KINAWANSAYAN 1
1
Winonsoi o Koinsanai'd Nunu Nopo
1Tontok di timpuun i' om wonsoyo' nod Kinorohingan o tawan om pomogunan.#1.1 tawan om pomogunan: Komoyon nopod “tawan om pomogunan” om koinsanai'd nunu nopo. 2Aiso' po suang do pomogunan, om aiso' o poimpasi;#1.1-2 Tontok di timpuun i' om wonsoyo'…aiso' i poimpasi: Ko': Tontok di timpuun i', di timpuun i' o Kinorohingan do minomonsoi do tawan om pomogunan, om aiso' po suang do pomogunan om aiso' o poimpasi; om noolitan di rahat dot opuhod, om odondom o kotuongo'. Nga' mintongkop i' i Rusod do Kinorohingan#1.2 Rusod do Kinorohingan; ko': tongus dot opuhod. do hiri'd soibau di waig. 3Om#2Ko. 4.6 pomoros no o Kinorohingan do poingkaa, “Nawau no,” ka — om haro noddi o tanawau. 4Om kokito nod Kinorohingan dot osonong i tanawau, om potongkiado' no dau i tanawau do mantad id totuong. 5Om pungaranai nod Kinorohingan do “Dangadau” i tanawau, om “Dongotuong” i totuong. Om korikot no sosodopon om korikot nogiddi kosuabon — iri no tadau do koiso'.
6-7Om#2Pt. 3.5 boros kad Kinorohingan, “Pohoroon ku o kulung do popitongkiad dilo waig om duwo indo o koiyonon,” ka — om kowonsoi no o miagal diri. Om iyo noddi o kinowoyo-woyoon do Kinorohingan do minomonsoi di kulung. Om iri no i kulung o pinopitongkiad di waig do hiti'd siriba' do mantad di waig di hilo'd sawat. 8Om pungaranai nod Kinorohingan i kulung do, “Tawan”. Om korikot no sosodopon om korikot nogiddi kosuabon — iri no tadau do koduwo.
9Om boros kad Kinorohingan, “Potimungon ilo waig do hilo'd sahau do tawan dot id iso' o koiyonon, om okito indo o tana',” ka. Om kowonsoi no o miagal diri. 10Om pungaranai nod Kinorohingan i tana' do “Katanaan”. Om iri no kinotimungon di waig om pinungaranan dau do “Rahat”. Om kokito nod Kinorohingan dot osonong i nowonsoi dau. 11Om boros kad Kinorohingan, “Poposuni iti tana' do mogisuayan o sumuni di kilinsou om i kitua',” ka. Om kosiliu no o miagal diri. 12Om posuni noddi i tana' do mogisuayan i sumuni. Om kokito nod Kinorohingan dot osonong i nowonsoi dau. 13Om korikot no sosodopon om korikot nogiddi kosuabon — iri no tadau do kotolu.
14Om boros kad Kinorohingan, “Mimbulai o mogulinau do hilo'd tawan do potongkiad di tanawau do mantad id totuong, om oilaan i' o koimpuunon do tadau, om toun, om tadau'd agayo do don tugama';#1.14 Tadau'd Agayo do Don Tugama'; ko': Maso do sumimban o kooyu-oyuo' do talun. 15om iri nondo i mogulinau do hilo'd tawan o mamanawau diti pomogunan,” ka — om kosiliu no o miagal diri. 16Om iyo noddi o Kinorohingan do minomonsoi di duwo o mogulinau dit agayo: i tadau o mulinau do dangadau, om i tulan o mulinau do dongotuong; om winonsoi ngai' nogi' dau i rombituon. 17Om poiyono' no dau i piro-piro mogulinau diri do hilo'd tawan do mamanawau diti pomogunan, 18do mogulinau do dangadau, om mogulinau do dongotuong, om popitongkiad do tanawau do mantad id totuong. Om kokito nod Kinorohingan dot osonong i nowonsoi dau. 19Om korikot no sosodopon om korikot nogiddi kosuabon — iri no tadau do kaapat.
20Om boros kad Kinorohingan, “Oponu' ilo waig do koinsanai di kipinuhobo, om oponu' do tombolog o hilo'd sawat diti pomogunan,” ka dau. 21Om wonsoyo' noddi do Kinorohingan i nintorusan dit angagayo do hilo'd rahat, om koinsanai di kipinuhobo do miyon dot id waig, om koinsanai do bansa' do tombolog. Om kokito nod Kinorohingan dot osonong i nowonsoi dau. 22Om barakatai no dau o koinsanai'ddi om sinunudan dau do sumakag i kipinuhobo di poingiyon do hilo'd waig, om momonu' di rahat, om sinunudan ngai' nogi' dau do gumumu' i tombolog. 23Om korikot no sosodopon om korikot nogiddi kosuabon — iri no tadau do kolimo.
24Om boros kad Kinorohingan, “Popoimbulai iti pomogunan do mogisuayan o nintorusan dit alaya' om i lalang, om it angagayo om it ongokoro',” ka — om kosiliu no o miagal diri. 25Om iyo noddi o Kinorohingan do minomonsoi do koinsanai'ddi. Om kokito nod Kinorohingan dot osonong i nowonsoi dau.
26Om#1Ko. 11.7 boros kad Kinorohingan, “Dinondo no, om momonsoi toko' do tulun; om paagalon toko' dati' iyolo' om iyo nondo dati' iyolo'. Om kikuasa' nondo iyolo' dot id sawat do koinsanai'd sada', om tombolog, om koinsanai do nintorusan dit angalaya' om i lalang,#1.26 Iso' o solinan di gulu po: nintorusan dit angalaya' om i lalang; solinan dot Ibrani: koinsanai'd nintorusan dit angalaya' om koinsanai'd pomogunan. om it angagayo om it ongokoro',” ka dau. 27Om#Mat. 19.4, Mar. 10.6 #Kwn. 5.1-2 pomonsoi noddi o Kinorohingan do tulun do pinoiyo dau. Om winonsoi dau iyolo' do kusai om tondu'. 28Om barakatai nod Kinorohingan iyolo' do mikuwo'd minomoros do poingkaa, “Paganak kou nod ogumu' om kopomogun i' o sinakagon dokoyu do pointongkop diti pomogunan om oporinta' indo diyolo' o koinsanai do sada', om tombolog, om koinsanai do bansa'd nintorusan do hilo'd gouton. 29Om nokosodia' ku no o mogisuayan o linsou om mogisuayan o tua-ua' do maan dokoyu'd kanon; 30nga' iri nopo i nintorusan di hilo'd gouton om i tombolog om nosodiaan ku no do sakot om i songinsuni dit ongkiroun do maan do diyolo'd kanon,” ka dau — om kosiliu noddi o miagal diri. 31Om ontong no o Kinorohingan do koinsanai di winonsoi dau, om osonong ngai' nopo. Om korikot no sosodopon om korikot nogiddi kosuabon — iri no tadau do koonom.
Aktuálne označené:
KINAWANSAYAN 1: BDK
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Hakcipta © 2007, Pertubuhan Bible Malaysia Copyright © 2007, Bible Society of Malaysia