GENESIS 2
2
1EKEM enam enyɔŋ ye isɔŋ, ye kpukpru udim mmɔ ema. 2Abasi onyuŋ anam utom esie emi enye akanamde, okure ke ɔyɔhɔ usen itiaba; ndien ke ɔyɔhɔ usen itiaba enye odop kpukpru utom esie emi enye akanamde. 3Ndien Abasi ɔdiɔŋ ɔyɔhɔ usen itiaba, onyuŋ anam enye edi edisana; koro ke esit ke enye odop kpukpru utom esie emi Abasi okobotde okonyuŋ anamde.
Eritɔŋɔ Ubon Owo
4Mme mmɔ emi edi emana enyɔŋ ye isɔŋ ke ebotde mmɔ, ke usen emi Jehovah Abasi anamde isɔn ye enyɔŋ. 5Ndien eto obot ndomo kiet ikoduhe kaŋa ke isɔn, baba ikɔŋ isɔŋ ikonyuŋ itibeke kaŋa: koro Jehovah Abasi mikanamke edim edep kaŋa ke ererimbot, owo eke ofuŋde isɔŋ mika inyuŋ iduhe. 6Ekem ntuhube oto ke isɔŋ ɔdɔk, ekebit ofuri iso obot. 7Ndien Jehovah Abasi obot owo ke ntan-isɔŋ, onyuŋ ɔduɔk ibifik uwem esin ke odudu ibuo esie; ndien owo akabare edi ukpɔŋ eke odude uwem.
8Jehovah Abasi onyuŋ ɔtɔ iŋwaŋ ke Eden ke edem usiaha-utin; onyuŋ emen owo emi enye okobotde onim do. 9Jehovah Abasi onyuŋ anam isɔŋ otibe kpukpru eto eke enemde ndise enyuŋ efɔnde ndidia; ye eto uwem ŋko ke ufɔt iŋwaŋ, ye eto ifiɔk eti ye idiɔk.
10Akpa onyuŋ oto ke Eden edibit iŋwaŋ; ndien ɔtɔŋɔ do enye abahare, akabare edi mbuot inaŋ. 11Enyiŋ kiet edi Pison: edi enye akan ofuri idut Havilah okuk, emi gold odude do; 12gold idut oro onyuŋ ɔfɔn: bdellium ye itiat onyx mmɔdo. Enyiŋ udiana akpa akpa onyuŋ edi Gihon: edi enye akan ofuri idut Kush okuk. 13Enyiŋ ɔyɔhɔ akpa ita onyuŋ edi Hiddekel: edi enye asaŋa ke iso Assyria. 14Ndien ɔyɔhɔ akpa inaŋ edi Euphrates.
15Ekem Jehovah Abasi ada owo oro edinim ke iŋwaŋ Eden, ete ɔdiɔŋ enye onyuŋ ekpeme enye. 16Jehovah Abasi onyuŋ owuk owo oro, ete, Dia kpukpru eto iŋwaŋ; 17Edi ama edi eto ifiɔk, eti ye idiɔk, kudia ke esit: koro ke usen eke afo adiade ke esit afo eyekpa mkpa.
18Ekem Jehovah Abasi ete, Ke ifɔnke owo ndidu ikpɔŋ; nyenam andinyaŋa ekem ye enye. 19Ndien Jehovah Abasi obot kpukpru unam obot ke ikoneto, ye kpukpru inuen enyɔŋ: ndien ada mmɔ ɔsɔk Adam, ete ise nte Adam edikotde mmo: ndien kpukpru se Adam okotde unam eke edude uwem, oro edi enyiŋ mmɔ. 20Ntem ke Adam ada enyiŋ osio kpukpru ufene, ye inuen enyɔŋ, ye kpukpru unam obot: edi Adam ikwe andinyaŋa eke ekemde ye enye.
21Ekem Jehovah Abasi anam ɔkpɔsɔŋ idap omum Adam, ndien enye ede: ndien osio ɔkpɔ-ŋkaŋ esie kiet, onyuŋ esiri obuk ke itie esie; 22ndien Jehovah Abasi obot ɔkpɔ-ŋkaŋ emi enye okosiode Adam ke idem, anam ŋwan kiet, onyuŋ ada enye ɔsɔk Adam. 23Ndien Adam ɔdɔhɔ ete, Ke (ŋwan) emi ndien edi ɔkpɔ eke otode ke ɔkpɔ mi, ye obuk eke otode ke obuk mi: emi eyekere Ŋwan, koro edade emi ke idem Eren owo. 24Mmɔdo owo edikpɔŋde ete esie ye eka esie edinyuŋ adiana ye ŋwan esiemɔ; ndien mmɔ eyekabare obuk kiet. 25Mmɔ mbiba, eren oro ye ŋwan esie, enyuŋ edi iferi, edi inyeneke but.
Aktuálne označené:
GENESIS 2: ENA
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Efik Old Bible With Sectional Headings © Bible Society of Nigeria, 2013, 2019.