मरकुस 11
11
यीशु हर यरूशलेम मे अईस
(मत्ती 21:1-11; लूका 19:28-40; यूहन्ना 12:12-19)
1जब ओमन मन यरूशलेम शहर के लिघे, जैतून पहार मे बैतफगे अउ बैतनिय्याह नगर मे अईन त ओहर अपन चेला मन ले दूई झन मन ला ये कह के भेजिस, 2“आगू कती कर गाव मे जावा, अउ ओ गाव मे पहुच के एक गदहा कर छउवा, जेमा कभो कोनोच हर नी चड़हे रही, बांधल तुमन मन ला भेटाही। ओला खोएल लाना। 3अगर तुमन मन ले कोनो हर पूछही, ‘एला काबर करथा?’ त कईहा, ‘प्रभु ला एकर जरूरत है’ अउ ओहर ओला तुरतेच हिया भेज देही।”
4ओमन मन जाए के ओ छउवा ला बाहर दूरा कर लिघे चौक मे बांधल पईन, अउ खोले लागिन। 5ओमन मन ले जेमन हुवा ठड़होए रहिन, कोनो-कोनो मन कहे लागिन, “ये का करथा, गदही कर छउवा ला काबर खोलथा?” 6जईसन यीशु हर कहे रहिस, ओहिच कस ही ओमन मन ले कह देहिन; तब लोग मन ओमन मन ला जाए देहिन। 7अउ ओमन मन गदही कर छउवा ला ले के यीशु कर लिघे लाएन के ओकर उपर मे अपन कपरा मन ला ओड़हईन अउ यीशु हर ओकर उपर बईठ गईस। 8अउ ढेरेच झन मन अपन कपरा मन ला डगर मे बिछईन, अउ लोग मन खेत मन ले डाएर मन ला काएट-काएट के बिछईन। 9अउ जेमन मन ओकर आगू-आगू मे जात अउ पाछू-पाछू रेंगत आत रहिन, अउ पुकाएर-पुकाएर के कहत जात रहिन, “होशाना! धन्य हे ओहर जेहर प्रभु कर नाव ले आथे। 10हमर दाऊ दाऊद कर राएज जेहर आत है; धन्य हे! अकाश मे होशाना।”
11अउ यीशु हर यरूशलेम शहर मे पहुच के मन्दिर मे अईस, अउ चाएरो कती कर सबेच चीज मन ला देख के बारह चेला मन कर संग मे बैतनिय्याह नगर गईन, काबर कि सांझ होए गए रहिस।
अंजीर कर रूख ला श्रापिस
(मत्ती 21:18-19)
12दूसर दिन जब ओमन मन बैतनिय्याह नगर ले हिकलिन त ओला भूख लागिस। 13अउ यीशु हर दुरिया ले अंजीर कर एक हरियर रूख ला देख के लिघे गईस कि का जाने ओमे कुछ मिलही: पर पतई मन ला छोएड़ अउ कुछ नी पईस; काबर कि फर कर समय नी रहिस। 14एकरे बर यीशु रूख ले कहिस, “अब ले कोनो तोर फर ला कभो नी खाही।” अउ ओकर चेला मन सुनत रहिन।
मन्दिर ले ब्यपारी मन ला हिकालिस
(मत्ती 21:12-17; लूका 19:45-48; यूहन्ना 2:13-22)
15फिर ओमन मन यरूशलेम शहर मे अईन, अउ ओहर मन्दिर मे गईस; अउ हुवा जेमन खरीद-बिक्री करत रहिन ओमन मन ला बाहर कती हिकाले लागिस, अउ सर्राफा मन कर पिड़हा अउ परेवा बेचे बाला मन कर चौकी मन ला उलट देहिस।
16अउ मन्दिर मे कोनोच ला भाड़ा मन ला ले के आए जाए नी देहिस। 17अउ उपदेश कईर के ओमन मन ले कहिस,
“का ये नी लिखल है कि मोर घर हर सबेच जाएत मन बर प्रार्थना कर घर कहलाही?
पर तुमन एला डाकू मन कर खोह बनाए देहे हा।”
18एला सुईन के प्रधान याजक अउ शास्त्री मन ओकर नाश करे बर मौका खोजे लागिन; काबर कि ओमन मन ओकर ले डरत रहिन, एकरे बर कि सबेच लोग मन ओकर उपदेश ले चकित होत रहिन। 19जब सांझ होईस त यीशु अउ ओकर चेला मन यरूशलेम शहर ले बाहर कती रेंगत गईन।
बिश्वास कर ताकत
(मत्ती 21:20-22)
20फिर भिनसरहा मे जब ओमन मन ओ कती ले जात रहिन त ओमन मन ओ अंजीर कर रूख ला जईर ले झुराल देखिन। 21पतरस ला ओ गोएठ कर याद अईस, अउ पतरस हर यीशु ले कहिस, “हे गुरू देख! ये अंजीर कर रूख हर जेला तय श्राप देहे रहे, झुराए गईस है।” 22यीशु हर ओमन मन ला उत्तर देहिस, “परमेश्वर मे बिश्वास रखा। 23मैहर तुमन मन ला सहिच कहथो, जे कोनो ये पहार ले कही, ‘तय उखेड़ जा, अउ समुन्दर मे गिर जा’ अउ अपन मन मे संदेह झिन करा, बरन बिश्वास करा, कि जेला कहथो ओहर होए जाही, त ओकर बर ओहिच कस होही। 24एकरे बर मैहर तुमन मन ले कहथो कि जे कुछ ला तुमन मन प्रार्थना कईर के मांगिहा, त बिश्वास कईर लेवा कि तुमन मन ला मिल गईस, अउ तुमन मन बर होए जाही। 25अउ जब कभो तुमन मन ठड़होए के प्रार्थना करिहा त अगर तुमन कर मन मे कोनो कर कती ले कुछ बिरोध होही त छमा करा: एकरे बर कि तुमन मन कर स्वर्ग कर दाऊ भी तुमन मन कर पाप ला छमा करही। 26अउ अगर तुमन मन क्षमा नी करिहा त तुमन मन कर दाऊ भी जेहर स्वर्ग मे है, तुमन मन कर पाप ला छमा नी करही।”
अधिकार बर प्रश्न
(मत्ती 21:23-27; लूका 20:1-8)
27ओमन मन फिर यरूशलेम शहर मे अईन, अउ जब यीशु हर मन्दिर मे घुमत रहिस त प्रधान याजक अउ शास्त्री मन अउ पुरनिए लोग मन हर ओकर लिघे आए के पूछे लागिन, 28“तय ये बुता ला काकर अधिकार ले करथस? अउ ये अधिकार तोला कोन हर देहिस है कि तय ये बुता ला करा?” 29यीशु हर ओमन मन ले कहिस, “मैहर भी तुमन मन ले एक गोएठ पुछथो; मोला उत्तर देईहा त मैहर भी तुमन मन ला बताहु कि ये बुता ला काकर अधिकार ले करथो। 30यूहन्ना कर बपतिस्मा का स्वर्ग कती ले रहिस कि लोग मन कर कती ले रहिस? मोला उत्तर दा।” 31तब ओमन मन अपनेच मे चर्चा करे लागिन कि अगर हमन कहब, “स्वर्ग कती ले” त ओहर कही, “फिर तुमन मन ओकर बिश्वास काबर नी करा?” 32अउ अगर हमन मन कहब, “लोग मन कती ले,” त लोग मन कर डर है, काबर कि सबेच झन जानत रहिन कि यूहन्ना सहिच मे अगमजानी रहिस। 33तले ओमन मन यीशु ला उत्तर देहिन, “हमन मन नी जानी।” यीशु हर ओमन मन ले कहिस, “मैहर भी तुमन मन ला नी बताओ कि ये बुता ला काकर अधिकार ले करथो।”
Выбрано:
मरकुस 11: SGJNT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.