MATEO 3
3
La yal skꞌop Dios te Juan Akꞌichꞌjaꞌe
1La sta stiempoil te tal te ba ay tꞌantꞌan kꞌinal yuꞌun Judea te Juan Akꞌichꞌjaꞌe. 2Teꞌ lijk yaltalanbe a te genteetike:
—Sujtesa me awoꞌtanik yuꞌun te amulike yuꞌun ya me xlijkix ta pasaw ta mantal te Diose —xchi.
3Te jꞌalwanej yuꞌun Dios te Isaias sbiile la stsꞌibabe jilel skꞌoplal te Juane:
“Ya me xlijk ta tulan kꞌop ta tꞌantꞌan luwar te jich ya yal ta kꞌope: ‘Chapbeyaik me sbe te Kajwaltike, toj me xꞌajamik bael te sbee’” xchi me.
4Te skꞌuꞌ-spakꞌ te Juane pasbil ta stsotsil kameyo y xchukoj xchꞌujt ta nujkul. Jaꞌ a sweꞌelin te kꞌulube sok chab yuꞌun wits. 5Tal yaꞌiyik te machꞌatik talemik ta Jerusalen y sok spꞌejel ta estado yuꞌun Judea y sok machꞌatik nopol nax ayik ta ukꞌum Jordan. 6Te machꞌatik la yalik ta jamal te smulike, akꞌtalanbot yichꞌik jaꞌ ta ukꞌum Jordan yuꞌun te Juane.
7Te Juane la yil te bayal fariseoetik sok saduseoetik te talik yuꞌun ya skꞌan yichꞌik jaꞌ. La yaltalanbe:
—Te jaꞌexe jaꞌ stsꞌumbalex kꞌoem te tiꞌawal chanetike. ¿Machꞌa kꞌa yalbeyex awaꞌiyik te ya xjuꞌ ya akoltay abaik lokꞌel a te tulan kastigo te nopol xtale? 8Aꞌ me chiknajuk ta ilel ta jamal ta skuenta awaꞌtelik te tutꞌil sujtemix awoꞌtanik ta stojol te Kajwaltike. Ma me xꞌawalik: “Te joꞌotike stsꞌumbalotik jꞌAbraham”, ma me xchiukex. 9Jamal ya kalbeyex te ya xjuꞌ yuꞌun te Diose ya sujtes ta stsꞌumbal jꞌAbraham te tonetik to. 10Pajalex sok te teꞌetik te chapalix yechejul te ya yichꞌ tsꞌetel kꞌalal ta yisim. 11Spisil te teꞌetik te ma bujtsꞌanuk te site ya me yichꞌ tsꞌetel sok ya me yichꞌ chikꞌel. Te joꞌone ya kaꞌbeyex awichꞌik jaꞌ yuꞌun te sujtemix awoꞌtanik ta stojol Dios. Pero te machꞌa patil ya xtal kuꞌune, jaꞌ me ya yaꞌbeyex awikꞌik te Chꞌul Espíritu sok kꞌakꞌ. Jaꞌ mas tulan stukel; yan te joꞌone mas pekꞌ ayon. Ni ya kujan jba ta slikel bael te swawe. 12Te machꞌa xtale yichꞌoj spala teꞌ ta skꞌab yuꞌun ya sajpꞌubey lokꞌel skꞌapalel te triwue. Patil ya me skꞌej ochel ta yawil te striwue. Yan te skꞌapalele ya me xchikꞌ ta kꞌakꞌ te ma xtupꞌ sbajtel kꞌinale —xchi te Juane.
Jesus aꞌbot yichꞌ jaꞌ
13Te Jesuse lijk tal ta estado yuꞌun Galilea, tal ba ukꞌum Jordan. Kꞌot te ba ay te Juane, yuꞌun tal skꞌan yichꞌ jaꞌ. 14Te Juane kꞌan ma yaꞌbe yichꞌ jaꞌ te Jesuse. Jich a yalbe:
—Snujp te joꞌon ya awaꞌbon kichꞌ jaꞌe. ¿Tuꞌun te jaꞌat a talat ta jtojole? —xyut.
15La yal te Jesuse:
—Jich me wakꞌ yichꞌ pasel, yuꞌun ya skꞌan jpastik spisil te tut ya skꞌan yoꞌtan te Diose —xchi.
Jich a yaꞌbe ichꞌ jaꞌ te Juane. 16Kꞌalal laj yichꞌ jaꞌ te Jesuse, lokꞌ tal ta jaꞌ. Ora jam te chꞌulchane. Te Jesuse la yil a koj tal te Espíritu yuꞌun Dios, jachik tutꞌil paloma jul ta skuenta. 17Sok ay machꞌa kꞌopoj tal ta chꞌulchan:
—Jaꞌ i to jaꞌ jNichꞌan te lom bayal kꞌux ta koꞌtane. Ben jun koꞌtan yuꞌun —xchi.
Выбрано:
MATEO 3: AMANNT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Nuevo Testamento Tzeltal de Amatenango © Sociedad Bíblica de México, 2006.