Yoane 6
6
Nter apur makuimpi
1Ampis muna, Yes kubuer mas ma Garirea, rukompua rekra mas ma Tiberiade.
2Bat ba buiki bawirabs ante, isin atar banta bisana biaker yante ruk ri babero.
3Yes kuwe ra ruk ru nkuentshi, yante kuwar ona nto baronki bante.
4Isina rusu ru nkira mu Asampar Ntsampe muawar kora kor, nkira munene mu basi Yuda.
5Yes kuumun mis, yante kutar bat ba buiki bawiy ngwa yante, yante kuror Firipo : Bitu tshusomp bisima kue, isin bat bene ruera banta budji ?
6Yante atot nkos isina kukik Firipo, di yante amayeb mey masot yante ker.
7Firipo kunsaks yampe : Bisima bi birok masanke makuem mape bia takok muota muot irab kakek.
8Ronki rante rumwetsh rekra Andere, muan inyante a bora Simon Petero kunor :
9Muan nunka mwetsh angwar ane, yante angwar nto makuimpi matan, nto ake basue bape babakeke, biapakok nto a bat bene babuiki ?
10Yes kuror yampe : Tshuer ana bat asin, ona nenke mua buiki muawara ; bat bene kuwar asin, bawar rueri tuku itanu.
11Yes kurab makuimpi matan, nter amana yante uromp Ntsampe, yante kukaps baronki bante, keka baronki bante bakaps bene bawar asin ; yante kukabawek ake basue nko awont banta.
12Nter awuut banta, yante kuror baronki bante yampe : Tor ana mabeye isina biteny udimu bo.
13Banta kubitor, banta kuyoros mitet isank nto mitet mipe mabeye mu biteny bi makuimpi, mabese bene badja.
14Nter atar bat bene isana raker Yes, banta bampe : Barabara, yone angwar profete, yeuwiy u kat a bat ba man.
15Nter ayeb Yes ampe, bat baukunsoti kunats bukumu i bunono, kuwe ra ruk ru nkuentshi yamet.
Nter asamp Yes ruk ra mas
16Nter awitor itankua rikokoro, baronki bante kuoworme kwar a mas manen.
17Banta kunyingin u kat a buat, bawont kubuer u muin muwe ri Kapernaum kupit, Yes utowiy ngwa ba bo.
18Mas kukatu nto bunono isina puinki ntshunene aker.
19Nter aman banta uru buat buamator tare ruera ntshueri (stade = km)#6:19 Stade : mpara rinta ampe rueri ri basi Yuda. itan mpe isampr, banta kutar Yes iwisampi ra mas, yante awar u kor a buat, banta kupak.
20Di yante kubaror yampe : Mi nywe ; kat pak ana !
21Banta kunyings u kat a buat nto nianko, keka buat kutor u irak rawawe ba.
Yes awar kat a monyo
22Nyies muna tong a bat bawar u muin mua mas, atar ba Yes ke war u kat buat, nto baronk bante bo baronk bawe bamet.
23Di mat mekr matoa u Tiberiade masamp u kor irak radji banta nter aman uromp Kumu.
24Nter atar ba ampe, Yes rek ante ona, i baronk bante, banta kunyingn kat a mat, kuwe ri Kapernaum uwasot Yes
25Ba kuamon u muin mua mas, ba kunor bampe : Kumu ! Wene wawir nter ye ane ?
26Yes kubasaks yampe : Barabara, barabara, minyi rikibirori, binu kubukusoti minyi isin atar binu bisan bo, di isina atar binu, awuut binu, keka ikusot binu.
27Kat ker ana ngun isin bisima bikawa, di sot ana bine bia mony usir bo, yemubiwek Muan a Muot, isina Tata ntshu ngwaka Ntsampe amansik yentsh.
28Ba kunor bampe : Bitu tshuker mpueny isin kuker mayemp ma Ntsampe ?
29Yes kubasaks yampe : Iyemp ra Ntsampe rungwak kanko, binu buyes yone ntshu atom yante.
30Ba kunor bampe : Isana ru na runkerk wene, bitu tshuatar isina keka tshuiyes ? Iyemp ru na runkerk wene ?
31Batat ba bitu bamadja manne#6:31 Manne : bisima bia toa a ruk. Ntsampe aweke basi Yuda nter awara banta u busueb bu ibuings. u busuebe bu ibuings, nko awak manta mapunta ; kat mukanta mua Ntsampe. Yante amabawek bisima bia ruk isina kudja.
32Yes kubaror yampe : Barabara, barabara, minyi rik birori, Moise kuamabiwek kat atoa a ruku bo, di Tata ibiwek binu kat a barabara atoa a ruk.
33Kat a Ntsampe ingwak ya yone atoa a ruk, ya iwek bat ba manu mony.
34Ba kunor bampe : Kumu ! Tshuwek kat yis matank makima.
35Yes kubaror yampe : Minyi rungwar kat a mony, muot ntshu wiya ngwa minyi, yak awar a ntshar, ntshu ntshyesa minyi, yak awar a puesa.
36Minyi ramabiror, binu bamatar, di binu untshyes bo.
37Bakima bupek Tata bapawiy ami, muot uwiya ngwa minyi, minyi rake uming bo.
38Minyi kuratoa a ruk isin kuwiy ker ruwont rami bo, di ruwont ra yone ntshu amatom minyi.
39Rine ruwont ra Tata ntshu amatom minyi, minyi rake rimis muot u kat a bene bamapek ya bo, di minyi ribaumun rusu ru buso.
40Rine ruwont ra yone ntshu amatom minyi, muot ntshu tar Muan, inyesa, angwar a mony usir bo, minyi rupangumun rusu ru buso.
41Di basi Yuda baukukukuk isina atot yante ampe : Minyi ru kat ato a ruk.
42Ba kutot bampe : Ka Yes muan a Yosef nywe, bitu tshuamayeb isante nto ake inyante ? Isin ye ikutot ya ampe : Minyi rato ruk ?
43Yes kubaror yampe : Kat kukukuk ana u kat a binu.
44Rek a muot uyeb uwiy ngwa minyi bo, mpe Tata ntshu amatom minyi rek unan ; minyi rapangumun rusu ri buso.
45Mungwar mapunta u kat mukanta mu Baprofete : Ntsampe ipabisuengs bakima. Muot ntshu oka mey ma Tata ntshu maraba, ya iwiya ngwa minyi.
46Rek a muot atutar Tata bo, di ya yante atoa ngwar Ntsampe, yante atar Tata.
47Barabara, barabara, minyi rik birori, mpe muot antshyes minyi, yante angwar a mony usir bo.
48Minyi rungwak ru kat a mony.
49Biso bia binu banta bamadja manne u busuebe bu ibuings, banta bamawa.
50Ine ingwak kat atoa a ruk, isina ntshu idja yak kawa bo.
51Minyi rungwak kat a mony ato a ruk, mpe muot adja kat ine, yante iwar a mony usir bo ; kat ntshi biwek minyi, ingwak rutoko rami, yeruwek minyi bat bakim ba man, isin mony usir bo.
52Basi Yuda baukuwamsi bamet bampe : Muot nywe iyeb tshuwek rutoko rante udja mpueny ?
53Yes kubaror : Barabara, barabara, minyi rik birori, mpe binu udja rutoko ra Muan a Muot bo, unyo ake makera mante bo, binu bak mon mony bin amet bo.
54Muot udja rutoko rami, unyo ake makera mami, yante iwar a mony usir bo, minyi rupangumun rusu ri buso.
55Isin rutoko rami rungwak isina ra barabara, makera mami ake mungwak inyur ra barabara.
56Muot udja rutoko rami, inyo makera mami, yante iwar u kat ami, minyi ake ruwar u kat ante.
57Nko Tata a mony amatom minyi, minyi rungwak a mony isin Tata, nkos muot udja rutoko rami, yante iwar a mony isin minyi.
58Yine ingwak kat ato a ruk, kumungwak nko kat adji biso bia binu, banta bamawa. Ntshu udja kat ine yeiwar a mony usir bo.
59Yes aukuror mey mene, aukusuengn u kat irak ruromp u Kapernaum.
Yes akika baronki bante
60Nter aoka baronki bante ba buiki mey mene, ba kutot bampe : Mey mene mungwak ntshoro, na uyeb maok?
61Nter ayeb Yes u ntem muante mey maukukukukuk baronki bante, ya kubaror yampe : Mey mene mumabipampra?
62Mpe butar Muan a Muot ibentu ya irak ratawar yante buso buso.
63Puinki a Ntsampe ngwekek mony, ri rutoko kurunkerk iket bo. Mey mumak biror minyi mungwak Puinki a Ntsampe nto ake mony.
64U kat a binu, bat bungwak bak yes bo. Isin Yes amatayeb buso buso bat bak yes bo, nto ake na ingwek yante kat a rou ra bat babe.
65Ya kutot yampe : Isin kankos imabiror minyi ampe, muot yak yeb uwiy ngwa minyi bo, mpe Tata ungwek bunono buwiy ngwa minyi bo.
66Itank rina baronki bante ba buiki kukaru banta ukawe nto ante bo isin mey mene.
67Yes kukaror baronki bante isanke ibape yampe : A binu ake reke bawont uwent ?
68Simon Petero kunsaks Kumu ! Bitu tshuwe a nake ? Wene ungwar mey ma mony usir bo.
69Bitu tshuamayes, bitu tshuamayeb wene awar barabara Kristo, Muan a Ntsampe ntshu a mony.
70Yes kubaror, minyi keramabisor isanke ibape ? Di mwetsh u kat a binu angwar nsong mua Satan.
71Yante atot nkose isina Yuda Iskariot, muan a bora Simon ; ya awar ntshu isanke i bape, nsariy ante.
Выбрано:
Yoane 6: EJK2012
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Copyright © 2012, ASAREB, Suisse MiDi BIBLE