Matayo 12
12
UYesu ye Mutwa va Sabato
(Maluko 2:23-28; Luka 6:1-5)
1Umusika ugo mu kigono ikya Sabato,#12:1 Kigono ikya Sabato Lole Ikigono ikya Sabato ku Figanulo. uYesu na vanyigendwa vaakwe vaahelanidzaga mu migunda gya ngana. Avanyigendwa vaakwe vakwipulikaga musale, viivangaga ukupulula inyoodzo dza ngana nu kuliya.#Lwiwuko 23:25 2Neke kangi aVafwalisayo pe valuweene ulo, vamulongelage uYesu vatigilage, “Lolage, avanyigendwa vaako viilima amalimo mu kigono ikya Sabato! Ulo luli mwiko mu milagililwe gya Mose!”#Kuhega 20:8-11; 34:21; Lwiwuko 5:12-15
3UYesu akuvahigaga iitigilaga, “Musinaa mwimba kye aalimile uDawudi, umusika pe aali nu musale pamwinga na vayagwe? 4UDawudi iingiye mu nyumba ya Nguluvi,#12:4 Nyumba ya Nguluvi Mu musika gwa Dawudi, inyumba ya Nguluvi yaadzengiilwe ni liheema. Lole Iliheema lya kutaangʼanila ku Figanulo. neke umwene na vayagwe valiyage imikaate imiimike igisiikwidikwa ukuliya, nda haamu, va vateekedzi veene swe.#Valevi 24:9; 1 Samweli 21:1-6 5Musinaa mwimba mu milagililwe gya Mose ukutigila, avateekedzi viilima amalimo mu tembeli ikigono ikya Sabato? Mu ulo, viidzumba ikigono ikya Sabato, nda haamu, vasili ni nongwa. 6Neke kangi ndikuvalongela unyeenye ukutigila, apa pwali umukomi ukulutila itembeli. 7Ngana mukali mukikagulage ikiganulo kya madzwi ga Wusimbe uWiimike agiitigila, ‘Ndiisaka ulupyana, si kutawula uwusembe,’#Hoseya 6:6 apo ngali musivahigile avaanu avangaya nongwa. 8Pakuva uMuswamuve va Muunu ye Mutwa va Sabato.”
UYesu iinaniya mu kigono ikya Sabato
(Maluko 3:1-6; Luka 6:6-11)
9UYesu iihegaga apo, iihelelaga, iikwingilaga mu luholanilo lwawo. 10Umo, aali mwali umwadaada yumwinga umunya liwoko ilinya liteela. AVafwalisayo vaasakile uwiimilo wa kumutaaha uYesu, neke vamuwuudzage vatigilage, “Ongo, mu milagililwe gya Mose, lwikwidikwa ukumunaniya umuunu mu kigono ikya Sabato?”
11UYesu akuvahigaga iitigilaga, “Ye ani umwenyo ngana ingʼolo yaakwe yigwile mu wiina pa kigono ikya Sabato, ye asiihelela kuyilopola mu kigono kiikyo? 12Lolage, umuunu ali nu wutalamu ukulutila ingʼolo! Lwe lwene, lwikwidikwa ukulima inofu mu kigono ikya Sabato.”
13Neke uYesu amulongelage umunya liwoko ilinya liteela atigilage, “Golose iliwoko lyako.” Nave iigolosaga, umusika guugo liiponaga nu kuvedza ngita liwoko ilingi. 14Neke kangi aVafwalisayo avo vahumage kwivala, valonganage na Vahelode#12:14 Vahelode Iki kyali kiwungu kya Vayahudi avanya ngufu, aviidikilaga uwutemi wa Valoma, kangi vaali nu wudzeela nu mutwa Helode. AVafwalisayo na Vahelode vasiidiingʼanaga, lwiwoneka vaahanganaga wiimila wa kumutegedza uYesu. ulwa ngʼaasi iya kumukomela uYesu.
UYesu ye mulimila-vangi ye aahaaguliilwe nu Nguluvi
15UYesu iidzeelaga uwugulume wa Vafwalisayo, iihegaga apo. Avaanu voloofu vakumuniniilaga, nave akuvananiyaga vonda avaali vatamwa. 16Neke uYesu avakaanidzage ukutigila, vatane ukulonga ku vangi imola dzaakwe. 17Pe peene liikwilaga ilidzwi ilyalongiilwe nu muvidzi Isaya ukutigila,
18“Lolage, uyu ye mulimila-vangi vangu ye ndímuhaaguwe,
uMwende vangu ye ndíkeeliidzwe nave.
Ndihadza ndikumuviika uMubepo vangu pakyanya apaakwe,
ukuta adalikage uwupoki ku vaanu vonda.
19Asiliibeedzaga na vaanu, nambe kuyova.
Kangi sikwali umuunu ye alaapulika umwango gwakwe mu ngelele.
20Asilaadeenya uludete úluhanyangiike,
asilaadzimya akooto akiiyengelela,
ukufikila uwupoki pe wiideludza.
21Kangi avaanu vonda valalihuuvila ilitaawa lyakwe.”#Isaya 42:1-4
UYesu nu Belisebuli
(Maluko 3:20-30; Luka 11:14-23)
22Neke avaanu vamuleetelage uYesu umuunu yumwinga ye iibiitwe nu mubepo muviifu, ugwamuhuliye uwubofu kangi uwukitalonga. UYesu akumunaniyaga umuunu uyo, iivangaga ukulonga nu kulola. 23Ililugu liidzumaga, kangi liiwuudzaga liitigilaga, “Siye Muswamuve va Dawudi wona mwene uyu?” 24Neke kangi aVafwalisayo pe vaapuliike idzo, vatigilage, “Umuunu uyo iilosa imibepo imiviifu mu ngufu dza Belisebuli, umuvina va mibepo imiviifu.”#Matayo 9:34
25UYesu aadzeeliye dze vaahoodzaga, akuvalongelaga iitigilaga, “Avaanu va wutwa wuwuvedzaga pe víitilangile, uwutwa uwo wiikwanangika. Ndeeni, avaanu va wudzenge enewuli ikaaya yiyivedzaga, pe víitilangile, ikaaya iyo yisiima. 26USetano ngana iilosa imibepo imiviifu gyakwe ukuhuma ku vaanu, iivedza akwiluwa mwene. Apo uwutwa waakwe wusiliima. 27Ngana uneene ndiilosa imibepo imiviifu mu ngufu dza Belisebuli, lino avaniniilidzi veenyo viilosa mu ngufu dza ani? Pa ulo, avaniniilidzi veenyo vahadza vakuvawoneesa inongwa yeenyo. 28Neke kangi, ngana ndiilosa imibepo imiviifu mu ngufu dza Mubepo va Nguluvi, apo uwutwa wa Nguluvi wúvafikiye unyeenye. 29Kangi umuunu ye iikwingila mu nyumba ya muunu umunya ngufu, asiisweketula ifiinu fya nyumba ya muunu uyo kitatala amupinge tandi, neke asweketule ifiinu fyakwe.
30“Umuunu ye asili lubali lwangu, uyo ye mutavangwa vangu. Kangi ye asiilundasa pamwinga naane, uyo iiveyasa. 31Wiimila wa ulo, ndikuvalongela ndiitigila, umuunu ye iilima indzanangifu nu kumulonga fivi uNguluvi, uyo ahadza iiwodzwa indzanangifu dzonda idzo. Neke kangi ye akumulonga fivi uMubepo uMwimike, uNguluvi asilaawodza indzanangifu iyo. 32Umuunu ye akumulonga wuviifu uMuswamuve va Muunu, ahadza iiwodzwa indzanangifu iyo, neke kangi ye avedzaga ye akumulonga wuviifu uMubepo uMwimike, asilaawodzwa indzanangifu iyo, umusika ugu nambe ugwikwadza.
Avaanu viikagulika mu migendele gyawo
(Luka 6:43-45)
33“Ngana mukuguhambusa umubiki kuvedza munofu, ifiveleko fyakwe fiivedza finofu, kangi ngana mukuguhambusa umubiki ukuvedza muviifu, ifiveleko fyakwe fiivedza fiviifu. Avaanu vakugukagula umubiki wugendela wa fiveleko fyakwe. 34Nye va kivegalo kya ndzokaanye! Mwilemwa ukulonga amadzwi amanofu, pakuva muli vahosi! Dze iilonga umuunu, dze dzeene ídzimemile mu numbula yaakwe. 35Umuunu umunofu iilonga inofu idziihuma mu numbula yaakwe, nu muunu muhosi iilonga uwuhosi uwiihuma mu numbula yaakwe. 36Neke kangi uneene ndikuvalongela ndiitigila, pa kigono ikya luhigo, avaanu valaalonga vaveene wiimila wa madzwi gonda agasiivagila ge viilonga. 37Ikigono ikyo ulaahigwa wiimila wa madzwi gaako, uNguluvi alaatigila uveeve uli mugolofu, enewuli uli ni nongwa.”
Avalongodzi va Vayahudi viinyilika ikimanyilo
(Maluko 8:11-12; Luka 11:29-32)
38Neke aVafwalisayo avangi na vawulanidzi va milagililwe, vamulongelage uYesu vatigilage, “Muwulanidzaave, twisaka utuhuufye ikimanyilo kya kilole ukutigila, uveeve wiihuma kwa Nguluvi.” 39UYesu akuvahigaga iitigilaga, “Ikivegalo ikihosi, kangi kidumuli-noolane kiisaka ikimanyilo! Neke kangi kisilaapeelwa ikimanyilo kikivedzaga, nda haamu, ki kimanyilo kya muvidzi uYona. 40Ngita uYona kye iikalile figono fidatu mugati mu lileme lya somba ingomi,#Yona 1:17 ikilo nu muunyi, ndeeni nayu Muswamuve va Muunu nave ahadza akwikala ifigono fidatu mu mombwe, ikilo nu muunyi. 41Ikigono ikya luhigo avaanu va ku Ninavi, navo valiima vavataahe unyeenye va kivegalo iki, ukutigila muli vahosi, pakuva uYona pe aadaliike ilidzwi lya Nguluvi ukwawo, vaapelile indzanangifu dzaawo. Lino apa pwali uMukomi ukulutila uYona. 42Ikigono ikya luhigo, umutwa umwayuuva uva ku Seba, aliima avataahe unyeenye vaanu va kivegalo iki, ukutigila muli vahosi, pakuva umwene aagendile ukuhuma ku nyi ya kutaali, iikwadzaga mu kupulikidza amadzwi ga luhalawukagudzi lwa Selemani.#1 Vatwa 10:1-10; 2 Misika 9:1-9 Lino apa pwali uMukomi ukulutila uSelemani.”
Ukupiluka kwa mubepo umuviifu
(Luka 11:24-26)
43UYesu iiginaga ukuvalongela iitigilaga, “Umubepo umuviifu pe gúhumile mwa muunu, gwagwihelela ku lungʼalangʼala kutemula apoono pa kupola, neke kangi gusikupawona, 44apo gwitigila, ‘Ndiipiluka ku nyumba yangu ye ndíhumile.’ Pe gúpilwike, gukuyiwona inyumba iyo yingaya kiinu, fyagile nu kunodzwa wunofu. 45Apo pe peene pe gwihelela kunyamula imibepo igingi mufungʼati (7), imiviifu ukulutila ugwene. Imibepo igyo giikwingila mwa muunu uyo nu kwikala. Neke lino, umuunu uyo iilemwa hiilo ukulutila pa kutala. Lwivedza ewo ku vaanu va kivegalo ikihosi iki.”
Avanyalukolo va ndakyene va Yesu
(Maluko 3:31-35; Luka 8:19-21)
46UYesu aali pele alonga ni lilugu lya vaanu, ungʼina na vanyalukolo vaakwe viikwadzaga, viikwimaga piivala, viisakaga ukulongana nave. 47Neke umuunu yumwinga amulongelage atigilage, “Uyuuwo na vanyalukolo vaako víimile piivala, viisaka ukulongana naave.” 48UYesu akumuhigaga iitigilaga, “Uyuuva na vanyalukolo vangu ve va ani?” 49Neke asoonage ku vanyigendwa vaakwe atigilage, “Ava ve vayuuva na vanyalukolo vangu. 50Ye avedzaga ye iilima imikeelelele gya Daada ye ali kukyanya, uyo ye munungʼu-vangu, muhaadza-vangu nu yuuva.”
Выбрано:
Matayo 12: BEZ
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2022 Wycliffe Bible Translators, Inc. All rights reserved.