توریت شریف: پَیدایش 23
23
1بی بی سارہ اِک سو ستائی سال نی عُمر وِچ 2مُلک کَنعان نے شہر قِریَت اربع وِچ فوت ہوئے. (اِس کی حبرون وی آخݨے اݨ.) تے حضرت اِبراہِیم بی بی سارہ نا ماتم کرنے واسطے گئے۔
3فِر حضرت اِبراہِیم اپݨی زناݨی نی میّت کولوں اُٹھی گئے، تے بنی حِتّ نے لوکاں نال جیہڑے اُتھے رہݨے سݨ، گَلاں کرݨ لغے تے آخیا، 4”میں تُساں وِچ مسافر تے پردیسی آں. تُساں مِکی قبرے واسطے جغہ دیو، تانکہ میں اپݨی کہرے آلی نی اِس مَیت کی دبی سَٹاں۔»
5فِر بنی حِتی لوکاں حضرت اِبراہِیم کی جواب دِتا، 6”اے جناب! تُساں اَساں نے وِچ بہُوں بڑے سردار او. تُساں اساں نی ساریاں تُوں چنگی قبر وِچ میّت کی دَبی چھوڑو. اَساں وِچ اِیئے جہیا کوئی نی جیہڑا تُساں کی نہ کرے تے تُساں مَیت کی دَبی ناں سکو۔»
7فِر حضرت اِبراہِیم اُٹھی کے بنی حِتّ نے لوکاں اگے آداب کِیتا، 8تے اُنہاں اِس طرح آخیا، «جے تُساں نی مرضی ہووے کہ میں اپݨی زناݨی نی مَیت کی اِتھے دَباں، تے فِر تُساں صُحر نے پُتر عِفرون اَگے مہاڑی سفارش کرو 9کہ او مکفیلہ نے غار کی، جیہڑا اُس نا اے تے اُس نی اِک باڑی نے کنارے پر اَے، پوری قیمت کِہنی کے تُساں نے سامݨے مِکی چائی دَے، تاںکہ قبرے واسطے او مہاڑی ملکیت بݨی جائے۔»
10عِفرون اپݨے لوکاں نال شہر نے پھاٹک پر بیٹھا وا سی۔ اُس اُنہاں ساریاں نے سامݨے حضرت اِبراہِیم کی جواب دِتا، 11”اے جناب، اِس طرح ناں ہوسی، بلکہ میں اے باڑی تُساں کی دیݨا آں، تے غار وی جیہڑا اِس وِچ اے تُساں کی دیݨا آں. میں اے اپݨے لوکاں نے سامݨے تُساں کی دیݨا آں. تُساں اپݨے مَیت کی اِس وِچ دَبی سکݨے او۔»
12تاں فِر حضرت اِبراہِیم اُس علاقے نے لوکاں اگے سِر نِیواں کِیتا، 13تے عِفرون کی ساریاں نے سامݨے جواب دِتا، ”مہربانی کری کے تُساں اِس باڑی نی مہاڑے کولوں قیمت کِہنو، تانکہ میں اپݨے کہرے آلی نی میت اِتھے دَباں۔»
14عفروں حضرت اِبراہِیم کی جواب دِتا، 15”اے جناب، اے زِیمی چاندی نے چار سو سِکیاں نی اے. اے تُساں نے تے مہاڑے واسطے کُج وی نی! بس! تُساں اپݨے میت اِتھے دَبی شوڑو۔»
16حضرت اِبراہِیم عِفرون نی گل منی کِہدی، تے اُنہاں اُتنی ہی چاندی تولی کے دِتی جِتنی اِس لوکاں نے سامݨے آخی سی، یعنی چار سو چاندی نے سِکے جیہڑا سِکہ سوداگراں وِچ چلݨا سی.
17اِس طرح عِفرون نی باڑی جیہڑی مکفیلہ وِچ ممرے نے سامݨے سی تے او غار جیہڑا اِس وِچ سی، تے سارے درخت جیہڑے اُس باڑی وِچ سݨ، 18اے ساریاں حِتی لوکاں نے سامݨے جیہڑے اُس ویلے شہرے نے پھاٹک پر سݨ، حضرت اِبراہِیم نی ملکیت وِچ دِتے۔
19اُس توں بعد حضرت اِبراہِیم اپݨی زناݨی بی بی سارہ نی میّت کی اُس غار وِچ جیہڑا کَنعان نے مُلخے وِچ سی، دَبی شوڑیا۔ 20اِس طرح اے باڑی تے غار جیہڑا اُس وِچ سی بنی حِت نی طرفوں قبرستان واسطے حضرت اِبراہِیم نی ملکیت وِچ چائی دِتا گیا۔
Выбрано:
توریت شریف: پَیدایش 23: phr
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Text (c) 2021 Noor-e-Kashmir
Audio (p) 2021 Noor-e-Kashmir