S. Juan 1
1
1U yʌj chuni tu woro a ba', toj ya tiʌ a t'ʌn y a t'ʌn toj tiʌ yete K'uj y a t'ʌn lʌji' K'uj. 2Toj lik' u yʌj chuni kaj meta tu woro a ba', a Ti' toj tiʌ yete K'uj. 3Tu woro a ba', lʌji' tu laj meta o mʌnʌ' a ti' tu woro a ba' a yʌn toj moj metchʌ. 4Ti tu ts'a u kuxta tu woro a ba' y lay a kuxta lʌji' tu ts'a u sasi tia' winiko'. 5A lay u sasi ku saskintik tu ts'uak'ʌ y lay a ts'uak'ʌ mʌnʌ' u k'uchu u muk' u tupe a lay u sasi.
6Yʌn junturi' xi'ra a to'o K'uj tu tuchi'ta, u k'aba' Juan. 7A je' tari ti' u tsikbʌtik a ba' tu yira y tu yua, yok'o a bex u sasi y ti' u ch'a'ba u t'ʌn a Juan a ba' ku tsikbʌtik ti a winiko' yok'o bex u sasi. 8A Juan mo' lʌji' a bex u sasi, to jai' tuchi'ta' tiu tsikbʌtik yok'o moki jach lʌji' a bex u sasi. 9A lʌji' a bex u sasi a ku jach tichk'atik tu woro a winiko', tʌn u tar yok'o a lu'm.
10Toj yok'o lu'm tiʌ, a to'o toj lʌji' ti' tu laj meta, chen u winiko' a lu'm mo' tu k'o'ota. 11Tari u yire u winik, chen u winiko' mo' tu yaksa' tu yʌno'. 12Chen tu woro a mok tu yakso' y tu ch'ao' u t'ʌn K'uj, K'uj tu wayso' tu woro u jach ti'aro', 13y lʌjio' u ti'o' K'uj, y mo' bex u k'at a winik, lʌji' a bex u k'at K'uj.
14A mok a lay a T'ʌn tu meta u bʌj winik, y kʌjnʌ yete to' (tak ira' u muk', u muk' a bex a lʌji' toj ja'ri' jach lʌji' u Ti'a K'uj a mok ja'ri' junturi'), a lay ne otsi u yirik a winik y ne taj ba' tu tsikbʌta. 15Juan tu tsikbʌta moki a lay a t'ʌn, y bex tu ya'a: «A je' lʌji' a ti wa'a a ku bin tar, lʌji' más t'o'o ti ten, lʌji' u yʌj chuni ti' y ten pachi.»
16Yok'o ti' tari ti to' ne ya'p u siji ne tsoy ba' u jer u jer. 17A tu li'sa' u t'ʌn K'uj lʌji' ts'abti' a Moisés, chen ti' ak irik ne otsi u yiriko' K'uj y aj tari u tsikbʌto' u taji a ba' ti to', lʌji' tari yok'o a Jesucristo. 18Mix mok u yirmʌ a K'uj, jari u Ti'a K'uj a lʌji' ja'ri' junturi' a tiʌ tu yiknʌ y a lʌji' bexi' K'uj, lʌji' tu ts'ato' ti' aj k'oo'tik K'uj.
Juan a ku but'ik ja' a winik ku tsikbʌtik ba'wi tuchi'ta'
(Mt. 3.11-12; Mr. 1.7-8; Lc. 3.15-17)
19A je' lʌji' a ku tsikbʌta' baij tu meta a Juan, tuk'in u t'ojo' u winik a judíos tu tuchi'ta ix Jerusalén a moko' ku meajo' yok'o u yatoch K'uj yete a mok ku yʌntik, ti' u k'atko' ti' a Juan: ¿Mokech a tech? 20Toj mo' tu mukra, toj tu ki' nuka tio':
—A ten mo' lʌjien a Cristo.
21Kaj k'ata' ti':
—¿Mokech a tech? ¿Lʌjiech a Elías?
Ti' tu nuka:
—Mo' ten.
Y tio' tu chich k'ato':
—¿Techech a mok ku bin tar a mok lʌji' profeta?
Y ti' tu nuka:
—Mo'o.
22Ij a'bi ti':
—¿Y mokech a wei'k? Yʌnti' in wetko' mokech tin wei'ko' ti' a mok tu tuchi'to'. ¿A bʌji' tech baij ka' che tsikbʌtik to' yok'o tech?
23Y Juan tu nuka:
—A ten lʌjien a mok tʌn u k'ʌ'm abot yok'o u lu'mi tu mʌnʌ' nukuch che' woro tikin lu'm yʌn, bex ku yei'k: “Ki tajkote'x u beri tuku bin k'uchu ak Ts'uri” bex tu ya'a Isaías a profeta a tu ts'ibʌ' uchik.
24A winiko' a tuchi'tao' ti u winiko' a judíos a ku ya'batio' fariseos, 25tu k'ato' ti' a Juan:
—¿Biken ka but'ik ja' a bojo', ka wei'k mo' tech a Cristo, mix a Elías, mix lʌjiech profeta?
26A Juan tu nuka:
—A ten ki but'ik ja'ri' yete ja' a winik, chen tiʌ junturi' yete teche'x a ma' k'omo'e'x. 27A ku bin tar pachi, a to'o lʌji' u yʌj chuni ti ten, a ten kin wui'k in bʌj ne mo tsoyen ti' pitik u k'ʌni u pechek xʌnʌ'.
28Tu woro a je' a ba' a ku tsikbʌta' mʌni ix u lu'mi u k'aba' Betábara a tiʌ tu pach a uk'un a u k'aba' Jordán, tuba a Juan tita tʌn u but'ik ja' a winik.
U choj me' K'uj
29Ka k'uchi u jer k'in, a Juan tu yira a Jesús u tar ti', y Juan tu ya'a: «¡Ire'x a lay lʌji' u Choj Me' K'uj a ku luk'sik u si'pi a winik way yok'o a lu'm! 30A je' lʌji' a ten ti wa'a: “A ku bin tar pachi, a lʌji' más t'o'o ti ten y lʌji' u yʌj chuni ti' y ten pachi.” 31Bexi' ten mi' wue moki ka'chik, chen ti' u k'oo'tik u winki a Israel ben ten taren in yʌj but'e yete ja' a winik.»
32Bexi' a Juan tu ya'a: «Tin wira u Pixʌn K'uj u yeme ix kʌ' p'is aj uk y tij kuri ti'. 33Y ten mi' wue moki ka'chik, chen a mok tu tuchi'ten in but'ik ja' a winik tu ya'ten: “A mok ka wirik u yeme ti' u Pixʌn K'uj y ti ku p'ata ti', lʌji' a mok a ku bin u turse a winik yete u muk' u Pixʌn K'uj.” 34Y ten tin wira, ben kin wei'k a je' lʌji' u jach Ti'a K'uj.»
U yʌj chuno' a ku tejtik u kʌ'sa winik a Jesús
35Kaj k'uchi u jer u k'ini, a Juan bexi' tiʌ tita yete ka'to' u kʌ'sa winiko'. 36Tuk'in a Juan tu yira u mʌn a Jesús tita, tu ya'a:
—¡Ire'x a lay lʌji' u Choj Me' K'uj!
37Tu yuo' a ka'to' u kʌ'sa winik a Juan u yei'k a Juan bex, lʌji' kaj bino' tu pach a Jesús. 38Y Jesús tu sutubʌj u pʌkte a ku tar tu pach y tu ya'tio':
—¿Baij ka kʌxtike'x?
Tio' tu nuko':
—Rabí (La' u nu'ku lʌji': Wʌjkʌ'si), ¿To' tu kʌjech?
39Jesús tu nuka tio':
—Ko'xe'x a wire'x.
Bino' u yiro' tu kʌjʌ' a Jesús ij p'ato' yete ti' a lay u k'ini. Tu tʌn u yoko k'in.
40Tu ka'troi a lʌjio' tu yua u yei'k a Juan moki a Jesús y a lʌji' bini tu pach a Jesús, junturi' u k'aba' Andrés y lʌji' u bojo' a Simón Pedro. 41A je' lʌji' tu yʌj ira' u bojo' a k'aba' Simón, y tu ya'ti':
—Tin wiro' a Mesías (u nu'ku lʌji': Cristo).
42Pachi a Andrés tu bisa a Simón tu tiʌ a Jesús, y Jesús ka tu yira, tu ya'ti':
—A tech lʌjiech a Simón, u ti'a a Jonás, chen beje' a k'aba' ku bin p'ata, Cefas (u nu'ku lʌji': Pedro).
Jesús ku pʌyik a Felipe y a Natanael
43Kaj k'uchi u jer k'in, Jesús bini ix Galilea, y tita tu yira a Felipe y tu ya'ti':
—Ko'ten tin pach.
44A je' a Felipe ti' u tar u kʌjta ix Betsaida, a lʌji' bexi' ti u taro' a Andrés y a Pedro. 45A Felipe bini u kʌxte a Natanael y tu ya'ti':
—Tin wiro' a mok tsikbʌta a tu ts'ibʌ' yok'o u t'ʌn a K'uj a tu ts'ipta' a Moisés uchik, a bexi' a tu ts'ibto' uchik a moko' a profetas: A lʌji' a Jesús u ti'a a José a ti' u tar ix Nazaret.
46A Natanael tu nuka:
—¿Yʌn ba' tsoy ku che jok'o ix u kʌjta Nazaret?
A Felipe tu nuka:
—Kox ire a bʌji'. 47Ka tu yira Jesús u tichi a Natanael tu tiʌ, tu ya'a:
—Ire'x a lay ku tar lʌji' jach israelita, a mok mʌnʌ' tus ti'.
48Y a Natanael tu k'ata:
—¿To' tu ta k'o'oten?
Jesús tu nuka:
—Toj muj naj t'ʌnech a Felipe, ten ya tin wirech ti'ech yok'o u bo'i a che' u k'aba' Higuera.
49Y a Natanael tu nuka:
—Rabí, ¡a tech lʌjiech u Ti'ech K'uj, a tech lʌjiech u Wesi a Israel!
50Jesús tu nuka:
—¿To' jai' ka ch'eik in t'ʌn a tu tin wa'tech ti'ech yok'o u bo'i a che' u k'aba' Higuera? Kin wei'k tech bin a wire más ne ya'p tsoy ba' a bex a je' ta wu'a.
51Bexi' Jesús tu ya'a:
—Jach to jai' kin wei'k tech: Ya beje' bin a wire'x jea' a kʌ' y ne pim u ángeles K'uj bi a wire'x u nʌ'kʌ y u yeme ti' u Ti'a Xi'ra.
Выбрано:
S. Juan 1: PLacNaha
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Sociedad Biblica de México AC