ ᐊᐊ ᑭᐐᐤ ᐃᐃᒫ ᐁᑮ ᐅᒋ ᐐᓯᓂᔭᓐ ᒥᑎᑯᕽ ᑳᑮ ᐅᒋᐃᓈᐹᓐ ᒋᐅᑕᒋᑫᓯᐗᓐ, ᒦ ᓴ ᐃ ᑮᓐ ᑮᐸᑖᑕᒫᓱᔭᓐ ᐅᐅ ᐊᑭ᙮ ᐁᑕᓱ ᑮᔑᒃ ᑭᑲ ᐊᔮᓐ ᑭᒋ ᐊᓄᑮᐎᓐ ᒋᐅᒋ ᐐᓯᓂᔭᓐ ᒥᓂᒃ ᑫᐱᒫᑎᓯᔭᓐ᙮ 18ᑭᑲ ᓂᑖᐎᑭᑕᒫᑯᓐ ᑕᔥ ᐊᑭ ᒦᓀᓵᑎᑰᒃ, ᐅᑳᐎᒥᓇᑲᔒᐸᑰᓐ ᑲᔦ᙮ ᐃᓂ ᑕᔥ ᐊᔥᑭᐸᑰᓐ ᑳᓂᑖᐎᑭᑭᓐ ᐊᑮᕽ, ᒦᐗᓐ ᓴ ᐃᓂ ᑫᐅᒦᒋᒥᒥᔭᓐ᙮ 19ᓇᑲᐌ ᒋᐊᐺᓄᑮᔭᓐ ᒋᑆ ᒦᒋᔭᓐ ᑭᒦᒋᒥᒻ ᐲᓂᔥ ᒋᓂ ᐃᔥᒀ ᐱᒫᑎᓯᔭᓐ ᒋᓂ ᑮᐌᔭᓐ ᐃᐃᒫ ᐊᑮᕽ ᑳᑮ ᐅᒋ ᐅᔑᐃᑰᔭᓐ᙮ ᑭᐹᑾᑖᐗᑭᔅ ᐋᓃᔥ, ᒦᔥ ᐃᐃᒫ ᑫᔑ ᑮᐌᔭᓐ᙮
20ᐊᐊ ᑕᔥ ᐃᓂᓂ ᐋᑕᒻ#3.20 ᐋᑕᒻ: ᐃᐃᐌ ᐃᔑᓂᑳᓱᐎᓐ ᐋᑕᒻ ᑳᐃᒋᑳᑌᒃ ᑲᑭᓇ ᐊᐎᔭᒃ ᐯᒫᑎᓯᐙᒡ ᐊᑮᕽ᙮ ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ (Adam) ᐅᑮ ᐃᔑᓂᑳᓈᓐ ᐃᓂ ᐃᑴᐗᓐ ᐄᑉ#3.20 ᐄᑉ: ᐃᐃᐌ ᐃᔑᓂᑳᓱᐎᓐ ᐄᑉ ᑳᐃᒋᑳᑌᒃ ᑲᑭᓇ ᑳᐅᒫᒫᒥᑯᒡ ᐯᒫᑎᓯᓂᒡ ᐊᑮᕽ᙮ ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ Eve᙮ ᒦ ᐃ ᐋᓃᔥ ᐗᐊ ᑫᓂ ᐅᒫᒫᒥᑯᒡ ᑲᑭᓇ ᑳᐱᒫᑎᓯᓂᒡ᙮ 21ᑳᑎᐯᒋᑫᒡ ᑭᔐᒪᓂᑑ ᑕᔥ ᐅᑮ ᐅᔑᑕᒪᐙᐞ ᐋᑕᒨᓐ, ᐃᓂ ᑲᔦ ᐃᑴᐗᓐ ᑫᑭᑭᔥᑲᒥᓂᒡ ᐁᑮ ᐅᒋ ᐅᔑᑑᒡ ᐊᔭᐋᐎᔑᐗᔮᓃᕽ᙮
ᐋᑕᒻ, ᐄᑉ ᑲᔦ ᑮᓵᑭᒋᓂᔕᐅᑣ ᑭᑎᑫᐎᓂᕽ
22 # Rev 22.14. ᑳᑎᐯᒋᑫᒡ ᑭᔐᒪᓂᑑ ᑕᔥ ᑮᐃᑭᑐ, ᐃᓇᔥᑫ ᐗᐊ ᐃᓂᓂ ᓅᑯᒻ ᐯᔑᒃ ᑮᓇᐎᓐᑦ ᑳᐃᔑᐊᔮᔭᕽ ᐃᔑᐊᔮ, ᐁᑭᑫᑕᕽ ᒥᓄᐃᔑᐌᐱᓯᐎᓐ, ᒪᒋᐃᔑᐌᐱᓯᐎᓐ ᑲᔦ᙮ ᑕᑲ ᓴ ᑫᑯ ᑕᔒᐱᓂᑫᓂᓰ ᐃᐃᒫ ᐱᒫᑎᓯᐎᓈᑎᑰᕽ᙮ ᑮᔥᐱᓐ ᐅᑕᒋᑫᒡ ᐃᐃᒫ ᑕᑳᑭᑫ ᐱᒫᑎᓯ᙮ 23ᒦᑕᔥ ᑳᐃᔑ ᓵᑭᒋᓂᔕᐙᒡ ᐃᐃᒫ ᑭᑎᑫᐗᑲᒥᑯᕽ ᒥᓄ ᐊᑮᕽ ᐄᑎᓐ Eden ᑳᑮ ᐃᒋᑳᑌᓂᒃ, ᐁᑮ ᐃᔑᓂᔕᐙᒡ ᐌᑎ ᐊᓅᒋᑯ ᒋᐊᑕ ᑭᑎᑫᓂᒡ ᑳᑮ ᐅᒋ ᐅᔑᐋᒡ ᐊᑮᕽ᙮ 24ᐅᑮ ᓵᑭᒋᑯᑯᓈᓐ ᐃᑕᔥ ᐃᓂ ᐃᓂᓂᐗᓐ᙮ ᐅᑮ ᐊᓵᐞ ᑕᔥ ᒉᕒᐊᐲᑳᓇᐞ#3.24 ᒉᕒᐊᐲᑳᓇᒃ: ᒦ ᐊᐊ ᐱᔑᑭ ᐁᐅᓂᑸᑲᓂᒡ ᐅᐗᑌᕽ ᐃᓂᓃᕽ ᐁᔑᓈᑾᓂᓂᒃ᙮ Cherubim ᐃᐃᒫ ᓇᑫ ᐙᐸᓄᕽ ᑭᑎᑫᐗᑲᒥᑯᕽ, ᒥᓄ ᐊᑮᕽ ᐄᑎᓐ ᑳᐃᔑᓂᑳᑌᓂᒃ᙮ ᑭᒋ ᒨᑯᒫᓐ ᑲᔦ ᐁᐌᐌᐸᑯᓀᓭᒃ ᑫᑲᑮᐳᓂᑯᒡ ᐊᐎᔭ ᒌᔖᓯᒃ ᐃᐃᒫ ᐱᒫᑎᓯᐎᓈᑎᑯᕽ᙮
Выбрано:
ᒉᓂᓯᔅ 3: OJBS
Выделить
Поделиться
Копировать
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fru.png&w=128&q=75)
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Ojibwe Shorter Bible (Syllabic Script) © 2008 Canadian Bible Society