創世記 9
9
上帝㧯挪亞立約
1上帝賜福挪亞㧯厥孻仔，對佢等講：「愛𫱔多多子女，遍滿世界。 2所有地上个獸類、空中个飛鳥、地上个爬蟲，㧯海肚个魚類，全部會驚你等；𠊎愛將這兜交在你等手中。 3以前，𠊎將青菜賜給你等做食物；這下𠊎也將這兜動物賜給你等做食物。 4總係，你等做毋得食帶血个肉，因為生命在血底背。 5無論係人抑係野獸，若係流人个血，害人个命，𠊎一定追討血債；就係害自家个兄弟，也照樣論罪。
6流人血个，
別人也愛流佢个血，
因為上帝造人，
係照佢自家个形像造个。
7你等愛𫱔多多子女、大大興旺、遍滿世界。」
8上帝對挪亞㧯佢該兜孻仔講： 9「𠊎這下愛㧯你等並你等个子孫立約； 10也愛㧯地上所有个生物，就係該兜同你等共下出大船个飛鳥、頭牲、並野獸立約。 11𠊎應許你等：凡有血肉个，無再被大水滅掉，毋會再有大水來毀滅大地。」 12上帝又講：「這就係𠊎㧯你等並該兜同你等共下各樣个生物，世世代代立約个記號。 13𠊎愛將𠊎个天弓放在雲个當中，成做𠊎㧯大地立約个記號。 14當𠊎在天空鋪上雲，天弓在雲中出現个時， 15𠊎就會紀念𠊎㧯你等並各樣有血肉个生物所立个約；就無再做大水來毀滅所有个生物。 16當𠊎看到天弓在雲中出現該時，𠊎就會紀念𠊎㧯地上各樣有血肉个生物所立永遠个約。」 17上帝對挪亞講：「這就係𠊎㧯地上所有个生物立約个記號。」
挪亞㧯厥孻仔
18 挪亞个孻仔全部對大船出來，佢等係：閃、含㧯雅弗。 (含係迦南个阿爸。) 19分散在全世間个人類，就係挪亞這三個孻仔个子孫。
20 挪亞係耕種人，也係最先種葡萄園个人。 21佢食葡萄酒，啉到醉醉，脫光衫褲，睡在帳篷肚。 22含 (迦南个阿爸) 看到厥爸打赤膊，就出去㧯佢兩個兄弟講。 23閃㧯雅弗拿一領長衫袈在兩儕个肩頭項，倒退行入帳篷，去遮阿爸个身體。因為佢等面向外，就無看到阿爸脫光个身體。 24挪亞清醒後，知厥滿子對佢所做个事， 25就講：
「迦南應當受咒詛！
佢愛做厥兄弟奴僕个奴僕。」
26又講：
「愛頌讚上主，閃个上帝！
迦南愛做閃个奴僕。
27願上帝俾雅弗興旺，
使佢住在閃个帳篷肚；
又願迦南做佢个奴僕。」
28大水以後，挪亞還在世三百五十年。 29挪亞食到九百五十歲正過身。
Aktuálne označené:
創世記 9: THV12Hdb
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© The Bible Society in Taiwan, 2012
All rights reserved
© 台灣聖經公會版權所有 2012