LIPOH 4
4
Kain ko Abel
1Hütsüpü Adam-nü anitpü Eve te mükhongcho ko abükyü afü müding kangcho. Abükyünü azarü khüdu nümüsucho ko yocho, “Abüdongba arüku khu adhrerü khüdu nguko.” Achotsü abi neng Kain dsijücho. 2Akhanglang abükyünü adhrerü khüdu, Abel nümüsucho. Abel san nyahrü kangcho, ta Kain luthsarü kangcho. 3Azachah lipü, Kain-nü anguchicho lanü khürü hiro Abüdongba khyang amübü jücho. 4#Ibr 11.4Achotsü Abel-nü abi san yola akhu mütrücho khüdu hiro müpsehcho, ko shuh atsauba tsü amübü jücho. Abüdongba-nü Abel ko abinü mübüchola künyangcho, 5ta Kain ko abi amübü mükhyüchocho. Hütsünü Kain rihlong chürocho ko aromih dhrüdhrücho. 6Achotsü Abüdongba-nü Kain te yocho, “Tuepü nüh rihlong chüroro? Tuepü nü romih dhrüdhrüro? 7Nühnü athsalang tsü nguchirelang nüh münyübae. Ta nühnü mütsa nguchichonü, amünyi tsü nü trahtri la jole. Abinü nüh kohnyüre, ta nühnü hütsü kohchehbae.”
8 #
Mat 23.35; Luk 11.51; 1 Jhn 3.12 Hütsüde Kain-nü ani Abel te yocho, “Ihjülü luhlang wünung.” Ko khode anyüh luh chihcho, Kain-nü ani Abel nyüm shemüsu abi müpsehcho.
9 Abüdongba-nü Kain te tsingdhingcho, “Nü ni Abel khülo?”
Abinü lalingcho, “Ihnü mümüdhe. Ih Ini nyahrü do?”
10 #
Ibr 12.24
Achotsü Abüdongba-nü yocho, “Nühnü hi tu nguchicho? Nüni shühnü alih lanü Ite züdeko. 11Nüh chokehcholako ko adelü nühnü luh müthsanung. Nühnü abi müpsehde alihnü abe kapü nüni shüh tsü müdhsüko. 12Nühnü luthsanye alihnü tusü müchührojünung; nüh limih la atsikehchah müliba atsichirü thsanung.”
13Ko Kain-nü Abüdongba te yocho, “Hiba akhingchi hi I nengdang dirale. 14Nühnü alih lanü ko nü tenü Ih iipehre. Ih limih la atsikehchah müliba atsichirü, ko sünü Ih ngunang Ih müpsehnung.”
15Ta Abüdongba-nü lalingcho, “Hütsüta mah. Khürünü nüh müpsehkhang, hütsü rühyang akang dhünyeh khyünung.” Hütsüpü sünü Kain shirünang abi mümüpsehsohnung abi chah amüdhethsa khüdu Tsingrangba-nü tühcho. 16Ko Kain-nü Abüdongba tenü za tsicho ko Eden nyüchürolang “Atsichirü lih” pü dsiba lih la licho.
Kain Chahnü Trahchocho
17Kain ko anitpü nyüh azarü khüdu nümüsucho ko aneng Enok dsijücho. Hütsüpü Kain-nü yangdi khüdu thricho ko atsurü nengla hütsü “Enok” pü dsicho. 18Enok tsurü Erad ko abi Mehujael au, ko Mehujael tsurü Methushael ko abi Lamek au licho. 19Lamek anitpü anyüh licho, Ada ko Zilla. 20Ada-nü Jabal nümüsucho, abi tsü shükuh la li kanglungrü kangrü jümürü kangcho. 21Ani Jubal licho, abi tbenglah ko honglilah khithsarü jümürü kangcho. 22Zilla-nü Tubal Kain nümüsucho, abinü imüyeng ko idhsenü thsunohrü kengcho. Tubal Kain nitpü khingkurü Naama licho.
23Lamek-nü anitpü nyüh te yocho,
“Ada ko Zilla, Iyu nyieng:
I chah dhsakehjüchonü Ihnü dhrezarü khüdu müpsehko.
24 #
Mat 18.22
Kain müpsehcho ngang akang dhünyeh khang-khang,
Khürünü Ih müpsehkhang,
akang nyührepü dhünyeh khangnung.”
Seth ko Enosh
25Adam e anitpü nyüh azarü apa khüdu nümüsucho. Abükyünü yocho, “Kain-nü müpsehba Abel mülihnung Tsingrangba-nü I khyang azarü khüdu jüko.” Hütsünü abi neng Seth dsijücho. 26Seth chahnü atsurü khüdu Enosh licho. Hütsütinü nyitsarünü Abüdongba nengla dsinung dikehcho.
Aktuálne označené:
LIPOH 4: SANGBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.