YOHANE 1
1
Kivokio
1Aho kivoko hekina Kiteto, na uo Kiteto ekiho ha Mrungu, na uo Kiteto neki Mrungu. 2Uo kuvoka ekiho he Mrungu. 3Vyose vyeharehike he uo; na esi he ye tehena cho cheharehike he vila vyeharehwe. 4Heye niho hekina nkalamo, na iyo nkalamo ne kianga cha vantu. 5Na icho kianga kiangaa he kija, neri kija tekikiidime.
6Hekina mntu etumiwe kufuma ha Mrungu, izina lakwe niye Yohane. 7Uo eziie vuonwa, iti atetie kianga vuonwa, nesa vose vaitikije vuntu vwakwe. 8Uo sekiye kila kianga, mira ezie iti atetie kila kianga vuonwa. 9Hekina kianga kijenye, chemwangaja kila mntu, chekiza he si ii. 10Ekiho he si ii, he mburi yakwe si ii ikavoneka, neri ii si teimmanyije. 11Ezie hakwe, mira vala e vakwe tevemghuhie. 12Mira vose vemghuhie, vala veitikija izina lakwe, evainkie nzinya kuoka vana va Mrungu; 13vemoghiwe, si kwa sakame, neri kwa mikundire ya mwiri, kana mikundire ya mntu, mira he Mrungu. 14Na uo Kiteto akaoka mwiri, akatua hetu; na uswi tukavona ngazo yakwe, ngazo sa ya Mwana ere mmwe efuma he Vava; eizue mbonea na idi.
15Yohane akamtetia vuonwa, akatetisha ekiti, “Uu niye nemtetie kuti, ‘Ye eza nyuma hemi ekinirongorire; ambu ekiho mi nesinate.’” 16Ambu he kuizuiwa kwakwe, uswi vose tweghuhie mbonea na mbonea. 17Ambu myomongwa yeinkijwe kwa mkono wakwe Mose; mbonea na idi vyezie kwa mkono wakwe Yesu Kristo. 18Tehena anamvona Mrungu narini; Mrungu Mwana remmwe, eho he Vavee, niye emmanyishe.
Yohane M’batizi emtetia Yesu vuonwa
(Mat. 3:1-12; Mrk. 1:7-8; Luk. 3:15-17)
19Na uvu nivwo vuonwa vwakwe Yohane, Vayuda vekinatume vatasi na Valevi kufuma Yerusalemu iti varemvwija, “We u muni?” 20Naye akakunda, neri tekanie; akakunda akati, “Mi simi Kristo.” 21Vakamvwija, “Cheikee ze? Niwe Elia?” Akati, “Mi siye.” “We niwe ula mroti?” Akagharusha, “Hai.” 22Niho vakamti, “Niwe ani? nesa tuvone cha kuvagharusha vala vetutumie. We mwenye ukutize?” 23Akati, “Mi ni izii la mreamberija uko nyika, ‘Rongajani nzia ya Mfumwa!’ sa vuntu mroti Yesaya etetie.” 24Na vala vetumiwe vekifumie ha Vafarisayo. 25Vakamvwija, vakamti, “Hanini ra webatiza kakicha siwe Kristo, kana Elia, kana ula Mroti?” 26Yohane akagharusha, akati, “Mi nibatiza kwa mpombe. Ghati he unywi heimuke yye mwesimmanyije. 27Ni ula eza nyuma hangu, eye chesinifwenye mi kuhalaja mkoa wa kiratu chakwe.” 28Ivyo vyerongike uko Betania sela ila ya Yordani, hantu Yohane ekibatizia.
29Hala yavo hakwe akamvona Yesu ekimzia, akati, “Rereha Mwana ng’onji wa Mrungu, etika mabanu a ii si! 30Uu niye nemtetie nekiti, ‘Heza mntu nyuma hangu, eye ekinirongorire; ambu ekiho mi sekiho.’ 31Neri mi nesekimmanyije; mira nesa afunyirijwe he Vaisraeli, nicho cheshighie mi nekiza kubatiza na mpombe.” 32Yohane akateta vuonwa ekiti, “Nemvonie Mpeho ekisea sa nziva kufuma uko wanga, naye akaikaa wanga heye. 33Neri mi nesekimmanyije; mira ula enitumie kubatiza na mpombe, uo enivwirire, ‘Uo wenezamvona Mpeho ekisea na kuikaa wanga heye, uo niye ebatiza na Mpeho Wedi.’ 34Nami nevonie, kangi nekoneshe iti uu ni Mwana wa Mrungu.”
Varateri va kuvoka
35Hala yavo kangi Yohane ekiimuke na varateri vakwe veri. 36Akamrereha Yesu ekivecha, akati, “Rereha Mwana ng’onji wa Mrungu!” 37Vala varateri veri vakamsikia ekiteta, vakamratera Yesu. 38Yesu akagharuka akavavona vekimratera, akavati, “Muenda ni?” Vakamti, “Rabi (ni kuti, ‘Mcheji’), uikaa hio?” 39Akavati, “Nzoni muvone.” Vakatonga vakavona hantu eikaa. Vakaikaa hakwe ula msi. Nao neki marongo a saa ikumi. 40Andrea mjinawe Simioni Perto, neki mmwe wa vala veri, vemsikie Yohane, vakamratera Yesu. 41Uo akaronga mvona Simioni, mjinawe mwenye. Akamti, “Twamvona Mesia (ni kuti, ‘Kristo’).” 42Akamtonja he Yesu. Yesu naye akamrereha, akati, “We niwe Simioni mwana Yohane. Nawe uneitangwa Kef” a (nikwo kuti, “Petro kana, Ikamba)”.
43Hala yavo hakwe Yesu akaenda kutonga Galilaya, naye akamvona Filipo. Yesu akati, “Niratera.” 44Filipo naye neki mntu wa Betsaida, mkaa wa muzi wavo Andrea ne Petro. 45Filipo akamvona Natanaeli, akamti, “Twamvona ula eandikwe ni Mose he myomongwa na varoti, Yesu mwana Yosefu, mntu wa Nazareti.” 46Natanaeli akamti, “Kive kintu chedi kifume Nazareti?” Filipo akamti, “Nzo uvone.” 47Niho Yesu akamvona Natanaeli ekimzia, akateta mburi jakwe, “Rereha Mwisraeli wa idi, heye hesina ikombere.” 48Natanaeli akamti, “Waidima ze kunimanya?” Yesu akagharusha, akamti, “Aho Filipo esinakuitanga, hala weho kijusi he mkuu, nekirekuyoya.” 49Natanaeli akamgharusha, “Rabi, we u Mwana wa Mrungu, niwe mfumwa wa Israeli.” 50Yesu akagharusha, akamti, “Kila nakuti nekuvonie kijusi he mkuu, nicho waitikija? Unevona vintu vibaha kukela ivyo.” 51Akamti, “Kididi, kididi, nimutio, Munevona uko wanga hejuvuke, na vamalaika va Mrungu vekikwea na kumseia Mwana wa Mntu.”
Выбрано:
YOHANE 1: CHSUNT67
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Chasu New Testament © Bible Society of Tanzania, 1967.