توریت شریف: پَیدایش 17
17
1جس ویلے حضرت ابرام نَنِنَوے سالاں نے ہوئے، اُس ویلے رب اُنہاں پر ظاہر ہویا تے آخیا، ”میں اللّٰہ قادرِ مطلق آں۔ مہاڑے مُطابق زِندگی گُزار، تے بے اِلزام رہو۔ 2میں اپݨے تے تہاڑے درمیان عہد کرساں، تے تُہاڑی نسل بہُوں زیادہ بدھاساں.“
3حضرت ابرام سِر سجدے وِچ سٹیا، تے اللّٰہ تعالیٰ اُنہاں کی آخیا، 4”تک! مہاڑا عہد تہاڑے نال اے، کہ تُوں بہوُں قوماں نا پیو ہوسیں۔ 5تُہاڑا ناں ہُݨ ابرام نی ہوݨ لغا، بلکہ تُہاڑا ناں اِبراہِیم ہوسی، کِیئانکہ میں تُکی بہوُں قوماں نا پیو بݨائی شوڑیا اے. 6میں تُکی بہُوں زیادہ بدھاساں، تے میں تُہاڑے کولوں قوماں پیدا کرساں. تے تُہاڑی نسلاں وِچوں بادشاہ بݨسݨ۔ 7میں تہاڑے نال تے تہاڑے تُوں بعد تُہاڑیاں نسلاں نال بلکہ اِنہاں نیاں ساریاں پُشتاں نال، اپݨا ابدی عہد کرساں. یعنی، میں تہاڑا تے تہاڑے بعد تُہاڑیاں نسلاں نا خُدا ہوساں۔ 8میں کَنعان نا سارا مُلخ، جس وِچ تُوں پردیسی ایں، تُکی تے تُہاڑیاں نسلاں کی ہمیشہ نی ملکیت نے طور پر دیساں. تے میں اِنہاں نا خدا ہوساں.“
9فِر اللّٰہ تعالیٰ آخیا، ”اے اِبراہِیم، مہاڑے عہد کی مَن، تے تہاڑے توں بعد تُہاڑیاں نسلاں وی اِس کی پُشت در پُشت مَنَݨ. 10مہاڑا عہد، جیہڑا مہاڑے تے تہاڑے وِچ، تے تہاڑے توں بعد تُہاڑیاں نسلاں نال اے، جس کی تُوں مننا ایں، اے اے اَے کہ ہر اِک مُنڈے نیاں سُنتاں کِیتیاں جاݨ۔ 11تُساں سارے اپݨیاں سُنتاں کرواؤ، تے اے کم اِس عہد نا نشان ہوسی جیہڑا تُساں نے تے مہاڑے وِچ اے. 12تُساں وِچ پُشت در پُشت اٹھویں دیہاڑے پر ہر مُنڈے نیاں سُنتاں کِیتیاں جاݨ. اے کم اُس غُلام پر وی لاگو ہوݨا جیہڑا تُہاڑے کہار جمیا ہووے، یا کُسے پردیسی کولوں خریدیا ہوئے -- یعنی او جیہڑا تُہاڑی نسلاں وِچوں نی. 13کہار نے ہر مرد پر سُنتاں لازم اݨ، پاویں او کہار پیدا ہویا، یا کُسے پردیسی کولوں خریدیا ہووے. اے اِس گل نا نِشان ہوسی کہ مہاڑا عہد تُساں نال ہمیشہ تک قائم رہسی. 14او مرد جس نیاں سُنتاں نی ہویاں، اُس کی اپݨے لوکاں وِچوں کڈی سٹو، کِیئانکہ اُس مہاڑا عہد تروڑیا.“
15فِر اللّٰہ تعالیٰ حضرت اِبراہِیم کی آخیا، ”ساری جیہڑی تُہاڑی کہرے آلی اے، اِس کی ہُݨ ساری ناں آخیاں، بلکہ اِس نا ناں ہُݨ سارہ ہوسی. 16تے میں اُس کی وی برکت دیساں، تے اُس کولوں تُہاڑا اِک پُتر ہوسی. میں سارہ کی اِتنی برکت دیساں کہ قوماں اُس نیاں نسلاں وِچوں ہوسݨ، تے قوماں نے بادشاہ اُس وِچوں جَمسَݨ.“
17فِر حضرت اِبراہِیم سِر سجدے وِچ سٹیا، تے ہسی کے دِلے وِچ آخݨ لغے، ”سو سال نے بُڈھے نا وی مُنڈا جمی سکݨا؟ تے سارہ جیہڑی نَوے سالاں نی اے، اُس نی اُولاد کُتھوں جمسی؟ 18فِر اُنہاں اللّٰہ تعالیٰ کی آخیا، ”چنگا ہووے کہ اسماعیل ہی تُہاڑی برکت نال زِندگی گُزارے!“
19اللّٰہ تعالیٰ آخیا، ”کوئی شک نی کہ تُہاڑی کہرے آلی سارہ مُنڈا جمسی، تے تُوں اُس نا ناں اِسحاق رخیاں. میں اُس نال تے اُس نی اولادی نال اپݨا عہد، جیہڑا ابدی عہد اَے، قائم رخساں. 20تے اسماعیل واسطے وی میں تُہاڑی دُعا سُݨی کِہندی. تک، میں اُس کی وی برکت دیساں. میں اُس کی پَھلݨ پھولݨ دیساں، تے اُس نی تعداد بہُوں ہی زیادہ بدھاساں. اِس کولوں بارہ شہزادے جَمسݨ، تے میں اُس کولوں اِک بڑی قوم وی بݨاساں۔ 21پر اسحاق نال میں اپݨا عہد کرساں، تے اسحاق اگلے سال اِسے خاص ویلے بی بی سارہ کولوں جمسی.“ 22جدوں اللّٰہ تعالیٰ حضرت اِبراہِیم نال گَلاں ختم کری شوڑیاں، تے او اُنہاں کولوں آسمان پر ٹُری گیا۔
23فِر حضرت اِبراہِیم اُسے دیہاڑے اللّٰہ تعالیٰ نے حُکم نے مُطابق اپݨے پُترے حضرت اسماعیل تے ساریاں مرداں نیاں جیہڑے اُنہاں نے کہار رہݨے سݨ، سُنتاں کروایاں. 24حضرت اِبراہِیم نَنِنَوے سالاں نے سݨ جدوں اُنہاں نیاں سُنتاں ہویاں، 25تے جدوں حضرت اسماعیل نیاں سُنتاں ہویاں او تیرہ سالاں نے سݨ۔ 26حضرت اِبراہِیم تے اُنہاں نے پُتر نیاں سُنتاں اِک ہی دیہاڑے ہویاں. 27تے اُسے ہی دیہاڑے حضرت اِبراہِیم نے کہرے نیاں ساریاں مرداں نیاں سُنتاں اُنہاں نال ہویاں، جنہاں وِچ او مرد وی سݨ جیہڑے اُنہاں نے کہر جمے سݨ، یا جیہڑے کُسے پردیسی کولوں خریدے گئے سݨ.
Выбрано:
توریت شریف: پَیدایش 17: phr
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Text (c) 2021 Noor-e-Kashmir
Audio (p) 2021 Noor-e-Kashmir