मत्ती 13
13
अच्छी भूमि मा फलों का उत्पादन कु मिसाल
(मरक 4:1-9; लूका 8:4-8)
1वे दिन यीशु घौर बट्टी निकली के झील का छाला मा बैठी गै। 2अर वेका संमणी इथग बड़ी भीड़ जमा हवे गै कि यीशु एक नाव पर चढ़ी के बैठी गै अर सैरी भीड़ झील का छाला पर खड़ी रै। 3अर वेल ऊं दगड़ी मिसाल दे के भौत सी बात करिनी एक बुतै कन वलो बीज बुतुणु कु अपड़ा पुंगडा मा गै। 4अर बुतुण बगत कुछ बीज त बट्टा का किनारा पर छिलरेनी अर आकाश का चलखुडों ल ऐ के ऊं बीजों तैं खै दींनि। 5अर कुछ बीज पथरीली भूमि पर छिलरेनी जख ऊं तैं जादा माटो नि मिली अर गैहरु माटो नि मिलणा वजह से जल्दी जमि गैनी। 6अर जब घाम निकली त वे फुके गैनी अर जौड़ा कमजोर हूंण का कारण जल्दी सूखि गैनी। 7कुछ झिबलांण मा छिलारेनी अर जख झिबलाड़न ल बढ़ि के ऊं तैं दबै दींनि। 8पर कुछ बीज अच्छी भूमि मा पोड़िन अर फल लैंनि कुई सौ गुणा कुई साठ गुणा अर कुई तीस गुणा। 9अर वेल बोलि जु कुई ईं बात तैं सूंणि सकदु जु मि बुल्ण छौं उ यु तैं समझ भि ल्यो।
मिसालों कु उद्देश्य
(मरक 4:10-12; लूका 8:9-10)
10अर चेलों ल संमणी ऐ के ऊंमा बोलि, “तु लुखुं तैं दगड़ी मिसाल दे के किलै बात कनी छै” 11यीशु ल जवाब दींनि, “तुम तैं त परमेश्वर का राज्य कि सचै की समझ दियीं च पर ऊं तैं नि दिईं।” 12किलैकि जै मा थोड़ी भि मेरी बातों तैं समझणै की इच्छा छैं च वे तैं और दिये जालि अर वेमा भौत हवे जलो पर जै मा थोड़ा भि नि च वेमा बट्टी उ भि लिये जालि जु वेमा छैं च। 13मि ऊं दगड़ी मिसाल दे के इलै बात करदु किलैकि उ देखि के दिखुनु पर ऊं तैं पछांण नि सकदा अर सूंणि के भि सुणुनु पर समझ भि नि सकुनु। 14ऊंका बारा मा यशायाह कि य भविष्यवाणि पूरी हूंदी
तुम कंदूड़ों त सुंणिल्या पर नि समझिल्या अर आँखों ल त देखि ल्या पर तुम नि पैछाणिल्या।
15किलैकि यूं लुखुं का दिल जिद्दी हवे गैनी,
अर उ कंदूड़ों ल ऊंचो सुणदींनि अर ऊंल अपड़ा आंखा बूजिनि
कखि इन नि हो कि उ आँखों ल दिखुनु,
अर कंदूड़ों ल सुंणुनु अर मन से समझण,
अर अपड़ा पापों से मन फिरौनु अर मि ऊं तैं खूब कैरु।
16पर धन्य छिन तुमारा आंखा कि उ दिखदा छिन अर तुमारा कंदूड़ कि उ सुंणदा छिनी। 17किलैकि मि तुम मा सच बुल्णु छौं किलैकि कथग ही परमेश्वर का तरपां बट्टी बुल्ण वलो ल अर धर्मियों ल चै कि जौं बातों तैं तुम दिखणा छा देखा पर नि देखि अर जौं बातों तैं तुम सुनणा छा सुनणु पर नि सुंणिनि।
अच्छी भूमि की मिसाल की व्याख्या
(मरक 4:13-20; लूका 8:11-15)
18अब तुम बीज बुतंण वला मिसाल कु मतलब सूंणा 19जु कुई परमेश्वर को वचन सूंणि के नि संमझुदो वेका मन मा जु कुछ बुतै गै छो वे तैं उ दुष्ट शैतान ऐ के लूछि के लिजांदु यु उ ही च जु बट्टा किनारा बुतै गै छो। 20कुछ लोग वीं पथरीली भूमि जन छिन ज्यां पर बीज गिरदो पर यु उ छिनी कि जु वचन तैं सूंणि के वे बगत खुशी से स्वीकार कैरी दे दींनि। 21पर अफ मा जौड़ा नि रखणा वजह से उ कुछ ही दिनों कु रांदो यांका बाद जब ऊं पर क्लेश या बिपदा औंदि त तब उ तुरंत ठोकर खै दींनि। 22जु झिबलांण मा बुतै गैनी उ यु छिनी जौं ल वचन तैं सूंणि, पर धरती पर जीवन कि चिंता अर धन दौलत को धोखा ज्यां बट्टी उ प्रेम करदींनि अर कई चीजों तैं पाणै की चाह ऊंमा समैके वचन तैं दबै दींदु अर वे तैं कुछ फैदा नि हुंदा। 23अर जु अच्छी भूमि मा बुतै गैनी उ यु छिनी जु वचन तैं सूंणि के स्वीकार करदींनि अर फल लंदिनि उ भि कुई सौ गुणा, कुई साठ गुणा, अर कुई तीस गुणा।
ग्यूं अर जंगली बीज की मिसाल
24यीशु ल ऊं तैं एक और मिसाल दींनि स्वर्ग कु राज्य वे किसान जन च जैल अपड़ा पुंगड़ा मा अच्छो बीज बूति। 25पर जब लोग सिणा छा त वेका दुश्मन शैतान ल पुंगड़ा मा ऐ के ग्यूं का बीज का बीच जंगली बीज बूतिके चलि गै। 26जब अंकुर निकलीनि अर बलड़ा लगिनि त जंगली घास कि बिज्वाड़ भि दिखै गै। 27जु पुंगड़ा कु स्वामि छो वेका सेवकों ल वेमा ऐ के बोलि, हे स्वामि क्य तिल अपड़ा पुंगड़ा मा अच्छो बीज नि बूति छो? त फिर जंगली बीज कि बिज्वाड़ वेमा कख बट्टी ऐ? 28वेल ऊंमा बोलि, यु कै दुश्मन शैतान कु काम च सेवकों ल वेमा बोलि, क्य तेरी मनसा च कि हम जै के जंगली बीजों तैं जौड़ा बट्टी उखाड़ि दियां? 29वेल बोलि, न इन नि कैरा कि जंगली बीज कि बिज्वाड़ जौड़ा बट्टी उखड़दा दफा तुम ऊं दगड़ी ग्यूं को बीज भि उखाड़ि द्या। 30लवैइ तक द्वी तैं दगड़ी बढण द्या अर लवैइ का बगत मि लवैइ कन वलो बट्टी बुललु कि पैली जंगली बीज कि बिज्वाड़ बटोरी के फुकणु कु ऊंका पूला बंधि ल्या अर ग्यूं का बीज तैं मेरा कुठार मा कठ्ठा कैरा।
रैई का बीज की मिसाल
(मरक 4:30-34; लूका 13:18-21)
31यीशु ल ऊं तैं एक और मिसाल दींनि परमेश्वर कु राज्य रैई का बीज जन च जै तैं कै मनिख ल ले के अपड़ा पुंगड़ा मा बूति दींनि। 32उ सब बाजों से छुटो त हूंद पर जब बड़ी जांदु त तब सब साग-पात से बड़ो हवे जांदु अर वेका इन बड़ो डालो हवे जंदींनि कि आसमान का चलखुडा भि वेका फौंकों मा घोल बणै के बसेरा कैरी सकदींनि।
खमीर कु मिसाल
(लूका 13:20-21)
33यीशु ल एक और मिसाल ऊं तैं सुंणै कि स्वर्ग कु राज्य खमीर का जन च जै तैं एक जनन ल ले के तीन पथा आटा मा मिलै दींनि अर होंद-होंद उ सब खमीर हवे गै।
मिसालों कु इस्तेमाल
34यु सब बात यीशु लुखुं तैं मिसाल का रूप मा ही शिक्षा दींदो छो अर बगैर मिसाल का परमेश्वर का राज्य का बारा मा कुछ नि बुल्द छो। 35कि जु वचन परमेश्वर का तरपां बट्टी बुल्ण वलो का द्वारा बुलै गै छो उ पूरो हवे जौं “मि मिसाल दींणु कु अपड़ो गिच्चु खुललो मि ऊं बातों तैं जु दुनिया की रचना बट्टी छिपी रैनी ऊं बातों तैं मि प्रगट करुलो।”
जंगली बीज का मिसाल की व्याख्या
36तब यीशु भीड़ तैं छोड़ी के घौर मा ऐ अर वेका चेलों ल वेका संमणी ऐ के बोलि, पुंगड़ा मा कु जंगली बीज की मिसाल हम तैं समझै दे। 37वेल ऊं तैं जवाब दींनि अच्छा बीज तैं बुतंण वलो मि मनिख कु नौंनो छों। 38पुगड़ा यु दुनिया का लोग छिनी अर अच्छो बीज राज्य का लोग अर जंगली बीज दुष्ट शैतान कि सन्तान च। 39अर जै दुष्ट ल ऊं तैं बूति उ शैतान च लवैइ यु दुनिया कु अन्त च अर लवैइ कन वला स्वर्गदूत छिन। 40जन जंगली बीज बटोरे जंदींनि अर फुके जंदींनि उन ही यु दुनिया का अन्त मा होलो। 41मि मनिख कु नौंनो अपड़ा स्वर्गदूतों तैं भिजलु अर उ वेका राज्य मा बट्टी सब ठोकर खांण वलो तैं अर अधर्म अर पाप कन वलो तैं कठ्ठा करला 42अर स्वर्गदूत ऊं तैं आग का कुण्ड मा डललो जख रूंण अर दांतों कु पिसंण होलो। 43वे बगत मा धर्मी अपड़ा बुबा का राज्य मा सूरज जन चमकलो जु कुई ईं बात तैं सूंणि सकदु जु मि बुल्णु छौं उ यु तैं समझ भि ल्यो।
गुप्त धन
44“स्वर्ग कु राज्य कै पुंगड़ा मा छिप्यां धन का समान च जै तैं कै मनिख पै अर छिपै दींनि अर खुशी ल जै के अपड़ो सब कुछ बेचि दींनि अर वे पुंगड़ा तैं मोल ले लींनि।”
अनमोल मोती
45“फिर स्वर्ग कु राज्य एक व्यापारी जन च जु अच्छा मोतियों कि खोज मा छो।” 46जब वे तैं एक कीमती मोति मिली गै त वेल जै के अपड़ो सब कुछ बेचि के वे तैं मोल ले लींनि।
जाल की मिसाल
47“फिर स्वर्ग कु राज्य वे माछा पकड़ण वला जाल का समान च जु समुद्र मा डले गै अर बनि-बनि किस्मै का माछों तैं घेरि के लै।” 48अर जब जाल भुरे गै त मछवै वे तैं छाला पर खींचि के लैनि अर बैठी के भलि-भलि त ठेकि हुंद कठ्ठा कैरी अर निकम्मा माछा फेंकि दींनि। 49दुनिया का अन्त मा भि इन ही होलो स्वर्गदूत ऐ के दुष्टों तैं धर्मियों बट्टी अलग करला 50अर दुष्टों लुखुं तैं आग का कुण्ड मा डलला जख रूंण अर दांतों कु पिसंण होलो।
नई अर पुरणी शिक्षा कु महत्व
51“यीशु ल ऊंमा बोलि क्य तुम ल यूं बातों तैं समझेलि, चेलों ल वेमा बोलि, हाँ।” 52यीशु ल ऊंमा बोलि, “इलै हर एक मूसा की व्यवस्था तैं सिखांण वला जु स्वर्ग का राज्य कु चेला बंणि उ वे घौर का स्वामि जन च जु अपड़ा भण्डार बट्टी नई अर पुरांणि चीजों तैं निकालदु च।”
यीशु को नासरत मा फिर से आंण
(मरक 6:1-6; लूका 4:16-30)
53जब यीशु ल यु सभि मिसाल दियेलि छै त तब उख बट्टी चलि गै। 54अर अपड़ा घौर नासरत नगर मा ऐ के उख परमेश्वर बट्टी यहूदियों का मिलणा का भवन मा ऊं तैं परमेश्वर का वचन की शिक्षा दींण लगि गै कि उ भैंचक मा पड़ी के बुल्ण लगि गैनी “यु तैं यु ज्ञान अर चमत्कार का काम कैल दींनि?” 55क्य यु बड़ई कु नौंनो नि च? क्य ये कि ब्वे कु नौं मरियम अर येका भयों कु नौं याकूब यूसुफ शमौन अर यहूदा नि च? 56अर क्य वेकी बैंण इख हमारा बीच मा नि रौदींनि? त फिर ये तैं यु सब कख बट्टी मिली? 57इलै ऊंल वे तैं स्वीकार नि कैरी पर यीशु ल ऊंमा बोलि, कि परमेश्वर का तरपां बट्टी बुल्ण वलो कु अपड़ा देश अर अपड़ा कुटुम्ब अर अपड़ा घौर तैं छोड़ी के ऊं तैं सब जगह आदर हूंद। 58अर ऊंका अविश्वास का कारण यीशु ल और कुछ चमत्कार का काम कैर साकी।
Выбрано:
मत्ती 13: GHMNT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.