मट्टि 2
2
निवाँटाङ्पाचि नाम्कॆॽवाबाङ्कॆ येसु चुब्सि डाप्मिम्पा
1हेरोड हाङ्मि लःबि येसु याहुडियामि बेटलेहेम लोमॆ गाँवाँबि जान्म लिमिम्पा लॆटा। येसु जान्म लिसाहाङ्, खाङाम्नॆ नाम्कॆॽवाबाङ् निवाँटाङ्पाचि यारुसालेम्पि टाआमि। 2हाङ् गरहाङ् लोसुचि, “याहुडिचिम् हाङ् लिसे जान्म लिमिम्पा याॽमि हाबि चुऎ? मान्ठाभनॆ काङ्कॆ खो जान्म लिमिम्पा चिन्नामि साङ्केम्मा नाम्कॆॽवाबि खाङुङ्का हाङ् खो स्यामिसि टाडिङ्का।”
3ह हेरोड हाङ्ऎ ग खानावाँ खेमुहाङ् किसिखारा हाङ् यारुसालेमबिहा चोब्न याॽमिचि सङ्क किसिखारामि। 4हाङ् खोसॆ चोब्न ढ्या याटाङ्पाचि हाङ् मोसामि यायेॽमा चिन्खुबाचि खोमुचिहाङ् सिमुचि, “खिरिस्ट हाबि जान्म लिऎ?” 5खोचिऎ लोसुचि, “याहुडियामि बेटलेहेमबि मान्ठाभनॆ निवाँहाङ्मि खानावाँ इखुबाऎ गरहाङ् साब्डु
6‘ओ बेटलेहेम, आना याहुडाबिहा हाटाबाङ् मिःछुपा लॆःॽनानि,
मान्ठाभनॆ आनाबाङ् एक्क टुङ्घङ्पा टा
हाङ् खोसॆ एक्क कुखुबाऎ र
काम इस्राएलि याॽमिचि खाङ्कुचि’।”#मिका ५:२
7ग खेमुहाङ् हेरोडऎ आक्खा निवाँटाङ्पाचि खुनिङ्म चुबुचि हाङ् हाम्पॆ लःबि साङ्केम्मा खाङ्मुसॆ म खानावाँ वाबु। 8हाङ् खोसॆ आक्खाचि गर लोसे बेटलेहेमपि पाङ्हाङसुचि, “आन्ना खारानॆ हाङ् आक्क चाचा काम्नुःर यगाम्नॆ हाङ् यक्टक्मा अक्सि का इङानॆ हाङ् काङा सङ्क खोबि खॆःॽङाहाङ् स्यामिकुङ।”
9हाङ्मि खानावाँ खेमुचिहाङ् खोचि लाम्फु लङ्पकामि। खोचिऎ नाम्कॆॽवाबि खाङ्टम्पा साङ्केम्मा याॽलि याॽलि खारा हाङ् चाचा चुऎ ठावाँबि येप्टिखारा। 10खोचिऎ म साङ्केम्मा खाङ्टकुचिहाङ् एट्टान चेन्चाआमि।
11खोचि आक्कुबि टाआमि हाङ्खिम् हङ्सि भॆनामि हाङ् चाचा उम्मा मारियम नुङ् खाङ्टकुचि। हाङ् खोचिऎ खो हुहु पोःप्से स्यामिटुचि। हाङ् टाङ्पाम् बॆक्खा लाबक्मानुङ् फिःॽया, ढुपा हाङ् मुर्रा सङ्टिसुचि।
12हाङ् खोचिऎ सेम्माङ्पि आन्ना हेरोडबि आऎन्खारानॆ लोमॆ खानावाँ टक्चाउचि हाङ् खोचि होइकन लाम्फु लिसॆ उम्चि हाङ्टेम्पि ऎन्खारामि।
योसेफ मिस्रबि खुरॆमिम्पा
13आक्खा निवाँटाङ्पाचि खाइहाङ्सामि हाङ् पारभु निवाँहाङ्मि एक्क निवाँखाटॆखुबा सेम्माङ्बि योसेफ नुङ् खाङ्ङुसाहाङ् लोसु, “पगॆ हाङ् चाचा नुङ् उम्मा चिःक्मानुङ् मिस्र हाङ्टेम्पि खुरारॆ। हाङ् कॆ ऎन्टाऎ मालोरढारि आक्कुब्न पेनॆ मान्ठाभनॆ हेरोडऎ चाचा सेॽमाम् लागि यक्मिॽमा परःक्डुचि।”
14मसॆ खो पगाहाङ् सानुङ्मा चिःक्मानुङ् युटान मिस्र हाङ्टेम् पोट्टा खाइटा। 15हाङ् हेरोड मासिखॆॽलढारि खोचि आक्कुब्न पेनामि। गरहाङ् पारभु निवाँहाङ्ऎ निवाँहाङ्मि खानावाँ इखुबाबाङ् “काङॆ काम् पासा मिस्र हाङ्टेम्बाङ् सेःरुङ्”#होसे ११:१ लोमॆ खानावाँ गरहाङ् टङा।
हेरोडऎ चाचाचि सेॽमिॽमिम्पा
16हाङ् निवाँटाङ्पाचिऎ टाङ्पा बङ्सिम्पा खानावाँ हेरोडऎ वाप्टकु हाङ् सिर्डॆ पुम्खॆटु। हाङ् निवाँटाङ्पाचिबाङ् वाप्टॽमिम्पा लः रक्न बेटलेहेम हाङ् आक्कमि गॆअङ्मॆअङ्बिऎ ठालबिहा हिच्चि निङ् याक्मिम्पाचि हाङ् आक्कबाङ् मॆॽमङ्हा चोब्न वाठाङ्पा पिसाचि सेॽमिटुचि। 17हाङ् यारमिया लोमॆ निवाँहाङ्मि खानावाँ लोखुबा याॽमिऎ इमिम्पा खानावाँ गरहाङ् लिसा,
18“रामाबि ढ्या हाःप्मिम्पा हाङ् निवाँ टुक्मिम्पा साम्ला खेमु।
राहेल टाङ्पामि ठुक्पा पासाचिम् लागि हाःप्मेपाइ,
आसॆस खोम् मिॽवा टुक्पिहिसुचिनि,
मान्ठाभनॆ चोब्न ठुप्पा पासाचि सिःखॆडामि।”#यारमिया ३१:१५
19हेरोड सिखाराहाङ् पारभु निवाँहाङ्मि एक्क निवाँखाटॆखुबा मिस्र हाङ्टेम्पि योसेफ नुङ् सेम्माङ्पि खाङ्ङुसा हाङ् लोसु, 20“पःगॆहाङ् चाचा नुङ् उम्मा चिःक्से इस्राएलबि ऎन्खारॆ मान्ठाभनॆ चाचा सेॽमा यक्खुबाचि सिखारामि।” 21हाङ् योसेफ पःगाहाङ् सानुङ्मा चिःक्मानुङ् इस्साराएल हाङ्टेम्पि ऎन्टाआ।
22टर हेरोडमि ठालबि उम् पासा आरकिलाउसऎ याहुडियाबि हाङ्डाम् लॆःॽमे सिकु लोमॆ खानावाँ खेमुहाङ् योसेफ आक्कुबि खॆॽमा किसिआ। हाङ् खोसॆ निवाँहाङ्बाङ् सेम्माङ् मागु हाङ् गालिल आन्चालबि खारा। 23खो खाराहाङ् नासाराट लोमॆ हाटाबि पेना, आक्रहाङ् निवाँहाङ्मि खानावाँ इखुबाचिबाङ् “खो नासारि लोक्” लोमॆ खानावाँ गरहाङ् टङा।
Выбрано:
मट्टि 2: LBR
Выделить
Поделиться
Копировать
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fru.png&w=128&q=75)
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2023, Wycliffe Bible Translators, Inc. and Nepal Bible Society