Ñwaè' Matïìyoè 2
2
1À m ba mbe nfè' ce a m bi Jisòs à rla' Bɛtɛ̀lɛ̀hɛ̂m, à ŋgòŋ Jùdiyà à nfè' ce Hɛròd à m ba ŋkʉʉ, ŋgǎa bfee mo' a lo ekù mbùuntii a du à rla' Jɛ̀rusalɛ̀m, 2a bipshi enɛ̂, “Muu ce a bi ye à ŋkʉʉ Jus nà yû? Wèr à yɛ li rkàŋsì kù mbùuntii, a vʉ à rgʉ'shi nè ye.” 3Ŋkʉʉ Hɛròd à ka' yu' ca, yi fa ye ŋgɛ' sê, a fa ŋgɛ' foŋ nè bèe wɛɛwɛ à rla' Jɛ̀rusalɛ̀m. 4E kɛ' běe bgòrgòr efa mʉ̀ ŋgǎa taŋshi taŋshì ba ŋgǎa ryɛ'ni mncir, a bipshi nè wowèe enɛ yi m ba enɛ a be bi Krǎis anà ba fɛ lɛ? 5Wowèe a beesì enɛ̂, “À rla' Bɛtɛ̀lɛ̀hɛ̂m, à ŋgǒŋ Jùdiyà. Ŋwɛ̀ ncep ntuu Nyʉ̀ à m saŋ enɛ̂,
6‘Wɛ̀ ce Bɛtɛ̀lɛ̀hɛ̂m, ce à yu à ŋgǒŋ Judà,
à yu ŋwɛ̌ mʉcàr à mʉ̀ ŋgǎa rsa' à ŋgòŋ Judà ka' koo-mʉcàr,
njobè' ŋwɛ̀ rsa' be fʉʉ efa mʉ̀ yò bèe,
cìŋ yà bèe Isrɛ̀l àmbò ŋwɛ̀ ncìŋ njèe.’ ”
7Hɛròd à kɛ' ŋgǎa bfee anà mbe dì' ce e m ku ba mimŋgi', a bipshi nè wowèe, a yu' nfè' ce rkàŋsì li m yɛɛti seesê. 8A ka' yu', a tuu wowèe à rla' Bɛtɛ̀lɛ̀hɛ̂m, a laa enɛ̂, “Dù nè du roo muu anà bòŋboŋ, wěe ròo yɛ ye, wèe gee tɛ m rîŋ, tɛ m bo dù cà'ni ye foŋ.” 9Wowèe a ka' yu' yuu ce ŋkʉʉ à làa, a nati a ce dù, a ku yɛ àm bò rkàŋsì ce wowèe a m yɛ kù mbùuntii nà li ce dù kùntombì nè wowèe caar a ba' a tɛɛ mbe dì' ce muu anà à m ba. 10Wowèe a ka' yɛ àmbò li tɛɛ, a lu'shi magòr sê. 11Wowèe a niŋ mbe ndàp, a yɛ muu a yì ma ce Mɛ̀ɛri, a gʉ'shi nè ye. A ka' gʉ'shi nè ye wɛɛ, a mʉ' wâp bbàa, a fʉr bco' mo' ce a too enɛ gûl, ba nrɛ̀ɛ, ker ba njɛ̀ɛ mgʉr mo' ce mi m ce rʉ̀ʉ bòŋboŋ sê, a fa nè ye. 12Nyʉ̀ à bɛɛ wowèe à rlo enɛ a fa kʉti càa yɛ Hɛròd ka'. Wowèe a kʉtì a wǒ to' à njǐ jɛɛ.
13Wowèe a ka' dù, Tata Nyʉ̀ à tuu yì ncìndap nè Josɛ̀f à rlo a laa nè ye enɛ̂, “Nàti mbekì lor muu ca ba yì mâ, caŋ du àgho à to' Ijìp, cu àfo caar tɛ m ke làa nè wɛ̀ enɛ à kʉti, njobè' Hɛròd tɛɛ à rròo muu ca tɛ e bo yʉ.” 14Josɛ̀f à lɛ' efa mmirlò, a lor muu ba ma muu nètʉ', a du à to' Ijìp, 15a cu àfo caar Hɛròd à ke kwe. Ca yi m ba wa'a tɛ yuu ce Tata Nyʉ̀ à m làa njì enjep yì ŋwɛ̀ ncep ntuu enɛ̂, “Mɛ̀ m kɛ' muu wà e fʉʉ e à to' Ijìp” nà yi bo ghɛɛte njo.
16Hɛròd à ka' yɛ enɛ ŋgǎa bfee ekù mbùuntii a bo' ye, ntee yi yaŋ ye sê, e fa rsa' enɛ a yʉshi boo mmbaŋrù wɛɛwɛ ce a kɛ̀' embe bfě' bbaa kʉti njìnjì ce a yu à rla' Bɛtɛ̀lɛ̀hɛ̂m, ker ba à mʉ mla' ce mi yu àgee rla' ca. E m fa rsa' wa'a, njobè' bfè' vi m ba àmbò bbaa, kɛ' embe nfè' ce ŋgǎa bfee ekù mbùuntii a m yɛ rkàŋsì ce a m suŋ ye enɛ a yɛ nà. 17Yi ka' ba wa'a, yuu ce Jɛ̀rìmiyà ŋwɛ̀ ncep ntuu Nyʉ̀ à m làa nà, yi ghɛɛtè njo. E m làa enɛ̂,
18“A m yu' njèndoŋ ŋwɛ̀ à rla' Ramà,
ŋgàŋ à ce war a ce koosimnse magòr sê,
Racɛ̀l à ce war njo' boo vi,
a kani enɛ e be cip ka'
njobè' boo vi a m kweŋger wɛɛwɛ.”
19Hɛròd à ka' kwe, Josɛ̀f à yɛ ncìndap Tata Nyʉ̀ à rlo à to' Ijìp. 20E laa nè ye enɛ̂, “Nàti, lor muu ba yì mâ, tɛ wèe wowèe kʉti à ŋgǒŋ Isrɛ̀l, njobè' bèe ce a m ce ròo à ryʉ muu ca, a kweŋger.” 21E natì a lor muu ba ma a du àgho à ŋgǒŋ Isrɛ̀l. 22E ka' bà' yu' enɛ Àkɛlò à ye kʉʉ yì ta Hɛròd a ce sa' à ŋgǒŋ Jùdiyà, e wɛp à rdù cu àfo. Nyʉ̀ à ka' bɛɛ ye à rlo, e natì a du à ŋgǒŋ Galèlê. 23A ka' bà', a cu à rla' mo' ce a m too enɛ Nasarɛ̀t. Yuu ce ŋwɛ̀ ncep ntuu Nyʉ̀ à m làa enɛ̂, “A be too ye enɛ ŋwɛ̌ à rla' Nasarɛ̀t” nà yi ghɛɛtè njo.
Aktuálne označené:
Ñwaè' Matïìyoè 2: LNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Limbum New Testament © Bible Society of Cameroon, 2003.